మెగాస్టార్ చిరంజీవి నటించిన గాడ్ పాదర్ సినిమా మరో రెండు వారాల్లో ప్రేక్షకుల ముందుకు రాబోతున్న విషయం తెల్సిందే. భారీ అంచనాల నడుమ రూపొందిన గాడ్ ఫాదర్ సినిమా చుట్టూ చక్కని హైప్ ఏర్పడింది. మలయాళం సూపర్ హిట్ సినిమా లూసీఫర్ కి రీమేక్ గా రూపొందిన ఈ సినిమాపై అంచనాలు ఆకాశాన్ని తాకేలా ఉండటంతో అన్ని విధాలుగా బిజినెస్ భారీగా ఉందంటూ ఇండస్ట్రీ వర్గాల ద్వారా సమాచారం అందుతోంది.

మలయాళంలో ప్రధాన పాత్రను పోషించగా ఆ పాత్రలో ఇక్కడ చిరంజీవి కనిపిస్తారు. కాగా మాతృకకి దర్శకత్వం వహించిన పృథ్వీరాజ్ అందులో ఒక ముఖ్య అతిథి పాత్రలో నటించారు. విశేషం ఏమిటంటే తెలుగులో ఆ పాత్రను బాలివుడ్ సూపర్ స్టార్ సల్మాన్ ఖాన్ చేస్తున్నారు.

ఇండియన్ ఫిల్మ్ ఇండస్ట్రీకి చెందిన ఇద్దరు పెద్ద స్టార్స్ నటిస్తున్న సినిమా కావటంతో గాడ్ ఫాదర్ పై భారీ అంచనాలు ఉన్నాయి. ఈ పొలిటికల్ యాక్షన్ డ్రామా అక్టోబర్ 5 న విడుదల కానుంది. అయితే ఈ చిత్రానికి సంబంధించిన ప్రచార కార్యక్రమాలను సరైన విధంగా నడిపించట్లేదని మెగా అభిమానులు భావిస్తున్నారు.

ఈ సినిమా మొదటి సింగిల్ గత వారం విడుదల కావాల్సి ఉండగా, ఇప్పటికీ ఆ లిరికల్ విడియో రిలీజ్ కాలేదు. ఈ విషయం వల్ల సినిమాకి క్రేజ్ తగ్గుతుందేమో అని అభిమానులు కాస్త ఆందోళన చెందిన మాట వాస్తవం. అయితే వారికి అలాంటి భయాలేవీ అక్కర్లేదని చెప్పడానికి ఒక వార్త వచ్చింది.

ఈ సినిమా పై ఉన్న విపరీతమైన క్రేజ్‌ను దృష్టిలో ఉంచుకుని బయ్యర్లు ఫ్యాన్సీ మొత్తాలను ఆఫర్ చేసి రైట్స్‌ను సొంతం చేసుకుంటున్నారు. వాస్తవానికి, ఈ సినిమా థియేట్రికల్ వ్యాపారం అన్ని ఏరియాలలో ఇప్పటికే దాదాపు ముగిసింది. ఇక డిజిటల్ హక్కులు కూడా పెద్ద మొత్తాలకు అమ్ముడయ్యాయని తాజా సమాచారం.

ఈ సినిమా డిజిటల్ హక్కుల కోసం నెట్‌ఫ్లిక్స్ ఏకంగా 57 కోట్లు వెచ్చించింది. ఈ ఒప్పందంలో ఈ సినిమా తెలుగు మరియు హిందీ OTT హక్కులు ఉన్నాయట. తెలుగు సినిమాల వరకు దసరా అతిపెద్ద సీజన్‌లలో ఒకటి అనడంలో ఎలాంటి సందేహం లేదు. కాగా ఇద్దరు మెగాస్టార్‌లను తెరపై చూడటానికి అభిమానులు. చాలా ఆసక్తిగా ఎదురుచూస్తున్న ఈ చిత్రానికి మోహన్ రాజా చిత్రానికి దర్శకత్వం వహించారు.

సౌత్ ఇండియన్ లెజెండరీ డైరెక్టర్ మణిరత్నం ఎంతో ప్రతిష్టాత్మకంగా భారీ స్థాయిలో తెరకెక్కించిన పీరియాడిక్ యాక్షన్ ఫిలిం “పొన్నియిన్ సెల్వన్-1” రిలీజ్ కు సిద్ధంగా ఉంది. సెప్టెంబర్ 30న ప్యాన్ ఇండియా స్థాయిలో ప్రేక్షకుల ముందుకు ఈ సినిమాని తీసుకొచ్చేందుకు చిత్ర యూనిట్ అన్ని రకాల సన్నాహాలు చేస్తున్నారు. మణిరత్నం దాదాపు నాలుగేళ్ళ విరామం తర్వాత తిరిగి వస్తుండటంతో ఈ చిత్రం పై అందరిలో ఆసక్తి నెలకొంది.

‘పొన్నియిన్ సెల్వన్’ అనేది మణిరత్నం డ్రీమ్ ప్రాజెక్ట్ అన్న విషయం తెలిసిందే. ప్రసిద్ధ రచయిత కల్కి కృష్ణమూర్తి నవల ఆధారంగా చోళుల కాలం నాటి కథాంశంతో ఈ చిత్రాన్ని నిర్మిస్తున్నారు. కాగా ఫ్రాంచైజీ సినిమాగా తెరకెక్కిస్తున్నారు.. మొదటి భాగం ‘PS-1’ రిలీజైన తొమ్మిది నెలల్లో రెండవ భాగం విడుదల చేస్తామని ప్రకటించారు. తమిళ ప్రేక్షకులు మరియు సినీ మీడియా ఈ చిత్రం ఎప్పుడెప్పుడు విడుదల అవుతుందా అని ఎదురుచూస్తున్నారు.

ఇక విడుదల తేదీ దగ్గర పడటంతో మణిరత్నం, మరియు చిత్ర బృందం ప్రచార కార్యక్రమాలను మమ్మురం చేశారు. ఇక పీఎస్-1 నిడివి 2 గంటల 50 నిమిషాలు వచ్చిన నేపథ్యంలో.. కొందరు సినీ విశ్లేషకులు ఇది సినిమాకి నెగటివ్ అవుతుందేమో అని అభిప్రాయ పడుతున్నారు. అయితే ఇలాంటి పీరియాడిక్ చిత్రాలు ప్రేక్షకులను అలరించాలి అంటే ఈ మాత్రం నిడివి అవసరం అనే చెప్పాలి. ఎందుకంటే ఇలాంటి సినిమాల్లో ముఖ్య పాత్రలు చాలా ఉంటాయి. మరి ఆ పాత్రలను ప్రేక్షకులు ఇష్టపడాలి అనుకుంటే ఒక్కో పాత్రకి సమాన స్థాయిలో ప్రాధాన్యం ఉండాలి.

అయినా సినిమా బాగుంటే మూడు గంటలైనా ప్రేక్షకులు ఆదరిస్తారని మన తెలుగు సినిమాలైన రంగస్థలం, బాహుబలి-2, ఇటీవలే విడుదలై భారీ బ్లాక్ బస్టర్ అయిన తమిళ సినిమా విక్రమ్ నిరూపించాయి. అలాగే ఈ సినిమా కూడా పకడ్బందీ కథనంతో తెరకెక్కితే తప్పకుండా విజయం సాధిస్తుంది.

ఇక ఓవర్సీస్ లో పొన్నియిన్ సెల్వన్ రికార్డుల ఖాతాను తెరిచింది. ఈ సినిమా ప్రీ సేల్స్‌తో ఇప్పటికే 200K మార్క్‌ను దాటింది, USAలో ఈ ప్రీ సేల్స్‌ చూసి ఆశ్చర్య పోవటం ట్రేడ్ వంతయింది. విడుదలకు ఇంకా 10 రోజులు మిగిలి ఉన్న ఈ సినిమా ఇదే జోరు కొనసాగితే మిలియన్ డాలర్స్ ప్రీమియర్ షోలతో బాక్స్ ఆఫీస్ వద్ద భారీ స్థాయిలో ఓపెన్ అవుతుందని అంచనా వేస్తున్నారు . USAలో మణిరత్నం బ్రాండ్ ఈసారి చాలా బాగా పని చేస్తోంది.

కాగా ‘పొన్నియిన్ సెల్వన్’ చిత్రంలో విక్రమ్ – ఐశ్వర్యరాయ్ – త్రిష – కార్తీ – జయం రవి – శోభితా ధూళిపాళ్ల ప్రధాన పాత్రల్లో నటించారు. ప్రకాష్ రాజ్ – ప్రభు – విక్రమ్ ప్రభు – ఐశ్వర్య లక్ష్మీ – శరత్ కుమార్ – జయరామ్ – రెహమాన్ – రాధాకృష్ణన్ పార్థీవన్ తదితరులు ఇతర కీలక పాత్రలు పోషించారు.

లైకా ప్రొడక్షన్స్ మరియు మణిరత్నం మద్రాస్ టాకీస్ బ్యానర్స్ పై సుభాస్కరన్ – మణిరత్నం సంయుక్తంగా భారీ బడ్జెట్ తో ఈ చిత్రాన్ని నిర్మించారు. ఆస్కార్ విన్నర్ ఏఆర్ రెహమాన్ సంగీతం సమకూర్చారు. రవి వర్మన్ సినిమాటోగ్రఫీ అందించగా.. శ్రీకర్ ప్రసాద్ ఎడిటింగ్ వర్క్ చేశారు. తోట తరణి ఆర్ట్ డైరెక్టర్ గా వ్యవహరించారు.

దుల్కర్ సల్మాన్, మృణాల్ ఠాకూర్ జంటగా నటించిన సినిమా ‘సీతారామం’. హను రాఘవపూడి దర్శకత్వంలో, వైజయంతీ మూవీస్ సమర్పణలో స్వప్న సినిమా బ్యానర్ పై ప్రముఖ అగ్ర నిర్మాత సి. అశ్వనీదత్ అత్యంత ప్రతిష్టాత్మకంగా ఈ చిత్రాన్ని నిర్మించారు. విడుదలకు ముందు ఎలాంటి అంచనాలు లేకుండా థియేటర్లలో రిలీజ్ అయిన ఈ సినిమా.. విడుదల తర్వాత అనూహ్యంగా బ్లాక్ బస్టర్ టాక్ ని సొంతం చేసుకుని సినిమా చూసిన అందరి చేత ఏకగ్రీవంగా అద్భుతమైన సినిమాగా పేరు తెచ్చుకుంది.

‘యుద్ధంతో రాసిన ప్రేమకథ’ అనే ట్యాగ్ లైన్ తో ఒక మిలిటరీ ఆఫీసర్కి – యువరాణికి మధ్య ప్రేమగాథగా రూపొందిన ఈ సినిమా ఊహించని విధంగా ఘన విజయాన్ని సొంతం చేసుకుని ప్రేక్షకులతో పాటు విమర్శకుల ప్రశంసల్ని కూడా సొంతం చేసుకుంది.

దర్శకుడు హను రాఘవపూడి దర్శకత్వ ప్రతిభకు తోడు దుల్కర్ సల్మాన్ మృణాల్ ల అద్భుతమైన నటన సినిమాను చాలా గొప్ప స్థాయిలో నిలబెట్టింది. కేవలం నటన మాత్రమే కాకుండా ప్రేమికులుగా వారిద్దరి మధ్య కెమిస్ట్రీ కూడా అద్భుతంగా పండింది. సరదా సన్నివేశాలలో ఒకరిని ఒకరు అటపట్టించుకునే విధానం భలేగా ఉండింది. అలాగే సినిమా మొత్తంలో ఇద్దరూ ఒకరిని ఒకరు ముట్టుకునే సన్నివేశాలు చాలా తక్కువ అయినప్పటికీ వారి మధ్య ఉన్న శృంగార సాన్నిహిత్యాన్ని ప్రేక్షకులు భావించేలా ప్రేక్షకులను కట్టిపడేసారు. వెండితెరపై ఈ జంట ఎంతో చూడముచ్చటగా కనిపించి సినిమాకు ప్రధాన బలంగా నిలిచి ప్రతీ ఒక్కరి హృదయాల్ని కొల్లగొట్టేలా చేసింది.

అయితే ప్రేక్షకులని ఇంతగా అలరించిన ఈ జంట, వారిని తెరపై అందంగా చూపించిన దర్శకుడు మళ్ళీ కలిసి పని చేస్తారని తెలుస్తోంది .నిర్మాత సి. అశ్వనీదత్, ప్రేక్షకులు ఇంకా సీతా రామం సినిమాని మరచిపోకముందే మళ్ళీ ఈ కలయికలో సినిమా తీసే ఆలోచనలో వున్నారట. త్వరలో దుల్కర్ సల్మాన్ మృణాల్ ఠాకూర్ జంటగా, హను రాఘవపూడి దర్శకత్వంలో మరో మ్యాజికల్ రొమాంటిక్ లవ్ స్టోరీని తెరకెక్కించాలని అనుకుంటున్నట్లు సమాచారం. తాజాగా ఈ విషయాన్ని నిర్మాత సి. అశ్వనీదత్ స్పష్టం చేశారు. ఈ విషయం ఖచ్చితంగా దుల్కర్ మృణాల్ ల అభిమానులకు ఎంతో ఆనందాన్ని ఇస్తుంది.

మరి ఈ హిట్ కాంబినేషన్లో వైజయంతీ మూవీస్ రూపొందించనున్న సినిమా ఎప్పుడు మొదలు పెడతారో.. అలాగే సినిమాకి సంబంధించిన కీలక సమాచారాన్ని అధికారికంగా త్వరలోనే వైజయంతీ మూవీస్ బృందం వెల్లడించనున్నట్టుగా తెలిసింది. ఈ బ్లాక్ బస్టర్ కాంబినేషన్లో వచ్చే సినిమా మరో అద్భుతమైన దృశ్య కావ్యంగా నిలవాలని ఆశిద్దాం.

సినిమా అనేది టీమ్ వర్క్ తో కూడుకున్న పని. నటీనటులు, సంగీత దర్శకులు, దర్శకుడు అందరూ కలిసికట్టుగా కృషి చేస్తేనే సినిమాకి సరైన విధంగా ఫలితం వస్తుంది. అయితే అప్పుడప్పుడూ కొన్ని సినిమాల్లో నటులు తమ సహనటులతో, లేదా దర్శక నిర్మాతలతో సృజనాత్మక లేదా వ్యక్తిగత విభేదాల కారణంగా సినిమాల నుండి వైదొలగడం సర్వసాధారణం. ఈ తరంలో హీరో హీరోయిన్లకు ఉన్న క్రేజ్ దృష్ట్యా ఈ రోజుల్లో ఇలాంటి సంఘటనలు జరగడం మరింత సాధారణ విషయంగా మారిపోయింది.

యువ దర్శకుడు నెల్సన్‌తో రజనీకాంత్ తదుపరి చిత్రం జైలర్ అనే పేరుతో వస్తున్న సంగతి తెలిసిందే. ఫస్ట్ లుక్ చూసి రజనీ అభిమానులు తమ హీరోకి మరో సూపర్ హిట్ రానుందని ఆసక్తిగా ఎదురుచూస్తున్నారు. రజనీ మరియు నెల్సన్‌ల తాజా కలయిక చాలా ఆసక్తికరమైనదే కాకుండా వైవిధ్యాన్ని చూపగల అవకాశం ఉన్న సినిమా.

కొంతకాలం క్రితం, నెల్సన్ ఈ చిత్రంలో ప్రియాంక అరుల్ మోహన్‌ను ఒక ప్రధాన పాత్రలో నటించేందుకు తీసుకున్నారు. నెల్సన్ గతంలో తెరకెక్కించి బ్లాక్ బస్టర్ అయిన డాక్టర్‌ సినిమాలో ప్రియాంకతో కలిసి పనిచేశారు. ఆ రకంగా మళ్ళీ హిట్ కాంబినేషన్ రిపీట్ కానుందని అందరూ భావించారు.

అయితే నెల్సన్‌తో కొన్ని సృజనాత్మక విభేదాల కారణంగా ప్రియాంక జైలర్ సినిమా నుండి బయటకు వెళ్లిందని ఇప్పుడు వార్తలు వస్తున్నాయి. నిజానికి డాక్టర్ షూటింగ్ సమయంలో కూడా వీరిద్దరి మధ్య కొన్ని విభేదాలు వచ్చాయని తెలుస్తోంది. జైలర్ సెట్స్‌లో జరిగిన ఒక సంఘటన వల్లే ప్రియాంక, సూపర్ స్టార్ సినిమా నుండి తప్పుకోవాలని నిర్ణయించుకున్నారు అని సమాచారం.

నిజానికి ఏ నటి అయినా రజనీకాంత్‌తో కలిసి పనిచేయడం అంటే ఎంతో సంతోషిస్తారు అలానే ఆ అవకాశాన్ని గొప్ప అదృష్టంగా భావిస్తుంటారు. అలాంటిది ఆయన సినిమా నుండి, మరియు ఇంతటి భారీ ప్రాజెక్ట్ నుండి తప్పుకోవడం అనేది సాహసోపేతమైన నిర్ణయమనే చెప్పాలి. ఇక ప్రియాంక ఈ సినిమా నుండి నిష్క్రమించిన తర్వాత ఈ పాత్ర కోసం దర్శకుడు నెల్సన్ ఎవరిని ఎంచుకుంటారో చూడాలి.

కాగా సీనియర్ నటి రమ్యకృష్ణ మరియు యువ సంగీత తరంగం అనిరుధ్ ఇప్పటికీ ఈ ప్రాజెక్ట్‌లో చాలా కీలకమైన భాగంగా ఉన్నారు.