దక్షిణ భారత సినీ పరిశ్రమలో తనకంటూ ఒక ప్రత్యేక స్థానాన్ని ఏర్పరచుకున్నారు సమంత రుత్ ప్రభు. ప్రస్తుతం వరుస చిత్రాలతో తన సత్తా ఏంటో చూపించేందుకు ఉత్సాహంగా ఉన్నారు. హీరోయిన్ గానే కాకుండా ఎలాంటి పాత్ర అయినా చేసేందుకు సిద్ధంగా ఉన్న సమంతా..విలన్ పాత్రలో అలరించనుందట. తమిళ స్టార్ హీరో సినిమాలో ఆమె ఒక ఆసక్తికరమైన విలన్ పాత్ర చేయనున్నట్టు తెలుస్తోంది.

ఇటీవలే అక్కినేని నాగచైతన్య – సమంత విడాకులు తీసుకున్న సంగతి తెలిసిందే. అయితే ఆ వివాదాలతో అనవసర రాద్ధాంతం చేయకుండా సమంత వరుస సినిమాలు చేస్తూ తన కెరీర్ పైనే శ్రద్ధ వహిస్తున్నారు. ‘పుష్ఫ’ సినిమాలో స్పెషల్ హట్ సాంగ్ చేసి తన సత్తా చూపించిన తరువాత మరిన్ని ఆసక్తికరమైన పాత్రలు, సినిమాలు చేయనున్నారు.

పన్నెండేళ్ళ కెరీర్ లో సమంత అటు నటనకు ప్రాధాన్యం ఉన్న పాత్రలే కాకుండా గ్లామర్ పరంగా కూడా ఎప్పటికప్పుడు ట్రెండ్ కు తగ్గట్టుగా వస్త్ర ధారణతో పాటు స్టైలింగ్ ను మార్చుకుంటూ వచ్చారు.

ఇక గత కొన్నేళ్లుగా బోల్డ్ క్యారక్టర్స్, హాట్ సీన్ లు లేదా సాంగ్ లు చేయడానికి వెనుకాడని సమంత ఇప్పుడు విలన్ పాత్రకు సై అన్నట్టు సమాచారం.

ఇటీవలే లోకనాయకుడు కమల్ హాసన్ తో “విక్రమ్” వంటి బ్లాక్ బస్టర్ హిట్ కొట్టిన దర్శకుడు లోకేష్ కనగరాజ్ తన తదుపరి చిత్రాన్ని తమిళ సూపర్ స్టార్ విజయ్ తో చేస్తున్న విషయం తెలిసిందే. ఆ సినిమాలో హీరోయిన్ గా ప్రియాంక ఆరుల్ మోహన్ ను అనుకుంటడగా.. విలన్ పాత్రకు సమంత నటించనున్నారని సమాచారం. త్వరలోనే ఈ విషయం పై అధికారిక ప్రకటన వచ్చే అవకాశం ఉంది.

విలన్ పాత్ర సమంతకు కొత్తేమీ కాదు. గతంలో తమిళంలో వచ్చిన చియాన్ విక్రమ్ మూవీ ‘10’లో సమంత ద్విపాత్రాభినయం చేయగా అందులో ఒక పాత్ర మెయిన్ హీరోయిన్ అయితే మరో పాత్ర కరుడుగట్టిన విలన్ తరహాలో ఉంటుంది. ఆ సినిమా తర్వాత ఇప్పుడు విజయ్ సినిమాలో విలన్ గా నటించబోతున్నారని వార్తలు వస్తున్నాయి. ఇక సమంత ప్రస్తుతం తను ప్రధాన పాత్రలో నటిస్తున్న ‘యశోద’, గుణశేఖర్ దర్శకత్వంలో తెరకెక్కుతున్న ‘శాకుంతలం’ తో పాటు విజయ్ దేవరకొండ తో ‘ఖుషి’ సినిమా చేస్తున్నారు.

‘పుష్ప: ది రైజ్’ సినిమాతో ఐకాన్ స్టార్ అల్లు అర్జున్, క్రియేటివ్ డైరెక్టర్ సుకుమార్ పాన్ ఇండియా ప్రేక్షకుల్ని అద్భుతంగా అలరించారు. ప్రస్తుతం ఆ సినిమాకు సీక్వెల్ ‘పుష్ప 2’ ఎప్పుడు మొదలవుతుంది అని ప్రేక్షకులు ఆసక్తితో ఎదురు చూస్తున్న విషయం తెలిసిందే. త్వరలో ‘పుష్ప 2’ షూటింగ్ స్టార్ట్ చేయడానికి సన్నాహాలు జరుగుతున్నాయి. అయితే ఇప్పుడు ‘పుష్ప’ ఫ్రాన్చైజీ కు సంబందించి ఒక ఆసక్తికరమైన విషయం తెలిసింది.

అంతగా విశేషమైన వార్త ఏమిటంటే.. “పుష్ప -3″ కూడా రాబోతుందట. ఈ విషయాన్ని మరెవరో కాదు, పుష్ప సినిమాలో భన్వర్ సింగ్ షెకావత్ రోల్ చేసిన మలయాళ హీరో ఫహాద్ ఫాజిల్ చెప్పారు. ఆయన నటించిన ” మలయన్ కుంజు” చిత్రం ఈ శుక్రవారం విడుదల కానున్న సందర్భంగా ఆయన మలయాళ మీడియాతో ముచ్చటించారు. ఆ క్రమంలో ఆయన ‘పుష్ప 3’ ప్రిపరేషన్ కోసం ఇటీవల సుకుమార్ తనతో చర్చించారని ఆయన తెలిపారు.

ఫహాద్ ఫాజిల్ చెప్పిన దాని ప్రకారం నిజంగా ‘పుష్ప 3’ ఉంటే అందులో ఆయన పాత్ర ఎలా ఉండబోతుందో? అసలు పుష్ప 2 లో అల్లు అర్జున్ కి మధ్య అతనికి మధ్య యుద్ధం ఏ స్థాయిలో ఉంటుందో చూడాలి. ఇక పుష్ప 3 లో కూడా కథానాయికగా రష్మికతో పాటు మిగతా పాత్రధారులు ఎవరై ఉంటారు అనే ప్రశ్నలకు పార్ట్ 2 విడుదలైన తర్వాత గానీ సమాధానం దొరకదు.

పుష్ప 3′ వార్త వింటే అల్లు అర్జున్ అభిమానుల ఆనందానికి హద్దే ఉండదు. పుష్ప సినిమాలో ‘తగ్గేదే లే’ అంటూ పుష్పరాజ్ చూపించిన మేనరిజమ్ ప్రపంచ వ్యాప్తంగా తెగ పాపులర్ అయ్యింది. సినీ రంగాలే కాక క్రీడా రంగాలైన క్రికెట్ వరకూ ఆ మానరిజమ్ పాకింది. ఇక పుష్ప 2 మరియు పుష్ప 3 లో ఇంకెన్ని అంశాలు ఫేమస్ అవుతాయో చూడాలి.

నేషనల్ క్రష్ రష్మిక మందన్న ఆ టాగ్ కు తగ్గట్లే నార్త్, సౌత్ అనే తేడా లేకుండా అభిమానులను సంపాదించుకున్నారు. అందుకే, ఆమెకు అన్ని భాషల పరిశ్రమల నుంచి వరుస అవకాశాలు వస్తున్నాయి. తాజాగా వినిపిస్తున్న వార్తల ప్రకారం..కోలీవుడ్ నుంచి ఆమెకు పాన్ ఇండియా సినిమా ఆఫర్ వచ్చిందట.

తమిళ స్టార్ హీరో చియాన్ విక్రమ్ కథానాయకుడిగా, రజనీకాంత్ తో ‘కాలా’, ‘కబాలి’ సినిమాలు తీసిన పా.రంజిత్ కాంబినేషన్లో ఇటీవలే ఒక చిత్రం ఖరారయింది. ఈ చిత్రాన్ని స్టూడియో గ్రీన్ పతాకంపై కె.ఈ. జ్ఞానవేల్ రాజా నిర్మిస్తున్నారు. పైగా ఇది విక్రమ్ కు కెరీర్ లో అరవై ఒకటో చిత్రం (61st movie) కావడం విశేషం. ఆయనకు జోడీగా రష్మికను తీసుకోవాలని దర్శక నిర్మాతలు ఆలోచిస్తున్నారట. త్వరలో ఆమెను కలిసి కథ చెప్పనున్నారు అని సమాచారం. ఇక ఈ చిత్రానికి రష్మిక ఒప్పుకునే అవకాశాలే ఎక్కువగా ఉన్నాయని తెలుస్తోంది.

ఈ సినిమాను 1800 కాలం నాటి నేపధ్యంలో, త్రీడీ (3D) టెక్నాలజీతో తీయాలని ప్లాన్ చేసినట్టు తెలుస్తోంది. తమిళంతో పాటు తెలుగు, మలయాళం, హిందీ భాషల్లో సినిమాను విడుదల చేయడానికి సన్నాహాలు చేస్తున్నారట. అందుకే, అన్ని భాషల్లో క్రేజ్ ఉన్న రష్మికను కథానాయికగా తీసుకోవాలని అనుకుంటున్నారని సమాచారం.

ప్రస్తుతం తమిళ సూపర్ స్టార్ విజయ్ కథానాయకుడిగా, వంశీ పైడిపల్లి తెరకెక్కిస్తున్న తెలుగు, తమిళ సినిమా ‘వారసుడు’లో రష్మిక నటిస్తున్నారు. ఆ తర్వాత అల్లు అర్జున్ ‘పుష్ప 2’ లో పాల్గొనాలి. ఇక దుల్కర్ సల్మాన్ – మృణాల్ టాకుర్ జంటగా, దర్శకుడు హను రాఘవపూడి తెరకెక్కిస్తున్న ‘సీతా రామం’ లోనూ రష్మిక నటిస్తున్నారు. ఆ చిత్రం ఆగస్ట్ 5న విడుదలకు సిద్ధంగా ఉంది. ఇవే కాకుండా హిందీలో రెండు సినిమాలు, తెలుగులో మరో సినిమా ఉంది. ఇక విక్రమ్ – పా రంజిత్ సినిమా కూడా ఒప్పుకుంటే మరో ఆసక్తికరమైన సినిమా ఆమె ఖాతాలో చేరినట్లే.

ప్రకాష్ రాజ్ ఎంత మంచి నటుడో ప్రత్యేకంగా చెప్పుకోవలసిన అవసరం లేదు. ఎందుకంటే తెలుగు, తమిళ, కన్నడ, మలయాళ మరియు హిందీ భాషల్లో ఆయన చేసినన్ని వైవిధ్యమైన, విలక్షణ పాత్రలు అన్నీ ఇన్ని కావు. ఆయన నటించిన ప్రతి భాషలోనూ అక్కడి ప్రేక్షకులను తనదైన నటనను ప్రదర్శించి ఆకట్టుకున్నారు ప్రకాష్ రాజ్. వివిధ భాషల్లో నటిస్తూ వస్తున్న ప్రకాశ్ రాజ్ కి ఆయా భాషలపై మంచి పట్టు కూడా ఉంది. పలు భాషల్లోని సాహిత్యాన్ని ఆయన ఎక్కువగా చదువుతూ ఉంటారు కాబట్టి ఆ సాహిత్యం యొక్క ప్రభావం ఆయనపై కనిపిస్తూ ఉంటుంది.

అందువల్లనే సామాజిక అంశాలపై, సమస్యలపై వెంటనే ఆయన స్పందిస్తూ ఉంటారు. అలాగే నటనతో పాటు ఆయన కొన్ని చిత్రాలను స్వయంగా తానే దర్శకత్వం వహించి నిర్మించారు కూడా. అందులో కొన్ని ఇతర భాషల చిత్రాలకు రీమేక్ లు కాగా, ధోనీ వంటి స్ట్రెయిట్ సినిమా కూడా తీశారు. అయితే అవేవీ బాక్స్ ఆఫీసు వద్ద పెద్దగా ప్రభావం చూపకపోగా.. కంటెంట్ పరంగా కూడా అనుకున్నంత స్థాయిలో ఆదరణ పొందలేకపోయాయి.

ఆ సినిమాల వల్ల దర్శకుడిగా.. నిర్మాతగా ప్రకాష్ రాజ్ కు పెద్దగా పేరు రాకపోయినా.. ఆయన అలాంటి ప్రయత్నాలు చేస్తూనే ఉంటారు. ఎందుకంటే.. ఆయన తన అభిరుచిని ప్రదర్శించడానికి, కోన్ని కథల పై ఉన్న ఇష్టంతో తెరకెక్కించానని ప్రకాష్ రాజ్ చెబుతూ ఉంటారు.

నటుడిగా బిజీగా ఉండే ఆయన ఏమాత్రం సమయం దొరికినా దర్శకుడిగా మారుతూ ఉంటారు. అలా ఇప్పుడు ఆయన మళ్లీ మెగా ఫోన్ పట్టుకోవడానికి సిద్ధమవుతున్నారు.ఈ మేరకు ప్రకాష్ రాజ్ ఇప్పుడు సామాజిక మరియు రాజకీయ అంశాలతో ఒక సినిమాను రూపొందించనున్నారు. ‘మనలో ఒకడు’ అనే టైటిల్ తో ఈ సినిమా నిర్మితమవుతుందని ప్రకాష్ రాజ్ చెప్పారు. మరి ఈసారైనా ఆయన ప్రయత్నంలో విజయం సాధిస్తారో లేదో చూడాలి.