కరోనా వరుస దాడులతో కాస్త ఇరుకున పడ్డ తెలుగు సినిమా పరిశ్రమ మరియు తెలుగు రాష్ట్రాల థియేట్రికల్ మార్కెట్ కూడా మెల్లమెల్లగా పుంజుకుంటున్నా, OTT మార్కెట్ కూడా ఏమాత్రం వెనక్కి తగ్గడం లేదు. ఎందుకంటే మారుతున్న పరిస్థితులకు తగ్గట్టుగా అందరూ మారాల్సిన అవసరం ఎంతయినా ఉంది. అందుకే ఇప్పుడు ధియేటర్లలో విడుదల అవుతున్న సినిమాలతో పాటు అక్కడ సరిగ్గా ఆడే అవకాశం లేని కాస్త విభిన్నమైన ప్రయత్నాలు ఓటిటీలో విడుదల అవుతున్నాయి.

అందువల్ల ప్రేక్షకులకు అన్ని రకాల వినోద అంశాలు అందుతుంది.ఆరోగ్యకరమైన వాతావరణంలో అటు ధియేటర్ల వ్యవస్థ, ఇటు ఓటిటి వ్యవస్థ రెండూ కలిసి ముందుకి వెళ్లడం అనేది చాలా మంచిది. ప్రతి సంవత్సరం లెక్కలేనన్ని సినిమాలు వస్తుంటాయి, అలాంటప్పుడు ప్రతి సినిమాను థియేటర్లలో విడుదల చేయలేరు కదా. వెండి తెరపైకి రాలేని కొన్ని సినిమాలు ఇప్పుడు చిన్న తెరపై అంటే ఓటిటిలలో విడుదలై పేరు తెచ్చుకుంటున్నాయి.ఈ క్రమంలో రెండు కొత్త తెలుగు సినిమాలు ఇప్పుడు నేరుగా ఓటిటిలో ప్రసారం అవుతున్నాయి.

అందులో మొదటి సినిమా పెళ్లికూతురు పార్టీ.. అపర్ణ మల్లాది రచించి, దర్శకత్వం వహించిన ఈ సినిమా కథ, తన అక్క పెళ్లి నాశనం చేయడానికి ప్రయత్నించే ఒక చెల్లెలు గురించి హాస్యం జోడించి చెప్పే ఒక హాస్య చిత్రం. ఆమెకు ఆ పనిలో అమ్మమ్మ కూడా సహాయం చేస్తుంది. ఈ కథ ప్రేక్షకులని కడుపుబ్బా నవ్విస్తుంది. పెళ్లికూతురు పార్టీ సినిమా ఇప్పటికే ఇండస్ట్రీ వర్గాల్లో చక్కని స్పందన తెచ్చుకుంది. అలాగే చాలా మంది హృదయాలను గెలిచి ప్రశంసలు అందుకుంటున్నది. ప్రస్తుతం ఈ సినిమా ఆహా తెలుగులో ప్రసారం అవుతోంది.

ఇక ఈ వారం ప్రేక్షకుల ముందుకి వచ్చిన మరో సినిమా పంచతంత్ర కథలు. పెళ్లికూతురు పార్టీ చిత్రంతో పోలిస్తే పంచతంత్ర కథలు ఎక్కువగా ప్రాచుర్యం పొందలేదు. ఈ సినిమాకు గంగనమోని శేఖర్ రచనతో పాటు దర్శకత్వం కూడా వహించారు, ఈ చిత్రం సామాజిక సమస్యలను, వాటి పరిష్కారాల గురించి చర్చించే 5 కథల సమూహం. కులం విలువ, సెక్స్, వ్యభిచారం, స్వేచ్ఛ మరియు ప్రేమ అంశాల చుట్టూ తిరుగుతుంది. కేర్ ఆఫ్ కంచరపాలెం స్టైల్‌లో వేరు వేరు కథలతో ఒక సినిమాగా పంచతంత్ర కథలు సినిమాని చిత్రీకరించారు. ఈ సినిమా కూడా ఆహా తెలుగులోనే ప్రసారం అవుతోంది.

గత వారం లైగర్ వంటి డిజాస్టర్ తర్వాత, ఈరోజు రెండు కొత్త తెలుగు సినిమాలు పెద్ద తెరపైకి వచ్చాయి. మొదటిది ఫస్ట్ డే ఫస్ట్ షో, ఈ చిత్రానికి జాతి రత్నాలు దర్శకుడు అనుదీప్ కెవి కథ అందించారు. ఇక రెండో సినిమా వైష్ణవ్ తేజ్ నటించిన రొమాంటిక్ కామెడీ ఎంటర్టైనర్ రంగ రంగ వైభవంగా.రెండు చిత్రాల ప్రీమియర్ షోల నుండి పబ్లిక్ రివ్యూ ఎలా ఉందో చూద్దాం.

ఫస్ట్ డే ఫస్ట్ షో చాలా విషయాలను జొప్పించటానికి ప్రయత్నించినప్పటికీ సినిమా తీరు ప్రేక్షకులకు విసుగు పుట్టించేలా తయారైంది. జాతి రత్నాలు సినిమాలో లాగానే కామెడీతో మ్యాజిక్‌ చేసే ప్రయత్నం జరిగింది కానీ ఆ ప్రయత్నంలో చిత్ర బృందం అన్ని రకాలుగా ఘోరంగా విఫలమైంది.

ప్రేక్షకులను నవ్వించే లేదా అలరించే ఏ ఒక్క సన్నివేశం కూడా లేదని వాపోయారు. అనుదీప్ కథ రాసినప్పటికీ ఈ చిత్రానికి దర్శకత్వం వహించింది వంశీదర్ గౌడ్, లక్ష్మీనారాయణ. జాతి రత్నాలు సినిమా నవీన్ పోలిశెట్టి, రాహుల్ రామకృష్ణ మరియు ప్రియదర్శి వంటి ప్రతిభావంతమైన నటుల వల్ల ప్రేక్షకులని ఆకట్టుకుంది. ఫస్ట్ డే ఫస్ట్ షో అలాంటి ఆకట్టుకునే మాయాజాలం ప్రదర్శించడంలో విఫలమైంది.

ఇక రంగ రంగ వైభవంగా సినిమా కూడా పెద్దగా గొప్ప టాక్ తెచ్చుకోలేదు. సినిమాలో ఫస్టాప్ వరకూ హీరో – హీరోయిన్ల మధ్య చిలిపి గొడవలు చూపిస్తూ కాస్త సరదాగా సాగినా.. సెకండాఫ్ కి వచ్చేసరికి ఎమోషనల్ సన్నివేశాలు ఏమాత్రం ఆకట్టుకోలేదు. ఏ క్షణంలో కూడా పాత్రలతో, సినిమాతో ప్రేక్షకులు కనెక్ట్ అవకుండా ఉన్న ఈ సినిమా కూడా డిజాస్టర్ దిశగా పయనిస్తోందనే చెప్పాలి.

ఓవరాల్‌గా, ఈ రోజు విడుదలైన రెండు సినిమాలు కూడా ప్రేక్షకుల పై ఎటువంటి ప్రభావం చూపలేకపోయాయి. అసలు రెండు సినిమాలు విడుదలైన సందడి కూడా చాలా తక్కువగా ఉంది. ఇక ఇలా నెగటివ్ టాక్ రావడంతో రెండు సినిమాలు కూడా బాక్స్ ఆఫీసు వద్ద అట్టర్ ఫ్లాప్ అయ్యే అవకాశాలు ఎక్కువగా ఉన్నాయి. ఫస్ట్ డే ఫస్ట్ షో ప్రీ రిలీజ్ ఈవెంట్ లో చిరంజీవి చెప్పినట్టు కంటెంట్ బాగుంటేనే జనాలు థియేటర్లకు వస్తారనే విషయం మరోసారి రుజువైంది.

పోస్ట్ ప్రో అనేది ఒక పాన్ ఇండియా డబ్బింగ్ కంపెనీ. ఈ కంపెనీని వసంత్ స్థాపించారు. పోస్ట్ ప్రో కంపెనీ ద్వారానే కార్తికేయ 2 చిత్రం పోస్ట్ ప్రొడక్షన్ మరియు అన్ని భాషల్లోకి డబ్బింగ్ జరుపుకుంది. తెలుగు సినిమాలను ఇతర భాషల్లో అనువదించే సమయంలో నిర్మాతలు ఎదుర్కొంటున్న సమస్యలను దృష్టిలో ఉంచుకొని అన్ని భాషల అనువాదాల పనులు కూడా ఒకేసారి హైదరాబాద్ లో జరిగెందుకు వీలుగా పోస్ట్ ప్రో కంపెనీ ఏర్పాటు చేయబడింది.

ఈ సందర్భంగా కార్తీకేయ 2 చిత్ర నిర్మాతలు మాట్లాడుతూ… తెలుగు సినిమా చరిత్రలో మొట్టమొదటి సారిగా ఇతర భాషల్లో ఉన్న డబ్బింగ్ కళాకారులతో పాటు రచయితలను కూడా హైదరాబాద్ కు రప్పించి, నిర్మాతల సౌలభ్యం కోసం కార్తికేయ 2 సినిమా డబ్బింగ్ కార్యక్రమాలను పోస్ట్ ప్రో పాన్ ఇండియా డబ్బింగ్ కంపెనీ హైదరాబాద్ లో పూర్తి చేయడం జరిగింది. కార్తికేయ 2 చిత్రానికి హైదరాబాద్ లోనే డబ్బింగ్ పనులు పూర్తి చేయడం ద్వారా మాకు బడ్జెట్ కంట్రోల్ లో ఉండడమే కాకుండా.. దర్శకుడు చందూ మొండేటి ఈ సినిమా అనువాద కార్యక్రమాలను రోజూ చూసుకొని అవసరమైన మార్పులు చేసుకోనే అవకాశం లభించింది. దాంతో పాటు చాలా సమయం ఆదా అయ్యింది అని కూడా అన్నారు. సినిమా విడుదల చివరి వరకు తమతోనే ఉండి అన్ని రకాలుగా వెన్నుదన్నుగా నిలిచి సహకరించిన పోస్ట్ ప్రో డబ్బింగ్ కంపెనీ వసంత్ గారికి కార్తీకేయ చిత్ర నిర్మాతలు కృతజ్ఞతలు తెలిపారు.

కార్తికేయ 2 సినిమాను ఇతర భాషల్లో అనువదించే అవకాశాన్ని ఎంతో నమ్మకంతో పోస్ట్ ప్రో కంపెనీకి అప్పగించిన నిర్మాతలు టీ. జి. విశ్వ ప్రసాద్ గారికి, వివేక్ కుచిబొట్ల గారికి అభిషేక్ అగర్వాల్ గారికి, దర్శకులు చెందు మొండేటి గారికి హీరో నిఖిల్ సిద్ధార్థ్ మొదలగు వారందరికీ పోస్ట్ ప్రో కంపెనీ అధినేత వసంత్ గారు కృతజ్ఞతలు తెలిపారు. కార్తికేయ 2 సినిమానే కాకుండా.. ప్రస్తుతం పోస్ట్ ప్రో కంపెనీ పలు భారీ సినిమాలను కూడా అనువదించే పనిలో ఉందని తెలుస్తోంది.

ఇక తెలుగు చిత్ర పరిశ్రమ చరిత్రలోనే అద్భుతమైన ప్రదర్శన కనబరిచిన కార్తీకేయ 2 చిత్రం విశేష స్థాయిలో ప్రేక్షకులను అలరించిన విషయం తెలిసిందే. నిఖిల్ సిద్దార్థ్ హీరోగా నటించిన ఈ చిత్రానికి చందూ మొండేటి దర్శకత్వం వహించారు. ఇందులో అనుపమ పరమేశ్వరన్ హీరోయిన్‌గా నటించారు. ఈ చిత్రాన్ని అభిషేక్ అగర్వాల్, టీజీ విశ్వ ప్రసాద్ సంయుక్తంగా నిర్మించారు. కాల భైరవ సంగీతం అందించారు. కాగా ప్రముఖ బాలీవుడ్ నటుడు అనుపమ్ ఖేర్ ఒక కీలక అతిథి పాత్రను చేశారు. ఈ చిత్రం తెలుగు, తమిళం, కన్నడ, మలయాళం, హిందీలో విడుదలైంది.

కన్నడ స్టార్ యశ్ హీరోగా.. ప్రశాంత్ నీల్ దర్శకత్వంలో రూపొందిన కేజీఎఫ్ 2 చిత్రం ఈ ఏడాదిలో భారతీయ సినిమా పరిశ్రమలోనే భారీ బ్లాక్ బస్టర్ గా నిలిచింది. కాగా గత వారం ఈ సినిమా టీవీలో తొలిసారి ప్రసారం అయ్యింది. ఈ సినిమాకు వచ్చిన టీఆర్‌పీ రేటింగ్ ఎంతంటే…

ఈ ఏడాది యశ్ హీరోగా నటించిన కేజీఎఫ్ 2 సృష్టించిన హంగామా అంతా ఇంతా కాదు. కన్నడ, తమిళ, హిందీ, తెలుగు ఇలా ప్రతి భాషలోనూ విశేష స్థాయిలో ప్రేక్షకులని ఆకట్టుకుని ఈ సంవత్సరం హయ్యెస్ట్ గ్రాసర్ గా కేజీఎఫ్ 2 నిలిచింది. బాక్సాఫీస్ వద్ద వసూళ్ల వర్షాన్ని కురిపించిన ఈ సినిమా ఏకంగా 1200 కోట్లకుపైగా కలెక్షన్స్ రాబట్టడం విశేషం. మొత్తంగా దేశ సినీ చరిత్రలో అత్యధిక కలెక్షన్స్ రాబట్టిన సినిమాల్లో ఒకటిగా కేజీఎఫ్ 2 నిలిచింది.

రాకీ భాయ్ పాత్రలో పండిన హీరోయిజం.. ఆ పాత్రలో యశ్ అభినయం అద్భుతంగా ఉండి ప్రేక్షకులని విపరీతంగా ఆకట్టుకున్నాయి. ఇక దర్శకుడు ప్రశాంత్ నీల్ మాస్ టేకింగ్ కు ప్రేక్షకులు శభాష్ అన్నారు. అయితే థియేటర్లలో సంచలన విజయం సాధించిన ఈ సినిమా బుల్లితెరపై మాత్రం అనుకున్న స్థాయిలో ఆకట్టుకోలేకపోయింది.

ఇటీవల జీ తెలుగులో ఈ సినిమా ప్రసారం అయ్యింది. ఇదే తొలి టీవీ ప్రీమియర్ కావడంతో చిత్ర యూనిట్ కూడా భారీగా ప్రమోషన్స్ చేసింది. కానీ ఈ సినిమాకు కేవలం 9.15 టీఆర్‌పీ రేటింగ్ మాత్రమే వచ్చింది. ఇది మొదటి భాగం కంటే తక్కువ అని నివేదికలు వెల్లడిస్తున్నాయి. కేజీఎఫ్ పార్ట్ వన్ 11.9 టీఆర్‌పీ రేటింగ్ ను సొంతం చేసుకుంది. అంత భారీ హిట్ అయిన సినిమాకు పార్ట్ వన్ కంటే తక్కువగా టీఆర్‌పీ రేటింగ్స్ రావడం చర్చనీయాంశంగా మారింది.

ఇక మిగతా డబ్బింగ్ సినిమాల టీఆర్పీ రేటింగులు చూస్తే.. రోబో 19.4, బిచ్చగాడు 18.75, కబాలి 14.52 టీఆర్‌పీ రేటింగ్ సాధించాయి. ఆ రకంగా చూస్తే.. రొబో, బిచ్చగాడు సినిమాల్లో సగం టీఆర్‌పీ రేటింగ్ కూడా కేజీఎఫ్ 2కు రాకపోవడం ఇప్పుడు అందరినీ ఆశ్చర్యపరిచింది.

ఇదిలా ఉండగా . ఆర్ ఆర్ ఆర్ మరియు కేజీఫ్ -2 రెండు సినిమాలు కూడా బాక్స్ ఆఫీసు మరియు ఓటిటీలో తలపడిన విషయం తెలిసిందే. అయితే బాక్సాఫీస్ వద్ద కేజీఫ్-2 పై చేయి సాధించినా.. ఓటీటీ మరియు శాటిలైట్ టెలికాస్ట్ లో మాత్రం ఆర్ ఆర్ ఆర్ కె విజయం లభించింది. ఆర్ ఆర్ ఆర్ సినిమాలు టీఆర్పీ రేటింగ్ 18.36 వచ్చిన సంగతి తెలిసిందే.