ఈ తరం హీరోయిన్స్ లో మోస్ట్ బిజీ అయిన హీరోయిన్ సమంతా. ఏ మాయ చేశావే తో నిజంగానే ప్రేక్షకులను మాయ చేసింది. ఆ తరువాత బృందావనం,దూకుడు వంటి సూపర్ హిట్ సినిమాలతో దూసుకుపోయింది. మంచి నటి అవడంతో పాటు క్యూట్ లుక్స్, సక్సెస్ రేట్ ఎక్కువ ఉండటం వంటి కారణాల వల్ల తన కెరీర్ లో ఎప్పుడు కూడా పెద్దగా అవకాశాలకు బ్రేక్ పడలేదు.

మధ్యలో ఒకసారి ఆరోగ్యం బాగోలేక, నాగ చైతన్య తో పెళ్ళి జరిగిన కొన్ని రోజుల వరకు మాత్రమే కాస్త సినిమాలకు బ్రేక్ ఇచ్చింది. ఆ తరువాత స్టార్ హీరోల పక్కన ఛాన్స్ లు కాస్త తగ్గినా లేడీ ఓరియంటెడ్ సినిమాలతో కెరీర్ ను సాఫీగానే ముందుకు తీసుకెళుతుంది.

అయితే నాగ చైతన్య తో విడాకులు తీసుకున్న తరువాత మరో కొత్త మార్గంలో తన కెరీర్ ను చక్కబెట్టుకుంది సమంతా. ఇన్స్టాగ్రామ్ అనేది ఎంతోమందికి కెరీర్ ను ఇచ్చిన ప్లాట్ ఫామ్, చాలా తేలికగా తీసిపడేసే రీల్స్, టిక్ టాక్ తరహా పేరడీ డాన్స్ లతోనే పాపులర్ అయిన వాళ్ళు ఉన్నారు. ఇప్పుడు సమంతా తనకున్న క్రేజ్ ను, ఇన్స్టా లో ఉన్న ఫాలోయర్స్ ద్వారా ఉపయోగించుకుంటుంది. ఇటీవలి కాలంలో సమంతా ఫోటోషూట్ ల సంఖ్య బాగా పెరిగింది. ట్రెండీ ఔట్ ఫిట్ లకు తోడు హాట్ ఫోజ్ లతో కుర్రాళ్ళ మతి పోగొడుతుంది.

ఇన్స్టా లో బ్రాండింగ్ కూడా ఒక భాగమే, సినిమా హీరోలు, హీరోయిన్ లే కాక, విరాట్ కోహ్లీ వంటి క్రికెటర్ లు కూడా ఈ రకమైన బ్రాండింగ్ ద్వారా లబ్ది పొందిన వారే. ఇప్పుడు సమంతా కూడా అదే దారిలో వెళ్తుంది. ఇన్స్టాగ్రామ్ లో ఫోటో షూట్ లు మాత్రమే కాకుండా ప్రమోషనల్ పోస్ట్ ల ద్వారా దాదాపు నెలకు 3 కోట్ల వరకూ సంపాదిస్తుంది అని సమాచారం. దీపం ఉన్నప్పుడే ఇల్లు చక్కబెట్టుకోవాలి అనే సామెతను సాధారణంగా హీరోయిన్ లు బాగానే వంటబట్టించుకుని ఉంటారు. సమంతా కూడా అదే పని చేస్తూ ఇటు తన సంపాదనతో పాటు వీక్షకులకు ఆనందాన్ని పంచిపెడుతుంది.

స్టైలిష్ స్టార్ అల్లు అర్జున్, క్రియేటివ్ జీనియస్ సుకుమార్ కాంబినేషన్ లో వచ్చిన పుష్ప సినిమా ఎంత పెద్ద హిట్ అయిందో అందరికీ తెలిసిందే. తొలి రోజు మిక్స్డ్ టాక్/రివ్యూస్ వచ్చినా కలెక్షన్ లు సూపర్ హిట్ రేంజ్ లో సాధించి అల్లు అర్జున్ స్టామినా ఎంటో తెలియజేసింది. ముఖ్యంగా హిందీ బెల్ట్ లో బాహుబలి 1 ను క్రాస్ చేసి ట్రేడ్ పండిట్ల చెత్త ఔరా అనిపించుకుంది.

ఇక ప్రేక్షకులతో పాటు సినీ వర్గాలు కూడా పుష్ప 2 ఎప్పుడు వస్తుందా అని ఎదురుచూస్తున్నారు. పుష్ప 2 వచ్చే ఏడాది డిసెంబర్ లో విడుదల అవుతుంది అని అక్కడక్కడా పుకార్లు వినిపించినా అధికారికంగా యే రిలీజ్ డేట్ ఇవ్వబడలేదు.అయితే తాజాగా వినిపిస్తున్న సమాచారం ప్రకారం పుష్ప 2 మొదలవడం మరింత ఆలస్యం కానుందని తెలిసింది.

దీనికి కారణం దర్శకుడు సుకుమార్ అనారోగ్యం. మొదటి భాగం షూటింగ్ సమయంలో కూడా సుకుమార్ కు స్వల్ప అస్వస్థత తో ఉండటంతో కొన్ని రోజులు షూటింగ్ నిలిపివేశారు.ముందుగా అనుకున్న ప్లాన్ ప్రకారం అయితే పుష్ప 2 ఆగస్ట్ లో స్టార్ట్ అవ్వాల్సి ఉంది. అయితే స్క్రిప్టు వర్క్ ఇంకా పూర్తి కాకపోవడంతో పాటు సుకుమార్ ఆరోగ్యం కాస్త కుదుట పడే వరకు సినిమా మొదలయ్యే సూచనలు ఏవీ కనిపించట్లేదు.

ముందుగా సుకుమార్ కోలుకుని , స్క్రిప్టు వర్క్ క్షుణ్ణంగా జరిపిన తరువాతే సినిమా పట్టాలెక్కెందుకు ఒప్పుకుంటారు అని చెప్తున్నారు.సినిమాకి ఉన్న హైప్ అంతా ఇంతా కాదు కాబట్టి కాస్త ఆలస్యంగా అయినా సరే పుష్ప మళ్ళీ తగ్గేదెలే అంటూ అలరించడం ఖాయం.

పుష్ప సినిమాలో పాటలు ఎలా ఫేమస్ అయ్యాయి అనేది తెలిసిన విషయమే, పాటలతో పాటు తగ్గేదేలే డైలాగ్ అల్లు అర్జున్ మానరీజమ్ కూడా బాగా వైరల్ అయి సినిమాకి ఎనలేని క్రేజ్ ను తెచ్చిపెట్టింది.ఇక పార్ట్ 2 లో ఫాహద్ ఫాజీల్ కి అద్భుతమైన పాత్ర ఉంటుంది అని, పుష్ప కి షేఖావత్ కీ మధ్య పోరు రసవత్తరంగా ఉంటుంది అని భోగట్టా. వీటితో పాటు పుష్ప 2లో ఇంకెన్ని విశేషాలు ఉన్నాయో తెలియాలి అంటే కాస్త ఓపిక పట్టక తప్పదు.

కరోనా పాన్డేమిక్ తరువాత ప్రేక్షకులు సినిమా చూసే విధానం మారింది. ప్రేక్షకులు వీకెండ్ సినిమాకు అలవాటు పడ్డారు అని ప్రముఖ నిర్మాత దిల్ రాజు పేర్కొన్నారు. ఆయన చెప్పిన దాంట్లోనూ నిజం లేకపోలేదు.

యే ఇండస్ట్రీ అయినా మార్పు అనేది సహజం. సమయానికి తగ్గట్టు ఆయా కాలానికి అనుగుణంగా అప్డేట్ అవుతూ ముందుకు వెళ్తేనే అభివృద్ధి సాధ్యపడుతుంది.ఇప్పుడు తెలుగు సినిమా పరిశ్రమ కూడా అలాంటి పరిస్థితి లోనే ఉంది.

కరోనా మహమ్మారి దాడికి ఎన్నో జీవితాలు ప్రాణాలు కొల్పోగా పరోక్షంగా ఎన్నో పరిశ్రమలు తీవ్రమైన సంక్షోభం ఎదుర్కొన్నాయి. అందులో తెలుగు సినిమా కూడా ఒకటి. అయితే మన రెండు తెలుగు రాష్ట్రాల ప్రేక్షకులకు సినిమా అంటే ఎంత పిచ్చి అనేది అందరికీ తెలిసిందే.

ఆ పిచ్చి ప్రేమ వల్లే తెలుగు సినీ పరిశ్రమ త్వరగానే కోలుకుని పునరుద్ధరణ వైపు అడుగులు వేస్తుంది. అయితే అన్నీ సవ్యంగా ఉన్నాయి, సమస్యలు ఏవీ లేవు అనుకుంటే పొరపాటే అవుతుంది.ఎందుకంటే కరోనా కి ముందు, కరోనా తరువాత చెప్పుకోదగ్గ మార్పులు వచ్చాయి ప్రేక్షకులు సినిమా చూసే విధానంలో.

ఒకప్పుడు ధియేటర్ లో నుంచి సినిమా వెళ్ళిపోయాక కనీసం ఆరు నెలల గడువు తరువాత కానీ టీవిలో వచ్చేది కాదు. ఓటీటీ రెవల్యూషన్ మూలాన ఆ గ్యాప్ కాస్తా తగ్గిపోయి నెల వరకూ వచ్చింది. అయితే ఒక దశలో తెలుగు సినీ పెద్ద నిర్మాతలు కలిసి కనీసం 6 వారాల తరువాతనే రిలీజ్ గ్యాప్ ఉండాలి అని నిర్ణయించారు. అయితే కరోనా వేవ్ ల వల్ల చాలా చిన్న సినిమాలు, కొన్ని పెద్ద సినిమాలు కూడా డైరెక్ట్ గా ఓటీటీ లో విడుదల కావడం,. ఆ పై తిరిగి ధియేటర్ లు తెరిచిన తరువాత థియేట్రికల్ రిలీజ్ కీ, ఓటిటీ రిలీజ్ కీ మధ్య గ్యాప్ తగ్గిపోయింది.

నాలుగు వారాల లోపే టీవీ లలో, ఫోన్ లలో సినిమాలు అందుబాటులోకి వచ్చేస్తుంటే ఇంక ధియేటర్ కి వెళ్ళడం ఎందుకు అని చాలా ఫ్యామిలీ లు అనుకుని, ఏదైనా పెద్ద సినిమా వచ్చినప్పుడు మాత్రమే ధియేటర్ లకు తరలి వస్తున్నారు.

నిర్మాత దిల్ రాజు చెప్పినట్టే తొలి మూడు రోజుల వరకూ అభిమానులు, సినీ ఔత్సాహికులు మాత్రమే సినిమా చూడటానికి వస్తున్నారు, ఇతర న్యూట్రల్ ఆడియెన్స్, ఫ్యామిలీ ఆడియెన్స్ మాత్రం ఖచ్చితంగా కొన్ని సినిమాలకి మాత్రమే బయటకి వస్తున్నారు. అందుకే దాదాపు ప్రతి సినిమాకీ తొలి సోమవారం కలెక్షన్ లు డ్రాప్ అవుతున్నాయి. దానికి  తగ్గట్టే ఇండస్ట్రీ కూడా వినూత్న పద్ధతిలో ఆలోచించి సినిమాలు నిర్మించి, ప్రేక్షకులను ఆకట్టుకునేలా ప్రచారం చేయాలి. అప్పుడే పరిస్థితిలో మార్పు వస్తుంది.

అంటే సుందరానికీ సినిమా టైటిల్ చూస్తే హీరోకి ఏదో సమస్య ఉందని సందేహం వచ్చేలా ఉంటుంది. ప్రోమోలు , ట్రెయిలర్ లలో కూడా అలాగే ప్రచారం చేశారు. అయితే ఇప్పుడు సినిమా లో నిజంగానే ఏదో సమస్య ఉందేమో అనిపించేలా ఉంది ఆ సినిమా కలేక్షన్ ల పరిస్థితి.

రోజు రోజుకూ ఆ సినిమా కలేక్షన్ లు మరీ తీసికట్టుగా ఉంటున్నాయి. ప్రీ రిలీజ్ బజ్ సరిగా లేకున్నా, రివ్యూలు బాగా రావడంతో తరువాత అయినా సినిమా బాక్స్ ఆఫీస్ వద్ద ఊపు అందుకుంటుంది అని డిస్త్రిబ్యుటర్ లు ఆశించారు.అయితే వారి ఆశలు అన్నీ ఆవిరి అయిపోయేలా ఉంది సుందరం గారి కలేక్షన్ ల హోమం.

శ్యామ్ సింఘా రాయ్ కూడా అంచనాలను అందుకోలేక పోయినా కనీసం డీసెంట్ హిట్ గా నిలిచింది. కానీ అంతే సుందరానికీ ఓపెనింగ్స్ లో కూడా నాని రేంజ్ లో రాలేదు.తొలి 3 మూడు రోజుల షేర్ కేవలం 15 కోట్ల వరకూ వచ్చింది. కనీసం కిందా మీదా పడుతూ అన్నా ఒక మోస్తరు స్థాయికి వస్తుంది అనుకుంటే సోమవారం రెండు రాష్ట్రాలకూ కలిపి కేవలం 70 లక్షల షేర్ రావడం ట్రేడ్ వర్గాలను షాక్ కు గురి చేసింది.

వరల్డ్ వైడ్ గా ఈ సినిమాకి జరిగిన బిజినెస్ 31 కోట్లు అయితే పైన చెప్పుకున్నట్టు ఇప్పటి దాకా కేవలం 15 కోట్ల షేర్ వచ్చింది. ఈ రన్ చూస్తుంటే ఇంక పోను పోను వచ్చే చిల్లరకు షేర్ అంటూ ఆడ్ చేసేందుకు ఏమీ మిగిలేలా లేదు.

సినిమా లో కంటెంట్ లేకపోవడం వల్లనో, లేదా టాక్ బాగా రాకపోవడం వల్ల ఆడకపోతే ఒక అర్థం. కానీ సినిమాలో సరైన కంటెంట్ తో పాటు పాజిటివ్ టాక్ వచ్చినా ప్రేక్షకులు ధియేటర్ వైపు కదలలేదు అంటే కారణాలు ఎంటో ఎవ్వరికీ అంతుపట్టట్లేదు.

యాంకర్ సుమకి ఉన్న క్రేజ్ గురించి వేరే చెప్పనవసరం లేదు. ఎన్నో గేమ్ షోలు, మరియు ప్రోగ్రాం ల ద్వారా ఆవిడ ప్రేక్షకులను అలరిస్తుంది. అలాగే సినిమాలకు సంభంధించిన యే ప్రి రిలీజ్ ఈవెంట్ అయినా సుమ లేకుండా జరగదు

సినిమా హీరోయిన్ గా కెరీర్ మొదలు పెట్టిన సుమ కేవలం ఒక్క సినిమాతోనే ఆ ప్రయత్నానికి శుభం పలికింది. ఆ తరువాత అడపాదడపా చిన్న పాత్రల్లో కొన్ని సినిమాల్లో కనిపించింది

ఇక టెలివిజన్ ఇండస్ట్రీ లోకి అడుగు పెట్టిన తరువాత సుమ వెనక్కి తిరిగి చూసుకోవాల్సిన పని లేకుండా పోయింది.తనదైన టైమింగ్ తో ప్రోగ్రాం లను విజయవంతం చేయడం ఆవిడకు సర్వ సాధారణం అయిపోయింది

చాలా కాలం తరువాత సుమ ప్రధాన పాత్రలో నటించిన సినిమా జయమ్మ పంచాయితీ. పూర్తిగా గ్రామీణ ప్రాంత నేపద్యంలో తీసిన ఈ సినిమా థియేటర్లలో విడుదల అయినప్పుడు ప్రేక్షకుల నుండి మిశ్రమ స్పందన లభించినా, దర్షకుడి అభిరుచికి, సుమ మరియు ఇతర నటీనటుల నటనకు మంచి ప్రశంసలే దక్కాయి.

అయితే తాజాగా జయమ్మ పంచాయితీ ఓటీటీ (అమెజాన్ ప్రైమ్) లో విడుదల అయింది. ఒక మంచి ప్రయత్నమైన ఈ చిత్రం నిజానికి నేరుగా ఓటీటీ లోనే విడుదల అయి ఉంటే బాగుండేది అని పలు వర్గాలు, ప్రేక్షకుల అభిప్రాయం. మరి వారి మాటలకు తగ్గట్టే జయమ్మ పంచాయితీ తన జెండాను ఓటీటీలో ఎగరెస్తుందా లేదా చూడాలి.