నేషనల్ క్రష్ రష్మిక మందన్న ఆ టాగ్ కు తగ్గట్లే నార్త్, సౌత్ అనే తేడా లేకుండా అభిమానులను సంపాదించుకున్నారు. అందుకే, ఆమెకు అన్ని భాషల పరిశ్రమల నుంచి వరుస అవకాశాలు వస్తున్నాయి. తాజాగా వినిపిస్తున్న వార్తల ప్రకారం..కోలీవుడ్ నుంచి ఆమెకు పాన్ ఇండియా సినిమా ఆఫర్ వచ్చిందట.

తమిళ స్టార్ హీరో చియాన్ విక్రమ్ కథానాయకుడిగా, రజనీకాంత్ తో ‘కాలా’, ‘కబాలి’ సినిమాలు తీసిన పా.రంజిత్ కాంబినేషన్లో ఇటీవలే ఒక చిత్రం ఖరారయింది. ఈ చిత్రాన్ని స్టూడియో గ్రీన్ పతాకంపై కె.ఈ. జ్ఞానవేల్ రాజా నిర్మిస్తున్నారు. పైగా ఇది విక్రమ్ కు కెరీర్ లో అరవై ఒకటో చిత్రం (61st movie) కావడం విశేషం. ఆయనకు జోడీగా రష్మికను తీసుకోవాలని దర్శక నిర్మాతలు ఆలోచిస్తున్నారట. త్వరలో ఆమెను కలిసి కథ చెప్పనున్నారు అని సమాచారం. ఇక ఈ చిత్రానికి రష్మిక ఒప్పుకునే అవకాశాలే ఎక్కువగా ఉన్నాయని తెలుస్తోంది.

ఈ సినిమాను 1800 కాలం నాటి నేపధ్యంలో, త్రీడీ (3D) టెక్నాలజీతో తీయాలని ప్లాన్ చేసినట్టు తెలుస్తోంది. తమిళంతో పాటు తెలుగు, మలయాళం, హిందీ భాషల్లో సినిమాను విడుదల చేయడానికి సన్నాహాలు చేస్తున్నారట. అందుకే, అన్ని భాషల్లో క్రేజ్ ఉన్న రష్మికను కథానాయికగా తీసుకోవాలని అనుకుంటున్నారని సమాచారం.

ప్రస్తుతం తమిళ సూపర్ స్టార్ విజయ్ కథానాయకుడిగా, వంశీ పైడిపల్లి తెరకెక్కిస్తున్న తెలుగు, తమిళ సినిమా ‘వారసుడు’లో రష్మిక నటిస్తున్నారు. ఆ తర్వాత అల్లు అర్జున్ ‘పుష్ప 2’ లో పాల్గొనాలి. ఇక దుల్కర్ సల్మాన్ – మృణాల్ టాకుర్ జంటగా, దర్శకుడు హను రాఘవపూడి తెరకెక్కిస్తున్న ‘సీతా రామం’ లోనూ రష్మిక నటిస్తున్నారు. ఆ చిత్రం ఆగస్ట్ 5న విడుదలకు సిద్ధంగా ఉంది. ఇవే కాకుండా హిందీలో రెండు సినిమాలు, తెలుగులో మరో సినిమా ఉంది. ఇక విక్రమ్ – పా రంజిత్ సినిమా కూడా ఒప్పుకుంటే మరో ఆసక్తికరమైన సినిమా ఆమె ఖాతాలో చేరినట్లే.

ప్రకాష్ రాజ్ ఎంత మంచి నటుడో ప్రత్యేకంగా చెప్పుకోవలసిన అవసరం లేదు. ఎందుకంటే తెలుగు, తమిళ, కన్నడ, మలయాళ మరియు హిందీ భాషల్లో ఆయన చేసినన్ని వైవిధ్యమైన, విలక్షణ పాత్రలు అన్నీ ఇన్ని కావు. ఆయన నటించిన ప్రతి భాషలోనూ అక్కడి ప్రేక్షకులను తనదైన నటనను ప్రదర్శించి ఆకట్టుకున్నారు ప్రకాష్ రాజ్. వివిధ భాషల్లో నటిస్తూ వస్తున్న ప్రకాశ్ రాజ్ కి ఆయా భాషలపై మంచి పట్టు కూడా ఉంది. పలు భాషల్లోని సాహిత్యాన్ని ఆయన ఎక్కువగా చదువుతూ ఉంటారు కాబట్టి ఆ సాహిత్యం యొక్క ప్రభావం ఆయనపై కనిపిస్తూ ఉంటుంది.

అందువల్లనే సామాజిక అంశాలపై, సమస్యలపై వెంటనే ఆయన స్పందిస్తూ ఉంటారు. అలాగే నటనతో పాటు ఆయన కొన్ని చిత్రాలను స్వయంగా తానే దర్శకత్వం వహించి నిర్మించారు కూడా. అందులో కొన్ని ఇతర భాషల చిత్రాలకు రీమేక్ లు కాగా, ధోనీ వంటి స్ట్రెయిట్ సినిమా కూడా తీశారు. అయితే అవేవీ బాక్స్ ఆఫీసు వద్ద పెద్దగా ప్రభావం చూపకపోగా.. కంటెంట్ పరంగా కూడా అనుకున్నంత స్థాయిలో ఆదరణ పొందలేకపోయాయి.

ఆ సినిమాల వల్ల దర్శకుడిగా.. నిర్మాతగా ప్రకాష్ రాజ్ కు పెద్దగా పేరు రాకపోయినా.. ఆయన అలాంటి ప్రయత్నాలు చేస్తూనే ఉంటారు. ఎందుకంటే.. ఆయన తన అభిరుచిని ప్రదర్శించడానికి, కోన్ని కథల పై ఉన్న ఇష్టంతో తెరకెక్కించానని ప్రకాష్ రాజ్ చెబుతూ ఉంటారు.

నటుడిగా బిజీగా ఉండే ఆయన ఏమాత్రం సమయం దొరికినా దర్శకుడిగా మారుతూ ఉంటారు. అలా ఇప్పుడు ఆయన మళ్లీ మెగా ఫోన్ పట్టుకోవడానికి సిద్ధమవుతున్నారు.ఈ మేరకు ప్రకాష్ రాజ్ ఇప్పుడు సామాజిక మరియు రాజకీయ అంశాలతో ఒక సినిమాను రూపొందించనున్నారు. ‘మనలో ఒకడు’ అనే టైటిల్ తో ఈ సినిమా నిర్మితమవుతుందని ప్రకాష్ రాజ్ చెప్పారు. మరి ఈసారైనా ఆయన ప్రయత్నంలో విజయం సాధిస్తారో లేదో చూడాలి.

నిఖిల్ సిద్ధార్థ్ హీరోగా న‌టించి..విడుదలకు సిద్ధంగా ఉన్న తాజా చిత్రం “కార్తికేయ 2”. చందూ మొండేటి దర్శకత్వంలో వ‌స్తున్న ఈ చిత్రంలో అనుప‌మ ప‌ర‌మేశ్వ‌ర‌న్ హీరోయిన్ గా నటిస్తున్నారు. బాలీవుడ్ నటుడు అనుపమ్ ఖేర్ ఇందులో ఒక ప్రత్యేక పాత్రలో కనిపించనున్నారు. ఈ చిత్రాన్ని పాన్ ఇండియా స్థాయిలో విడుదల చేయడానికి చిత్ర యూనిట్ అన్ని సన్నాహాలు చేస్తున్నారు.

కార్తికేయ 2 టీం జూలై 19న ప్ర‌పంచ‌ ప్ర‌ఖ్యాత ISKCON ఆర్గ‌నైజేష‌న్‌ను సంద‌ర్శించ‌నుంది. యూపీలోని ఆర్గ‌నైజేష‌న్‌ను సంద‌ర్శించి.. అక్కడి భక్తులతో శ్రీ కృష్ణుని మహిమలు, జీవిత విశేషాలను ఏ రకంగా సినిమాలో స్పూర్తిగా తీసుకున్నారు అనే అంశాలపై చర్చలో పాల్గొనడానికి కోల్‌క‌తా ISKCON వైస్ ప్రెసిడెంట్ రాధారామ్ దాస్ కార్తికేయ 2 టీంను ఆహ్వానించటం విశేషం. ఈ విష‌యాన్ని నిఖిల్ ట్విట‌ర్ ద్వారా షేర్ చేశారు. హిందీ, తమిళ్, మలయాళ మరియు కన్నడ వెర్షన్ల టీజర్లను అక్కడ విడుదల చేయ‌నున్న‌ట్టు చెప్పారు నిఖిల్‌.

కార్తికేయ 2 లో ప్రముఖ బాలీవుడ్ నటుడు అనుపమ్‌ ఖేర్ తో పాటు ఆదిత్యా మీన‌న్‌, హ‌ర్ష చెముడు ముఖ్య పాత్రలు పోషిస్తున్నారు. కాలభైరవ సంగీతం అందిస్తున్నారు. కార్తీక్‌ ఘట్టమనేని కెమెరామెన్‌. కార్తికేయ 2 ను పీపుల్‌ మీడియా ఫ్యాక్టరీ, అభిషేక్‌ అగర్వాల్‌ ఆర్ట్స్ బ్యాన‌ర్ల‌పై నిర్మిస్తున్నారు. ఈ చిత్రానికి చందు మొండేటి కథ – స్క్రీన్ ప్లే అందించడంతో పాటు దర్శకత్వం వహిస్తున్నారు.

ప్రస్తుతం ప్రేక్షకులకి సినిమా అంటే అయితే భారీ బడ్జెట్ చిత్రం అయినా అయి ఉండాలి లేదా ఏదో ఒక ఆసక్తికరమైన విషయం ఉంటేనే సినిమాను చూడడానికి ఇష్టపడుతున్నారు. ఆ రకంగా చూసుకుంటే కార్తీకేయ 2 సినిమాకి సీక్వెల్ అనే అంశంతో పాటు ద్వారకా నేపథ్యంలో శ్రీ కృష్ణుని జీవితం గురించిన రహస్యాన్ని కథగా ఎంచుకోవడం వల్ల చక్కని హైప్ మరియు భారీ అంచనాలు నెలకొన్నాయి.

మెగా పవర్ స్టార్ రామ్ చరణ్ – యంగ్ టైగర్ ఎన్టీఆర్ హీరోలుగా.. తెలుగు సినీ దిగ్గజ దర్శకుడు ఎస్ ఎస్ రాజమౌళి దర్శకత్వంలో తెరకెక్కిన ఆర్ ఆర్ ఆర్ అత్యంత భారీ విజయాన్ని సొంతం చేసుకున్న సంగతి తెలిసిందే. కేవలం మన దేశంలోనే కాక అంత‌ర్జాతీయం గానూ ఎంతో ఖ్యాతిని సంపాదించింది ఆర్ ఆర్ ఆర్ చిత్రం.

పాన్ ఇండియా సినిమాగా ప్ర‌పంచ వ్యాప్తంగా తెలుగు సినిమా పేరును చాటుతోంది ఈ సినిమా. ఎన్టీఆర్‌, రామ్ చ‌ర‌ణ్ క‌థానాయ‌కులుగా డీవీవీ దాన‌య్య నిర్మించిన ఈ చిత్రం ఈ ఏడాది మార్చిలో విడుద‌లై దాదాపు పన్నెండు కోట్ల‌కు పైగా వ‌సూళ్ల‌ను రాబ‌ట్టి రికార్డులు క్రియేట్ చేసింది.

థియేట‌ర్ల‌లోనే కాకుండా ఓటీటీలో విడుదలైన తరువాత కూడా ఆర్ ఆర్ ఆర్ తన జోరును కొనసాగించింది. తెలుగుతో పాటు ఇతర దక్షిణ భాషల హక్కులను జీ5 (Zee 5) సొంతం చేసుకోగా.. హిందీ మరియు అంతర్జాతీయ వెర్షన్ ను ప్రముఖ ఓటీటీ సంస్థ నెట్ఫ్లిక్స్ (Netflix) దక్కించుకుంది. ఇక నెట్ఫ్లిక్స్ లో ఆర్ ఆర్ ఆర్ సరికొత్త రికార్డులని సాధించింది. నెట్‌ఫ్లిక్స్‌లో నాన్ ఇంగ్లీష్ సినిమాల కేటగిరీలో వరుస‌గా మూడు వారాల పాటు ఎక్కువ వీక్షకులు చూసిన సినిమాగా రికార్డు సృష్టించింది.

అలాగే ఇటీవలే హాలీవుడ్ క్రిటిక్స్ అసోసియేషన్ ప్రతి ఏడాది ఎంపిక చేసే ఉత్తమ సినిమాల జాబితాలో నిలిచి చరిత్ర సృష్టించింది ఆర్ ఆర్ ఆర్. నెట్ ఫ్లిక్స్‌లో విడుదలైన రోజు నుంచి ఈ సినిమాపై హాలీవుడ్‌ ప్రేక్షకులతో పాటు టెక్నీషియన్స్‌ కూడా పొగడ్తలు కురిపిస్తున్నారు. తాజాగా హాలీవుడ్ స్టార్ డైరెక్టర్ స్కాట్ డెర్రిక్‌స‌న్ ఈ వరుసలో చేరాడు.

మార్వెల్‌ కామిక్స్‌లో ‘డాక్టర్‌‌ స్ట్రేంజ్’ దర్శకుడు అయిన స్కాట్ సోషల్‌ మీడియాలో ‘ఆర్ఆర్ఆర్’ ను పొగుడుతూ పోస్ట్ పెట్టారు. ‘నా బర్త్ డే సందర్భంగా భార్యపిల్లలతో కలిసి ‘ఆర్ఆర్ఆర్’ సినిమాను చూశాను. చాలా నచ్చింది. ఇదో అద్భుతమైన రోలర్‌‌ కోస్టర్’ అంటూ ట్వీట్ చేశారు.

మరోవైపు చాలామంది విదేశీ ప్రేక్షకులు ఆర్ ఆర్ ఆర్ సినిమాపై ఇప్పటికీ పొగడ్తల వర్షం కురిపిస్తున్నారు. ఆర్ ఆర్ ఆర్ చిత్రంలో ఇంటర్వల్ ఎపిసోడ్ లో ఎన్టీఆర్ పులులతో బ్రిటీష్ ప్యాలెస్ లోకి చొరబడి దాడి చేసే సన్నివేశం ఎంత అద్భుతంగా ఉంటుందో తెలిసినదే. తాజాగా ట్విట్టర్ లో ఆ విడియోను ఒక హాలీవుడ్ నెటిజన్ షేర్ చేస్తూ “నేను ఇంతవరకూ 29 మార్వెల్ సినిమాలు చూసాను.. కానీ ఆర్ అర్ ఆర్ లో ఎన్టీఆర్ ట్రక్ లో పులులతో దాడి చెసే అంత అద్భుతమైన షాట్ జీవితంలో చూడలేదు” అని పోస్ట్ చేశారు. ఆ వీడియో ఏకంగా 1 Million వ్యూలు సంపాదించుకోవడం విశేషం.