సూపర్ స్టార్ మహేష్ బాబు సినిమాల్లో తనదైన కామెడీ టైమింగ్ తో అలరిస్తారు. అయితే బయట మాత్రం ఆయన చాలా తక్కువ మాట్లాడుతారు అని.. కాస్త క్లోజ్ అయితే కానీ ఆయన ఎవరితోనూ అంతగా మాట్లాడరు అని చాలా మంది అంటుంటారు. అలాగే టెలివిజన్ ఈవెంట్స్, షోస్ కి మహేష్ గెస్ట్ గా రావడం చాలా అరుదు. తన సినిమా ప్రమోషన్స్, బ్రాండ్ ఎండార్స్ మెంట్ ఇంటర్వ్యూలకు మాత్రమే హాజరవుతూ ఉంటారు.

అయితే తాజాగా మహేష్ జీ తెలుగులో ప్రసారమైన డాన్స్ ఇండియా డాన్స్ రియాలిటీ షోకి గెస్ట్ గా వచ్చారు. కూతురు సీతారతో పాటు ఆయన హాజరయ్యారు. ఎన్నడూ లేని విధంగా మహేష్ గడ్డం, మీసాలతో ఒక కొత్త లుక్ లో కనిపించడం అందరిలోనూ ఆసక్తికర చర్చగా మారింది. అతి త్వరలో త్రివిక్రమ్ సినిమా మొదలవనున్న నేపథ్యంలో.. మహేష్ ఆ సినిమా కోసమే కొత్త లుక్ ను సిద్ధం చేస్ పనిలో ఉన్నారని ప్రేక్షకులు మరియు అభిమానులు అనుకుంటున్నారు.

ఇదిలా ఉండగా, అసలు మహేష్ బాబు ఆ ఈవెంట్ కి గెస్ట్ గా రావడం వెనుక మరో కారణం కూడా ఉందంటున్నారు. మహేష్ తో జీ తెలుగు ఛానల్ భారీ డీల్ కుదుర్చుకుందట. ఆ ఒప్పందం ప్రకారం ఏడాది పాటు జీ తెలుగు ఛానల్ లో ప్రసారమయ్యే వివిధ షోలు, ఈవెంట్లు మరియు సీరియళ్లలో కనిపించేందుకు గాను 9 కోట్ల భారీ ఆఫర్ మహేష్ కు ఇస్తున్నారట. ఈ క్రమంలో జీ తెలుగు ఛానెల్ లో ప్రసారం అయ్యే సింగింగ్ షోస్, డాన్సింగ్ షోస్ ఫైనల్స్, ఇతర ప్రత్యేక ఈవెంట్స్ కి మహేష్ బాబు హాజరుకానున్నారట. ఇది ఒక రకంగా మహేష్ అభిమానులతో తో పాటు ప్రేక్షకులు ఆనందించాల్సిన విషయమే. ఎందుకంటే మహేష్ లాంటి స్టార్ ను తరచూ చూసే అవకాశం లభిస్తుంది కాబట్టి.

అయితే మహేష్ బాబు – జీ తెలుగు ఛానెల్ మధ్య డీల్ పట్ల మహేష్ అభిమానులు ఏ మాత్రం సంతోషంగా లేరని తెలుస్తోంది. పెద్ద హీరో అయి ఉండి ఇలా డాన్స్ షోలకు పాటల ప్రోగ్రాంలకు రావడం ఏంటని అభిమానులు బాధ పడుతున్నారు. స్టార్ హీరో అంటే ఒక స్థాయిని మెయింటైన్ చేయాలి కానీ ఇలా సీరియల్స్ లో లేదా ప్రతి ప్రోగ్రాంలో కనిపిస్తే అది ఆయన ఇమేజ్ కు ఏమాత్రం మంచిది కాదని మహేష్ అభిమానులు అభిప్రాయ పడుతున్నారు.

ఇక మహేష్ తదుపరి చిత్రం త్రివిక్రమ్ తో చేస్తున్న సంగతి తెలిసిందే. SSMB28 గా పిలవబడుతున్న మహేష్ ని సరికొత్తగా ప్రేక్షకులకి చూపించబోతున్నారు అని వినిపిస్తుంది. అలాగే వచ్చే ఏడాదలో రాజమౌళితో సినిమా కూడా సెట్స్ పైకి వెళ్ళే అవకాశాలు ఉన్నాయని అంటున్నారు.

రౌడీ స్టార్ విజయ్ దేవరకొండ ఎంతో ఉత్సాహం మరియు ఆత్మ విశ్వాసంతో ప్యాన్ ఇండియా స్థాయిలో బాక్సాఫీస్ ను షేక్ చేసే సక్సెస్ అందుకోవాలి అని లైగర్ సినిమాతో ప్రేక్షకుల ముందుకు వచ్చిన విషయం తెలిసిందే. పూరి జగన్నాథ్ దర్శకత్వంలో ఎంతో ప్రతిష్టాత్మకంగా ఈ సినిమాను నిర్మించారు. బాలీవుడ్ ప్రముఖ నిర్మాత అయిన కరణ్ జోహార్ ఈ సినిమా నిర్మాణంలో ఒక భాగం కావడంతో బాలీవుడ్ లో కూడా ఈ చిత్రానికి ఒక అగ్ర హీరోకు దక్కే స్థాయిలో ఈ సినిమాకు భారీ స్థాయిలో ధియేటర్లు లభించాయి.

ఇక ఈ చిత్ర ప్రచార సమయంలో హీరో విజయ్ దేవరకొండ చాలా కష్టపడ్డారు. కేవలం తెలుగు రాష్ట్రాల్లోనే కాకుండా దేశమంతా తిరిగి విస్తృతంగా ప్రచారం చేశారు. సినిమా ఒక అద్భుతం.. చూడకుంటే ఏదో కోల్పోతారు అన్న తరహాలో ప్రచారం చేయడం వల్ల, విజయ్ కు ఆల్రెడీ ప్రేక్షకుల్లో ఉన్న క్రేజ్ వల్ల లైగర్ సినిమాకు ఓపెనింగ్స్ అయితే భారీ స్థాయిలో వచ్చాయి.

హిందీలో కూడా విజయ్ దేవరకొండ కొత్త హీరో అయినప్పటికీ.. ఒక రెగ్యులర్ హీరో స్థాయిలో ఓపెనింగ్స్ అందుకుంది లైగర్. అయితే తొలి రోజు మార్నింగ్ షో నించే దారుణమైన టాక్ రావడంతో.. తెలుగు రాష్ట్రాల్లో కలెక్షన్స్ భారీగా డ్రాప్ అయ్యాయి. హిందీ కలెక్షన్స్ మాత్రం శుక్రవారం విడుదల చేయడంతో మూడు రోజుల వరకు బాగానే వచ్చాయి. ఇక హిందీ వెర్షన్ మొత్తంగా నాలుగు రోజులకు కలుపుకుని శుక్రవారం లైగర్ 15 కోట్ల నెట్ రాబట్టింది. ఇక పై ఎక్కడా లైగర్ చిత్రానికి షేర్ వచ్చే సూచనలు అటుంచి. ఈ శుక్రవారానికి అసలు ఏ ధియేటర్ లోనూ కనిపించనంత భారీ స్థాయిలో సినిమా డిజాస్టర్ కావడం అటు ట్రేడ్ వర్గాలను, ఇటు ఇండస్ట్రీ వర్గాలను షాక్ కు గురి చేసింది.

ఇక ఈ సినిమా ప్రపంచ వ్యాప్తంగా 90 కోట్ల బిజినెస్ జరుపుకోగా.. ఇప్పుడున్న పరిస్థితుల్లో ప్రపంచ వ్యాప్తంగా 30 కోట్ల షేర్ రావడం కూడా గగనంగా కనిపిస్తోంది. ముఖ్యంగా తెలుగు రాష్ట్రాల్లో పంపిణీదారులందరికీ చిత్రం భారీ నష్టాలను మిగిల్చింది. కాగా ఈ నష్టాలని భరించేది ఎవరు అన్న విషయం పై అంతర్గత వర్గాలలో చర్చనీయాంశంగా మారింది.

సినిమా విడుదలకు ముందు విజయ్ దేవరకొండ మాట్లాడుతూ, లైగర్ సినిమా మొత్తం ఇండియా బాక్సాఫీస్‌ను షేక్ చేస్తుందని.. కలెక్షన్ల పరంగా నా కౌంట్ 200 కోట్ల నుండి ప్రారంభమవుతుందని భారీ స్టేట్మెంట్లు ఇచ్చారు. కానీ సినిమా విడుదలైన తర్వాత 80% నష్టాలతో డిస్ట్రిబ్యూటర్లు మరియు ఎగ్జిబిటర్లు అల్లాడిపోయారు. ఇది ఎవరు కూడా ఊహించని పరిణామం.

సూపర్ స్టార్ మహేష్ బాబు పుట్టిన రోజు సందర్భంగా ఆయన అభిమానులు పోకిరి చిత్రాన్ని ప్రత్యేకంగా ప్రదర్శించి భారీ స్థాయిలో సంబరాలు చేసుకున్న సంగతి తెలిసిందే. ఐతే మహేష్ అభిమానులు పోకిరి స్పెషల్ షోల ప్రదర్శన జరిపించిన తీరు ఇతర అభిమానులకి ఒక సవాల్ గా నిలిచింది. వారి స్థాయిలో వేరే హీరో అభిమానులు తమ బలాన్ని చుపగలరా లేరా అన్న సందేహాలు అందరిలోనూ వ్యక్తం అయ్యాయి. పోకిరి చిత్ర ప్రత్యేక ప్రదర్శనల తో మహేష్ అభిమానులు రికార్డు సృష్టించారు. పోకిరి చిత్రం స్పెషల్ షోలతో మొత్తంగా 2 కోట్లకు పైగా గ్రాస్‌ను వసూలు చేసింది. అంతే కాకుండా 375 షోలకు పైగా ప్రదర్శించబడింది.

మహేష్ బాబు అభిమానులు తమ హీరో స్టార్‌డమ్‌ను ఆ స్థాయిలో ప్రదర్శించిన తర్వాత, పవన్ కళ్యాణ్ అభిమానులు ఆ సవాల్ ను స్వీకరించి రికార్డులను బ్రేక్ చేయడానికి నిర్ణయించుకున్నారు. పవన్ కళ్యాణ్ పుట్టినరోజు సందర్భంగా, ఆయన అభిమానులు బ్లాక్ బస్టర్ చిత్రం జల్సాని రీ-రిలీజ్ చేయడానికి ప్లాన్ చేసారు. ఇక జల్సా సినిమా స్పెషల్ షోల బుకింగ్స్ తో పాటు జల్సా స్పెషల్ షోల సంఖ్య కూడా పోకిరిని సులభంగా దాటేసేలా ఉన్నాయి.500 షోలకు పైగానే జల్సా సినిమా ప్రత్యేక ప్రదర్శనలు జరుగుతాయని అంచనా.

అయితే కథ ఇక్కడే ఆగిపోలేదు, మహేష్, పవన్ అభిమానుల తరువాత ఇప్పుడు ప్రభాస్ అభిమానులు కూడా ఈ ట్రెండ్ ను కొనసాగించనున్నారు. అక్టోబర్ 23న యంగ్ రెబల్ స్టార్ ప్రభాస్ పుట్టిన రోజు సందర్భంగా బిల్లా సినిమా స్పెషల్ షోలతో తమ బలాన్ని చూపించడానికి ప్రభాస్ అభిమానులు గట్టి ప్రయత్నాలే చేస్తున్నారట. ఈ మేరకు యంగ్ రెబల్ స్టార్ పుట్టినరోజు సందర్భంగా, బిల్లా సినిమా 4K ప్రింట్ వెర్షన్‌ను అన్ని ప్రాంతాలలో భారీ స్థాయిలో రీ-రిలీజ్ చేయడానికి అభిమానులు సన్నాహాలు చేస్తున్నారు.

అయితే ఇప్పుడు అందరిలోనూ ఉన్న ప్రశ్న ఏమిటంటే, మహేష్ బాబు మరియు పవన్ కళ్యాణ్ సాధించిన రికార్డులను ప్రభాస్ బ్రేక్ చేయగలడా లేదా అన్నదే ఆ ప్రశ్న. ఇదిలా ఉండగా ప్రభాస్ నటించిన అన్ని సినిమాల్లో.. అభిమానులు బిల్లా సినిమాను ఎంచుకోవడం అందరినీ ఆశ్చర్యపరిచింది. బిల్లా సినిమా తమిళ చిత్రం బిల్లాకి రీమేక్, తెలుగు రీమేక్ పరవాలేదు అనిపించింది తప్ప భారీ హిట్ ఏమీ కాదు. ప్రభాస్ కెరీర్ లో మాస్ అంశాలు నిండుగా కలిగినా ఛత్రపతి లేదా మిర్చి వంటి మంచి మాస్ ఎంటర్‌టైనర్‌లను స్పెషల్ షోల కోసం తీసుకుని ఉంటే బాగుండేది అని పలువురు సినీ వర్గాల వారు అభిప్రాయపడుతున్నారు.