ప్రస్తుతం తెలుగు సినీ ప్రేక్షకులకిదాదాపు ప్రతి శుక్రవారం అటు ధియేటర్లలో సినిమాలతో పాటు ఇటు ఓటిటిలో కూడా సినిమాలు విడుదలవుతున్నాయి. ఐతే ఇక్కడ గమనించాల్సిన విషయం ఏంటంటే దేని దారి దానిదే అన్నట్టు ధియేటర్ ప్రేక్షకులకు కావలసిన వినోదం వారికి దక్కుతుంది అలాగే ఇంట్లో టివిలో, మొబైల్ ఫోన్లలో చూసుకునే వీలుగా ఓటిటి కంటెంట్ రూపొందుతుంది. ఈ వారం ఇది వరకే ధియేటర్లలో విడుదల అయిన రెండు సినిమాలు ఓటిటిలో విడుదలవుతున్నాయి. రెండు చిత్రాలు కూడా కంటెంట్ పరంగా చాలా భిన్న నేపథ్యాలు కలిగిన సినిమాలు కావడం విశేషం. ఆ రెండు సినిమాలు మరెవో కాదు విక్రాంత్ రోణ మరియు వాంటెడ్ పండు గాడ్.

విక్రాంత్ రోణ ఒక యాక్షన్-అడ్వెంచర్ థ్రిల్లర్ అయితే, వాంటెడ్ పండుగాడు కామెడీతో మిళితమైన యాక్షన్-థ్రిల్లర్ గా తెరకెక్కింది.కన్నడ హీరో కిచ్చా సుదీప్ నటించగా.. అనూప్ భండారి దర్శకత్వంలో తెరకెక్కిన విక్రాంత్ రోణకన్నడ, హిందీ, తమిళం, తెలుగుతో పాటు మలయాళంలో కూడా భారీ స్థాయిలో అత్యధిక థియేటర్లలో విడుదలైంది. కాగా ఈ చిత్రం అత్యద్భుతమైన సెట్స్‌తో మరియు భారీ బడ్జెట్‌తో తెరకెక్కించారు. 3డిలో విడుదలైన తొలి కన్నడ సినిమా ఇదే కావడం మరో విశేషం. ఈ సినిమా చాలా వరకు ప్రేక్షకుల అంచనాలను అందుకొని వారి ఆదరణ పొందింది. అంతే కాకుండా నిర్మాతలకు కూడా లాభాలను తెచ్చిపెట్టింది. ముఖ్యంగా తెలుగు రాష్ట్రాలలో ఈ చిత్రం అనూహ్యంగా లాభదాయకమైన వ్యాపారం జరుపుకుంది. విక్రాంత్ రోణ ఇప్పుడు ZEE5 ప్లాట్‌ఫారమ్‌లో సెప్టెంబర్ 2 నుండి ప్రేక్షకులకు అందుబాటులోకి రానుంది.

మరో వైపు వాంటెడ్ పండుగాడ్ అనేది యాక్షన్ థ్రిల్లర్‌గా ప్రయత్నించినా చివరికి ఒక సిల్లీ కామెడీగా తయారైన సినిమా. నిజానికి టాలీవుడ్‌లోని చాలా మంది ప్రముఖ హాస్యనటులు ఈ చిత్రంలో ఉండటంతో ఈ చిత్రం ఖచ్చితంగా ఒక కామెడీ పండుగలా ఉంటుందని అందరూ భావించారు, కానీ తీరా సినిమా చూస్తే అసలు ఏమాత్రం భరించలేని ఒక భయంకరమైన అతి జుగుప్సాకరమైన సినిమాగా మారింది. ఈ చిత్రంలో సునీల్, శ్రీనివాసరెడ్డి, అనసూయ, సుధీర్, వెన్నెల కిషోర్, బ్రహ్మానందం, ఆమని, తనికెళ్ళ భరణి, విష్ణు ప్రియతో పాటు ఇతర ప్రముఖ కామెడీ/ క్యారెక్టర్ ఆర్టిస్టులు నటించారు. సెప్టెంబర్ 2 నుంచి ఆహా తెలుగులో వాంటెడ్ పండుగాడ్ ప్రసారం కానుంది.

తమిళ స్టార్ హీరో చియాన్ విక్రమ్ నటించిన తాజా చిత్రం కోబ్రా ఈ ఆగష్టు 31 న థియేటర్లలో విడుదలైంది. తొలి రోజు విమర్శకుల నుంచి కాస్త మిశ్రమ స్పందన లభించినా . బాక్స్ ఆఫీస్ వద్ద మాత్రం మొదటి రోజు అద్భుతమైన కలెక్షన్లను రాబట్టింది. ఈ చిత్రం పట్ల హైప్ కారణంగా కలెక్షన్లు బాగానే వచ్చాయి, అయితే సినిమా నిడివి మరీ ఎక్కువగా ఉన్న కారణంగా ప్రేక్షకుల నుండి టాక్ మాత్రం కాస్త నెగటివ్ గా వచ్చింది.

సైన్స్ ఫిక్షన్ థ్రిల్లర్ గా తెరకెక్కిన ఈ చిత్రానికి 183 నిమిషాలు చాలా ఎక్కువ లెంగ్త్ అని ప్రేక్షకులు భావించారు. విక్రమ్ నటనకు చాలా ప్రశంసలు లభించగా, సినిమాకు నిడివి మాత్రమే ప్రధాన సమస్యగా టాక్ వచ్చింది. అయితే దీన్ని దృష్టిలో ఉంచుకుని, ప్రేక్షకులను ఆకట్టుకోవడానికి కోబ్రా చిత్ర బృందం కొన్ని మార్పులు చేయాలని నిర్ణయించుకున్నారు.

దాదాపు 40 నిమిషాల పాటు సినిమాను తగ్గించాలని కోబ్రా చిత్ర బృందం ఒక సాహసోపేతమైన నిర్ణయం తీసుకున్నారు. సినిమాను 183 నిమిషాల నుంచి 144 నిమిషాలకు కుదించారు. అవసరం లేని సన్నివేశాల గురించి ప్రేక్షకుల నుండి ఫిర్యాదులు రావడంతో, నిడివి తగ్గించి సినిమాను మరింత ఆసక్తికరంగా మలచే విధంగా ఉండటం కోసం అలాంటి సన్నివేశాలను తొలగించాలని నిర్ణయించుకున్నారట.

ఇక నిడివి తగ్గించిన తరువాత కోబ్రా సినిమా కొత్త వెర్షన్ నేటి సాయంత్రం షోల నుండి ప్రదర్శించబడుతుంది. ఆ రకంగా నిడివి ఎక్కువైందని భావించిన ప్రేక్షకులను మరోసారి థియేటర్ల వద్దకు రప్పించే ప్రయత్నం ఇది. లెంగ్త్ మరియు కొన్ని అనవసరమైన సన్నివేశాల గురించి మాత్రమే ప్రధానంగా ప్రేక్షకులు ఫిర్యాదు చేశారు కాబట్టి, ఆ నిడివి తగ్గిందని తెలిస్తే వెండితెర పై విక్రమ్ మ్యాజిక్‌ను చూడటానికి ప్రేక్షకులు మళ్ళీ థియేటర్‌లకు తరలి వచ్చే అవకాశం ఉంది.

కోబ్రా సినిమాలో విక్రమ్ సరసన హీరోయిన్ గా శ్రీనిధి శెట్టి, మరో ముఖ్య పాత్రలో ఇర్ఫాన్ పఠాన్, మృణాళిని రవి, రోషన్ మాథ్యూ మరియు కెఎస్ రవికుమార్ తదితరులు నటించారు. ఈ చిత్రానికి అజయ్ జ్ఞానముత్తు దర్శకుడు కాగా ఏఆర్ రెహమాన్ సంగీత దర్శకుడుగా వ్యవహరించారు.

కరోనా వరుస దాడులతో కాస్త ఇరుకున పడ్డ తెలుగు సినిమా పరిశ్రమ మరియు తెలుగు రాష్ట్రాల థియేట్రికల్ మార్కెట్ కూడా మెల్లమెల్లగా పుంజుకుంటున్నా, OTT మార్కెట్ కూడా ఏమాత్రం వెనక్కి తగ్గడం లేదు. ఎందుకంటే మారుతున్న పరిస్థితులకు తగ్గట్టుగా అందరూ మారాల్సిన అవసరం ఎంతయినా ఉంది. అందుకే ఇప్పుడు ధియేటర్లలో విడుదల అవుతున్న సినిమాలతో పాటు అక్కడ సరిగ్గా ఆడే అవకాశం లేని కాస్త విభిన్నమైన ప్రయత్నాలు ఓటిటీలో విడుదల అవుతున్నాయి.

అందువల్ల ప్రేక్షకులకు అన్ని రకాల వినోద అంశాలు అందుతుంది.ఆరోగ్యకరమైన వాతావరణంలో అటు ధియేటర్ల వ్యవస్థ, ఇటు ఓటిటి వ్యవస్థ రెండూ కలిసి ముందుకి వెళ్లడం అనేది చాలా మంచిది. ప్రతి సంవత్సరం లెక్కలేనన్ని సినిమాలు వస్తుంటాయి, అలాంటప్పుడు ప్రతి సినిమాను థియేటర్లలో విడుదల చేయలేరు కదా. వెండి తెరపైకి రాలేని కొన్ని సినిమాలు ఇప్పుడు చిన్న తెరపై అంటే ఓటిటిలలో విడుదలై పేరు తెచ్చుకుంటున్నాయి.ఈ క్రమంలో రెండు కొత్త తెలుగు సినిమాలు ఇప్పుడు నేరుగా ఓటిటిలో ప్రసారం అవుతున్నాయి.

అందులో మొదటి సినిమా పెళ్లికూతురు పార్టీ.. అపర్ణ మల్లాది రచించి, దర్శకత్వం వహించిన ఈ సినిమా కథ, తన అక్క పెళ్లి నాశనం చేయడానికి ప్రయత్నించే ఒక చెల్లెలు గురించి హాస్యం జోడించి చెప్పే ఒక హాస్య చిత్రం. ఆమెకు ఆ పనిలో అమ్మమ్మ కూడా సహాయం చేస్తుంది. ఈ కథ ప్రేక్షకులని కడుపుబ్బా నవ్విస్తుంది. పెళ్లికూతురు పార్టీ సినిమా ఇప్పటికే ఇండస్ట్రీ వర్గాల్లో చక్కని స్పందన తెచ్చుకుంది. అలాగే చాలా మంది హృదయాలను గెలిచి ప్రశంసలు అందుకుంటున్నది. ప్రస్తుతం ఈ సినిమా ఆహా తెలుగులో ప్రసారం అవుతోంది.

ఇక ఈ వారం ప్రేక్షకుల ముందుకి వచ్చిన మరో సినిమా పంచతంత్ర కథలు. పెళ్లికూతురు పార్టీ చిత్రంతో పోలిస్తే పంచతంత్ర కథలు ఎక్కువగా ప్రాచుర్యం పొందలేదు. ఈ సినిమాకు గంగనమోని శేఖర్ రచనతో పాటు దర్శకత్వం కూడా వహించారు, ఈ చిత్రం సామాజిక సమస్యలను, వాటి పరిష్కారాల గురించి చర్చించే 5 కథల సమూహం. కులం విలువ, సెక్స్, వ్యభిచారం, స్వేచ్ఛ మరియు ప్రేమ అంశాల చుట్టూ తిరుగుతుంది. కేర్ ఆఫ్ కంచరపాలెం స్టైల్‌లో వేరు వేరు కథలతో ఒక సినిమాగా పంచతంత్ర కథలు సినిమాని చిత్రీకరించారు. ఈ సినిమా కూడా ఆహా తెలుగులోనే ప్రసారం అవుతోంది.

గత వారం లైగర్ వంటి డిజాస్టర్ తర్వాత, ఈరోజు రెండు కొత్త తెలుగు సినిమాలు పెద్ద తెరపైకి వచ్చాయి. మొదటిది ఫస్ట్ డే ఫస్ట్ షో, ఈ చిత్రానికి జాతి రత్నాలు దర్శకుడు అనుదీప్ కెవి కథ అందించారు. ఇక రెండో సినిమా వైష్ణవ్ తేజ్ నటించిన రొమాంటిక్ కామెడీ ఎంటర్టైనర్ రంగ రంగ వైభవంగా.రెండు చిత్రాల ప్రీమియర్ షోల నుండి పబ్లిక్ రివ్యూ ఎలా ఉందో చూద్దాం.

ఫస్ట్ డే ఫస్ట్ షో చాలా విషయాలను జొప్పించటానికి ప్రయత్నించినప్పటికీ సినిమా తీరు ప్రేక్షకులకు విసుగు పుట్టించేలా తయారైంది. జాతి రత్నాలు సినిమాలో లాగానే కామెడీతో మ్యాజిక్‌ చేసే ప్రయత్నం జరిగింది కానీ ఆ ప్రయత్నంలో చిత్ర బృందం అన్ని రకాలుగా ఘోరంగా విఫలమైంది.

ప్రేక్షకులను నవ్వించే లేదా అలరించే ఏ ఒక్క సన్నివేశం కూడా లేదని వాపోయారు. అనుదీప్ కథ రాసినప్పటికీ ఈ చిత్రానికి దర్శకత్వం వహించింది వంశీదర్ గౌడ్, లక్ష్మీనారాయణ. జాతి రత్నాలు సినిమా నవీన్ పోలిశెట్టి, రాహుల్ రామకృష్ణ మరియు ప్రియదర్శి వంటి ప్రతిభావంతమైన నటుల వల్ల ప్రేక్షకులని ఆకట్టుకుంది. ఫస్ట్ డే ఫస్ట్ షో అలాంటి ఆకట్టుకునే మాయాజాలం ప్రదర్శించడంలో విఫలమైంది.

ఇక రంగ రంగ వైభవంగా సినిమా కూడా పెద్దగా గొప్ప టాక్ తెచ్చుకోలేదు. సినిమాలో ఫస్టాప్ వరకూ హీరో – హీరోయిన్ల మధ్య చిలిపి గొడవలు చూపిస్తూ కాస్త సరదాగా సాగినా.. సెకండాఫ్ కి వచ్చేసరికి ఎమోషనల్ సన్నివేశాలు ఏమాత్రం ఆకట్టుకోలేదు. ఏ క్షణంలో కూడా పాత్రలతో, సినిమాతో ప్రేక్షకులు కనెక్ట్ అవకుండా ఉన్న ఈ సినిమా కూడా డిజాస్టర్ దిశగా పయనిస్తోందనే చెప్పాలి.

ఓవరాల్‌గా, ఈ రోజు విడుదలైన రెండు సినిమాలు కూడా ప్రేక్షకుల పై ఎటువంటి ప్రభావం చూపలేకపోయాయి. అసలు రెండు సినిమాలు విడుదలైన సందడి కూడా చాలా తక్కువగా ఉంది. ఇక ఇలా నెగటివ్ టాక్ రావడంతో రెండు సినిమాలు కూడా బాక్స్ ఆఫీసు వద్ద అట్టర్ ఫ్లాప్ అయ్యే అవకాశాలు ఎక్కువగా ఉన్నాయి. ఫస్ట్ డే ఫస్ట్ షో ప్రీ రిలీజ్ ఈవెంట్ లో చిరంజీవి చెప్పినట్టు కంటెంట్ బాగుంటేనే జనాలు థియేటర్లకు వస్తారనే విషయం మరోసారి రుజువైంది.

పోస్ట్ ప్రో అనేది ఒక పాన్ ఇండియా డబ్బింగ్ కంపెనీ. ఈ కంపెనీని వసంత్ స్థాపించారు. పోస్ట్ ప్రో కంపెనీ ద్వారానే కార్తికేయ 2 చిత్రం పోస్ట్ ప్రొడక్షన్ మరియు అన్ని భాషల్లోకి డబ్బింగ్ జరుపుకుంది. తెలుగు సినిమాలను ఇతర భాషల్లో అనువదించే సమయంలో నిర్మాతలు ఎదుర్కొంటున్న సమస్యలను దృష్టిలో ఉంచుకొని అన్ని భాషల అనువాదాల పనులు కూడా ఒకేసారి హైదరాబాద్ లో జరిగెందుకు వీలుగా పోస్ట్ ప్రో కంపెనీ ఏర్పాటు చేయబడింది.

ఈ సందర్భంగా కార్తీకేయ 2 చిత్ర నిర్మాతలు మాట్లాడుతూ… తెలుగు సినిమా చరిత్రలో మొట్టమొదటి సారిగా ఇతర భాషల్లో ఉన్న డబ్బింగ్ కళాకారులతో పాటు రచయితలను కూడా హైదరాబాద్ కు రప్పించి, నిర్మాతల సౌలభ్యం కోసం కార్తికేయ 2 సినిమా డబ్బింగ్ కార్యక్రమాలను పోస్ట్ ప్రో పాన్ ఇండియా డబ్బింగ్ కంపెనీ హైదరాబాద్ లో పూర్తి చేయడం జరిగింది. కార్తికేయ 2 చిత్రానికి హైదరాబాద్ లోనే డబ్బింగ్ పనులు పూర్తి చేయడం ద్వారా మాకు బడ్జెట్ కంట్రోల్ లో ఉండడమే కాకుండా.. దర్శకుడు చందూ మొండేటి ఈ సినిమా అనువాద కార్యక్రమాలను రోజూ చూసుకొని అవసరమైన మార్పులు చేసుకోనే అవకాశం లభించింది. దాంతో పాటు చాలా సమయం ఆదా అయ్యింది అని కూడా అన్నారు. సినిమా విడుదల చివరి వరకు తమతోనే ఉండి అన్ని రకాలుగా వెన్నుదన్నుగా నిలిచి సహకరించిన పోస్ట్ ప్రో డబ్బింగ్ కంపెనీ వసంత్ గారికి కార్తీకేయ చిత్ర నిర్మాతలు కృతజ్ఞతలు తెలిపారు.

కార్తికేయ 2 సినిమాను ఇతర భాషల్లో అనువదించే అవకాశాన్ని ఎంతో నమ్మకంతో పోస్ట్ ప్రో కంపెనీకి అప్పగించిన నిర్మాతలు టీ. జి. విశ్వ ప్రసాద్ గారికి, వివేక్ కుచిబొట్ల గారికి అభిషేక్ అగర్వాల్ గారికి, దర్శకులు చెందు మొండేటి గారికి హీరో నిఖిల్ సిద్ధార్థ్ మొదలగు వారందరికీ పోస్ట్ ప్రో కంపెనీ అధినేత వసంత్ గారు కృతజ్ఞతలు తెలిపారు. కార్తికేయ 2 సినిమానే కాకుండా.. ప్రస్తుతం పోస్ట్ ప్రో కంపెనీ పలు భారీ సినిమాలను కూడా అనువదించే పనిలో ఉందని తెలుస్తోంది.

ఇక తెలుగు చిత్ర పరిశ్రమ చరిత్రలోనే అద్భుతమైన ప్రదర్శన కనబరిచిన కార్తీకేయ 2 చిత్రం విశేష స్థాయిలో ప్రేక్షకులను అలరించిన విషయం తెలిసిందే. నిఖిల్ సిద్దార్థ్ హీరోగా నటించిన ఈ చిత్రానికి చందూ మొండేటి దర్శకత్వం వహించారు. ఇందులో అనుపమ పరమేశ్వరన్ హీరోయిన్‌గా నటించారు. ఈ చిత్రాన్ని అభిషేక్ అగర్వాల్, టీజీ విశ్వ ప్రసాద్ సంయుక్తంగా నిర్మించారు. కాల భైరవ సంగీతం అందించారు. కాగా ప్రముఖ బాలీవుడ్ నటుడు అనుపమ్ ఖేర్ ఒక కీలక అతిథి పాత్రను చేశారు. ఈ చిత్రం తెలుగు, తమిళం, కన్నడ, మలయాళం, హిందీలో విడుదలైంది.