బాలీవుడ్ స్టార్ హీరో రణ్బీర్ కపూర్ మరియు నేటితరంలో అత్యంత క్రేజ్ తో పాటు అద్భుతమైన ప్రతిభ గల హీరోయిన్/నటి అలియా భట్ జంటగా నటించిన సినిమా ‘బ్రహ్మాస్త్ర’. వారిద్దరూ నిజ జీవితంలో భార్యాభర్తలు అన్న విషయం తెలిసిందే. తొలిసారి వారు కలిసి నటించిన సినిమా కూడా ఇదే కావడం విశేషం.

యువ దర్శకుడు అయాన్ ముఖర్జీ ఎనిమిదేళ్లకు పైగా కష్టపడి అత్యంత ప్రతిష్టాత్మకంగా మరియు అత్యంత భారీ బడ్జెట్ తో ఈ సినిమాని రూపొందించారు. భారీ అంచనాల నడుమ ఈ చిత్రం ఈ శుక్రవారం విడుదలవగా.. రివ్యూలు మరియు టాక్ పరంగా కాస్త మిశ్రమ స్పందనను తెచ్చుకుంది.

అయితే బాక్సాఫీస్ వద్ద మాత్రం బ్రహ్మాస్త్ర అద్భుతంగా కలెక్షన్లు రాబడుతోంది. కాగా ఈ చిత్రం బాక్స్ ఆఫీసు వద్ద ప్రదర్శింపబడుతున్న తీరును చూసి పలువురు సినీ ఔత్సాహికులు బాలీవుడ్ ఈజ్ బ్యాక్.. బ్రహ్మాస్త గోల్డెన్ రన్ అంటూ కితాబు ఇస్తున్నారు. కాగా ఈ చిత్రం బాక్స్ ఆఫీసు వద్ద నిలకడగా రాణించడం అటు బాలీవుడ్ ట్రేడ్ వర్గాలతో పాటు ఇటు రణబీర్ కపూర్ అభిమానులకు కూడా ఓకే సమయంలో ఆనందాన్ని మరియు ఆశ్చర్యాన్ని కలిగించింది.

నిజానికి విడుదలకు ముందే బ్రహ్మాస్త్ర సినిమా పై భారీ అంచనాలు నెలకొని ఉన్నప్పటికీ, ప్రస్తుతం గడ్డు కాలం ఎదుర్కుంటున్న బాలీవుడ్ నుండి ఇంత భారీ ఓపెనింగ్స్ నమోదు చేసే సినిమా వస్తుందని ఎవరూ ఊహించలేదు.

కాగా మొదటి రోజు బ్రహ్మాస్త్ర ప్రపంచవ్యాప్తంగా 68 కోట్ల రూపాయల గ్రాస్ వసూలు చేసింది, మరియు రెండవ రోజు ఆ నంబర్ పెరిగి 75 కోట్ల కంటే ఎక్కువ గానే వసూలు చేస్తుందని అంచనా వేస్తున్నారు. ఇక మూడవ రోజు అడ్వాన్స్ ట్రెండ్ లని బట్టి చూస్తుంటే మూడవ రోజు అత్యధికంగా వసూళ్లు రాబట్టే అవకాశాలు గట్టిగా ఉన్నాయి. ఈ క్రమంలో ఆదివారం నాటికి ఈ సినిమా 200 కోట్ల గ్రాస్ మార్క్‌ను చాలా సునాయాసంగా దాటేసేలా కనిపిస్తుంది.

ఇది నిజంగా బాలీవుడ్ కు మరియు బ్రహ్మస్త్ర సినిమాకి అద్భుతమైన వీకెండ్ గా మారబోతుంది. కాగా అమీర్ ఖాన్ నటించిన లాల్ సింగ్ చడ్డా, అక్షయ్ కుమార్ రక్షా బంధన్ వంటి వరుస భారీ డిజాస్టర్‌లతో కొట్టుమిట్టాడుతున్న బాలీవుడ్‌కి ఇది చాలా అవసరమైన విజయం అని చెప్పాలి.

బాలీవుడ్ పరిశ్రమలో అత్యంత ప్రతిష్టాత్మక ప్రాజెక్ట్ గా బ్రహ్మాస్త్ర సినిమా రూపొందుతోంది. ఈ చిత్రంలో అలియా భట్ తో పాటు అమితాబ్ బచ్చన్, నాగార్జున కూడా కీలక పాత్రల్లో నటించారు. ఈ ఫాంటసీ అడ్వెంచర్ చిత్రం ప్యాన్-ఇండియా స్థాయిలో విడుదలైంది. కాగా దర్శకుడు అయాన్ ముఖర్జీ మరియు నిర్మాత కరణ్ జోహార్‌తో పాటు ప్రధాన తారాగణం సినిమా విడుదల తరువాత కూడా ఈ చిత్రాన్ని ప్రమోట్ చేయడంలో చాలా బిజీగా ఉన్నారు.

తెలుగు సినిమా పరిశ్రమలో టైర్-2 రేంజ్ హీరోల్లో శర్వానంద్ కి మంచి క్రేజ్ ఉంది. సహజమైన నటనతో పాత్రలకు న్యాయం చేయడంలో తనకంటూ ఒక ప్రత్యేక శైలిని ఏర్పరచుకున్నారు. ఆలాగే ఒకప్పుడు రన్ రాజా రన్, ఎక్స్ప్రెస్ రాజా, మహానుభావుడు ఇలా ఆయన నటించిన సినిమాలన్నీ మినిమం గ్యారెంటీ హిట్స్ గా నిలిచాయి. అయితే ఈ మధ్యకాలంలో శర్వానంద్ కి సరైన విజయం దక్కలేదు. దిల్ రాజు నిర్మాణంలో, దర్శకుడు సతీష్ వేగేశ్న రూపొందించిన ‘శతమానం భవతి’ సినిమానే శర్వాకి చివరి సూపర్ హిట్ చిత్రం. ఆ తరువాత వచ్చిన ‘పడి పడి లేచే మనసు’, ‘శ్రీకారం’, ‘జాను’, ‘రణరంగం’, ‘మహాసముద్రం’, ‘ఆడవాళ్లు మీకు జోహార్లు’ ఇలా వరుసగా ప్లాప్ సినిమాల వల్ల శర్వానంద్ మార్కెట్ దిగువ స్థాయికి వచ్చేలా పరిస్థితి ఏర్పడింది.

అయితే వరుస పరాజయాల తర్వాత ఎట్టకేలకు శర్వానంద్ కు సంతోషాన్ని ఆయన తాజాగా నటించిన ‘ఒకే ఒక జీవితం’ సినిమా ఇచ్చింది. ఈ చిత్రం శుక్రవారం విడుదలై పాజిటివ్‌ టాక్‌ ను తెచ్చుకుంది. సైన్స్ ఫిక్షన్ డ్రామాగా తెరకెక్కిన ఈ చిత్రం తొలి రోజు చాలా సాధారణ ఆక్యుపెన్సీలను నమోదు చేసినా, క్రమంగా పాజిటివ్ టాక్ పెరగడం వలన బాక్స్ ఆఫీస్ వద్ద పుంజుకుంది.

శ్రీ కార్తీక్ దర్శకత్వం వహించిన ఒకే ఒక జీవితం సినిమాలో అమల, వెన్నెల కిషోర్, రీతూ వర్మ మరియు ప్రియదర్శి కూడా కీలక పాత్రల్లో నటించారు.

కాగా ఈ సినిమా అన్ని చోట్లా ప్రశంసలు అందుకుంటున్న వేళ, శర్వానంద్ ఒక షాకింగ్ న్యూస్ ను తెలియజేశారు. ఈ సినిమా చిత్రీకరణ ప్రక్రియలో తనకు చాలా కష్టంగా అనిపించింది అని ఆయన చెప్పారు. ”ఈ సినిమా కారణంగా నేను డిప్రెషన్‌లోకి వెళ్ళాను. నేను నా షెడ్యూల్‌ను ఆపేసి కౌన్సెలింగ్ కోసం యుఎస్ వెళ్ళవలసి వచ్చింది, ”అని శర్వానంద్ తెలిపారు.

ఈ చిత్రం తనపై బలమైన ప్రభావాన్ని చూపిందని, అంతే కాక తను సంప్రదించిన డాక్టర్ కూడా ఇలాంటి సినిమాలు చేయవద్దని సూచించాడని శర్వానంద్ తెలిపారు. శ్రీ కార్తీక్ ఈ చిత్రానికి రచనతో పాటు దర్శకత్వం కూడా వహించారు. అలాగే వర్ధమాన నటుడు, దర్శకుడు అయిన తరుణ్ భాస్కర్ ఈ చిత్రానికి డైలాగ్స్ రాశారు. జేక్స్ బిజోయ్ సంగీతం అందించారు.

భారతదేశ చరిత్రలో అత్యంత గౌరవనీయమైన స్థానం దక్కించుకున్న, అలాగే అత్యంత ప్రసిద్ధ గాంచిన ఇతిహాసాలలో మహాభారతం ఒకటి. కేవలం భారతదేశంలోనే కాకుండా ప్రపంచవ్యాప్తంగా ఉన్న ఇతిహాసాల గురించి చర్చించే ఎవరైనా కూడా మహాభారతం గురించి చాలా గొప్పగా మాట్లాడతారు. ఎందరో మహామహుల దగ్గర నుంచీ సామాన్య ప్రజల వరకూ దీనిని చదివారు. గొప్ప సాహిత్య విలువలు ఉన్న కారణంగా, మహాభారతం అనేక సార్లు వివిధ రకాలుగా ప్రదర్శన కాబడింది.

అయితే వాటిలో అత్యంత ప్రజాదరణ పొందినది మాత్రం సిద్ధార్థ్ కుమార్ తివారీ నిర్మించిన మహాభారతం అనే చెప్పాలి, తొమ్మిదేళ్ళ క్రితం మెగా సీరియల్ గా రూపొంది 267 ఎపిసోడ్లతో స్టార్ టివిలో ప్రసారం అయిన ఈ మహా ఇతిహాసం ఘనవిజయం సాధించి ప్రేక్షకులను విపరీతంగా ఆకట్టుకుంది. ఈ కార్యక్రమం అంత పెద్ద హిట్ కాగా.. మరియు ప్రేక్షకులు టీవీలో చూసి ఆనందిచడమే కాకుండా తమకు ఇష్టమైన ఈ షోని రిపీట్ లు వేయడానికి లేదా అప్పట్లో టివిలో చూడని వాళ్ళు చూడటానికి వీలుగా 28 సీజన్లుగా విభజించబడి డిస్నీ హాట్‌స్టార్ OTT ప్లాట్‌ఫారమ్‌లో ఇప్పటికీ అందుబాటులో ఉంది.

దాదాపు ఒక దశాబ్దం తర్వాత, డిస్నీ హాట్‌స్టార్ మహాభారతంను మరోసారి ప్రేక్షకుల ముందుకు తీసుకు రానుంది. అయితే ఈసారి స్థాయి మరింత పెద్దది, బడ్జెట్‌ కూడా ఊహకందని విధంగా ఉండబోతుంది.. అలాగే సెట్స్‌ కూడా భారీగానే ఉంటాయి. ఇక డిస్నీ హాట్‌స్టార్ తన హాట్‌స్టార్ స్పెషల్స్ కేటగిరీ కింద ఈ షోను ప్రసారం చేస్తుంది. ఏ స్థాయిలో దీన్ని తెరక్కిస్తున్నారో అందరికీ తెలియచేయడానికి ఈ సీరీస్ నిర్మాణ సంస్థ అయిన మైథోవర్స్ స్టూడియోస్ సంస్థ వారు అధికారికంగా కొన్ని చిత్రాలను విడుదల చేసారు.

ఆ పోస్టర్స్ చూస్తుంటే, మహాభారతాన్ని ఎంత భారీ స్థాయిలో తీయడానికి సన్నాహాలు చేస్తున్నారో అర్థం అవుతుంది. మహాభారతం వంటి మహగాథను ఇంతవరకు ఎప్పుడూ కని వినీ ఎరుగని రీతిలో ఒక అద్భుత దృశ్యకావ్యంగా తీర్చిదిద్దుతున్నామని ఈ మేరకు నిర్మాణ బృందం వారు వాగ్దానం చేసారు. ఇక ఈ వెబ్ సిరీస్‌లో భారతీయ సినిమాలోని వివిధ పరిశ్రమలకు చెందిన స్టార్ లు అందరూ కూడా భాగం అవుతారని భావిస్తున్నారు.

తెలుగు, హిందీ, ఇంగ్లీష్ లతో పాటు ఇతర భారతీయ భాషల్లో ఈ సిరీస్ ని రూపొందించనున్నారని సమాచారం. భారీ తారాగణంతో పాటు అగ్రశ్రేణి సాంకేతిక బృందం ఈ ప్రాజెక్ట్ లో భాగం కానున్నారని తెలుస్తోంది. అయితే ఈ ‘మహాభారతం’ ను తెరకెక్కించే దర్శకుడు ఎవరనేది త్వరలోనే తెలుస్తుంది అంటున్నారు. దర్శకధీర రాజమౌళి ఎప్పటి నుంచో మహాభారతాన్ని తీయడం తన కలగా చెప్తూ వచ్చిన విషయం తెలిసిందే. మరి మహాభారతం సీరీస్ కు ఆయనే దర్శకత్వం వహిస్తారా లేక వేరే ఎవరైనా ఉంటారా అనేది తెలియాలంటే కొన్ని రోజులు వేచి చూడాలి.

ప్యాన్ ఇండియా అనబడే సినిమాలన్నిటినీ తలదన్నేలా భారీ స్థాయిలో తెరకెక్కే ఈ వెబ్ సీరీస్ ను బాలీవుడ్ నిర్మాత మధు మంతెన మైథోవర్స్ స్టూడియోస్ మరియు అల్లు ఎంటర్టైన్మెంట్ లతో కలిసి ఈ ప్రాజెక్ట్ ను రూపొందించనున్నారు.