రౌడీ స్టార్ విజయ్ దేవరకొండ నటించిన లైగర్ సినిమా ఆగస్ట్ 25న విడుదలకు సిద్ధమవుతోంది. ఈ చిత్రం పట్ల ప్రేక్షకులతో పాటు ట్రేడ్ వర్గాలు కూడా భారీ అంచనాలు పెట్టుకున్నారు. సినిమా పై అందరి దృష్టి పడేలా చేయడంలో చిత్ర బృందం విజయవంతమైంది. పైగా హీరో విజయ్ దేవరకొండ దర్శకుడు పూరి జగన్నాధ్ ల కలయికలో వస్తున్న తొలి సినిమా కావడం కూడా విపరీతమైన క్రేజ్ ను సంపాదించుకుంది. పూరి జగన్నాథ్ విజయ్ దేవరకొండను తెరపై ఎలా చూపిస్తారో ఎలాంటి విన్యాసాలు చేయిస్తారో చూడాలని అభిమానులు ఆసక్తిగా ఉన్నారు.

ఇక లైగర్ సినిమా ఓవర్సీస్ అడ్వాన్స్ బుకింగ్‌లు ఇటివలే ప్రారంభమయ్యాయి. ఆ బుకింగ్ వరస చూస్తుంటే ఈ చిత్రం మొదటి రోజు భారీ కలెక్షన్లను సాధించేలా కనిపిస్తోంది. ప్రీ-సేల్స్ ఇప్పటికే $10K మార్కును దాటడంతో.. ట్రేడ్ వర్గాలు మార్కెట్ విశ్లేషకులు లైగర్ సినిమా నుంచి ప్రీమియర్ షోల ద్వారా భారీ నంబర్‌ను ఆశిస్తున్నారు. విజయ్ దేవరకొండ నటించిన ఈ సినిమా ఓవర్సీస్ మార్కెట్ లో చాలా గట్టి ఓపెనింగ్స్ తో మొదలయ్యే సూచనలు ఎక్కువగానే ఉన్నాయి.

లైగర్ చిత్రం మొత్తం థియేట్రికల్ బిజినెస్ రూ.90 కోట్లకు జరిగింది. ఇది విజయ్ దేవరకొండ, మరియు పూరీ జగన్నాథ్ ఇరువురి కెరీర్ లో కూడా అత్యధిక రికార్డు. లైగర్ చిత్రంలో విజయ్ దేవరకొండ సరసన హీరోయిన్ గా అనన్య పాండే నటిస్తుండగా, తల్లి పాత్రలో రమ్య కృష్ణన్, మరియు ప్రఖ్యాత బాక్సింగ్ లెజెండ్ మైక్ టైసన్ కూడా ఒక అతిధి పాత్రలో నటించారు. కరణ్ జోహార్, పూరి సంయుక్తంగా ఈ చిత్రాన్ని నిర్మిస్తున్నారు. తెలుగు, తమిళం, కన్నడ, హిందీతో పాటు మలయాళంలో కూడా ఈ సినిమాని విడుదల చేస్తున్నారు. ఆగస్ట్ 25న ప్రపంచ వ్యాప్తంగా భారీ స్థాయిలో లైగర్ థియేటర్లలో విడుదల కానుంది.

విజయ్ దేవరకొండను ఆయన అభిమానులు మరియు ప్రేక్షకులు వెండితెరపై చూసి రెండేళ్లు దాటింది. ఆయన నటించిన చివరి చిత్రం వరల్డ్ ఫేమస్ లవర్ ఫిబ్రవరి 14, 2020న విడుదలైంది. ఈ చిత్రం బాక్సాఫీస్ వద్ద చాలా ఘోరంగా పరాజయం పాలైన సంగతి తెలిసిందే. అందువల్ల విజయ్ అభిమానులు లైగర్ పై భారీ నుంచి అతి భారీ ఆశలతో ఎదురు చూస్తున్నారు. మరి లైగర్ సినిమా అభిమానుల అంచనాలను అందుకుంటుందో లేదు చూడాలి.

గత కొంతకాలంగా తెలుగు సినిమా నిర్మాతల మండలి పలు సమావేశాలు నిర్వహించి కొన్ని కీలకమైన నిర్ణయాలు తీసుకునే యత్నం చేస్తున్న సంగతి తెలిసిందే. సినీ పరిశ్రమలో ఉన్న కొన్ని సమస్యలను పరిష్కరించేందుకు వారు నిరంతరం ప్రయత్నిస్తూనే ఉన్నారు. ఇటీవ‌ల పరిశ్రమ వారిని ప్రధానంగా ఇబ్బంది పెడుతున్న సమస్య ప్రేక్షకులు మునుపటిలా సినిమా హాళ్లకు తరలి రాకపోవడం.

కానీ అది కేవలం నిర్మాతలు మరియు డిస్ట్రిబ్యుటర్లు తమకు తామే తెచ్చుకున్న సమస్య అని ఖచ్చితంగా చెప్పచ్చు. ప్రేక్షకులు ఎప్పుడూ తమకు సరైన వినోదం అందించే సినిమాను చూసేందుకు సిద్ధంగా ఉంటారు. గత వారం విడుదలైన బింబిసార, సీతా రామం సినిమాల ఫలితాలే ఇందుకు నిదర్శనం. మంచి సినిమా వస్తే తెలుగు ప్రేక్షకులు ఇతర పరిశ్రమల కంటే ఎక్కువగా ఆదరిస్తారనడానికి ప్రధాన ఉదాహరణ ఆ రెండు చిత్రాల విజయమే.

అయితే ఎప్పటిలాగే తెలుగు నిర్మాతల మండలి తమ సినిమాల పరాజయాలకు వేరే కుంటి సాకులను వెతికే ప్రయత్నం చేయడం ఆశ్చర్యానికి గురి చేస్తుంది. ఇదివరకే నటీనటుల పారితోషికాలు మరియు ఓటిటి సంస్థలను అకారణంగా నిందించిన నిర్మాతల మండలి ఇప్పుడు మరో వింత ప్రతిపాదనతో ముందుకు వచ్చింది.

ఈ మేరకు తెలుగు సినీ నిర్మాతల మండలి ప్రతిపాదించిన కొత్త నిర్ణయం ఏంటంటే.. ఓవర్సీస్ ప్రీమియర్‌లను, భారత దేశంలో షోలను ఓకే సారి ప్రదర్శించాలని వారు చర్చించుకున్నట్లు తెలుస్తుంది. ఓవర్సీస్ షోల వల్ల వచ్చే ముందస్తు నెగటివ్ టాక్ ను నివారించడానికి వారు భారతదేశంలో మరియు ఓవర్సీస్‌లో ఒకే సమయంలో ప్రదర్శనలు నిర్వహించాలని కోరుకుంటున్నారు.

నిర్మాతల ప్రకారం, ఓవర్సీస్ ప్రీమియర్ షోల వల్ల సినిమాలకి నెగటివ్ టాక్ ఎక్కువగా ప్రచారం అయి, సినిమా బాక్సాఫీస్ ఫలితాన్ని ప్రభావితం చేస్తుందట. కానీ ఇక్కడ ఆలోచించాల్సిన విషయం ఏంటంటే ఒక సినిమా బాగోలేక పోతే ఏ షో ఎప్పుడు వేసినా అది పరాజయం పాలవుతుందన్న విషయాన్ని మాత్రం వారు ఎలా విస్మరిస్తున్నారో అర్థం కావట్లేదు.

తాజాగా నితిన్ హీరోగా నటించిన మాచర్ల నియోజకవర్గం సినిమా మంచి క్రేజ్ తోనే విడుదల అయినప్పటికీ, సినిమా ఏమాత్రం బాగొలేని కారణంగా నెగటివ్ టాక్ వచ్చి సినిమా ఫ్లాప్ అయింది, మరి ఈ సినిమాకి ఓవర్సీస్ లో, భారతదేశంలో చాలా దగ్గరగా షోలు వేశారు మరి అలాంటప్పుడు ఫ్లాప్ ఎందుకు అయింది?.. దానికి సమాధానం ఒక్కటే.. సినిమాలో సరైన కంటెంట్ లేకుంటే ఏ సినిమా అయినా ఫ్లాప్ కాక తప్పదు.

ఒక స్టార్ హీరో తన సినిమాకి తన నటనతో లేదా స్టార్డం తో భారీ క్రేజ్ సృష్టించి. ఆ సినిమాని విజయవంతం చేయడం సర్వ సాధారణంగా జరిగేదే. అందుకే వారిని నమ్మి నిర్మాతలు డబ్బు ఖర్చు చేసి సినిమాలు తీస్తుంటారు. అభిమానులు కూడా తమ హీరోను దేవుడిలా కొలుస్తుంటారు.

అయితే ఒక హీరో పదిహేనేళ్ల క్రితం నటించిన సినిమాను మళ్లీ విడుదల చేసి.. ఆ సినిమాను అభిమానులు మరియు ప్రేక్షకుల ఒక కొత్త సినిమా స్థాయిలో థియేటర్ల వద్దకు పరుగులు తీయడం మాత్రం సాధారణ విషయం కాదు.అలాంటి అసాధ్యాన్ని సుసాధ్యం చేసిన ఘనత సూపర్ స్టార్ మహేష్ బాబుకే దక్కుతుంది. ఇటీవల మహేష్ బాబు పుట్టిన రోజు సందర్భంగా ఆయన పూరి జగన్నాథ్ దర్శకత్వంలో నటించి ఇండస్ట్రీ హిట్ గా నిలిచిన పోకిరి సినిమాను ఆయన అభిమానులు ప్రత్యేక షోలు వేసి సంబరాలు జరుపుకున్నారు.

పోకిరి స్పెషల్ షోల ద్వారా నిజంగానే అద్భుతం సృష్టించింది అని చెప్పచ్చు. 375+ షోలతో ఒక బ్లాక్ బస్టర్ సినిమా స్థాయిలో ఈ స్పెషల్ షోలను మహేష్ అభిమానులు సందడి చేశారు. ఇది స్పెషల్ షోలలో అత్యధిక రికార్డు. మహేష్ బాబు కెరీర్ లోనే మరపురాని సినిమా అయిన పోకిరిని చూడటానికి అభిమానులు థియేటర్లకు ఒక ప్రవాహంలా వచ్చారు.

అయితే అభిమానులు తమ హీరోకు అంత ప్రేమ కురిపించడం సహజమే.. కానీ ఇతర సాధారణ ప్రేక్షకులు కూడా సినిమాని చూశారు అంటే అది ఖచ్చితంగా పోకిరి సినిమా మరియు మహేష్ బాబు మ్యాజిక్ అని చెప్పడంలో ఎలాంటి సందేహం లేదు. బాక్సాఫీస్ వర్గాల ప్రకారంపోకిరి స్పెషల్ షోలు ప్రపంచ వ్యాప్తంగా 1.73 కోట్ల గ్రాస్ వసూలు చేసినట్లు సమాచారం. ఇది కొందరి హీరోల మొదటి రోజు ఓపెనింగ్ కలెక్షన్ల కంటే ఎక్కువ.

మాములుగా అభిమానులను మరియు ప్రేక్షకులను ఇలాంటి స్పెషల్ షోలు ఆకట్టుకుంటాయని తెలిసినా.. ఈ స్థాయిలో వాటికి ఆదరణ ఉంటుందనే విషయం పోకిరి వల్లే తెలిసింది. ఈ క్రమంలో కొంతమంది నిర్మాతలు కొన్ని పాత క్లాసిక్ హిట్‌లను మళ్లీ రిమాస్టర్ చేసి హీరోలకి సంభందించిన ప్రత్యేక రోజులలో ఆయా హిట్ సినిమాలను ప్రదర్శించాలని ప్లాన్ చేస్తున్నారట.

ఒక్కో స్టార్ హీరోకి అలాంటి ప్రత్యేకమైన సినిమాలు ఉండనే ఉన్నాయి. రామ్ చరణ్ కు రంగస్థలం, అల్లు అర్జున్ రేసు గుర్రం, మరియు అలా వైకుంఠపురములో, పవన్ కళ్యాణ్ ఖుషి, గబ్బర్ సింగ్, ఎన్టీఆర్ కు టెంపర్, ఇక ప్రభాస్ కు మిర్చి వంటి సినిమాలు ఈ స్పెషల్ షోలకు సరిగ్గా సరిపోయే సినిమాలుగా చెప్పుకోవచ్చు.