రామ్ చరణ్.. శంకర్ ల కాంబినేషన్లో సినిమా గత ఏడాది సెప్టెంబర్ లో లాంచనంగా ప్రారంభం అయ్యింది. ఇక ఈ ప్రాజెక్టు (RC-15) అనౌన్స్ అయిన రోజు నుండి అటు ఇండస్ట్రీ వర్గాలతో పాటు ప్రేక్షకులు, ట్రేడ్ వర్గాలలో కూడా భారీ క్రేజ్ ను సృష్టించడంలో విజయవంతం అయింది. టాలీవుడ్, కోలీవుడ్ మరియు బాలీవుడ్ నుండి మహమహులు హాజరైన భారీ పూజా కార్యక్రమం తర్వాత ఈ చిత్రం సెట్స్‌ పైకి వెళ్ళింది. అప్పటి నుంచి రెగ్యులర్ గా షూటింగ్ జరుగుతూనే ఉంది.

ఇప్పటికే పూణె, అమృత్‌సర్‌, తూర్పు గోదావరిలో ఈ చిత్రానికి సంబంధించిన కొన్ని మేజర్‌ షెడ్యూల్స్‌ చిత్రీకరించారు. ఇప్పుడు తదుపరి షెడ్యూల్ కోసం, శంకర్ హైదరాబాద్ లోని శంషాబాద్‌లో 12 కోట్ల రూపాయల వ్యయంతో భారీ సెట్‌ ను వేసి అందులో భారీ యాక్షన్ సన్నివేశాలను చిత్రీకరించాలని నిర్ణయించుకున్నారని సమాచారం.

అంతే కాక ఈ షెడ్యూల్‌లో హీరో రామ్ చరణ్ కూడా భాగం అవుతారట. ఈ సినిమాని కేవలం ప్రేక్షకులకు కాక పరిశ్రమలకు అతీతంగా అందరూ చాలా ఆసక్తితో ఎదురుచూస్తున్న సినిమాలకి ఒకటి, ఇక శంకర్ ఈ చిత్రంలో తన శైలికి అనుగుణంగా భారీ సెట్ డిజైన్‌లు మరియు విలాసవంతమైన షూటింగ్ షెడ్యూల్స్ ఇలా ఎక్కడా ఎటువంటి ఖర్చులకి వెనుకాడటం లేదు.

ఇప్పటికే హీరోయిన్ కియారా అద్వానీ నటించిన ఒక పాటను భారీ సెట్‌లో చిత్రీకరించారు. సోషల్ డ్రామా రూపంలో సమాజంలోని పరిస్థితులను చక్కగా చూసిస్తూ.. ఫైట్లు మరియు పాటలను భారీ స్థాయిలో విజువల్స్ తో తెరకెక్కించటంలో శంకర్ తనదైన ముద్ర వేశారు. ఇక RC-15 సినిమా చిత్రీకరణ జరుగుతున్న తీరు, ఆ సినిమా గురించి వస్తున్న వార్తలు చూస్తుంటే. శంకర్ ఈ సినిమాతో తన బలమైన దారిలోకి తిరిగి వచ్చినట్లే కనిపిస్తోంది. ఈ చిత్రంలో ఎస్‌జే సూర్య విలన్‌గా నటిస్తుండగా, ‘ఆర్‌ఆర్‌ఆర్’ స్టార్ రామ్ చరణ్ సరసన కియారా అద్వానీ నటిస్తున్నారు.

ఈ యాక్షన్ డ్రామాలో శ్రీకాంత్, జయరామ్, అంజలి కూడా కీలక పాత్రలు పోషించనున్నారు. ఎస్ఎస్ తమన్ స్వరాలు సమకూరుస్తుండగా, దిల్ రాజు నిర్మాతగా ఈ ప్రాజెక్ట్‌కి వెన్ను దన్నుగా నిలుస్తున్నారు.

ఇక రామ్ చరణ్ – శంకర్ ల సినిమా కథ విజయానికి వస్తే.. ఈ చిత్రం ఒక పవర్ ఫుల్ మెసేజ్ తో కూడిన పొలిటికల్ డ్రామా అని తెలుస్తోంది. అవినీతిని నిర్మూలించే నేపథ్యంలో ఈ సినిమా ఉండబోతోంది. ఈ సోషల్ డ్రామాలో రామ్ చరణ్ పాత్ర అవినీతి వ్యతిరేకంగా పోరాటం చేసే వ్యక్తిగా కనిపించనున్నారు. అలాగే ఆయన ఒక ఐఎస్ అధికారి పాత్రను పోషిస్తున్నారని కూడా అంటున్నారు. ఇక తాజాగా వినిపిస్తున్న సమాచారం ప్రకారం, శంకర్ సినిమాలలో సాధారణంగా కనిపించే భారీ విఎఫ్ఎక్స్ దృశ్యాలు, ఖరీదైన సెట్లు RC15లో కనిపించవట.

మల్టీప్లెక్స్‌లో సినిమా చూసి ఆనందించాలి అని చాలా మంది ప్రేక్షకులకు కోరికగా ఉంటుంది. కానీ, ప్రస్తుతం ఉన్న సినిమా టికెట్ రేట్లకు భయపడి మల్టీప్లెక్స్ అంటేనే ప్రేక్షకులు రావడానికి ధైర్యం చేయడం లేదు. ముఖ్యంగా కరోనా తరువాత టికెట్ రేట్లను అమాంతం పెంచేయడంతో ప్రేక్షకులు మరింత దూరమయ్యారు. అయితే అలాంటి వారందరికీ మల్టీప్లెక్స్ అసోసియేషన్ ఆఫ్ ఇండియా(MIA) ఇటీవలే ఒక శుభవార్త అందించింది. నేషనల్ సినిమా డే(National Cinema Day) అయిన సెప్టెంబర్ 16న దేశవ్యాప్తంగా ఉన్న మల్టీప్లెక్స్‌లలో ప్రేక్షకులు సినిమా చూసేందుకు వీలును కలిపిస్తున్నట్లు ప్రకటించడం జరిగింది.

ఈ మేరకు సెప్టెంబర్ 16న మల్టీప్లెక్స్‌లలో సినిమా టికెట్ రేటును రూ.75కే అందించాలని MIA నిర్ణయించింది. ఈ క్రమంలోనే దేశంలోని అన్ని నగరాలలో ఉన్న పీవీఆర్, ఐనాక్స్, ఏషియన్ వంటి మల్టీప్లెక్స్ థియేటర్లలో ఈ డిస్కౌంట్ రేటును అమలు చేసేందుకు ప్రయత్నం చేస్తున్నారని కూడా తెలిపారు. మల్టీప్లెక్స్ అసోసియేషన్ ఆఫ్ ఇండియా (MAI) థియేటర్ వ్యాపారాన్ని నిలబెట్టిన సినీ ప్రేక్షకులకు కృతజ్ఞతగా ఈ ఆఫర్ ప్రకటించటంతో అందరూ ఎంతో ఆనందించారు.

ఏదేమైనా మల్టీప్లెక్స్‌లకు ఎక్కవ ప్రాధాన్యతనిచ్చే నేటి యువతరానికి ఇది ఖచ్చితంగా మంచి వార్తేనని అందరూ భావించారు అని చెప్పాలి. అయితే తక్కువ ధరకే సినిమాని చూడగలం అనే ప్రేక్షకుల ఆనందాన్ని దూరం చేస్తూ మల్టీప్లెక్స్ థియేటర్ల యాజమాన్యం వారు తమ నిర్ణయాన్ని మార్చుకున్నట్లు తాజాగా అందించిన సమాచారం.

తక్కువ టికెట్ రేట్ల వల్ల వ్యాపారానికి ఏమాత్రం అనుకూలించని పరిస్థితులు వస్తాయని డిస్ట్రిబ్యూటర్లు ఆవేదన వ్యక్తం చేస్తున్నారట. అందుకే మళ్ళీ టికెట్లు విషయంలో సరికొత్త ట్విస్ట్ ఇచ్చినట్లుగా తెలుస్తోంది.

తగ్గించిన ధరల వల్ల ఒకరోజు వచ్చే ఆదాయం పైన ప్రభావం చూపినా కూడా చాలా వరకు నష్టాలు చూడాల్సి వస్తుంది అని.. అందుకే ఈ ఈనెల సెప్టెంబర్ 16వ తేదీన ఎక్కువ సినిమాలు రిలీజ్ అవుతున్న రోజున కాకుండా 23వ తేదీన జాతీయ సినిమా దినోత్సవ కానుకగా మల్టీప్లెక్స్ లలో 75 రూపాయల టికెట్ల ధరకు అమ్మనున్నారు. ఈ మేరకు మల్టీప్లెక్స్ అసోసియేషన్ ఆఫ్ ఇండియా (MIA) అధికారిక ప్రకటన చేసింది.

అసోసియేషన్ చేసిన ప్రకటనలో, భారతదేశం అంతటా మల్టీప్లెక్స్ అసోసియేషన్ ఆఫ్ ఇండియా (MAI) మరియు సినిమాస్, జాతీయ సినిమా దినోత్సవాన్ని పురస్కరించుకుని ₹75 సెలబ్రేటరీ అడ్మిషన్ ధరతో సినిమాల్లో ఒక రోజు గడపాలని సినీ ప్రేక్షకులను స్వాగతిస్తున్నాయి. జాతీయ సినిమా దినోత్సవాన్ని గతంలోనే ప్రకటించారు. అయితే, వివిధ ‘స్టేక్ హోల్డర్‌ల’ అభ్యర్థన మేరకు మరియు ప్రేక్షకుల భాగస్వామ్యాన్ని మరింత పెంచడానికి, జాతీయ సినిమా దినోత్సవం సెప్టెంబర్ 23న నిర్వహించబడుతుందని తెలిపింది.

PVR, INOX, Cinepolis, Carnival, MIRA, Citypride, ASIAN, Mukta A2, Movie Time, Wave, M2K మరియు Delite సహా 4000 కంటే ఎక్కువ స్క్రీన్‌లు ఈ వేడుకలో పాల్గొంటున్నాయని ప్రకటన పేర్కొంది.

విక్రమ్ సినిమా సాధించిన అద్భుతమైన విజయం వల్ల ఆ చిత్ర దర్శకుడు లోకేష్ కనగరాజ్‌ ఒక్కసారిగా అగ్ర దర్శకుల జాబితాలో చేరిపోయారు. ఈ యువ దర్శకుడు ప్రస్తుతం అత్యంత డిమాండ్ ఉన్న దక్షిణ భారత దర్శకులలో ఒకడు అనడంలో ఎలాంటి అనుమానం లేదు. అలాగే ఆయన నుంచి తదుపరి రానున్న సినిమాలు కూడా ఎంతో ఆసక్తికరమైన విదంగా ఉన్నాయి.

ఇక దక్షిణాది రాష్ట్రాల్లో అద్భుతమైన మార్కెట్‌ను సంపాదించుకున్నారు గనక ఇప్పుడు హిందీ మార్కెట్‌లో కూడా తన మార్కెట్ ను సృష్టించుకొవాలి అని చూస్తున్నారు లోకేష్. అందుకే తాను తదుపరి విజయ్‌తో చేయబోయే సినిమా కోసం సంజయ్ దత్‌ని విలన్‌గా తీసుకున్నారని సమాచారం. ఈ చిత్రం 2023లో విడుదల కానుంది. అంతే కాక ప్రస్తుతం తమిళ సినిమా పరిశ్రమలో అత్యంత చర్చనీయాంశమైన సినిమాలలో ఒకటిగా నిలిచింది.

సంజయ్ దత్ తాజాగా ప్యాన్ ఇండియా బ్లాక్ బస్టర్ అయిన కేజీఫ్-2 లో అధిరా పాత్రలో నటించి ప్రేక్షకులను అలరించిన విషయం తెలిసిందే. ఇక ఓకే సినిమాలో ఇద్దరు స్టార్లను హ్యాండిల్ చేయడం దర్శకుడు లోకేష్ కనగరాజ్‌కి వెన్నతో పెట్టిన విద్య అని చెప్పవచ్చు. మాస్టర్ సినిమాలో తమిళ సూపర్ స్టార్ విజయ్ మరియు విజయ్ సేతుపతి కాంబినేషన్ ను సమర్థవంతంగా నిర్వర్తించిన లోకేష్, విక్రమ్ లో కమల్ హాసన్, విజయ్ సేతుపతి, ఫహాద్ ఫాజిల్ వంటి మేటి తారలను కూడా చక్కని ఆసక్తికరమైన పాత్రలలో చూపించారు.కాగా దళపతి67 అనే వర్కింగ్ టైటిల్ తో ప్రస్తుతం పిలవబడుతున్న ఈ చిత్రంలో సమంత, ప్రియాంక అరుల్ మోహన్ కూడా కీలక పాత్రల్లో కనిపించనున్నారు.

దళపతి67 ప్రస్తుతం చిత్రీకరణ దశలో ఉంది. కాగా విశ్వసనీయ వర్గాల నివేదికల ప్రకారం, ఈ సినిమాలో విలన్‌గా నటించేందుకు గానూ సంజయ్ దత్‌కు 10 కోట్ల రూపాయల భారీ ఆఫర్ ఇచ్చినట్లుగా తెలుస్తోంది. భారీ అంచనాలతో రూపొందుతున్న ఈ సినిమా హీరో విజయ్ కు, దర్శకుడు లోకేష్ కనగరాజ్ కు మంచి విజయం సాధించాలని కోరుకుందాం.

రణ్‌బీర్ కపూర్ మరియు అలియా భట్ ప్రధాన పాత్రల్లో, అయాన్ ముఖర్జీ దర్శకత్వంలో బాలీవుడ్ బడా నిర్మాత కరణ్ జోహార్ నిర్మించిన “బ్రహ్మాస్త్ర” బాక్స్ ఆఫీస్ వద్ద బ్లాక్ బస్టర్‌గా నిలిచే వైపు పరుగులు తీస్తుంది. ఈ చిత్రం ఓపెనింగ్ వీకెండ్ లో అద్భుతమైన వసూళ్లను సాధించి ప్రపంచవ్యాప్తంగా 225 కోట్ల గ్రాస్ కలెక్షన్లను వసూలు చేసింది.

బాలీవుడ్ ట్రేడ్ పండితుల నివేదికల ప్రకారం బ్రహ్మాస్త్ర హిందీ వెర్షన్ తొలి దాదాపు రూ.120 కోట్లు రాబట్టింది. కాగా ఇదివరకు మొదటి వారాంతం అంటే డైరెక్ట్ హిందీ సినిమాల ఓపెనింగ్ వీకెండ్ రికార్డ్ రణబీర్ కపూర్ హీరోగా నటించిన సంజూ సినిమా సాధించింది. దేశ వ్యాప్తంగా సంజు సినిమా120 కోట్ల నెట్‌తో రికార్డు సృష్టించగా.. ఇప్పుడు బ్రహ్మాస్త్ర 125 కోట్ల నెట్‌ని వసూలు చేసింది. ఈ క్రమంలో రణ్‌బీర్ తన రికార్డును తానే బద్దలు కొట్టారన్నమాట. అంతే కాకుండా హిందీ చిత్రాలకు ఒక కొత్త బెంచ్‌మార్క్‌ను సెట్ చేసింది బ్రహ్మస్త్ర.

ఇక తన చిత్రానికి లభించిన భారీ ఓపెనింగ్స్ చూసి దర్శకుడు అయాన్ ముఖర్జీ ఉక్కిరిబిక్కిరి అయ్యారు. కేవలం దేశ వ్యాప్తంగానే కాకుండా అంతర్జాతీయ స్థాయిలో కూడా సినిమాని ఆదరించిన ప్రేక్షకులందరికీ చాలా రుణపడి ఉన్నట్లు ఆయన తెలిపారు. బ్రహ్మాస్త్ర సినిమాకి లభించిన ప్రేమ, ఆదరణ నిజంగా తమ చిత్ర బృందానికి ఉత్తేజకరమైన భావనతో పాటు భావోద్వేగానికి లోనయ్యేలా చేసిందని.. ఓపెనింగ్ వీకెండ్ కు భారీ స్థాయిలో స్పందన ఇచ్చి తమను ఆశీర్వాదించిన ప్రేక్షకులకు కృతజ్ఞుడిని చేసిందని, ఇక రాబోయే వారాల్లో కూడా ప్రేక్షకులు తమ సినిమాను ఆదరిస్తారని ఆశిస్తున్నట్లు తెలిపారు.

బ్రహ్మాస్త్ర సినిమా విజయం బాలీవుడ్‌ పరిశ్రమకు ఎంతో అవసరమైనదిగా చెప్పవచ్చు. అమీర్ ఖాన్ వంటి సూపర్ స్టార్ నటించిన లాల్ సింగ్ చద్దా, ఖిలాడి అక్షయ్ కుమార్ చేసిన రక్షా బంధన్, బచ్చన్ పాండే, సామ్రాట్ పృథ్వీరాజ్ మరియు రణబీర్ కపూర్ హీరోగా చేసి ఇటీవలే విడుదలైన షంషేరాతో సహా హిందీ చలనచిత్ర పరిశ్రమ ఈ సంవత్సరం అనేక భారీ-బడ్జెట్ ఫ్లాప్‌లను చూసింది. పైగా లాల్ సింగ్ చద్దాతో సహా అనేక పెద్ద సినిమాలకి చాలా ఇబ్బంది కలిగించిన బాయ్కాట్ నినాదాల ప్రభావం గురించి కూడా చాలా చర్చ జరిగింది.

ఏది ఏమైనప్పటికీ, బ్రహ్మాస్త్ర అటువంటి బాయ్కాట్ ట్రెండ్ తో పాటు తొలిరోజు నెగటివ్ సమీక్షలను కూడా ఎదురుకుని బాక్సాఫీస్ వద్ద భారీ స్థాయిలో కలెక్షన్లను రాబడుతోంది. ఇక రాబోయే రోజుల్లో కూడా ఇదే తరహాలో లాంగ్ రన్ ను కొనసాగిస్తుందని బాలీవుడ్ ట్రేడ్ వర్గాలు ఆశిస్తున్నాయి. కాగా విడుదలకు ముందే బ్రహ్మస్త్ర సినిమాకు దాదాపు లక్ష టిక్కెట్లు అమ్ముడవ్వడం విశేషం.