తెలుగు సినీ పరిశ్రమకు ఆగస్టు నెల బాగా కలిసివచ్చింది. వరుస విజయాలు కలిగిన ఆ నెల తర్వాత, సెప్టెంబర్ పరిశ్రమకు చాలా కఠినమైన నెలగా మారింది. రంగ రంగ వైభవంగా, ఫ‌స్ట్ డే ఫ‌స్ట్ షో సినిమాలు బాక్సాఫీస్ వద్ద ద‌గ్గ‌ర దారుణంగా పరాజయం పాలవడంతో ఈ నెల ప్రారంభం అయింది. ఈ రెండు సినిమాలు కూడా తొలిరోజునే కుదేలయ్యాయి. కాగా ఆ సినిమాలకు సంభందించిన అన్ని పార్టీలకు కూడా అన్ని రకాలుగా నష్టాలను మిగిల్చి భారీ డిజాస్టర్లుగా నిలిచాయి.

ఆ తర్వాత వారంలో వచ్చిన ఓకే ఒక జీవితం సినిమా రూపంలో మరో మంచి సినిమా వచ్చింది, సరైన కంటెంట్ ఎల్లప్పుడూ ప్రేక్షకుల మనసును గెలుస్తుందని ఈ చిత్రం మరోసారి నిరూపించింది. ఒకే ఒక జీవితం హృద్యమైన సినిమాగా ప్రశంసలు దక్కించుకోవటంతో పాటు బాక్సాఫీస్ వద్ద.కూడా భారీ విజయాన్ని సాధించింది. అమ్మ సెంటిమెంట్ ప్రధాన కథగా.. దానికి టైం ట్రావెల్ వంటి విభిన్న అంశాన్ని తెరకెక్కించిన తీరు ప్రేక్షకులను ఆకట్టుకుంది.

అయితే ఆ తర్వాత కథ మళ్లీ మొదటికి వచ్చింది..గత వారం విడుదలైన ఆ అమ్మాయి గురించి మీకు చెప్పాలి.. నేను మీకు బాగా కావాల్సినవాడిని అనే రెండు సినిమాల రూపంలో అట్టర్ డిజాస్టర్లు పరిశ్రమను మళ్ళీ వెనక్కి తోశాయి. ఈ రెండు సినిమాలు కూడా బాక్స్ ఆఫీసు వద్ద నామ మాత్రపు షేర్లని నమోదు చేసి ఎగ్జిబిటర్లకు పెద్ద మొత్తంలోనే నష్టాలను మిగిల్చాయి.

ఇక తాజాగా ఈ వారం విడుదలైన సినిమాల పరిస్థితి కూడా అందుకు భిన్నంగా ఏమీ లేదు. ఈ వారం విడుదలైన మూడు సినిమాలు కూడా కనీస స్థాయిలో థియేటర్లలో ప్రేక్షకులను రప్పించడంలో ఘోరంగా విఫలమయ్యాయి. అంతే కాకుండా చాలా చోట్ల తొలి రోజునే థియేటర్ రెంట్ ను వసూలు చేయడంలో కూడా విఫలమయ్యాయి.

శ్రీవిష్ణు నటించిన అల్లూరి సినిమా ఒక మోస్తరు స్థాయిలో సమీక్షలను తెచ్చుకుంది. ఇక నాగ శౌర్య హీరోగా వచ్చిన కృష్ణా వ్రిందా విహారి కూడా అంతే. కాకపోతే ఈ వారంలో విడుదలైన సినిమాలలో కంటెంట్ పరంగా బాగుందన్న పేరు మాత్రం ఈ సినిమాకు మిగిలింది. ఇక దొంగలున్నారు జాగర్త సినిమా అయితే ఆ సినిమా రిలీజ్ అయిన సంగతి చాలా మందికి తెలియనే తెలియదు. అంత ఘోరంగా ఆ సినిమా పరాజయం పాలయింది.

ఈ మూడు సినిమాలు మూకుమ్మడిగా ఢమాల్ అవడంతో దాదాపు అన్ని థియేటర్లు ఇప్పుడు డెఫిసిట్లలో నడుస్తున్నాయి. కాగా ఎగ్జిబిటర్లు దసరా పండుగ సందర్భంగా విడుదల అయ్యే సినిమాలు మళ్ళీ తమ వ్యాపారం ఊపందుకునేలా చేస్తాయని ఆసక్తిగా ఎదురుచూస్తున్నారు.

తమిళ యువ దర్శకుడు అట్లీ దర్శకత్వంలో బాలీవుడ్ బాద్షా షారుఖ్ ఖాన్ నటిస్తున్న తాజా చిత్రం “జవాన్” సినిమా. ఈ సినిమా కోసం షారుఖ్ అభిమానులు ఎంతగానో ఎదురు చూస్తున్నారు. లోగడ ఈ చిత్రం నుంచి విడుదలయిన చిన్న విడియో గ్లింప్స్ అద్భుతంగా ఉండి సినిమా మీద అందరిలో ఆసక్తిని పెంచేసింది. 2018లో వచ్చిన ‘జీరో’ సినిమా విడుదలైన తర్వాత కింగ్ ఖాన్ మరో సినిమా చేయలేదు. ఐదేళ్ల విరామం తర్వాత మళ్లీ ఆయన హీరోగా కనిపించనున్న ఈ సినిమా పట్ల ట్రేడ్ వర్గాలు బాగా ఆసక్తి కనబరుస్తున్నారు. తద్వారా ఈ సినిమా నాన్ థియేట్రికల్ బిజినెస్ తోనే షారుఖ్ రికార్డుల వేటను ప్రారంబించారు.

యాక్షన్ ఎంటర్‌టైనర్‌గా తెరకెక్కుతున్న ఈ చిత్రంలో విలక్షణ నటుడు విజయ్ సేతుపతి విలన్ పాత్రలో నటిస్తున్నారు. కాగా నయనతార కూడా మరో ముఖ్య పాత్రలో కనిపించనున్నారు. ఇక జవాన్ చిత్రం తాలూకు ఆల్ ఇండియా శాటిలైట్ హక్కులను జీ టీవీ సొంతం చేసుకుంది. ఎంతో ఆసక్తిగా ఎదురుచూస్తున్న ఈ ప్రాజెక్ట్ కు సంభందించిన డిజిటల్ హక్కులను దిగ్గజ ఓటీటి సంస్థ నెట్‌ఫ్లిక్స్ దక్కించుకుంది. ఈ రెండు ఒప్పందాల మొత్తం విలువ ఏకంగా 250 కోట్ల కంటే ఎక్కువని తెలుస్తోంది.

జవాన్ సినిమాలో మునుపెన్నడూ చూడని యాక్షన్ రోల్ లో షారుఖ్ ను చూపించే టీజర్‌ను అట్లీ ఇదివరకే విడుదల చేయడంతో సినిమా పై ఇప్పటికే అంచనాలు ఆకాశాన్ని తాకాయి. సాధారణంగా రొమాంటిక్ సినిమాలు ఎక్కువగా చేసే షారుఖ్ ను సరికొత్త అవతార్ లో చూపించడంతో ఈ చిత్రం అందరి దృష్టిని ఆకర్షించింది. షారుక్ ఖాన్ 2023 సంవత్సరంలో వరుసగా భారీ సినిమాలతో ప్రేక్షకులని పలకరించెందుకు సిద్ధంగా ఉన్నారు. జవాన్‌ సినిమాతో పాటు, సిద్ధార్థ్ ఆనంద్ దర్శకత్వంలో ‘పఠాన్’ మరియు రాజ్‌కుమార్ హిరానీ తెరకెక్కించే ‘డుంకీ’లో కూడా ఆయన కనిపిస్తారు.

జూన్ 2023లో విడుదల కానున్న జవాన్ చిత్రానికి అనిరుధ్ రవిచందర్ సంగీతం అందిస్తున్నారు. హిందీతో పాటు తమిళం, తెలుగు, మలయాళం, కన్నడ భాషల్లో కూడా ఈ చిత్రం విడుదల కానుంది.

హను రాఘవపూడి తెరకెక్కించిన మ్యాజికల్ లవ్ స్టొరీ సీతా రామం ఈ సంవత్సరంలో అతిపెద్ద హిట్‌లలో ఒకటిగా నిలిచింది. ఓ వైపు ప్రేక్షకులు మరియు విమర్శకులు ఈ చిత్రాన్ని పొగడ్తలతో ముంచెత్తగా.. మరో వైపు బాక్సాఫీస్ వద్ద కూడా అద్భుతంగా లాంగ్ రన్ తో భారీ విజయాన్ని సొంతం చేసుకుంది.

ఏ ప్రేమకథకైనా కావాల్సింది హీరో – హీరోయిన్ల జోడీ చక్కగా కుదరడం.. వీనుల విందైన సంగీతం. సీతా రామంలో దుల్కర్, మృణాల్ ఇద్దరూ తమ నటన మరియు కెమిస్ట్రీని సీతారాములుగా వారిని తప్ప మరెవ్వరినీ ఊహించలేనంతగా పండించారు. ఇక విశాల్ చంద్రశేఖర్ సంగీతం కూడా శ్రావ్యంగా ఉండి ఒక్కో పాట ఒక్కో అద్భుతంగా, నేపథ్య సంగీతం కూడా సినిమాకి ప్రాణంలా నిలిచింది.

ఇక ముందుగానే చెప్పుకున్నట్లు బాక్స్ ఆఫీస్ వద్ద ఈ యుద్ధం రాసిన ప్రేమకథ ప్రతి ప్రాంతంలోనూ గొప్ప విజయాన్ని సాధించింది. పంపిణీదారులు మరియు ఎగ్జిబిటర్‌లకు భారీ లాభాలను సంపాదించి పెట్టింది.

కాగా సీతా రామం సినిమా ప్రపంచ వ్యాప్తంగా 100 కోట్ల గ్రాస్ మార్కుకు కేవలం కొద్ది అడుగుల దూరంలో ఉంది. హిందీ కలెక్షన్లతో కలిపి 22 రోజుల వరకు ఈ చిత్రం మొత్తంగా 96 కోట్ల మొత్తాన్ని వసూలు చేసింది. అమెజాన్ ప్రైమ్ వీడియోలో డిజిటల్ రిలీజ్ ను నిర్మాతలు గనక మరి కొన్ని రోజులు ఆలస్యం చేసుంటే ఈ చిత్రం మ్యాజికల్ 100 కోట్ల మార్క్‌ను అవలీలగా సాధించేది. హిందీ కలెక్షన్లు ఇప్పటి వరకు 8 కోట్ల వరకు వచ్చాయి. ఇక వంద కోట్ల మైలురాయిని చేరుకోవడానికి ఈ చిత్రం మరో 4-5 కోట్లు వసూలు చేయాల్సి ఉంటుంది.

సీతా రామం యొక్క ఏరియాల వారీ కలెక్షన్స్ ఎలా వచ్చాయంటే.. తెలుగు రాష్ట్రాలలో – 44 కోట్లను వసూలు చేయగా.. కేరళలో – 8 కోట్లు, తమిళనాడులో – 13 కోట్లు, హిందీ – కర్ణాటక కలిపి 15 కోట్లు, ఓవర్సీస్లో 16 కోట్లు.. మొత్తంగా అన్ని ఏరియాల వసూళ్లు కలుపుకుని 96 కోట్ల భారీ ఫిగర్ ను సాధించింది.

హను రాఘవపూడి ఈ చిత్రానికి దర్శకత్వం వహించగా, వైజయంతీ మూవీస్ బ్యానర్‌ పై అగ్ర నిర్మాత అశ్విని దత్ నిర్మాణ సారథ్యం వహించారు. ఈ సినిమాలో రష్మిక మందన్న, సుమంత్, తరుణ్ భాస్కర్ కీలక పాత్రల్లో నటించారు. దుల్కర్ మరియు మృణాల్ అద్భుతమైన కెమిస్ట్రీ, అబ్బురపరిచే విజువల్స్, భావోద్వేగాలతో కట్టి పడేసే కథ, పాత్రలు ప్రేక్షకుల హృదయాలను గెలుచుకోవడంలో చిత్రానికి ఎంతగానో సహాయపడ్డాయి.

తమిళ సినిమా పరిశ్రమలో ప్రతి తరంలోనూ, ఇద్దరు లేదా ముగ్గురు అగ్ర హీరోలు, నటులు ఎల్లప్పుడూ భారీ సంఖ్యలో అభిమాన గణాన్ని ఆస్వాదిస్తూ వచ్చారు. తమిళ చలనచిత్ర పరిశ్రమ ఎదుగుతున్న సంవత్సరాల్లో, ఎంజీఆర్, జెమినీ గణేశన్ లతో పాటు శివాజీ గణేశన్ వంటి నటులు తమిళ సినిమాను శాసించారు. కాగా వారు నిరంతరం బలమైన అభిమానుల ఆదరణ మరియు ప్రేమను ఆస్వాదించేవారు. అంతే కాకుండా అన్ని వేళలా ఆయా హీరోల మధ్య ఆరోగ్యకరమైన పోటీని కొనసాగిస్తూ వచ్చారు.

పైన పేర్కొన్న మహానటుల తర్వాత. ఎనభైల కాలం నుండి తమిళ సినిమా ముఖచిత్రాల తరహాలో కమల్ హాసన్, రజనీకాంత్ వంటి వారు ఆ పద్ధతిని క్రమం తప్పకుండా అనుసరించారు. అయితే వీరిద్దరి మధ్య ఎవరు పెద్ద స్టార్ లేదా ఎవరికి ఎక్కువ అభిమానుల సంఖ్య ఉంది అనే విషయాల పై చర్చలు ఎప్పుడూ జరుగుతూనే ఉంటాయి. కమల్ హాసన్ తనదైన శైలిలో విలక్షణ పాత్రలు, సినిమాలతో క్లాస్ ప్రేక్షకులలో ఎక్కువ పేరు తెచ్చుకున్నారు, ఇక రజనీకాంత్ మాస్, కమర్షియల్ సినిమాలను ఎక్కువకాలం అందిస్తూ మాస్ ప్రేక్షకుల ఆరాధ్య దైవంగా నిలిచారు.

వారి తరం తరువాత.. ప్రస్తుత తమిళ సినిమా రంగంలో విజయ్ మరియు అజిత్ లు అగ్ర తారలుగా రాజ్యం ఎలుతున్నారు. వీరిద్దరి సినిమాలు విడుదలైనప్పుడల్లా వారి అభిమానులు ఒక పండగ వాతావరణం సృష్టించి ఆయా సినిమాల వేడుకలను ఘనంగా జరుపుకుంటారు. ఇద్దరికీ ఎనలేని, అమితమైన స్థాయిలో అభిమానుల మద్దతు ఉంటూ వచ్చింది. పైగా హిట్, ఫ్లాపులు ఎన్ని ఎదురయినా అభిమానులు వాళ్ళ హీరోను నిరాశపరచకుండా వెన్నంటే ఉంటారు.

ఇక రాబోయే పండగ సీజన్, అంటే పొంగల్ 2023 బరిలో విజయ్ మరియు అజిత్ ఒకరి సినిమాతో ఒకరు థియేటర్ల వద్ద పోరాడుతారని తెలుస్తోంది. వంశీ పైడిపల్లి దర్శకత్వంలో విజయ్ నటించిన వరిసు, హెచ్.వినోద్ దర్శకత్వంలో అజిత్ నటిస్తున్న తునివు.. ఈ రెండు చిత్రాలు పొంగల్‌ సందర్భంగా విడుదల కాబోతున్నాయి. ఈ సందర్బంగా ఇరువురి హీరోల అభిమానుల మధ్య పూర్తి ఆరోగ్యకరమైన పోటీ ఉంటుందని, అలాగే ఎవరి చిత్రం హిట్ అయినా అంతిమంగా సినిమా అనేది విజయం సాధిస్తుందని ఆశిద్దాం.