తెలుగులో ఒక హీరో స్థాయిలో అభిమానులను సంపాదించుకున్న సాయి పల్లవి ఇటీవలే విరాటపర్వం సినిమాతో ప్రేక్షకులను పలకరించారు. ఆ సినిమా ఆశించిన స్థాయిలో విజయం సాధించలేదు. అయితే సాయి పల్లవి నటనకు మంచి ప్రశంసలు దక్కాయి. ఇక రెండు వారాల ముందు మరోసారి గార్గి అనే సినిమాతో మరోసారి ప్రేక్షకుల ముందుకు వచ్చారు. తమిళ, తెలుగు భాషల్లో తెరకెక్కిన ఈ సినిమా జూలై 15వ తేదీన ప్రపంచవ్యాప్తంగా భారీ ఎత్తున విడుదలైంది. ముందు నుంచి సినిమాకు పెద్దగా ప్రచారం జరగకపోయినా, సినిమా ట్రైలర్ విడుదల చేశాక ప్రేక్షకులకి సినిమా మీద ఆసక్తి పెరిగింది.

అలాగే రిలీజ్ కు ముందు రోజు సినిమాకు ప్రివ్యూలు వేసారు. ఆ ప్రీమియర్ షో చూసిన విమర్శకులు మరియ మీడియా సినిమాకి చాలా మంచి టాక్ చెప్పారు. ఇతర మెయిన్ స్ట్రీమ్ మీడియాలో కూడా రివ్యూలు బాగానే వచ్చాయి. అయితే బాక్స్ ఆఫీసు వద్ద సందడి మాత్రం అనుకున్నంత లేదు. కోర్ట్ రూమ్ డ్రామా, మరియు ఒక సున్నితమైన అంశంతో తెరకెక్కిన గార్గి సినిమా ఒక మంచి ప్రయత్నంగా పేరు తెచ్చుకుంది. ఇక కలేక్షన్ల పరంగానూ పరవాలేదు అనిపించుకుందీ చిత్రం.

సాయి పల్లవి నటనకు అద్భుత స్పందన లభించగా, సహాయక పాత్రలో నటించిన కాళి వెంకట్ నటనను కూడా పొగడ్తలతో ముంచెత్తారు విమర్శకులు మరియు ప్రేక్షకులు. అయితే ముందుగానే చెప్పుకున్నట్టు మనసు తట్టుకోలేని విధంగా ఉన్న కథా వస్తువు వల్ల ఈ చిత్రం జనరంజకమైన సినిమాగా ఆదరణ పొందలేకపోయింది. ఒక్కోసారి ఇలాంటి సినిమాలు రావాలి, సమాజంలో జరుగుతున్న ఘోర నేరాలను ప్రశ్నించాలి. కాబట్టి ఇతర సినిమాల లాగా కమర్షియల్ సూత్రాలలో ఈ చిత్రాన్ని కొలవడం సబబు కాదు.

ఈ నేపధ్యంలో ఈ చిత్రం ఓటిటి రిలీజ్ ఎప్పుడనే చర్చ కాస్త ప్రాధాన్యతను సంతరించుకుంది. ఎందుకంటే ఈరోజుల్లో ఒక సినిమా థియేటర్లలో విడుదల అవుతున్నపుడే ఏ ఓటీటి యాప్ లో వస్తుంది అని ఆలోచించే ప్రేక్షకులు కూడా ఉన్నారు. కాబట్టి ఆ వార్తలను తూచా తప్పకుండా ఫాలో అయ్యే ప్రేక్షకులు ఓటిటి రిలీజ్ కూడా ఒక విశేషమైన వార్త లాగా చూస్తారు.

తాజాగా వినిపిస్తున్న వార్తల ప్రకారం గార్గి సినిమా వచ్చే వారం అంటే ఆగస్ట్ రెండో తారీఖు నుంచి సోనీ లైవ్ (sony liv) లో స్ట్రీమ్ అవబోతుందని తెలిసింది. మరి ఓటిటి విడుదల తరువాత సాయి పల్లవికి, ఆవిడ సినిమాకి ఇంకెంత ఆదరణ లభిస్తుందో చూద్దాం.

తమిళ యువ స్టార్ హీరో.. జాతీయ ఉత్తమ నటుడు ధ‌నుష్ .. విభిన్నమైన, విలక్షణమైన పాత్రలతో తనకంటూ ప్రత్యేక గుర్తింపు తెచ్చుకున్నారు. ముఖ్యంగా ఆయన సామాన్య ప్రజలకి దగ్గరగా ఉండే పాత్రలు, వాళ్ళ జీవితాలను తెరపై చర్చించే సినిమాలు చూస్తూ తనకంటూ ఓ ప్రత్యేకతను సంపాదించుకున్నారు. అంతే కాకుండా కేవలం తమిళంకే పరిమితం కాకుండా.. హిందీలో పలు చిత్రాల్లోనూ నటించారు.

అంతే కాకుండా ధనుష్ ఇటీవల ఏకంగా అవెంజర్స్ దర్శకులతో కలిసి ది గ్రె మ్యాన్ అనే సినిమాలో నటించిన విషయం తెలిసిందే. అయితే ఆ సినిమాలో అతనికి అనుకున్నంత స్థాయిలో గుర్తింపు దక్కలేదు అనే మాట వాస్తవం. ఏదో అనుకుంటే ఇంకేదో తరహాలో కేవలం రెండు ఫైట్లు రెండు డైలాగులు పరిమితం అయింది ఆయన పాత్ర.

కానీ హాలీవుడ్ వరకు వెళ్ళడం అంటే మామూలు విషయం కాదు కదా. ఇది ఒక విధంగా భవిష్యత్తులో వచ్చే అవకాశాలు దారి ఇచ్చినట్లే అని చెప్పవచ్చు.ఇపుడు ధనుష్ దృష్టి తెలుగు సినీ పరిశ్రమ పై పడింది.

ఇప్పటికే శేఖర్ కమ్ముల దర్శకత్వంలో ఓ స్ట్రెయిట్ తెలుగు చిత్రంలో నటిస్తోన్న ధనుష్. దాంతో పాటు వెంకీ అట్లూరి దర్శకత్వంలో ‘సార్’ అనే సినిమా కూడా చేస్తున్న సంగతి తెలిసిందే. తాజాగా ఈ సినిమాకి సంబందించిన ఫస్ట్ లుక్ మరియు టీజర్ రిలీజ్ గురించిన వివరాలను చిత్ర బృందం ప్రకటించింది.

ఫస్ట్ లుక్ పోస్టర్ లో ధనుష్ టేబుల్ వద్ద కూర్చుని చీకట్లో లాంప్ వెలుతురులో ఏదో రాస్తున్నట్టు కనిపిస్తుంది. మరి అది అల్లరి మూకల పైన ఫిర్యాదు పత్రం అయి ఉంటుందా లేక ఏదైనా బలమైన సంఘటనకు సంబంధించిన కవిత్వం లేదా విప్లవ నినాదం అయి ఉంటుందా అని ఆ పోస్టర్ చూసిన ప్రేక్షకులు ఆలోచిస్తున్నారు. ఇక ఈ చిత్రం తాలూకు టీజర్ ను రేపు ధనుష్ పుట్టిన రోజు సందర్భంగా సాయంత్రం ఆరు గంటలకు విడుదల చేస్తున్నట్లు చిత్ర బృందం ప్రకటించింది.

తెలుగులో ‘సార్’ టైటిల్‌తో వస్తోన్న ఈ చిత్రం తమిళంలో మాత్రం ‘వాతి’ టైటిల్‌తో తెరకెక్కనుంది. ఈ సినిమాను సితార ఎంటర్టైన్మెంట్ పతాకంపై నాగ వంశీతో పాటు త్రివిక్రమ్ శ్రీనివాస్ సతీమని సాయి సౌందర్య నిర్మిస్తున్నారు. పీడీవీ ప్రసాద్ సమర్పకులుగా వ్యవహరిస్తున్నారు. ఈ చిత్రానికి జీవి ప్రకాష్ కుమార్ సంగీతం అందిస్తున్నారు.

దుల్కర్ సల్మాన్ హీరోగా, మృణాల్ ఠాకూర్ హీరోయిన్ గా హను రాఘవపూడి దర్శకత్వంలో తెరకెక్కిన చిత్రం ‘సీతా రామం’. ‘వైజయంతీ మూవీస్’ సమర్పణలో ‘స్వప్న సినిమా’ పతాకం పై స్టార్ ప్రొడ్యూసర్ అశ్వనీదత్ ఈ చిత్రాన్ని నిర్మించారు. ప్రస్తుతం తెలుగు సినిమా పరిశ్రమ లోనే కాదు ప్యాన్ ఇండియా స్టార్ హీరోయిన్ గా ఎదుగుతున్న రష్మిక మందన కూడా ఈ చిత్రంలో కీలక పాత్ర పోషించడం విశేషం.

అంతే కాదు బ్రిగేడియర్ విష్ణు శర్మ పాత్రలో సుమంత్ కూడా ఓ ప్రాముఖ్యమైన పాత్రలో కనిపించ బోతున్నారు. ఈ చిత్రంలో ఆయన లుక్ కు సంబంధించిన పోస్టర్ రిలీజ్ అవ్వడం, దానికి ప్రేక్షకుల నుంచి భలే ఆసక్తికరంగా ఉంది అన్న స్పందన లభించడం జరిగింది.

ఇటివలే విడుదలైన ఈ చిత్రం తాలూకు ట్రైలర్ చూశాక సినిమాలో సుమంత్ పాత్ర ఆకట్టుకునే విధంగా తయారు చేశారు అని ప్రేక్షకులు భావిస్తున్నారు. సీతారాముల ప్రేమ కథకి ఆయన పాత్ర ఏ రకంగా ఉపయోగ పడుతుంది అనే ఆలోచన ప్రేక్షకుల్లో వచ్చింది.

ఇక ‘ సీతా రామం’ ని తను నటించిన ‘గోదావరి’ వంటి క్లాసిక్ సినిమాతో పోల్చి అంచనాలు మరింత పెంచారు హీరో సుమంత్. 2006 లో దర్శకుడు శేఖర్ కమ్ముల కాంబినేషన్లో వచ్చిన “గోదావరి” చిత్రం ఎంత పేరు తెచ్చుకుందో ప్రత్యేకంగా చెప్పనక్కర్లేదు.

ఇప్పుడు ‘ గోదావరి ‘ చిత్రంతో ‘సీతా రామం’ ని పోల్చడంతో సుమంత్ వ్యాఖ్యలు ఇపుడు సోషల్ మీడియా వైరల్ అవుతున్నాయి. సుమంత్ మాట్లాడుతూ.. ” నేను ఈ ఈవెంట్ కి చాలా క్యాజువల్ గా వచ్చేసాను. కానీ మా హీరో దుల్కర్ సూటు బూటు వేసుకొని వచ్చాడు. ఎప్పుడు.. టీ షర్ట్ లు వేసుకునే మా డైరెక్టర్ కూడా షర్ట్ వేసుకుని వచ్చాడు.

వచ్చేసారి నుండి ప్రమోషన్స్ కు నేను కూడా సూటు బూటు వేసుకొనే వస్తాను. ఇక ఈ సినిమా 150 పేజీల కథ మొత్తం చదివిన తర్వాత ‘సీతా రామం’ దృశ్య కావ్యం అవుతుంది అని నాకు అనిపించింది. గతంలో నేను ‘గోదావరి’ అనే సీతారాముల కథ చేశాను ఆ సినిమా అందరికీ గుర్తుంది కదా. ఆ సినిమా అప్పుడు క్లాసిక్ గా నిలిచింది.

ఇప్పుడు ‘సీతా రామం’ కూడా అలాగే క్లాసిక్ అవుతుంది అని చెప్పడంలో ఎలాంటి సందేహం లేదు. ఈ సినిమా పై నాకు చాలా నమ్మకం ఉంది. నేను ఇందులో చాలా మంచి పాత్ర చేశాను. ఆగస్టు 5 తారీఖు కోసం ఎదురుచూస్తున్నాను. ఇది ఖచ్చితంగా అందరూ థియేటర్ లో చూడాల్సిన సినిమా. ఆగస్టు 5న అందరం థియేటర్లో కలుద్దాం” అంటూ చెప్పుకొచ్చారు సుమంత్.

గత కొంత కాలంగా తెలుగు సినీ నిర్మాతలు.. పరిశ్రమ ఎదురుకుంటున్న సమస్యల పై చర్చలు మరియు పలు నిర్ణయాలు తీసుకునే ఆలోచన చేస్తున్న విషయం తెలిసిందే. ఓ వైపు కరోనా వల్ల షూటింగ్ లు ఆగిపోయి నిర్మాణ వ్యయం పెరిగిపోయి నిర్మాతలు చాలా వరకు ఆర్థికంగా తీవ్ర ఇబ్బందుల్ని ఎదుర్కొంటున్నారు. మరో వైపు ఓటీటీల ప్రభావం పెరిగిపోవడంతో ప్రేక్షకులు థియేటర్లకు రావాలంటే ఆలోచించే పరిస్తితి ఏర్పడటం, ముఖ్యంగా పెరిగిన టికెట్ రేట్ల కారణంగా సినిమా థియేటర్లకు ప్రేక్షకులు రావడానికి ఆసక్తిని చూపించడం లేదనే భావన అటు ఇండస్ట్రీ వర్గాల్లోనూ.. ఇటు సినీ విమర్శకులు మరియు ట్రేడ్ వర్గాల్లోనూ ఉంది.

ఇక సినిమా బడ్జెట్ ను కాస్త తగ్గించి సినిమాలు నిర్మించే ప్రయత్నం చేయాలంటే స్టార్ హీరోలు, క్యారెక్టర్ ఆర్టిస్ట్ ల రెమ్యునరేషన్ భారీగా పెంచేశారని నిర్మాతలు వాపోతున్నారు. ఈ నేపథ్యంలో తాజా సమస్యలన్నింటినీ ఓ కొలిక్కి తీసుకురావాలన్న ఆలోచనతో నిర్మాతలు ఆగస్టు ఒకటో తారీఖు నుంచి సినిమాల షూటింగ్ లని నిరవధికంగా ఆపి వేయాలనే ఆలోచనకు వచ్చాయి.

ఈ మేరకు సోమవారం నిర్మాతల మండలి అత్యవసర భేటీని ఏర్పాటు చేసిన విషయం తెలిసిందే. ఈ మీటింగ్ లో ఓటీటీ లో సినిమాల రిలీజ్ లతో పాటు టికెట్ రేట్ల పై అలాగే ఇతర సమస్యల పై చర్చించారట. అయితే ఓటీటీల్లో సినిమాల రిలీజ్ లపై మాత్రం నిర్మాతలు అందరూ ఏకాభిప్రాయానికి రాలేదనే వార్తలు వినిపించాయి. దీంతో 27న మరోసారి నిర్మాతల మండలి సర్వసభ్య సమావేశాన్ని నిర్వహించాలని తలపెట్టింది.

అయితే ఇక్కడ గమనించాల్సిన విషయం ఏమిటంటే, రెమ్యునరేషన్ అనేది అయా నటుడు లేదా హీరో.. తనతో చిత్రం నిర్మించే నిర్మాతతో చర్చించుకుని తీసుకునే నిర్ణయం పరస్పరం లాభాలు మరియు నష్టాలు లెక్కించుకుని జరిగే ఒప్పందం. దాన్ని ఇలా ఏదో ఆఫీసులో జీతాలు నిర్ణయించినట్టుగా చర్యలు తీసుకోవడం లేదా ఫలానా అమౌంట్ వరకే ఇవ్వాలి అనడం ఏమాత్రం సబబు కాదు. అది అసలు కుదరని పనిగా చెప్పవచ్చు.

ఎందుకంటే ప్రస్తుతం యువ హీరోలు కూడా ప్యాన్ ఇండియా స్థాయిలో చిత్రాలు చేస్తున్నారు. అందుకు వారు శారీరకంగా మరియు మానసికంగా ఎంతో కష్టపడుతూ విలువయిన సమయాన్ని కూడా ప్రచార నిమిత్తం వెచ్చిస్తున్నారు. మరి ఆ కష్టానికి ధర వారు నిర్ణయించడమే సరైన పద్ధతి. ఏదైనా బేరం చేసి తగ్గించాలంటే అది సదరు సినిమా నిర్మాత చేయాలి కానీ ఇలా ఎన్ని మీటింగ్ లు పెట్టి ఎన్ని తీర్మానాలు చేసినా లాభం ఉండదు అందువల్ల జరిగే మార్పూ ఏదీ ఉండదు.

మొత్తానికి అందరూ అనుకున్నట్లే అయ్యింది. ఆగస్టు 1 నుండి సినిమా షూటింగ్లను నిలిపి వేస్తున్నట్లు నిర్మాతల మండలి నిర్ణయం తీసుకుంది. ప్రస్తుతం చిత్ర పరిశ్రమలో నెలకొన్న పరిస్థితుల నేపథ్యంలో ఈ నిర్ణయం తీసుకున్నట్లు వారు తెలిపారు. తాజాగా తెలుగు ఫిల్మ్‌ ఛాంబర్‌ లో నిర్మాతలు, డిస్ట్రిబ్యూటర్ల సమావేశం జరిగింది, ఆ సమావేశంలో తుది నిర్ణయాన్ని కమిటీకి వదిలేశారు. అయితే, అనూహ్యంగా నిర్మాతల మండలి కీలక నిర్ణయాలు తీసుకుంటూ ప్రకటన విడుదల చేసింది. ఇటీవల కార్యవర్గ సమావేశంలో చర్చించిన 8 కీలక అంశాలపై పలు నిర్ణయాలు తీసుకున్నారని తెలుస్తోంది.

ఓటీటీ, వీఎఫ్ఎక్స్ చార్జీలు, సినిమా టికెట్ ధ‌ర‌ల వంటి ప‌లు అంశాల‌పై చ‌ర్చించి ప‌లు నిర్ణ‌యాలు తీసుకున్నట్లు సమాచారం. ఇందులో భాగంగా భారీ బడ్జెట్ సినిమాల‌ను థియేట‌ర్‌లో విడుద‌లైన 10 వారాల త‌ర్వాతే ఓటీటీకి ఇవ్వాల‌ని నిర్ణ‌యించారట. ఇక చిన్న బ‌డ్జెట్‌తో తెర‌కెక్కిన సినిమాల‌ను 4 వారాల త‌ర్వాత ఓటీటీలో విడుదల చేయవచ్చని కమిటీ పేర్కొందట. సినిమా ప్ర‌ద‌ర్శ‌న‌కు వీఎఫ్ఎక్స్ చార్జీలను ఎగ్జిబిట‌ర్లే చెల్లించాల‌నే నిర్ణయం కూడా తీసుకున్నారట.

అలాగే ఇటీవల భారీ స్థాయిలో పెరిగిపోయిన సినిమా టికెట్‌ ధరలను సామాన్యులకు అందుబాటులో ఉంచాలని తెలంగాణ ఫిల్మ్‌ ఛాంబర్‌ ప్రతిపాదించింది. నగరాలు, పట్టణాల్లో సాధారణ థియేటర్లు, సి-క్లాస్‌ సెంటర్లలో టికెట్‌ ధరలు రూ.100, రూ.70(జీఎస్టీతో కలిపి)గా ఉంచాలని ప్రతిపాదించారు. ఇక మల్టీప్లెక్స్‌లో జీఎస్టీతో కలిపి రూ.125 ఉండేలా ప్రతిపాదనలు చేశారు. మీడియం బడ్జెట్‌, మీడియం హీరో సినిమాలకు టికెట్‌ ధర నగరాలు/పట్టణాల్లో రూ.100 ప్లస్‌ జీఎస్టీ ఉండాలని, అదే సి-సెంటర్లలో రూ.100 (జీఎస్టీతో కలిపి) ఉండాలని, మల్టీప్లెక్స్‌లో అత్యధికంగా రూ.150 ప్లస్‌ జీఎస్టీతో మాత్రమే ఉండాలని ప్రతిపాదించారు.

అయితే అనుకున్నది అనుకున్నట్లుగా ఈ టికెట్ రెట్లు అమలు అవుతాయో లేదో చూడాలి. ఇక షూటింగ్ లను ఆపివేసే నిర్ణయంలో కూడా ఒక చిన్న సవరణ చేసినట్లుగా తెలుస్తోంది. అదేంటంటే 70 శాతం షూటింగ్ పూర్తి చేసుకున్న సినిమాలు యధావిధిగా షూటింగ్ లను కొనసాగించవచ్చని ఈ సమావేశంలో నిర్ణయించినట్లుగా తెలుస్తోంది. దీని వల్ల కేవలం కొత్తగా షూటింగ్ ప్రారంభించే సినిమాలకు మాత్రమే కాస్త ఇబ్బంది ఉంటుంది. ఇదివరకే షూటింగ్ ప్రారంభించిన సినిమాలకు ఎలాంటి ఇబ్బందీ ఉండదు. కాగా ఈ షూటింగ్లను ఆపివేసే నిర్ణయం అంతే నిక్కచ్చిగా పాటిస్తారా లేదా అనేది కూడా ఒక సందేహమే.