హీరోయిన్ సమంత రుత్ ప్రభు, శనివారం తన సోషల్ మీడియా అకౌంట్లైన ట్విట్టర్ మరియు ఇన్‭స్టాగ్రామ్ పోస్ట్‌లలో తన అనారోగ్యం గురించి తెలిపి అభిమానులందరినీ షాక్ కు గురి చేశారు. కాగా కండరాలు బలహీనపడటానికి దారితీసే మైయోసిటిస్ అనే ఆటో ఇమ్యూన్ కండిషన్‌తో బాధపడుతున్నట్లు వెల్లడించారు.

తన ఆరోగ్యంపై అప్‌డేట్‌ను పంచుకుంటూ సమంత, “నేను అతి త్వరలో పూర్తిగా కోలుకుంటానని వైద్యులు నమ్మకంగా ఉన్నారు” అని రాశారు.

నేరుగా ఆసుపత్రి నుండి ఒక చిత్రాన్ని పోస్ట్ చేస్తూ, సమంత ఈ మాటలతో నోట్‌ను ప్రారంభించారు.. “యశోద ట్రైలర్‌కి మీ స్పందన చాలా బాగుంది. మీ అందరితో నేను పంచుకున్న ఈ ప్రేమ మరియు అనుబంధం, జీవితం నా పై విసురుతున్న అంతులేని సవాళ్లను ఎదుర్కోవటానికి నాకు శక్తిని ఇస్తుంది.. కొన్ని నెలల క్రితం నాకు మైయోసిటిస్ అనే ఆటో ఇమ్యూన్ కండిషన్ ఉన్నట్లు నిర్ధారణ అయింది. ఇది ఉపశమనం పొందిన తర్వాత దీన్ని షేర్ చేయాలని నేను ఆశించాను. కానీ నేను అనుకున్నదానికంటే కొంచెం ఎక్కువ సమయం తీసుకుంటోందని నేను నెమ్మదిగా గ్రహిస్తున్నాను. మనం ఎల్లప్పుడూ బలమైన ముందంజ వేయాల్సిన అవసరం లేదు. ఈ దుర్బలత్వాన్ని అంగీకరించడం అనేది నేను ఇప్పటికీ పోరాడుతున్న విషయం.”

ఇక తాను కోలుకుంటున్నట్లు రాస్తూ, “నేను అతి త్వరలో పూర్తిగా కోలుకుంటానని వైద్యులు నమ్మకంగా ఉన్నారు. జీవితంలో నాకు మంచి రోజులు మరియు చెడు రోజులు ఎదురు పడ్డాయి… శారీరకంగా మరియు మానసికంగా…. మరియు ఎప్పుడు కూడా నేను ఇంక ఒక్క రోజు కూడా తట్టుకోలేను అనిపించినప్పుడు, ఏదో ఒక విధంగా ఆ క్షణం గడిచిపోతుంది. నేను కోలుకోవడానికి మరో రోజు దగ్గరగా ఉన్నానని మాత్రమే దీని అర్థం అని అనుకుంటున్నాను. నేను మిమ్మల్ని ప్రేమిస్తున్నాను.” అని చెప్తూ ఈ అనారోగ్యం సమస్య తొందరలోనే బాగవుతుందని సమంత ఆశించారు.

సమంత నటించిన తాజా చిత్రం యశోద ట్రైలర్ ఇటీవలే విడుదలైంది. ట్రయిలర్‌లో సమంతను సరోగసికి ఒప్పుకునే మహిళగా చూపించారు. తీవ్రమైన వైద్య నేరాలకి సంబంధించిన రహస్యాలను ఒక మహిళ ధైర్యంగా ఎలా ఎదురుకుంది అనే కథాంశంతో సినిమా తెరకెక్కింది.

తమిళం మరియు తెలుగు భాషలలో చిత్రీకరించబడిన యశోదను హిందీ, కన్నడ మరియు మలయాళం భాషలలో కూడా డబ్ చేసి విడుదల చేయనున్నారు. హరి మరియు హరీష్ దర్శకత్వం వహించిన యశోద నవంబర్ 11 న విడుదల కానుంది. కాగా సమంత విజయ్ దేవరకొండతో కలిసి తదుపరి రొమాంటిక్ డ్రామా చిత్రం ఖుషిలో కూడా కనిపిస్తున్నారు. వచ్చే సమ్మర్‌లో ఈ సినిమా థియేటర్లలోకి విడుదల చేయడానికి సన్నాహాలు చేస్తున్నారు.

మైత్రీ మూవీ మేకర్స్ సంస్థ ప్రస్తుతం తెలుగు సినిమాల్లో అత్యంత ప్రసిద్ధి చెందిన ఇద్దరు మాస్ హీరోలైన మెగాస్టార్ చిరంజీవి మరియు నందమూరి బాలకృష్ణతో సినిమాలను రూపొందిస్తున్నారు. కెఎస్ రవీంద్ర దర్శకత్వంలో చిరు వాల్తేరు వీరయ్య చిత్రంలో నటిస్తుండగా, బాలయ్య గోపీచంద్ మలినేని దర్శకత్వంలో వీరసింహారెడ్డిలో నటించనున్నారు.

నిజానికి ఈ రెండు చిత్రాలను మొదలు పెట్టినప్పుడు బహుశా మైత్రీ వారు తాము ఈ సినిమాలని ఒకేసారి విడుదల చేస్తామని ఊహించి ఉండరు. వీరసింహారెడ్డి సినిమా షూటింగ్ షెడ్యూల్ ఇటలీలో జరిగే వరకు ఎవరూ ఈ సినిమా సంక్రాంతికి విడుదల అవుతుందని ఊహించలేదు. డిసెంబర్ నెల ఆఖరున వస్తుంది అనే అనుకున్నారు.

అయితే కారణాలేమైనా వీరసింహారెడ్డి సినిమాని సంక్రాంతికి విడుదల చేయాల్సిందే అని బాలకృష్ణ నిర్ణయించుకోవడంతో నిర్మాతలు చేసేదేమీ లేక రెండు సినిమాలను కూడా ఒకేసారి విడుదల చేయటానికి సిద్ధం అయ్యారు.

కానీ సినిమాని కొనే బయ్యర్లు, డిస్ట్రిబ్యూటర్ల పరిస్థితి కూడా ఆలోచించాలి కదా. మైత్రీ మూవీస్ రెండు చిత్రాలను సంక్రాంతికి విడుదల చేయడానికి సన్నాహాలు చేయడమే కాక బయ్యర్లకు అధిక ధరలకు సినిమాని అమ్మే ప్రయత్నం ద్వారా వ్యాపారాన్ని ప్రారంభించారు. అయితే రెండు చిత్రాల పై కూడా బయ్యర్లు ఆసక్తి చూపుతున్నారు. కానీ, వారు నిర్మాతలకు ఒక షరతు విధించారు.

అదేంటంటే ప్రభాస్ ఆదిపురుష్ సినిమా సంక్రాంతికి రాని పక్షంలో వాల్తేరు వీరయ్య, వీరసింహా రెడ్డిలను మైత్రి చెప్పిన విధంగా అధిక ధరలకు కొనుగోలు చేస్తారు. ఒకవేళ ఆదిపురుష్ సినిమా కూడా సంక్రాంతి రేసులో కొనసాగితే మాత్రం ధరలలో కనీసం 25% – 30% తగ్గించుకోవాలి.

ప్రభాస్ ‘ఆదిపురుష్’ నిర్మాతలు చాలా కాలం క్రితం సంక్రాంతి 2023ని విడుదల తేదీగా ప్రకటించారు. కానీ బాలకృష్ణ వీరసింహా రెడ్డి మరియు చిరంజీవి యొక్క వాల్తేరు వీరయ్య మాత్రమే పండగ సీజన్‌లో విడుదల అవుతాయని, ఆదిపురుష్ సినిమా విడుదల తేదీని వాయిదా వేసుకుంటుందని మైత్రీ మూవీ మేకర్స్ పంపిణీదారులకు తెలియజేశారట.

ఇక పోతే బాలకృష్ణ మరియు గోపీచంద్ మలినేని వీరసింహారెడ్డి మొదటి విడుదలగా జనవరి 11 న విడుదలయ్యే అవకాశం ఉందని తెలుస్తోంది. మరో వైపు వాల్తేరు వీరయ్య జనవరి 13న విడుదల కానుందట. ఆసక్తికరమైన విషయమేమిటంటే, ఈ రెండు సినిమాల్లోనూ శ్రుతి హాసన్ హీరోయిన్ పాత్రలో నటించారు.

మెగాస్టార్ చిరంజీవి తన నటనా ప్రతిభకు మాత్రమే కాకుండా, అద్భుతమైన డ్యాన్స్‌లు మరియు ఫైట్‌లకు కూడా గొప్ప పేరును కలిగి ఉన్నారు, ఇక ఆయన కామెడీ టైమింగ్‌కు ఎంతో మంది ప్రత్యేకంగా అభిమానులు ఉన్నారు. సినిమాల్లోని డైలాగులే కాదు, బయట కూడా కొన్ని సందర్భానికి అనుకూలంగా ఆయన వేసే పంచ్ లు కూడా ఒక్కోసారి నవ్వు తెప్పిస్తాయి.

తాజాగా ఆయన సినీ జర్నలిస్టు ప్రభు రచించిన ‘శూన్యం నుండి శిఖరాగ్రం వరకు’ అనే పుస్తకాన్ని ఆవిష్కరించేందుకు వచ్చారు. మెగాస్టార్ చిరంజీవి రాకతో ఈ బుక్ రిలీజ్ ఫంక్షన్ ఒక భారీ వేడుకగా మారింది.

చిరంజీవి లాంటి పెద్ద స్టార్ ఏ ఫంక్షన్ కి హాజరైనా ఆయన చుట్టూ క్రేజ్ ఉండడం సహజం. కాబట్టి సహజంగా ఆయనను చూసి అందరూ ఆయనతో ఫోటో దిగేందుకు వేదిక పైకి వచ్చారు. చిరంజీవి సంతోషంతో వారి అభ్యర్థనను అంగీకరించి వారితో ఫోటోలు దిగారు. కాగా చిరంజీవి ఫోటోలకు పోజు ఇస్తూ ‘ వారు ఇక్కడ లేరు కదా? అని అన్నారు.

ఆ వ్యక్తి పేరు ఏమిటో చిరు చెప్పక పోయినా, ఆయన ఉద్దేశించిన వ్యక్తి ఎవరో అక్కడ అందరికీ అర్థమైంది. గరికపాటి నరసింహారావు గారిని ఉద్దేశించే అలా అన్నారని ఆ వీడియో చూసిన వారికి కూడా అర్థం అవుతుంది. దీనికి కారణం తాజాగా చిరంజీవి – గరికపాటి మధ్య రగిలిన చిన్న వివాదమే.

ఇటీవలే బండారు దత్తాత్రేయ నిర్వహించిన అలయ్ బలాయ్ కార్యక్రమంలో చిరంజీవి పాల్గొన్నారు. ఈ కార్యక్రమానికి ప్రముఖ ఆధ్యాత్మిక వక్త గరికపాటి నరసింహారావు కూడా హాజరై ప్రసంగిస్తుండగా కొందరు మహిళా అభిమానులు చిరంజీవితో ఫొటోలు దిగారు.

ఆ సమయంలో చిరంజీవి ఆ ఫోటోలు తీయడం మానేసి వేదికపైకి వస్తేనే స్పీచ్ ఇస్తానని.. లేదంటే అక్కడి నుంచి వెళ్లిపోతానని గరికపాటి కాస్త కోపంగా స్పందించారు.

ఈ విషయమై కొన్ని రోజులుగా రచ్చ జరిగింది. గరికపాటిని హెచ్చరిస్తూ మెగా ఫ్యాన్స్ వీడియోలు కూడా చేశారు. ఈ విషయం పై గరికపాటి ఎలాంటి ప్రకటన చేయలేదు. ఇక ఇదే విషయం పై చిరంజీవి ఓ ఇంటర్వ్యూలో స్పందిస్తూ.. ఆయన చేసిన పనిని ఎవరైనా తప్పుగా పొరపాటు పడితే అందుకి తాను చేసేదేమీ లేదని అన్నారు. అలాగే గరికపాటి అంటే తనకు గౌరవం, అలాంటి పెద్ద మనిషి చేసిన వ్యాఖ్యలను వివాదాస్పదం చేయకూడదని అన్నారు.

ఇప్పుడు ఈ పుస్తకం రిలీజ్ సందర్భంగా దాదాపు అదే తరహా పరిస్థితి ఏర్పడటంతో.. అది గుర్తుకు తెచ్చుకుని గరికపాటి పై పరోక్షంగా పంచ్ వేశారు. చిరు టైమింగ్‌, కామెడీ సెన్స్‌ పై మెగా అభిమానులు సంతోషం వ్యక్తం చేయగా మరికొందరు మాత్రం ఇది అనవసరం అని, సమసిపోయిన వివాదాన్ని మళ్ళీ రేపడం ఎందుకని అభిప్రాయపడ్డారు.

కాంతార సినిమా ప్రస్తుతం తెలుగు రాష్ట్రాలతో పాటు దేశవ్యాప్తంగా ట్రెండ్ అవుతున్న విషయం తెలిసిందే. కాంతార చిత్రాన్ని చూసిన ప్రతి ఒక్కరూ అద్భుతం అంటున్నారు. కన్నడ నుండి వచ్చిన ఈ చిత్రాన్ని కెజిఎఫ్ మేకర్స్ హోంబలే ఫిల్మ్స్ సంస్థ నిర్మించింది. కాగా ఈ చిత్రం తెలుగులో ఇప్పటికే 25 కోట్లకు పైగా వసూలు చేసి ట్రేడ్ వర్గాలకు స్వీట్ షాక్ ఇచ్చింది.

మరోవైపు ఈ సినిమా ఓటీటీకి సంబంధించిన వార్తలు సోషల్ మీడియాలో వైరల్ అవుతున్నాయి. ఈ బ్లాక్ బస్టర్ ‘కాంతార’ సినిమా యొక్క డిజిటల్ హక్కులను అమెజాన్ ప్రైమ్ వీడియో భారీ ధరకు సొంతం చేసుకుందని తెలుస్తోంది.

అయితే ముందుగా కుదిరిన ఒప్పందం ప్రకారం ఈ సినిమా నవంబర్ 5న అమెజాన్ ప్రైమ్‌లో అందుబాటులోకి వస్తుందని వార్త వైరల్ అవుతుండగా.. దీనిపై చిత్ర నిర్మాత కార్తీక్ గౌడ ఇటివలే ట్విట్టర్‌లో స్పందించారు.

నవంబర్ 5 నుంచి సినిమా స్ట్రీమింగ్ అవాస్తవమని, ఓటీటీలో సినిమా ఎప్పుడు వస్తుందనేది ప్రకటిస్తామని స్పష్టం చేశారు. కానీ అంతర్గత వర్గాల సమాచారం ప్రకారం, ఈ వార్తల్లో నిజం ఉందని, మరియు ఒప్పందం ప్రకారం కాంతార నవంబర్ 5న OTT lo ఖచ్చితంగా విడుదల అవుతుందని అంటున్నారు.

ఒకవేళ వార్తల్లో ఉన్న తేదికే కాంతార సినిమా OTT lo వస్తే.. థియేట్రికల్ విడుదలకు మరియు OTT విడుదలకి మధ్య 5 వారాల గ్యాప్ ఉంటుంది, ఇది ఒక యావరేజ్ సినిమాకి ఐతే పర్వాలేదు కానీ కాంతార చిత్రం ఇప్పటికీ మంచి కలెక్షన్లను రాబడుతోంది. అంతే కాకుండా బాక్సాఫీస్ వద్ద ఎటువంటి పోటీ లేకపోవడంతో రాబోయే వారాల్లో కూడా మంచి వసూళ్లు రాబడుతుందని ట్రేడ్ వర్గాల వారు భావిస్తున్నారు.

అలాంటి సినిమాని ఇంత తొందరగా OTT లో విడుదల చేసే నిర్ణయాన్ని చిత్ర నిర్మాతలు వాయిదా వేసి ఉండాల్సిందని సినీ అభిమానులు మరియు పరిశ్రమ వర్గాల వారు కూడా భావిస్తున్నారు.

కాగా కాంతార చిత్రాన్ని తెలుగులో గీతా ఆర్ట్స్ బ్యానర్‌పై అల్లు అరవింద్ విడుదల చేశారు. సెప్టెంబర్ 30న విడుదలైన ఈ చిత్రం అంచెలంచెలుగా ఎదుగుతూ బలమైన టాక్ వల్ల ఈ నెల 15న తెలుగులో విడుదలై ఇక్కడ కూడా భారీ కలెక్షన్లు రాబడుతోంది.

నిజానికి కాంతార సినిమాలో నటించిన హీరోలు, హీరోయిన్లు ఎవరూ తెలుగు ప్రేక్షకులకు తెలియదు కానీ అధ్భుతమైన కంటెంట్ కారణంగా ప్రేక్షకులను ఆకట్టుకుంది. చిన్న సినిమాగా విడుదలైన ఈ కన్నడ చిత్రం బాక్సాఫీస్ వద్ద సత్తా చాటుతోంది. కన్నడ హీరో రిషబ్ శెట్టి రచన, దర్శకత్వం వహించిన ఈ సినిమా ఇప్పటికే ప్రపంచ వ్యాప్తంగా 250 కోట్లు వసూలు చేసింది.