మెగాస్టార్ చిరంజీవి, కోలీవుడ్ స్టార్ డైరెక్ట‌ర్‌ మోహ‌న్ రాజా కాంబినేష‌న్‌లో వ‌స్తున్న చిత్రం గాడ్ ఫాద‌ర్. బాలీవుడ్ స్టార్ హీరో స‌ల్మాన్ ఖాన్ ప్రత్యేక పాత్రలో కనిపించనున్నారు. చిరు 153వ చిత్రంగా వ‌స్తున్న గాడ్ ఫాదర్ నుంచి ఫస్ట్ లుక్ అప్ డేట్ అందించారు చిత్ర యూనిట్. జులై 4న సాయంత్రం 5:45న ఫ‌స్ట్ లుక్ పోస్ట‌ర్‌ను విడుద‌ల చేయ‌నున్న‌ట్టు ప్ర‌క‌టించారు.రోమాలు నిక్కబొడుచుకునే చిత్రం సిద్ధం అంటూ అభిమానులను ఉద్దేశించి చిత్ర బృందం ట్వీట్ చేశారు.

.హనుమాన్ జంక్ష‌న్ ఫేం మోహ‌న్ రాజా దర్శకత్వం వహిస్తున్న ఈ చిత్రంలో తెలుగు స్టార్ డైరెక్ట‌ర్ పూరీ జ‌గ‌న్నాథ్ కీలక పాత్ర‌లో న‌టిస్తుండ‌టం విశేషం. ఇప్ప‌టికే చిరంజీవితో క‌లిసి దిగిన స్టిల్ ఒక‌టి సోషల్ మీడియాలో హ‌ల్ చ‌ల్ చేస్తోంది. కొణిదెల ప్రొడ‌క్ష‌న్ కంపెనీ, సూప‌ర్ గుడ్ ఫిలిమ్స్ బ్యాన‌ర్ల‌పై నిర్మిస్తున్న ఈ చిత్రంలో న‌య‌న‌తార‌, స‌త్యదేవ్ ముఖ్య పాత్రలు పోషిస్తున్నారు. భారీ బ‌డ్జెట్‌తో నిర్మిస్తున్న ఈ చిత్రానికి ఎస్ థ‌మ‌న్ సంగీతం అందిస్తున్నారు.

తాజాగా విడుదలైన గాడ్ ఫాదర్ ఫస్ట్ లుక్ లో మెగాస్టార్ చిరంజీవి కొత్త లుక్ అదిరిపోయే లెవెల్ లో ఉందని చెప్పాలి.అలాగే మినీ టీజర్ లాగా ఉన్న కార్ షాట్ లో కూడా చిరంజీవిని బాగా ప్రెజెంట్ చేశారు.. తమన్ అందించిన నేపథ్య సంగీతం అద్భుతంగా ఉంది.ఇక ఈ టీజర్ లో చిరంజీవి పక్కన సునీల్ కూడా కనిపించారు.

చిరంజీవి గాడ్ ఫాదర్ తో పాటు మెహ‌ర్ ర‌మేష్ తో వేదాళ‌మ్ రీమేక్‌గా వ‌స్తున్న‌ భోళా శంక‌ర్ సినిమాలో న‌టిస్తున్నారు. కీర్తిసురేష్ చెల్లెలి పాత్రలో న‌టిస్తోంది. మ‌రోవైపు కేఎస్ ర‌వీంద్ర (బాబీ) డైరెక్ష‌న్‌లో 154వ సినిమాని చేస్తున్న సంగతి తెలిసిందే.

యాంకర్ అనసూయకి ఉన్న క్రేజ్ గురించి ప్రత్యేకంగా చెప్పనవసరం లేదు. తన అందచందాలతో పాటు చురుకైన మాటలతో బుల్లితెర పై కొన్ని సంవత్సరాలుగా తెలుగు ప్రేక్షకులను అలరిస్తున్నారు. కేవలం తన యాంకరింగ్ వల్లే కాక పలు మార్లు తన మాటల ద్వారా,సోషల్ మీడియాలో పెట్టే పోస్ట్ ల ద్వారా కాస్త వివాదాస్పద సంఘటనలు ఆవిడ కెరీర్ లో ఎదురైనా..బెదరకుండా ఆయా పరిస్థితులని ధీటుగా ఎదురుకుని శభాష్ అనిపించుకున్నారు.

ఇదిలా ఉండగా అనసూయ టెలివిజన్ కెరీర్ ముగిసిపోనుందని వార్తలు వస్తున్నాయి. తాజాగా జబర్దస్త్ నుంచి అనసూయ తప్పుకుంటున్నట్లు ప్రకటించిన సంగతి తెలిసిందే. ఇక పై ఆమె జబర్దస్త్‌లో కనిపించబోదని తెలుస్తోంది. అనసూయ గతంలో జబర్దస్త్ తో పాటు పలు టీవీ ప్రోగ్రామ్‌లలో కూడా కనిపిస్తూ ఉండేవారు. కాగా ప్రస్తుతం ఓ రెండు టీవీ షోల్లో మాత్రమే కనిపించడానికి కారణం ఇక బుల్లితెరకు టాటా చెప్పేసి పూర్తిగా సినిమాలపై, దృష్టి సారించే ఆలోచనలో ఉన్నట్లు తెలుస్తుంది.

అనసూయకు మొదటి నుంచీ సినిమా అవకాశాలు కూడా బాగానే వస్తున్నాయి. ప్రత్యేక పాటలు,ప్రత్యేక పాత్రలే కాక తను ప్రధాన పాత్రలో కూడా కొన్ని సినిమాల్లో నటించింది. రంగస్థలంలో రంగమ్మత్త పాత్రలో ఆవిడ నటనకు ఎంతో పేరు వచ్చింది. అలాగే క్షణం,పుష్ప సినిమాల్లో విలన్ పాత్రల్లో కనిపించి మెప్పించారు.ఇతర భాషలలో కూడా అనసూయ నటించడం జరిగింది. మలయాళం లో అగ్ర హీరో మమ్ముట్టి సరసన భీష్మపర్వం సినిమాలో నటించిన అనసూయకు మరో మలయాళ సినిమాతో పాటు రెండు తమిళ చిత్రాల్లోనూ నటించే అవకాశం దక్కిందట.ఇక పుష్ప2లో కూడా తన పాత్రకి మంచి ప్రాముఖ్యత ఉందని తెలుస్తోంది.

కృష్ణవంశీ దర్శకత్వంలో విలక్షణ నటుడు ప్రకాష్ రాజ్ ప్రధాన పాత్రలో నటిస్తున్న “రంగమార్తాండ” చిత్రంలోనూ ఒక పాత్రలో నటిస్తున్న అనసూయ,ఆ తరువాత మరోసారి ప్రధాన పాత్రలో ఒక వెబ్ సిరీస్ చేయనున్నారని సమాచారం. అందులో ఒక వేశ్య పాత్రలో నటిస్తున్నారు అని వినికిడి.

‘కన్యాశుల్కం’ నాటకం అప్పటి బాల్యవివాహాలు .. వితంతు వివాహాలతో పాటు ఇతర మూడాఛారాలు ఆనాటి సమాజాన్ని ఎంతగా ప్రభావితం చేశాయనేది చాటి చెబుతుంది. ఈ వెబ్ సిరీస్ ను దర్శకుడు క్రిష్ సారథ్యం వహిస్తున్నారు అని సమాచారం. 1955లో నందమూరి తారకరామారావు గారు,మహానటి సావిత్రి కలిసి నటించిన ‘కన్యాశుల్కం’ సినిమాను నేటికీ ప్రేక్షకులు,విమర్శకులు ప్రశంసిస్తూ ఉంటారు. మరి అనసూయ, క్రిష్ అలనాటి క్లాసిక్ ను మరిపించేలా చేయగలరో లేదో చూద్దాం.

ప్రస్తుతం తెలుగు సినిమా పరిశ్రమలో ఎదుగుతున్న హీరోల్లో శ్రీవిష్ణు ఒకరు. వైవిధ్యమైన కథలు,పాత్రలతో విమర్శకులను, ప్రేక్షకులను మెప్పిస్తున్న హీరో శ్రీ విష్ణు. హిట్ అయినా ఫ్లాఫ్ అయినా తనకు నచ్చిన సినిమాలు చేసుకుంటూ వెళ్తున్నారు శ్రీ విష్ణు. ఎక్కువగా ఎమోషనల్ సబ్జెక్ట్ లతో సినిమాలు తీసే శ్రీవిష్ణు.. మధ్యలో కామెడీ టచ్ ఉన్న సినిమాలూ చేశారు.

అయితే ఇప్పుడు శ్రీ విష్ణు మాస్ సినిమాతో ప్రేక్షకుల ముందుకు రాబోతున్నారు. శ్రీ విష్ణు హీరోగా ప్రదీప్ వర్మ దర్శకత్వంలో బెక్కెం వేణుగోపాల్ నిర్మాతగా లక్కీ మీడియా బ్యానర్ పై ‘అల్లూరి’ సినిమాని ప్రకటించిన సంగతి తెలిసిందే.

తాజాగా ఈరోజు అల్లూరి సీతారామరాజు జయంతి సందర్భంగా శ్రీ విష్ణు హీరోగా నటించిన ‘అల్లూరి’ సినిమా టీజర్ రిలీజ్ చేశారు. ఇందులో మొదటి సారి శ్రీవిష్ణు పవర్ఫుల్ పోలీస్ ఇన్స్పెక్టర్ గా కనిపిస్తున్నారు.ఎక్కడి దొంగలు అక్కడే గప్ చుప్.. పోలీస్ బయలుదేరాడురా అంటూ మాస్ టచ్ తో మొదలైన టీజర్,ఆ తరువాత విప్లవానికి నాంది చైతన్యం.. చైతన్యానికి పునాది నిజాయితీ..నిజాయితీకి మారుపేరు అల్లూరి అంటూ కాస్త విప్లవాన్ని జోడించి ఆకట్టుకునేలా సాగింది.

పోలీస్ సినిమాలు అంటేనే సాధారణంగా ఒక ఫార్ములాతో ఉంటాయి,ఈ సినిమా కూడా అదే దారిలో నడిపిస్తే ఖచ్చితంగా విజయం సాధించవచ్చు. ఎందుకంటే ఇంతవరకు మాస్ హీరోయిజం ఉన్న పాత్రలో శ్రీవిష్ణు చేయలేదు,కనుక ఈ సినిమా ప్రేక్షకులకు కొత్త అనుభూతిని కలిగిస్తుంది అనడంలో ఎలాంటి సందేహం లేదు.

శ్రీవిష్ణు గత చిత్రం భళాతందనాన ఘోరంగా పరాజయం పాలవడంతో ఈసారి ఎలాగైనా గట్టి హిట్టు కొట్టాలని అనే ధృడసంకల్పంతో ఉన్న శ్రీవిష్ణు సినిమా కోసం తన లుక్ ను కూడా మార్చుకున్నారు.ఈ సినిమా విడుదల తేదీ ఇంకా అధికారికంగా ప్రకటించాల్సి ఉంది.

ప్రేమమ్ తెలుగు వెర్షన్ తో తెలుగు ప్రేక్షకులకు పరిచయం అయిన అనుపమ పరమేశ్వరన్ తక్కువ సమయం లోనే చక్కని క్రేజ్ ను సంపాదించుకున్నారు. చక్కని నటనతో పాటు తెలుగులో సొంతంగా డబ్బింగ్ చేప్పుకుంటూ తనదైన స్మైల్/హెయిర్ స్టైల్ తో ప్రేక్షకులను ఆకట్టుకున్నారు.

తాజాగా అనుపమ ప్రధాన పాత్రలో ”బ‌ట‌ర్‌ఫ్లై”అనే సినిమాలో నటిస్తున్నారు.ఒక అపార్ట్మెంట్ బ్యాక్ డ్రాప్ లో సైకలాజికల్ థ్రిల్లర్ గా రూపొందుతున్న ఈ చిత్రానికి గంటా స‌తీష్‌ బాబు ద‌ర్శ‌క‌త్వం వ‌హిస్తున్నారు. ర‌వి ప్ర‌కాష్ బోడ‌పాటి, ప్ర‌సాద్ తిరువ‌ళ్లూరి, ప్ర‌దీప్ న‌ల్లిమెల్లి నిర్మిస్తున్నారు.

ఈ సినిమా కోసం అనుప‌మ తొలిసారిగా గాయనిగా మారటం విశేషం. ‘ఆల్ ది లేడీస్ రైజ్ యువ‌ర్ హాండ్స్‌’ అనే గీతాన్ని ఆలపించిన అనుపమ టాలెంట్ ను ప్రేక్షకులు ఎంతగానో అభినందిస్తున్నారు.పరభాషా నటి అయి ఉండి సొంతంగా డబ్బింగ్ చెప్పడమే కాకుండా ఇప్పుడు పాట కూడా పాడటం అనుపమకు వృత్తి పట్ల ఉన్న అంకిత భావాన్ని తెలియచేస్తుంది.

ఇన్నాళ్లు సోష‌ల్ మీడియాలో స‌ర‌దాగా పాటలు

పాడుతూ వ‌చ్చిన అనుప‌మ ఈ సినిమాతో గాయనిగా అధికారికంగా పరిచయమైంది. ఈ పాట‌కు చ‌క్క‌టి స్పంద‌న రావ‌డం ప‌ట్ల అనుప‌మ ప‌ర‌మేశ్వ‌ర‌న్ ఆనందాన్ని వ్య‌క్తం చేస్తోంది. అయితే బ‌ట‌ర్‌ఫ్లై సినిమాను OTTలో విడుదల చేయాలని చిత్ర యూనిట్ భావిస్తున్నట్టు తెలుస్తోంది. ఇప్పటికే చాలా సినిమాలు థియేటర్లలో విడుదలవ్వడం వలన ప్రేక్షకులు ప్రతి సినిమాని,అందులోనూ చిన్న సినిమాలను చూసేందుకు ప్రేక్షకులు ఆసక్తి చూపించటం లేదు.అందువల్ల ఈ సినిమా OTTలో విడుదల చేయడం సరైన నిర్ణయంగా భావించవచ్చు.

ప్రస్తుతం అనుపమ తెలుగులో నిఖిల్‌తో ‘18పేజీస్‌’, ‘కార్తికేయ‌-2’ చిత్రాల్లో హీరోయిన్‌గా న‌టిస్తోంది అనుపమ పరమేశ్వరన్. ఈ రెండు సినిమాలు చిత్రీక‌ర‌ణ ద‌శ‌లో ఉన్నాయి. ఈ ఏడాది మొత్తంగా అనుప‌మ న‌టించిన మూడు సినిమాలు ప్రేక్ష‌కుల ముందుకు రాబోతున్నాయి.

తెలుగు సినిమా నిర్మాతల మండలి ఇటీవల OTT రిలీజ్ ల పై కొత్త నిబంధనలు అమలు చేయాలని నిర్ణయం తీసుకుంది. పెద్ద హీరోల సినిమాలు అయితే ఎనిమిది వారాలు..అదే చిన్న సినిమా థియేటర్లలో రిలీజ్ అయిన ఆరు వారాల తరువాతే OTT రిలీజ్ ఉండాలనీ ఈ మేరకు నిర్ణయం తీసుకున్నారు.

అయితే ఈ సమావేశం అప్పుడే కొందరు నిర్మాతలు ఈ నిర్ణయం పట్ల అంత సుముఖంగా లేరు అని తెలియవచ్చింది. సినిమాలు ఫ్లాప్ అయినపుడు తొందరగా OTT విడుదలకు వెళ్ళే అలవాటు ఈ సంవత్సరంలో బాగా వృద్ధిలో ఉండింది.ఇప్పుడు ఈ కొత్త నిభందనలు అమలులోకి వస్తే ఆ వెసులుబాటు ఉండదు.

ఉదాహరణకు ఈ వారం రిలీజ్ అయిన సినిమాలే తీసుకుందాం..పక్కా కమర్షియల్, షికారి,తమిళ డబ్బింగ్ సినిమా ఏనుగు విడుదల అయ్యాయి. అన్ని సినిమాలు కూడా బాక్స్ ఆఫీస్ వద్ద పరాజయం పాలయ్యాయి. మరి ఇప్పుడు కొత్త నిబంధనల ప్రకారం ఈ సినిమా నిర్మాతలు ఆరు వారాల తరువాతే OTT రిలీజ్ కు పచ్చ జెండా ఊపుతారా లేక పాత పద్ధతిలో త్వరగా విడుదల చేస్తారా అనేది చూడాలి.

ఏదైనా కొత్త నిభందనలు అమలులోకి వచ్చిన తరువాత అప్పటి వరకూ వేరే పద్ధతులు అలవాటయిన వారికి కాస్త ఇబ్బందిగా ఉంటుంది అనేది వాస్తవం.కానీ ఆ నిర్ణయాలు అందరి శ్రేయస్సు దృష్ట్యా తీసుకున్నారు కాబట్టి నిర్మాతలు కూడా అత్యాశకు పోకుండా నిభందనలు పాటిస్తే అందరికీ మంచిది.