తనదైన కథలు, సినిమాలు ఎంపిక చూసుకుని ఎప్పుడు ఎదో కొత్త తరహా ప్రయత్నాలు చేసే యువ హీరో నిఖిల్ నటించిన మిస్టరీ అడ్వెంచర్ థ్రిల్లర్ `కార్తికేయ 2`. ఈ సినిమాకి చందూ మొండేటి దర్శకత్వం వహించారు. అభిషేక్ అగర్వాల్ ఆర్ట్స్ పీపుల్ మీడియా ఫ్యాక్టరీ బ్యానర్ లపై అభిషేక్ అగర్వాల్ టి.జి. విశ్వప్రసాద్ సంయుక్తంగా నిర్మించారు. అనుపమ పరమేశ్వరన్ హీరోయిన్ గా నటించిన ఈ సినిమాలో ఒక కీలక అతిథి పాత్రలో బాలీవుడ్ సీనియర్ నటుడు అనుపమ్ ఖేర్ నటించారు. ముందుగా జూలై 22న విడుదల కావాల్సిన ఈ సినిమాకి అనుకోని అవాంతరాలు ఎదురయ్యాయి. జూలై 22న విడుదల చేయాలని చిత్ర బృందం ప్రకటించినా.. అదే సమయంలో నాగచైతన్య `థాంక్యూ` సినిమా కోసం కార్తీకేయ 2 వాయిదా వేసుకోమన్నారట.

అగ్ర నిర్మాత అయిన దిల్ రాజు చెప్పడంతో `కార్తికేయ 2`విడుదల తేదీని ఆగస్టు 12కు మార్చటం జరిగింది. ఇక్కడ గమనించాల్సిన విషయం ఏంటంటే `కార్తికేయ 2` ని వాయిదా వేయించి జూలై 22న విడుదలైన `థాంక్యూ` చిత్రం బాక్సాఫీస్ వద్ద దారుణమైన పరాజయం చవి చూసింది.

ఇక ఎట్టకేలకు `కార్తికేయ 2`ని ఆగస్టు 12న విడుదల చేసేందుకు అన్ని సన్నాహాలు మొదలు పెడితే.. ఆ డేట్ కు కూడా విడుదల చేయకూడదని కొంత మంది వెనక్కి వెళ్లమన్నారని లోగడ హీరో నిఖిల్ సంచలన వ్యాఖ్యలు చేసిన విషయం తెలిసిందే. అయితే ఎటువంటి ప్రతికూల పరిస్థితులు ఎదురైనా ఆగస్టు 12న మా సినిమా ఎట్టి పరిస్థితుల్లో రిలీజ్ అవుతుందని హీరో నిఖిల్ స్పష్టం చేసినా.. చివరి నిమిషంలో రిలీజ్ డేట్ ని మళ్లీ మార్చుకోవాల్సి వచ్చింది.

ఆగస్టు 12న నితిన్ `మాచర్ల నియోజక వర్గం` రిలీజ్ అవుతున్న నేపథ్యంలో రెండు సినిమాల మధ్య క్లాష్ ఉండటం మంచిది కాదని మళ్లీ నిఖిల్ `కార్తికేయ 2`ని వెనక్కి వెళ్లమన్నారట. దీంతో తప్పని సరి పరిస్థితుల్లో ఒక రోజు ఆలస్యంగా అంటే ఆగస్టు 13న కార్తీకేయ 2 సినిమాని రిలీజ్ చేస్తున్నట్టుగా ప్రకటించారు. ఇక ఆగస్టు 12న విడుదలైన నితిన్ `మాచర్ల నియోజక వర్గం` నిరాశపరచడంతో 13న రానున్న నిఖిల్ సినిమాపై అందరూ ఆసక్తిగా ఎదురు చూస్తున్నారు.

ఇక అందరూ ఎంతో ఆసక్తిగా ఎదురు చూస్తున్న కార్తీకేయ 2 ఎట్టకేలకు ఈరోజు విడుదల అయింది. ఓవర్సీస్ షోల నుంచి ఈ సినిమాకి పాజిటివ్ టాక్ వినిపిస్తుంది. ఓవర్సీస్ వద్ద ఓపెనింగ్స్ కూడా బాగా వచ్చే అవకాశాలు ఎక్కువ ఉన్నాయి. మరి ఇప్పటికే మంచి బజ్ ఉన్న ఈ సినిమాకి టాక్ కూడా తోడైతే బ్లాక్ బస్టర్ అవడం చాలా సులువు. మరి తొలి రోజు ప్రీమియర్ల నుంచి వినిపిస్తున్న టాక్ నిజమై కార్తీకేయ 2 ఘన విజయం సాధించి తెలుగు సినిమా పరిశ్రమకు మరో భారీ విజయాన్ని అందివ్వాలని కోరుకుందాం.

సినిమా రంగం అనేది ఒక మాయాజాలంతో కూడుకున్న రంగుల ప్రపంచం. వెండి తెర పై జరిగేది అంతా కల్పితం అని, బొమ్మల కొలువు మాదిరిగా కంప్యూటర్ గ్రాఫిక్స్ వంటి అదనపు హంగులు ఉంటాయి అని కూడా ప్రేక్షకులకు తెలుసు. అలాగే సినిమాల్లో ఫైట్లు హీరో నిజంగా చేయడు, వైర్ వర్క్, డూప్ ల ద్వారా ఆ సన్నివేశాలను చిత్రీకరిస్తారు. అయితే కొన్ని సందర్బాలలో హీరోలు డూప్ ల మీద ఆధార పడకుండా సొంతంగా స్టంట్స్ చేస్తుంటారు. అలాంటి సమయంలో వారు గాయాలకు గురి కావడం కూడా జరుగుతుంది. తాజాగా అలాంటి అనుకోని పరిస్థితుల్లో హీరో విశాల్ గాయపడ్డారు అని తెలియ వచ్చింది.

తన తాజా చిత్రం అయిన మార్క్ ఆంటోని షూటింగ్ సమయంలో, హీరో విశాల్ ప్రమాదానికి గురవడంతో.. ఆయనకు వెంటనే చికిత్స చేయవలసి వచ్చింది. ఇలా యాక్షన్ సన్నివేశాలు చిత్రీకరిస్తున్న సమయంలో గాయ పడటం హీరో విశాల్ కు ఇదే మొదటిసారి కాదు. అయన గతంలో లాఠీ అనే సినిమా షూటింగ్ సమయంలో ఒక ఫైట్ సీక్వెన్స్ చేస్తున్నప్పుడు కూడా చేయి విరిగింది.

ఇక మార్క్ ఆంటోని సినిమా షూటింగ్ లో జరిగిన ప్రమాదంలో తీవ్రత ఎంత అనేది తెలియనప్పటికీ, చిత్ర బృందంలో ఎక్కువ మందిని ఆసుపత్రికి తరలించినట్లు సమాచారం. అదృష్టవశాత్తూ యూనిట్ లో ఎవరికీ ఎటువంటి ప్రాణనష్టం జరిగినట్లు దాఖలాలు లేవని తెలిసింది. ఈ సందర్భంగా గాయపడిన యూనిట్ సభ్యులు అందరూ త్వరగా కోలుకోవాలి అని ఆశిద్దాం.

ఓ ఫైట్ సీక్వెన్స్‌లో భాగంగా విశాల్‌ను తీవ్రంగా కొట్టినపుడు ఈ ప్రమాదం జరిగినట్లు సమాచారం. దీంతో ఆయన కాళ్లకు బలమైన గాయాలు తగలడంతో ఆస్పత్రికి తరలించారట. ప్రస్తుతం విశాల్.. ఓ ప్రైవేట్ ఆస్పత్రిలో వైద్యుల పర్యవేక్షణలో చికిత్స పొందుతున్నారట.

ప్యాన్ ఇండియా చిత్రాల జాబితాలో విశాల్ తొలిసారి ప్రయత్నిస్తున్న చిత్రం మార్క్ ఆంటోనీ. ప్రస్తుతం ఈ సినిమానే కాకుండా, లాఠీ అనే మరో చిత్రంలో కూడా పని చేస్తున్నారు విశాల్, అందులో ఒక పవర్ఫుల్ పోలీసు పాత్రను పోషిస్తున్నారు. ఇక మార్క్ ఆంటోనీ చిత్రంలో ప్రముఖ నటుడు, దర్శకుడు ఎస్‌జె సూర్య కూడా ఒక ముఖ్యమైన పాత్రలో నటిస్తున్నారు. జివి ప్రకాష్ ఈ చిత్రానికి సంగీత దర్శకుడుగా వ్యవహరిస్తున్నారు.

దాదాపు మూడు నెలలకు పైగా తెలుగు చిత్ర పరిశ్రమ సరైన హిట్లు లేక థియేటర్లు వెలవెల బోయాయి. అసలు సినిమాలు చూడటానికి ప్రేక్షకులు మునుపటిలా సినిమాలకు వస్తారా లేదా అని ఇండస్ట్రీ వర్గాలు అనుమానాలు ఏర్పడిన నేపథ్యంలో.. గత వారం విడుదలైన బింబిసార మరియు సీతా రామం సినిమాలు పరిశ్రమకు ఎంతో సంతోషాన్ని ఇచ్చాయి.ఈ రెండు చిత్రాలు బాక్సాఫీస్ వద్ద చక్కని వసూళ్లను సాధించాయి. అంతే కాకుండా తెలుగు ప్రేక్షకుల నుండి విశేష స్థాయిలో ఆదరణ పొందాయి. ఇక ఈ రెండు సినిమాలు తొలి వారం పూర్తయ్యే సరికి బ్రేక్ ఈవెన్ సాధించాయి. ఇప్పుడు వస్తున్న కలెక్షన్లు అన్నీ లాభాలే. బింబిసార మరియు సీతా రామం మొదటి వారం కలెక్షన్ల వివరాలు చూద్దాం.

బింబిసార బాక్స్ ఆఫీస్ వద్ద అద్భుతమైన ఓపెనింగ్స్ ను సంపాదించి, ఆ తర్వాత రెండవ, మూడవ రోజు కూడా అదే హవాను కొనసాగించింది. ఈ సినిమా విడుదలకు ముందే చక్కని అంచనాలతో ఉండింది. ఇక విడుదల తరువాత ఆ పాజిటివ్ బజ్ సినిమాకు ఎంతగానో సహాయపడింది. అంతే కాక బింబిసార చిత్రం అటు నిర్మాతలు, పంపిణీదారులు మరియు ఎగ్జిబిటర్లకు భారీ లాభాలను తెచ్చి పెట్టింది.

బింబిసార మొదటి వారం 25 కోట్ల కలెక్షన్ సాధించింది. పైగా కళ్యాణ్ రామ్ కెరీర్ బెస్ట్ హిట్ అయిన పటాస్‌ను భారీ ఆధిక్యంతో దాటింది. బ్లాక్ బస్టర్ హిట్ గా నిలిచి 30 కోట్ల షేర్ మార్క్ ను చేరుకోవడానికి చాలా దగ్గరలో ఉంది. ఈ సినిమా ప్రీ రిలీజ్ బిజినెస్ 16 కోట్లకు జరుపుకుంది. ఆ రకంగా ఈ చిత్రం అందరికీ అత్యంత లాభదాయకమైన సినిమాగా నిలిచింది.

ఇక మ్యాజికల్ లవ్ స్టొరీలా తెరకెక్కిన సీతా రామం తొలి రోజు వసూళ్ల పరంగా కాస్త సాధారణంగా ఉన్నప్పటికీ.. అయితే తొలి రోజుతో పోలిస్తే ఈ సినిమా కలెక్షన్లు రెండూ రోజు పెరిగాయి. వాటి కంటే మూడో రోజు అలా స్టడీగా బాక్స్ ఆఫీస్ వద్ద ఈ సినిమా ఎదుగుతూ వచ్చింది. సినిమా అద్భుతంగా ఉంది అన్న మౌత్ టాక్ వల్ల చాలా లాభ పడింది సీతా రామం. సరైన సినిమాకి పాజిటివ్ టాక్ ఏ రకంగా ఉపయోగ పడుతుందో మరోసారి రుజువు చేసింది.

సీతా రామం తెలుగు వెర్షన్ ప్రపంచ వ్యాప్తంగా 14 కోట్ల వరకు సాధించింది. ఇక సోమవారం అంటే ఆగస్ట్ 15 నాటికి 20 కోట్ల షేర్ మార్క్‌ను చాలా సులభంగా చేరుతుందని ట్రేడ్ వర్గాలు అంటున్నాయి. సినిమా విడుదలకు ముందు ఎవరూ ఊహించకపోయినా ఈ సినిమా అద్భుతంగా రూపొంది, ప్రేక్షకులని విపరీతంగా ఆకట్టుకుని బ్లాక్‌బస్టర్‌గా నిలిచింది.

ఓవరాల్‌గా సీతా రామం మరియు బింబిసార రెండూ అద్భుతమైన బాక్సాఫీస్ కలెక్షన్లను నమోదు చేశాయి.

బాలీవుడ్ సూపర్ స్టార్ అమీర్ ఖాన్ నటించిన లాల్ సింగ్ చడ్డా సినిమా ఈరోజు విడుదలైన సంగతి తెలిసిందే. అయితే సాధారణంగా అమీర్ సినిమా అంటే ఖచ్చితంగా బ్లాక్ బస్టర్ అనిపించేలా ప్రచార కార్యక్రమాలు.. సినిమా ప్రోమోలు వగైరాలతో అట్టహాసంగా సందడిగా వాతావరణం ఉంటుంది.అయితే ఈసారి అందుకు భిన్నంగా ఏమాత్రం సానుకూల పరిస్థితి లేకుండా.. బాయ్కాట్ నినాదాల మధ్య.. సినిమా ఫలితం ఏమవుతుందో అనే అయోమయాల మధ్య ఈ రోజు లాల్ సింగ్ చడ్డా సినిమా థియేటర్లలో విడుదలైంది.

అయితే నిజానికి ఈ సినిమాని బహిష్కరించాలి అన్న ప్రచారం చాలా వరకు పిచ్చి పుకార్ల వల్ల, లేక అనవసరమైన ద్వేషం వల్ల జరిగింది.అయితే ఈ నెగటివ్ పబ్లిసిటీ చిలికి చిలికి గాలివానగా మారినట్లు చివరికి సినిమా ఓపెనింగ్స్ పైన ప్రభావం చూపినట్లు కనిపిస్తోంది. లాల్ సింగ్ చద్దా ఓపెనింగ్ రోజు బాక్స్ ఆఫీసు వద్ద చాలా సాధారణ స్థాయిలో కలెక్షన్లు నమోదు చేసుకుంది. అంతే కాకుండా, సమీక్షలు కూడా పేలవంగా ఏమాత్రం సినిమాకు సహకరించేలా లేవు.

అయితే ఈరోజు పరిస్థితిని చూసిన బాలీవుడ్ వర్గాలు ఆలోచనలో పడ్డారు. అసలు ప్రేక్షకులు తిరస్కరించింది లాల్ సింగ్ చడ్డా సినిమానా లేక అమీర్‌ ఖాన్ ను తిరస్కరించారా అనే చర్చకు దారి తీసింది. అసలు అమీర్ పై ఇంత నెగటివిటీ పెరగడానికి కారణం ఆయన గతంలో చేసిన జాతి వ్యతిరేక వ్యాఖ్యలు అని ఒక వాదన వినిపిస్తోంది. అమీర్ తన కెరీర్‌లో ఇంతకు ముందు కూడా చాలా సార్లు జాతియ వ్యతిరేకిగా (Anti National)నిందింప బడ్డారు.

అయితే ఈ వివాదాలు ఎప్పుడూ ఆయన సినిమాల బాక్సాఫీస్ స్టామినాను ప్రభావం చూపించలేదు అన్నది వాస్తవం. అయితే ఈసారి మాత్రం గతానికి భిన్నంగా అమీర్‌ ఖాన్‌ స్టార్ డం ప్రమాదంలో పడిందని ట్రేడ్ వర్గాలు అంటున్నాయి. అమీర్ ఖాన్ సినిమాలు సాధారణంగా భారీ ఓపెనింగ్స్ ను సాధిస్తాయి కానీ లాల్ సింగ్ చడ్డా మాత్రం చాలా సాధారణ స్థాయిలో బాక్స్ ఆఫీస్ వద్ద ఓపెన్ అయింది.

అయితే లాల్ సింగ్ చడ్డా సినిమా ఇలాంటి పరిస్థితిలో ఉండటానికి కేవలం అమీర్ ఖాన్ పై ఉన్న నెగటివిటీ మాత్రమే కారణం కాదని.. సినిమా ఒక పాత హాలీవుడ్ సినిమాకు రీమేక్ గా తెరకెక్కుతున్నప్పుడే ఈ చిత్రం పట్ల ప్రేక్షకులు పెదవి విరిచారు. ఇక కరోనా వల్ల సినిమా మరింత ఆలస్యం అవడం, పాటలు మరియు ట్రైలర్ ఏది కూడా ఆశించిన స్థాయిలో ప్రేక్షకులను ఆకట్టుకోవడంలో విఫలమవడం వంటి కారణాల వల్లనే సినిమా పరాజయం దిశగా పయనిస్తుందని మరో బలమైన వాదన వినిపిస్తోంది. ఈ వాదనలో కూడా నిజం లేక పోలేదు. మరి తదుపరి చిత్రంతో అమీర్ ఖాన్ ఇలాంటి వివాదాలకు తావు లేకుండా ప్రేక్షకులని ఆకట్టుకుని భారీ విజయంతో తిరిగి కమ్ బ్యాక్ ఇస్తారని ఆశిద్దాం.