బ్రహ్మాస్త్ర సినిమా ప్రి రిలీజ్ ఈవెంట్ హైదరాబాద్ లో నిన్న జరగాల్సింది. కానీ చివరి నిమిషంలో భద్రతా కారణాల వల్ల ఆ ఈవెంట్ ను రద్దు చేసి ప్రెస్ మీట్ నిర్వహించారు. ఈ సమావేశం భారీ విజయాన్ని సాధించింది. ఈ కార్యక్రమానికి ఎన్టీఆర్, రాజమౌళితో పాటు చిత్ర తారాగణం రణ్ బీర్ కపూర్, అలియా భట్ హాజరయ్యారు. ఈ కార్యక్రమంలో నిర్మాత కరణ్ జోహార్ కూడా పాల్గొన్నారు.

ఎన్టీఆర్ ఎప్పటిలానే తనదైన శైలిలో సినిమా పరిశ్రమ బాగోగుల గురించి ఆలోచింపజేసే ప్రసంగం చేసి ఆకట్టుకున్నారు, అయితే బ్రహ్మస్త్ర చిత్ర హీరో రణ్ బీర్ కపూర్ తన తెలుగు ప్రసంగంతో అందరి మనసులను దోచుకున్నారు.

తన కెరీర్ లోనే ఇది భారీ సినిమా అని.. ఎంతగానో ప్రచారం జరుపుకుని వచ్చిన ఈ బ్రహ్మస్త్ర సినిమా తెలుగు ప్రేక్షకులకు నచ్చుతుందని నమ్ముతున్నట్లు రణ్ బీర్ కపూర్ అన్నారు. అలాగే ఈవెంట్ కు తరలి వచ్చిన అక్కినేని మరియు నందమూరి అభిమానులకి కృతజ్ఞతలు తెలిపారు.తెలుగు ప్రేక్షకులు ఎప్పుడూ గొప్ప సినిమాలను ఎలా ఆదరిస్తారో అలాగే బ్రహ్మాస్త్రాన్ని కూడా ఆదరించాలని రణ్ బీర్ అభ్యర్థించారు. అంతే కాకుండా బ్రహ్మాస్త్ర 2 సినిమా ఈవెంట్‌లో తప్పకుండా తెలుగులో అనర్గళంగా మాట్లాడతానని హామీ ఇచ్చారు.

అయాన్ ముఖర్జీ దర్శకత్వం వహించిన ఈ సూపర్ హీరో చిత్రాన్ని దక్షిణాది భాషల్లో ఎస్ఎస్ రాజమౌళి సమర్పించనున్నారు. ఈ సినిమాలో రణ్ బీర్ సూపర్ హీరోగా నటిస్తుండగా, నాగార్జున ఆర్కియాలజిస్ట్ పాత్రలో కనిపించనున్నారు. అమితాబ్ బచ్చన్ ప్రొఫెసర్‌గా, అలియా భట్ రణబీర్ ప్రేమికురాలి పాత్రలో కనిపించనున్నారు.

ఈ చిత్రం మూడు భాగాలుగా విడుదల కానుంది. ప్రస్తుతం భారత దేశ వ్యాప్తంగా ప్రేక్షకులు ఎంతగానో ఎదురుచూస్తున్న ప్యాన్ ఇండియా చిత్రాలలో బ్రహ్మస్త్ర ఒకటి. బ్రహ్మాస్త్ర చిత్రం 9 సెప్టెంబర్ 2022న విడుదలకు సిద్ధంగా ఉంది. కాగా తదుపరి భాగాలు ఎప్పుడు విడుదల అవుతాయి అనేది త్వరలో ప్రకటిస్టారు.

ప్రస్తుతం తెలుగు సినీ ప్రేక్షకులకిదాదాపు ప్రతి శుక్రవారం అటు ధియేటర్లలో సినిమాలతో పాటు ఇటు ఓటిటిలో కూడా సినిమాలు విడుదలవుతున్నాయి. ఐతే ఇక్కడ గమనించాల్సిన విషయం ఏంటంటే దేని దారి దానిదే అన్నట్టు ధియేటర్ ప్రేక్షకులకు కావలసిన వినోదం వారికి దక్కుతుంది అలాగే ఇంట్లో టివిలో, మొబైల్ ఫోన్లలో చూసుకునే వీలుగా ఓటిటి కంటెంట్ రూపొందుతుంది. ఈ వారం ఇది వరకే ధియేటర్లలో విడుదల అయిన రెండు సినిమాలు ఓటిటిలో విడుదలవుతున్నాయి. రెండు చిత్రాలు కూడా కంటెంట్ పరంగా చాలా భిన్న నేపథ్యాలు కలిగిన సినిమాలు కావడం విశేషం. ఆ రెండు సినిమాలు మరెవో కాదు విక్రాంత్ రోణ మరియు వాంటెడ్ పండు గాడ్.

విక్రాంత్ రోణ ఒక యాక్షన్-అడ్వెంచర్ థ్రిల్లర్ అయితే, వాంటెడ్ పండుగాడు కామెడీతో మిళితమైన యాక్షన్-థ్రిల్లర్ గా తెరకెక్కింది.కన్నడ హీరో కిచ్చా సుదీప్ నటించగా.. అనూప్ భండారి దర్శకత్వంలో తెరకెక్కిన విక్రాంత్ రోణకన్నడ, హిందీ, తమిళం, తెలుగుతో పాటు మలయాళంలో కూడా భారీ స్థాయిలో అత్యధిక థియేటర్లలో విడుదలైంది. కాగా ఈ చిత్రం అత్యద్భుతమైన సెట్స్‌తో మరియు భారీ బడ్జెట్‌తో తెరకెక్కించారు. 3డిలో విడుదలైన తొలి కన్నడ సినిమా ఇదే కావడం మరో విశేషం. ఈ సినిమా చాలా వరకు ప్రేక్షకుల అంచనాలను అందుకొని వారి ఆదరణ పొందింది. అంతే కాకుండా నిర్మాతలకు కూడా లాభాలను తెచ్చిపెట్టింది. ముఖ్యంగా తెలుగు రాష్ట్రాలలో ఈ చిత్రం అనూహ్యంగా లాభదాయకమైన వ్యాపారం జరుపుకుంది. విక్రాంత్ రోణ ఇప్పుడు ZEE5 ప్లాట్‌ఫారమ్‌లో సెప్టెంబర్ 2 నుండి ప్రేక్షకులకు అందుబాటులోకి రానుంది.

మరో వైపు వాంటెడ్ పండుగాడ్ అనేది యాక్షన్ థ్రిల్లర్‌గా ప్రయత్నించినా చివరికి ఒక సిల్లీ కామెడీగా తయారైన సినిమా. నిజానికి టాలీవుడ్‌లోని చాలా మంది ప్రముఖ హాస్యనటులు ఈ చిత్రంలో ఉండటంతో ఈ చిత్రం ఖచ్చితంగా ఒక కామెడీ పండుగలా ఉంటుందని అందరూ భావించారు, కానీ తీరా సినిమా చూస్తే అసలు ఏమాత్రం భరించలేని ఒక భయంకరమైన అతి జుగుప్సాకరమైన సినిమాగా మారింది. ఈ చిత్రంలో సునీల్, శ్రీనివాసరెడ్డి, అనసూయ, సుధీర్, వెన్నెల కిషోర్, బ్రహ్మానందం, ఆమని, తనికెళ్ళ భరణి, విష్ణు ప్రియతో పాటు ఇతర ప్రముఖ కామెడీ/ క్యారెక్టర్ ఆర్టిస్టులు నటించారు. సెప్టెంబర్ 2 నుంచి ఆహా తెలుగులో వాంటెడ్ పండుగాడ్ ప్రసారం కానుంది.

తమిళ స్టార్ హీరో చియాన్ విక్రమ్ నటించిన తాజా చిత్రం కోబ్రా ఈ ఆగష్టు 31 న థియేటర్లలో విడుదలైంది. తొలి రోజు విమర్శకుల నుంచి కాస్త మిశ్రమ స్పందన లభించినా . బాక్స్ ఆఫీస్ వద్ద మాత్రం మొదటి రోజు అద్భుతమైన కలెక్షన్లను రాబట్టింది. ఈ చిత్రం పట్ల హైప్ కారణంగా కలెక్షన్లు బాగానే వచ్చాయి, అయితే సినిమా నిడివి మరీ ఎక్కువగా ఉన్న కారణంగా ప్రేక్షకుల నుండి టాక్ మాత్రం కాస్త నెగటివ్ గా వచ్చింది.

సైన్స్ ఫిక్షన్ థ్రిల్లర్ గా తెరకెక్కిన ఈ చిత్రానికి 183 నిమిషాలు చాలా ఎక్కువ లెంగ్త్ అని ప్రేక్షకులు భావించారు. విక్రమ్ నటనకు చాలా ప్రశంసలు లభించగా, సినిమాకు నిడివి మాత్రమే ప్రధాన సమస్యగా టాక్ వచ్చింది. అయితే దీన్ని దృష్టిలో ఉంచుకుని, ప్రేక్షకులను ఆకట్టుకోవడానికి కోబ్రా చిత్ర బృందం కొన్ని మార్పులు చేయాలని నిర్ణయించుకున్నారు.

దాదాపు 40 నిమిషాల పాటు సినిమాను తగ్గించాలని కోబ్రా చిత్ర బృందం ఒక సాహసోపేతమైన నిర్ణయం తీసుకున్నారు. సినిమాను 183 నిమిషాల నుంచి 144 నిమిషాలకు కుదించారు. అవసరం లేని సన్నివేశాల గురించి ప్రేక్షకుల నుండి ఫిర్యాదులు రావడంతో, నిడివి తగ్గించి సినిమాను మరింత ఆసక్తికరంగా మలచే విధంగా ఉండటం కోసం అలాంటి సన్నివేశాలను తొలగించాలని నిర్ణయించుకున్నారట.

ఇక నిడివి తగ్గించిన తరువాత కోబ్రా సినిమా కొత్త వెర్షన్ నేటి సాయంత్రం షోల నుండి ప్రదర్శించబడుతుంది. ఆ రకంగా నిడివి ఎక్కువైందని భావించిన ప్రేక్షకులను మరోసారి థియేటర్ల వద్దకు రప్పించే ప్రయత్నం ఇది. లెంగ్త్ మరియు కొన్ని అనవసరమైన సన్నివేశాల గురించి మాత్రమే ప్రధానంగా ప్రేక్షకులు ఫిర్యాదు చేశారు కాబట్టి, ఆ నిడివి తగ్గిందని తెలిస్తే వెండితెర పై విక్రమ్ మ్యాజిక్‌ను చూడటానికి ప్రేక్షకులు మళ్ళీ థియేటర్‌లకు తరలి వచ్చే అవకాశం ఉంది.

కోబ్రా సినిమాలో విక్రమ్ సరసన హీరోయిన్ గా శ్రీనిధి శెట్టి, మరో ముఖ్య పాత్రలో ఇర్ఫాన్ పఠాన్, మృణాళిని రవి, రోషన్ మాథ్యూ మరియు కెఎస్ రవికుమార్ తదితరులు నటించారు. ఈ చిత్రానికి అజయ్ జ్ఞానముత్తు దర్శకుడు కాగా ఏఆర్ రెహమాన్ సంగీత దర్శకుడుగా వ్యవహరించారు.