ఈ వారం రైటర్ పద్మభూషణ్, బుట్టబొమ్మ, మైఖేల్ రూపంలో మూడు కొత్త సినిమాలు విడుదలయ్యాయి. కాగా రైటర్ పద్మభూషణ్ సినిమా అందరి హృదయాలను గెలుచుకుని బ్లాక్ బస్టర్ దిశగా దూసుకెళ్తుండగా, మిగతా రెండు సినిమాలకు మాత్రం చేదు అనుభవం ఎదురైంది.

సందీప్ కిషన్ ప్రధాన పాత్రలో మంచి పబ్లిసిటీతో వచ్చిన మైఖేల్, అర్జున్ దాస్, అనిఖా సురేంద్రన్, సూర్య వశిష్ట నటించిన బుట్టబొమ్మ చిత్రాలు బాక్సాఫీస్ వద్ద ఘోర పరాజయం చవిచూశాయి.

మంచి తారాగణం, ట్రైలర్ కారణంగా మైఖేల్ సినిమా చాలా మంచి అంచనాలతో విడుదలైంది. ఈ సినిమాతో సందీప్ కిషన్ కమ్ బ్యాక్ హిట్ కొడతారని అందరూ ఆశించగా.. తొలి ఆట నుంచే టాక్ ఘోరంగా ఉండటంతో ఈ చిత్రం బాక్సాఫీస్ వద్ద బోల్తా కొట్టింది మరియు బుట్టబొమ్మకు కూడా అదే పరాభవం ఎదురయింది. ఈ సినిమా కూడా వాష్ అవుట్ అయింది. ఈ రెండు సినిమాలు బాక్సాఫీస్ వద్ద భారీ డిజాస్టర్లుగా నిలిచాయి.

సందీప్ కిషన్ మైఖేల్ లో గౌతమ్ మీనన్, అనసూయ, వరుణ్ సందేశ్ లతో పాటు విజయ్ సేతుపతి, వరలక్ష్మి శరత్ కుమార్ అతిధి పాత్రలలో నటించిన మైఖేల్ చిత్రం తెలుగు, తమిళ భాషల్లో విడుదలై హిందీ, కన్నడ, మలయాళ భాషల్లో కూడా డబ్ అయింది. కానీ ఏ ఒక్క చోటా సినిమాకి సానుకూల స్పందన రాలేదు.

మరో వైపు బుట్టబొమ్మ 2020లో విడుదలైన మలయాళ హిట్ కప్పెలాకు రీమేక్ గా తెరకెక్కింది. పరస్పరం ఎప్పుడూ కలవని ఒక ఆటోడ్రైవర్, పల్లెటూరి అమ్మాయికి మధ్య జరిగే ఫోన్ కాల్ రొమాన్స్ నేపథ్యంలో ఈ సినిమా సాగుతుంది. వారి జీవితం లోకి మరో వ్యక్తి ప్రవేశించినపుడు ఎదురైన సంఘటనల సమాహారం ఏ మిగిలిన కథ.

జల్సా, ఖుషి రీ రిలీజ్ లు భారీ స్థాయిలో సక్సెస్ కావడంతో పవన్ కళ్యాణ్ పాత బ్లాక్ బస్టర్ సినిమా బద్రి రీ రిలీజ్ ను ఫిబ్రవరి 11న, తొలిప్రేమను వాలెంటైన్స్ డే స్పెషల్ గా ఫిబ్రవరి 14న విడుదల చేయాలని ప్లాన్ చేశారు. అయితే తాజా సమాచారం ప్రకారం ఈ రెండు సినిమాల విడుదల క్యాన్సిల్ అయినట్లు తెలుస్తోంది.

రీ రిలీజ్ క్యాన్సిల్ కావడానికి కారణం అభిమానుల్లో ఉన్న నిరాసక్తత అని తెలుస్తోంది. ఎందుకంటే కేవలం క్రేజ్ ను క్యాష్ చేసుకునేందుకు పాత హిట్ సినిమాలను విడుదల చేయడం సరికాదని.. అలాగే సందర్భం లేకుండా సినిమాలను రీ రిలీజ్ చేయడం మంచిది కాదని అభిమానులే సూచించారని సమాచారం.

ఇప్పుడు మెగాస్టార్ చిరంజీవి నటించిన గ్యాంగ్ లీడర్ సినిమా మాత్రమే ఫిబ్రవరి 11న విడుదల కాబోతోంది. శరత్ కుమార్, మురళీ మోహన్, ఆనందరాజ్, రావుగోపాల్ రావు ఈ చిత్రంలో కీలక పాత్రలు పోషించారు. విజయ్ బాపినీడు దర్శకత్వం వహించిన ఈ చిత్రానికి బప్పీ లాహిరి సంగీతం అందించారు.

పోకిరి (2006)తో తెలుగు చిత్ర పరిశ్రమలో రీ రిలీజ్ ట్రెండ్ కు ఒక్కసారిగా క్రేజ్ వచ్చింది. ఇకఆ తర్వాత జల్సా (2008), ఖుషి (2001), ఒక్కడు (2003) చిత్రాలు వరుసగా రీ రిలీజ్ ల రూపంలో ప్రేక్షకుల ముందుకు వచ్చాయి.

మొదట్లో పాత హిట్ సినిమాలను రీ రిలీజ్ చేయాలనే ఆలోచన కేవలం అభిమానులను మాత్రమే కాకుండా ఆ సినిమాలను మళ్ళీ థియేటర్లో చూడాలనే ఉత్సాహం సాధారణ ప్రేక్షకులలో కూడా కలిగింది. ఒక్కో హీరో అభిమానులు ఒక్కో సినిమాని ఎంచుకుని రీ రిలీజ్ చేయడానికి రకరకాల సన్నాహాలు చేశారు.

అయితే కొంత కాలం వరకు ఈ వరస బాగానే ఉన్నా తర్వాత బ్యాక్ టు బ్యాక్ సినిమాలు ప్రేక్షకుల పై పడటంతో అందరికీ మొహం మొత్తినట్టు అయింది. ఇక మీదట అభిమానులు, నిర్వాహకులు ఈ రీ రిలీజ్ లకు గ్యాప్, పర్ఫెక్ట్ టైమింగ్ చూసుకుంటే అందరికీ మంచిది.

నటుడు సుహాస్ తన ప్రతి సినిమాలోనూ విభిన్నమైన పాత్రలను పోషిస్తూ తన కెరీర్ ను బాగా నిర్మించుకుంటున్నారు. కోవిడ్-19 సమయంలో ఓటీటీలో విడుదలైన ‘కలర్ ఫొటో’ సినిమాలోని తన నటన మెగాస్టార్ చిరంజీవి ప్రశంసలు అందుకుంది. ఇక ఇటీవలే హిట్ 2లో విలన్ గా నటించిన సుహాస్ అందర్నీ ఆశ్చర్యపరిచారు.

ఆయన నటించిన తాజా చిత్రం ‘ రైటర్ పద్మభూషణ్’ ఫిబ్రవరి 3 శుక్రవారం విడుదలైంది. షణ్ముఖ ప్రశాంత్ దర్శకత్వం వహించిన ఈ చిత్రానికి విమర్శకులతో పాటు ప్రేక్షకుల నుంచి కూడా పాజిటివ్ రివ్యూలు వచ్చాయి. ఈ చిత్రంలో పద్మభూషణ్ అనే మధ్యతరగతి యువకుడిగా సుహాస్ కనిపించగా, ఆశిష్ విద్యార్థి, రోహిణి అతని తల్లిదండ్రులుగా నటించారు.

ట్రేడ్ రిపోర్ట్స్ ప్రకారం ‘రైటర్ పద్మభూషణ్’ బాక్సాఫీస్ వద్ద ఆదివారం అద్భుతమైన ప్రదర్శన కనబర్చింది. కాగా 3 రోజులకు ప్రపంచవ్యాప్తంగా రూ .5 కోట్లకు పైగా గ్రాస్ వసూలు చేసింది. ఈ చిత్రం సుహాస్ కెరీర్ బెస్ట్ కలెక్షన్లను నమోదు చేసిందని చెప్పవచ్చు.

ఓవర్సీస్ లో కూడా ఈ సినిమా మంచి వసూళ్లు రాబట్టింది. యూఎస్ఏ బాక్సాఫీస్ వద్ద 200 వేల డాలర్లకు పైగా వసూలు చేసినట్లు సమాచారం. ఇక నైజాంలో కోటి మార్కును దాటింది. ఫుల్ రన్ లో ఈ సినిమా వరల్డ్ వైడ్ గా 10 కోట్లకు పైగా గ్రాస్ కలెక్ట్ చేస్తుందని ట్రేడ్ వర్గాలు అంచనా వేస్తున్నాయి. మొదటి రోజు కంటే రెండో రోజు ఎక్కువ వసూళ్లు రాబట్టిన ఈ చిత్రం మూడో రోజు అదిరిపోయే వసూళ్లను రాబట్టింది.

విజయవాడలో నివసిస్తున్న పద్మభూషణ్ అనే 25 ఏళ్ల ఔత్సాహిక రచయిత కథే ఈ సినిమా. సున్నితమైన భావోద్వేగాలతో ఆహ్లాదకరమైన హాస్యం.. నటీనటుల నుంచి సహజమైన నటన అన్నీ కలిసి ఈ సినిమాను ఒక ఆరోగ్యకరమైన వినోదం ఇచ్చేందుకు దోహద పడ్డాయి.

ఈ సినిమాకి వెంకట్ ఆర్ శాఖమూరి సినిమాటోగ్రఫీ అందించారు. ఎడిటింగ్ బాధ్యతలను కోదాటి పవన్ కళ్యాణ్, సిద్ధార్థ్ తాతోలు చూసుకున్నారు. శేఖర్ చంద్ర, కళ్యాణ్ నాయక్ ఈ చిత్రానికి సంగీతం అందించారు.

వాల్తేరు వీరయ్య సినిమా విడుదలై 4 వారాలు కావస్తున్నా ప్రేక్షకులకు మాత్రం ఇప్పటికీ ఫస్ట్ ఛాయిస్ ఇదే. ఈ చిత్రం 4 వ వారాంతంలో కొత్తగా విడుదలయిన సినిమాల కంటే ఎక్కువ కలెక్షన్లను వసూలు చేసింది, ఇది అసాధారణ విజయంగా చెప్పవచ్చు.

ఈ వారం 3 కొత్త సినిమాలు రిలీజైన సంగతి తెలిసిందే. సందీప్ కిషన్ యొక్క మైఖేల్, నాగవంశీ తీసిన బుట్టబొమ్మ చిత్రాలు ప్రేక్షకులను ఆకట్టుకోవడంలో విఫలం కాగా, అవి థియేటర్లలో వాష్ అవుట్ గా నిలిచాయి. ఇక ఈ వారం విడుదలైన మరో చిత్రం రైటర్ పద్మభూషణ్ మల్టీప్లెక్స్ లతో పాటు ఓవర్సీస్ లోనూ మంచి ఆక్యుపెన్సీతో విజయవంతంగా ప్రదర్శితమైంది.

కొత్త సినిమాలు ప్రేక్షకులని పెద్దగా ఆకట్టుకోకపోవడంతో వాల్తేరు వీరయ్య తెలుగు రాష్ట్రాల్లో ఆ సినిమాల పై ఆధిపత్యం చెలాయించడంతో పాటు మ్యాట్నీ, ఫస్ట్ షోలకు చాలా స్క్రీన్స్ లో హౌస్ ఫుల్స్ రికార్డ్ చేసి అన్ని సెంటర్లలో ఈ సినిమాకు కలెక్షన్స్ అదిరిపోయాయి.

ఈ సంక్రాంతికి విడుదలైన చిరంజీవి వాల్తేరు వీరయ్య.. బాక్సాఫీస్ వద్ద సెన్సేషనల్ స్టార్ట్ అందుకుని రెండు వారాల పాటు అదే జోరును కొనసాగించింది. వాస్తవానికి చాలా ప్రాంతాల్లో వాల్తేరు వీరయ్య వీకెండ్స్ మినహా వీక్ డేస్ లో కూడా హౌస్ ఫుల్స్ నమోదు చేసింది. కాగా సంక్రాంతికి బాలకృష్ణ వీర సింహారెడ్డి సినిమాతో పోటీగా విడుదలైన ఈ చిత్రంతో ఆచార్య, గాడ్ ఫాదర్ వంటి వరుస పరాజయాల తర్వాత మరోసారి బాక్సాఫీస్ వద్ద తన సత్తా చాటిన చిరు, బాలయ్యతో జరిగిన ఈ పోరులో తిరుగు లేని విజయం సాధించారు.

బాబీ దర్శకత్వంలో రవితేజ, శ్రుతిహాసన్, ప్రకాష్ రాజ్ కీలక పాత్రల్లో నటించిన ఈ చిత్రానికి దేవిశ్రీ ప్రసాద్ సంగీతం అందించారు. మైత్రీ మూవీ మేకర్స్ ఈ చిత్రాన్ని నిర్మించింది.