కేరళ నుండి తెలుగు సినీ పరిశ్రమలో అడుగుపెట్టి నటిగా చక్కని పేరును మరియు గుర్తింపును తెచ్చుకున్న నటి నిత్యా మీనన్. సహజంగా నటిస్తారు అనే పేరు ఉన్న నిత్యా, అందుకు తగ్గట్టే తను చేసే సినిమాలను చాలా జాగర్తగా ఎంచుకుంటారు. సంఖ్య కన్నా మంచి పాత్రలకే ఆవిడ ఓటు వేస్తారు.

ఇదిలా ఉండగా ఈ కేరళ బ్యూటీ పెళ్ళి చేసుకోబోతోందనే ఒక పుకారు ఈ మధ్య తెగ చక్కర్లు కొట్టింది. ఓ మలయాళ నటుడితో నిత్యా మీనన్ పెళ్ళి పీటలెక్కబోతున్నారని గత కొద్ది రోజులుగా ప్రచారం జరుగుతోన్న విషయం విదితమే. ఫలానా హీరోని నిత్యా మీనన్ పెళ్ళాడనుందంటూ ఆ హీరో పేర్లను కూడా ప్రచారంలోకి తెచ్చేశారు. దాదాపు నలుగురైదుగురు హీరోల పేర్లు ప్రచారంలోకి వచ్చాయి.

తన పెళ్ళి గురించి సోషల్ మీడియాలో, అలాగే మీడియాలో వస్తున్న వార్తల్లో నిజం లేదని తాజాగా ఓ ఇంటర్వ్యూలో నిత్యా మీనన్ స్పష్టం చేసేసారు. కొందరు కావాలనే చేస్తున్న ఈ దుష్ప్రచారం చాలా బాధాకరంగా ఉందని, ఇకపై ఈ వార్తలు ఇకనైనా ఆగిపోతాయని తాను ఆశిస్తున్నట్లు నిత్యామీనన్ చెప్పారు.

ఇటీవలే పవన్ కళ్యాణ్ సరసన భీమ్లా నాయక్ లో నటించిన తరువాత..ప్రస్తుతం తెలుగుతో పాటు తమిళ, మలయాళ, హిందీ సినిమాలతో, అలాగే తెలుగు ఇండియన్ ఐడల్ వంటి ఓటీటీ షోలలోనూ నిత్యా మీనన్ బిజీగా ఉన్నారు.

అయితే గతంలోనూ నిత్యా మీనన్ పెళ్ళి గురించి చాలా పుకార్లు వచ్చాయి. ప్రేమ పెళ్ళి, పెద్దలు కుదిర్చిన పెళ్ళి.. ఇలా రకరకాల వార్తలు వచ్చాయి.. అవన్నీ ఉట్టి గాలి వార్తలని ఆ తరువాత రుజువైంది. ఇప్పుడు కూడా అదే జరిగింది. ఏదేమైనా కేవలం సినీరంగంలో ఉన్నంత మాత్రాన ఇలా హీరో హీరోయిన్ల వ్యక్తిగత జీవితంలోని విషయాల గురించి ఇలా పిచ్చి వార్తలు ప్రచారం ఎందుకు చేస్తారో అందువల్ల ఏం లాభం ఉంటుందో ఎవరికీ తెలియదు..

తెలుగు సినిమా పరిశ్రమ నంబర్ వన్ దర్శకుడు రాజమౌళి దర్శకత్వంలో మెగా పవర్ స్టార్ రామ్ చరణ్, యంగ్ టైగర్ ఎన్టీఆర్ కాంబినేషన్లో వచ్చిన ఆర్‌ఆర్‌ఆర్ సినిమా ప్రపంచ వ్యాప్తంగా బాక్స్ ఆఫీస్ వద్ద విజయం సాధించి భారీ కలెక్షన్లని రాబట్టిన సంగతి తెలిసిందే. తెలుగు రాష్ట్రాలు, భారత దేశంతో పాటు ప్రపంచంలోని పలు దేశాల్లో ఈ సినిమా విడుదల అయింది. మన తెలుగు సినిమాలకి వేరే దేశాల్లో కూడా మంచి మార్కెట్ ను సంపాదించి పెట్టే పనిలో ఉంది ఆర్ ఆర్ ఆర్ సినిమా.

ఇది వరకే అమెరికా, ఆస్ట్రేలియా లో ఇప్పటివరకు ఏ భారతీయ సినిమా కలెక్ట్ చేయనన్ని వసూళ్లు రాబట్టింది. ఈ రెండు దేశాలే కాక పలు దేశాల్లో కూడా ఈ సినిమా మంచి విజయం సాధించి వసూళ్లు కొల్లగొట్టింది.ఆర్ఆర్ఆర్ సినిమాని ఇప్పుడు చైనా, జపాన్ తో సహా మరో ముప్పై దేశాల్లో త్వరలో విడుదల చేయడానికి చిత్ర యూనిట్ సన్నాహాలు చేస్తున్నారు.

ఇటీవల మన భారతీయ సినిమాలకి చైనా, జపాన్ మంచి మార్కెట్ గా మారుతుంది. గత కొన్నేళ్లలో అక్కడ విడుదలైన హిందీ సినిమాలు దంగల్, సీక్రెట్ సూపర్ స్టార్ సినిమాలు భారీ విజయాలు సాధించాయి. అలాగే మన తెలుగు సినిమాలైన ప్రభాస్ బాహుబలి, సాహో సినిమాలు చైనా, జపాన్ లో మంచి స్పందనే రాబట్టాయి. దీంతో ముందుగా మన దేశంలో పాటు అమెరికా తదితర దేశాల్లో సినిమాలు రిలీజ్ అయిన తర్వాత కాస్త గ్యాప్ ఇచ్చి అటు పైన చైనా, జపాన్ దేశాల్లో కూడా మన సినిమాలని విడుదల చేయటం ఇప్పుడు కొత్త ట్రెండ్ గా మొదలయింది.

ఇటీవల రామ్ చరణ్ ఓ ఇంటర్వ్యూలో మాట్లాడుతూ.. ఆర్ ఆర్ ఆర్ ను ప్రపంచవ్యాప్తంగా మరో 30కి పైగా వివిధ దేశాలలో త్వరలో విడుదల చేయడానికి సన్నాహాలు చేస్తున్నామని చెప్పారు. ఆ క్రమంలోనే ఈ సినిమా ముందుగా అక్టోబర్‌లో (October 21) జపాన్‌లో విడుదల అవుతుందని తెలిపారు. మరోసారి విదేశాల్లో తాను, ఎన్టీఆర్ మరియు రాజమౌళి ప్రచార కార్యక్రమాలలో పాల్గొంటామని చెప్పారు. ఇక ఆ ప్రచారంలో భాగంగా పలు దేశాలు చుట్టొస్తామని ఆయన తెలిపారు. అలాగే ఆర్ ఆర్ ఆర్ గ్లోబల్ థియేట్రికల్ రిలీజ్ గురించి మరిన్ని వివరాలు త్వరలోనే వెల్లడిస్తామని ఆయన తెలిపారు.

తెలుగు సినీ పరిశ్రమలో నటుడిగా తనకంటూ ఒక ప్రత్యేకమైన స్థానాన్ని ఏర్పరచుకున్నారు అడవి శేష్. కేవలం నటుడిగానే కాకుండా రచయితగా కూడా ఆయన తన ప్రతిభను చక్కగా నిరూపించుకున్నారు. ఆయన ఒక సినిమా చేస్తున్నారు అంటే ప్రేక్షకుల్లో తప్పకుండా ఆ చిత్రం పై మంచి ఆసక్తి కలిగి ఉంటుంది. ఆ విధంగా మొదటి సినిమా నుండి మొన్నటి మేజర్ వరకు నటుడిగా విభిన్న కాన్సెప్ట్ లతో సినిమాలు చేసి ప్రేక్షకులను ఆకట్టుకుంటూ వచ్చారు అడవి శేష్.

ప్రస్తుతం శేష్ హిట్ 2 సినిమా చేస్తున్నారు. ఈ చిత్రం మొదటి భాగంలో విశ్వక్ సేన్ హీరోగా నటించిన విషయం తెలిసిందే. అయితే ఈ చిత్రంతో పాటు అడివి శేష్ మరో సీక్వెల్ లో నటిస్తున్నారు. ఆ సినిమానే గూడచారి 2 కాగా ఈ సినిమా గురించి ఇటీవల మీడియాతో మాట్లాడిన శేష్, నిజానికి ఈ సినిమా షూటింగ్ ఇప్పటికే జరుగుతుందని ప్రేక్షకులు భావిస్తున్నారని, ఆ వార్తల్లో నిజం లేదని చెప్పుకొచ్చారు.

అయితే ప్రస్తుతం తన మనసులో ఉన్న ఒక లైన్ ని పూర్తి స్థాయి స్క్రిప్ట్ గా మార్చే ప్రయత్నంలో ఉన్నట్లు శేష్ తెలిపారు. అంతే కాకుండా త్వరలోనే సెట్స్ మీదకు వెళ్లనున్న గూఢచారి-2 సినిమాని భారీ స్థాయిలో తెరకెక్కిస్తున్నట్లుగా ఆయన చెప్పారు.

తప్పకుండా గూఢచారి 2 అందరి అంచనాలను అందుకునే విధంగా తెరకెక్కించేలా తాను, తన టీమ్ కష్టపడుతోందని చెప్పారు శేష్. శశికిరణ్ టిక్కా దర్శకత్వంలో వచ్చిన గూఢచారి సినిమా 2018లో ప్రేక్షకుల ముందు వచ్చి అటు విమర్శకుల ప్రశంసలని ఇటు బాక్స్ ఆఫీస్ వద్ద కలెక్షన్లను సాధించి విజయం సాధించింది. ఇందులో రా ఏజెంట్ గోపి పాత్రలో కనిపించారు అడివి శేష్.

మరి త్వరలో తెరకెక్కనున్న గూఢచారి 2 పై ప్రేక్షకులు భారీ అంచనాలు పెట్టుకున్నారు. మరి ఆ అంచనాలను అడవి శేష్ అండ్ టీమ్ అందుకుంటుందో లేదో చూడాలి. కాగా ఈ సినిమాకి సంబందించిన పూర్తి వివరాలు త్వరలో అధికారికంగా ప్రకటించనున్నారు.