ఈ వారం విడుదల కానున్న మణిరత్నం యొక్క పొన్నియిన్ సెల్వన్ 2 ప్రీ రిలీజ్ ఈవెంట్ నిన్న హైదరాబాద్ లో అంగరంగ వైభవంగా జరిగింది. ఈ కార్యక్రమానికి దర్శకుడు మణిరత్నం, విక్రమ్, కార్తీ, త్రిష, ఐశ్వర్యరాయ్, జయం రవి తదితరులు హాజరయ్యారు. ఈ చిత్రం గురించి, తెలుగు ప్రేక్షకుల ఆదరణ గురించి చిత్ర బృందం సుదీర్ఘంగా మాట్లాడింది.

ఈ సినిమా స్థాయి, గ్రాండియర్ గురించి మణిరత్నం మాట్లాడుతూ.. పాన్ ఇండియా సినిమాలను ఇంత భారీ స్థాయిలో తెరకెక్కించడానికి మార్గం సుగమం చేసింది ఎస్ ఎస్ రాజమౌళి ఏ అని అన్నారు. బాహుబలి గనక రెండు భాగాలుగా విడుదలయి ఇంతటి విజయం సాధించకపోయి ఉంటే పొన్నియిన్ సెల్వన్ ను రెండు భాగాలుగా ఊహించడం ఆయనకు కష్టమయ్యేది అని తెలిపారు.

మణిరత్నం చెప్పింది నూటికి నూరుపాళ్ళు నిజం అనే చెప్పాలి. బాహుబలి ఘనవిజయం వల్లే పొన్నియిన్ సెల్వన్, కేజీఎఫ్, పుష్ప, రోబో వంటి చిత్రాల నిర్మాతలు పాన్ ఇండియా లెవల్లో భారీ స్థాయిలో నిర్మించి విడుదల చేసే పరిస్థితి ఏర్పడింది.

పొన్నియిన్ సెల్వన్ ఏప్రిల్ 28న ప్రపంచ వ్యాప్తంగా విడుదల కానుంది. ఈ సినిమా అడ్వాన్స్ బుకింగ్స్ నిజానికి అంతగా ఆశాజనకంగా లేవనే చెప్పాలి. అయితే మణిరత్నం అండ్ కో పాజిటివ్ టాక్ తెచ్చుకుని ఈ సినిమా ప్రపంచ బాక్సాఫీస్ వద్ద భారీ స్థాయిలో ప్రభావం చూపే అవకాశం ఉంటుందని ఆశిస్తున్నారు.

తెలుగు సినిమా పరిశ్రమలో నైజాం డిస్ట్రిబ్యూషన్ మార్కెట్ ను దిల్ రాజు, ఏషియన్ గ్రూప్ ఏళ్ల తరబడి నిర్వహిస్తున్నాయి. తాజాగా మైత్రీ మూవీ మేకర్స్ కూడా ఈ క్లబ్ లో చేరి కొన్ని సినిమాలను డిస్ట్రిబ్యూట్ చేయడం మొదలు పెట్టింది. పై వారంతా బడా నిర్మాతలే అయినప్పటికీ ఈ మధ్య కాలంలో ఈ ఫీల్డ్ లో పుట్టుకొచ్చిన పేరు వరంగల్ శ్రీను.

మాస్ మహరాజ్ రవితేజ నటించిన క్రాక్ వంటి సూపర్ సక్సెస్ తో మంచి గుర్తింపు తెచ్చుకున్న ఈ డిస్ట్రిబ్యూటర్ ఒక దశలో దిల్ రాజు ఆధిపత్యానికి సవాలు విసిరారు. ఆ పైన పలువురు టాలీవుడ్ ప్రముఖ హీరోల సినిమాల హక్కులను సొంతం చేసుకుని అందరినీ ఆశ్చర్యపరిచారు. వరంగల్ శ్రీను, దిల్ రాజు మధ్య మాటల యుద్ధం కూడా జరిగింది. ఆ తర్వాత ఈ డిస్ట్రిబ్యూటర్ కు ఆచార్య, లైగర్ రూపంలో భారీ ఎదురుదెబ్బలు తగిలాయి.

టాలీవుడ్ లో బిగ్గెస్ట్ డిజాస్టర్ గా నిలిచింది ఆచార్య. ప్రధాన ప్రాంతాల్లో భారీ నష్టం వాటిల్లిందని, అన్ని పార్టీలకు 50 శాతం నష్టం వాటిల్లిందని ట్రేడ్ వర్గాల వారు అంచనా వేశారు. అదే విధంగా లైగర్ కూడా వ్యాపారంలో భాగం అయిన అన్ని పార్టీలకు కూడా ఎవరూ ఊహించని రీతిలో భారీ నష్టాలను తెచ్చి పెట్టింది.

ఈ నష్టాల తాకిడికి వరంగల్ శ్రీను ఏకంగా ఈ ఫీల్డ్ నే వదిలేశారని సమాచారం అందుతోంది. ప్రస్తుతానికి ఆయన సినిమాలేవీ కొనడం లేదని, డిస్ట్రిబ్యూషన్ బిజినెస్ నుంచి పూర్తిగా తప్పుకున్నట్లు తెలుస్తోంది.

ఏప్రిల్ 21న విడుదలైన సాయిధరమ్ తేజ్ విరూపాక్ష ఓవర్సీస్ ప్రీమియర్స్ నుంచే పాజిటివ్ టాక్ తో పాటు మంచి రేటింగ్స్ తెచ్చుకుని తెలుగు రాష్ట్రాల్లోనూ అదే ఊపుని కొనసాగించింది. ఇక సినిమా విడుదలకు ముందు చిత్ర యూనిట్ ఇండస్ట్రీ వర్గాల కోసం స్పెషల్ ప్రీమియర్ ఏర్పాటు చేయగా, ఆ షోకు మంచి రెస్పాన్స్ వచ్చింది. విరూపాక్ష టీం విడుదలకు సినిమా పై చాలా కాన్ఫిడెన్స్ చూపించగా అది నిజమై ఇప్పుడు సినిమా భారీ బ్లాక్ బస్టర్ దిశగా దూసుకెళ్తోంది.

ఈ సినిమా థియేట్రికల్స్ 25 కోట్లకు అమ్ముడుపోగా, ఓపెనింగ్ వీకెండ్ లోనే 20 కోట్లకు పైగా షేర్ కలెక్ట్ చేసిన ఈ సినిమా రేపటి కల్లా బ్రేక్ ఈవెన్ సాధిస్తుందని ట్రేడ్ వర్గాలు అంచనా వేస్తున్నాయి. ఇప్పుడు ఈ సినిమా పై బాక్సాఫీస్ అంచనాలు భారీగా ఉన్నాయి. ప్రపంచ వ్యాప్తంగా 40 కోట్లకు పైగా షేర్ వసూలు చేసే అవకాశాలు ఉన్నాయని, ఇది టైర్-2 సినిమాకి చాలా భారీ ఘనత అని అంటున్నారు.

విరూపాక్ష సినిమా సృష్టించిన థ్రిల్లింగ్ ఇంపాక్ట్ మరియు సాంకేతిక నైపుణ్యానికి ప్రేక్షకులు మంత్రముగ్ధులవడంతో వారంతా రుద్రవనం ప్రపంచంలో లీనమైపోయారు. ముఖ్యంగా హీరోయిన్ సంయుక్త మీనన్ తన అద్భుతమైన నటనకు మంచి ప్రశంసలు అందుకుంటున్నారు.

శ్రీ వెంకటేశ్వర సినీ చిత్ర పతాకం పై బి.వి.ఎస్.ఎన్.ప్రసాద్ నిర్మించిన విరూపాక్ష చిత్రం తెలుగు, హిందీ, తమిళం, కన్నడ, మలయాళం సహా పలు భాషల్లో విడుదల కావాల్సి ఉన్నా అనుకోని కారణాల వల్ల తెలుగులోనే విడుదలైంది. బి.అజనీష్ లోక్ నాథ్ సంగీతం అందించిన ఈ చిత్రానికి షామ్దత్ సైనుద్దీన్ సినిమాటోగ్రఫీ అందించారు.

సాయి ధరమ్ తేజ్, సంయుక్తా మీనన్ హీరో హీరోయిన్లుగా నటించిన ఈ చిత్రంలో రాజీవ్ కనకాల, బ్రహ్మాజీ, అజయ్, సునీల్ ఇతర కీలక పాత్రలు పోషించారు. రుద్రవనం అనే గ్రామంలో జరిగే అపరిష్కృత అంశాల ఆధారంగా రూపొందిన ఈ సినిమాకి సుకుమార్ రచనా భాద్యతలను నిర్వర్తించారు.

తెలుగు చిత్ర పరిశ్రమలో సక్సెస్ రేట్ చాలా తక్కువ అనేది అందరికీ తెలిసిన విషయమే.. అయితే ఇలాంటి పరిస్తితుల్లో కూడా కొందరు దర్శకులు అనవసరంగా తమ సమయాన్ని, డబ్బును సినిమాల నిర్మాణంలో పెట్టి అనవసరమైన ఆర్థిక ఒత్తిళ్లతో తమ ప్రాణాలను పణంగా పెడుతున్నారు. ఒక దర్శకుడు నిర్మాణంలో నిమగ్నం కాకపోవడమే మంచిది అని చెప్పాలి.

దర్శకుడు కొరటాల శివ తన గత చిత్రం ఆచార్య నిర్మాణం, వ్యాపారంలో పాలుపంచుకోవడంతో వ్యక్తిగతంగా, ఆర్థికంగా ఇంత ఇబ్బంది పడ్డాడు అనేది తెలిసిందే. ఇప్పుడు మరో దర్శకుడు గుణశేఖర్ కూడా తన తాజా చిత్రం శాకుంతలం విషయంలోనూ అదే జరిగిందని కూడా మనకు తెలుసు.

వీరిద్దరే కాదు చాలా మంది దర్శకులు కూడా తమ సినిమాల నిర్మాణంలో పాలుపంచుకుని అదే తప్పు చేస్తున్నారు. దర్శకత్వం మరియు నిర్మాణ బాధ్యతలను ఒకేసారి నిర్వహించడం అనేది చాలా కష్టమైన పని. అలాంటి రెండు భాద్యతలను ఒకేసారి నిర్వహించడానికి చాలా సమయం మరియు శక్తిని కేటాయించాల్సి ఉంటుంది.

అయితే ఎంత కష్టపడినా తెలుగు చిత్ర పరిశ్రమలో సక్సెస్ రేట్ చాలా తక్కువగా ఉండటంతో దర్శకులు తమ సినిమా విజయం పై ధీమాగా ఉండలేకపోతున్నారు. కాబట్టి ఒక సినిమా హిట్ అయితే దర్శకులకు ఇబ్బంది ఉండదు కానీ అది ఫెయిల్ అయినప్పుడు మాత్రం ఆ ఫెయిల్యూర్ ఇమేజ్ వారి కెరీర్ పై ప్రభావం చూపుతుంది కాబట్టి తర్వాతి సినిమాలకు అవకాశం రావడం చాలా కష్టంగా మారుతుంది.