మెగాస్టార్ చిరంజీవి తన తదుపరి చిత్రం వాల్తేరు వీరయ్యతో ఈ సంక్రాంతి సీజన్ లో ప్రేక్షకుల్ని అలరించడానికి సిద్ధంగా ఉన్నారు. వాల్తేరు వీరయ్య సెన్సార్ గురించి, సినిమా రిపోర్ట్ గూర్చిన సమాచారం గురించి అనేక రకాల పుకార్లు వచ్చాయి. కానీ ఇప్పుడు వివరాలు బయటకు వచ్చాయి.

వాల్తేరు వీరయ్య ఇటీవల సెన్సార్ కార్యక్రమాలు పూర్తి చేసుకుని యు/ఎ సర్టిఫికేట్ పొందింది. తాజా సమాచారం ప్రకారం ఈ సినిమా నిడివి 2 గంటల 40 నిమిషాలు (160 నిమిషాలు) ఉంటుందని తెలిసింది.

కమర్షియల్ సినిమాకు ఇది పర్ఫెక్ట్ రన్ టైమ్ అని చెప్పవచ్చు, సెన్సార్ టీమ్ నుండి చాలా పాజిటివ్ రిపోర్ట్ వచ్చిందట మరియు షో పూర్తయిన తరువాత సెన్సార్ యూనిట్ వాల్తేరు వీరయ్య చిత్ర బృందాన్ని అభినందించిందని అంటున్నారు.

గతంలో ‘జై లవ కుశ’, ‘పవర్’, ‘వెంకీ మామ’ వంటి చిత్రాలకు దర్శకత్వం వహించిన బాబీ ఈ చిత్రానికి దర్శకత్వం వహిస్తున్నారు. కాగా ఆయన మెగాస్టార్ చిరంజీవికి వీరాభిమాని అన్న విషయం తెలిసిందే. ఇక వాల్తేరు వీరయ్య పాటలు ప్రేక్షకులను బాగా ఆకట్టుకున్నాయి.

బాస్ పార్టీ సాంగ్ బాగా ప్రాచుర్యం పొందింది మరియు ఇటీవల విడుదలైన పూనకాలు లోడింగ్ సాంగ్ కూడా మంచి స్పందనను పొందుతుంది. వీరయ్య టైటిల్ సాంగ్ కూడా ఓవరాల్ గా డీసెంట్ గా ఉందనే చెప్పాలి. పాటలు ఈ సినిమా ప్రజల్లో మరింత చేరువ కావడానికి సహాయపడ్డాయి.

వాల్తేరు వీరయ్య చిత్రానికి కోన వెంకట్ స్క్రీన్ ప్లే అందించగా, మాస్ మహారాజా రవితేజ ఈ యాక్షన్ ఎంటర్ టైనర్ లో కీలక పాత్ర పోషిస్తున్న సంగతి తెలిసిందే.

జనవరి 13న ప్రేక్షకుల ముందుకు రానున్న ఈ సినిమాలో శృతి హాసన్ హీరోయిన్ గా నటిస్తున్నారు. బాబీ సింహా, రాజేంద్ర ప్రసాద్, కేథరిన్ థ్రెసా ఇతర ముఖ్యమైన పాత్రల్లో కనిపించనున్నారు. మైత్రీ మూవీ మేకర్స్ నిర్మిస్తున్న ఈ చిత్రానికి దేవిశ్రీ ప్రసాద్ సంగీతం అందించారు.

సినిమా హాళ్లకు ప్రేక్షకులు బయటి నుంచి ఆహారం, పానీయాలు తీసుకెళ్లవచ్చా లేదా అనే అంశం పై సుప్రీంకోర్టు మంగళవారం విచారణ చేపట్టింది. ఈ సందర్భంగా సీజేఐ డీవై చంద్రచూడ్‌, జస్టిస్‌ పీఎస్‌ నరసిహతో కూడిన ధర్మాసనం పలు కీలక వ్యాఖ్యలు చేసింది. థియేటర్లు అనేవి యజమానుల యొక్క ప్రైవేటు ఆస్తులు కాబట్టి ప్రేక్షకులు బయటి నుంచి తెచ్చుకున్న ఆహారం, పానీయాలు లోపలికి తీసుకెళ్లకుండా నియంత్రించే హక్కు సినిమా హాళ్లు, మల్టిప్లెక్స్‌లకు ఉంటుందని సుప్రీంకోర్టు వెల్లడించింది.

కాగా 2018 జూలై 18న సినిమా హాళ్లలోకి బయట ఆహారాన్ని తీసుకురాకుండా విధించిన నిషేధాన్ని జమ్మూ కశ్మీర్‌ హైకోర్టు తొలగించింది. నిషేధం కారణంగా థియేటర్లలో ఏది విక్రయిస్తే అది తినాల్సిన పరిస్థితి ఏర్పడుతుందనే కారణంతో హైకోర్టు ఈ తీర్పునిచ్చింది. తద్వారా ప్రేక్షకుల ఆరోగ్యం దెబ్బతినే అవకాశం ఉందని ఆ సమయంలో కోర్టు అభిప్రాయపడింది.

అయితే హైకోర్టు తీర్పును సవాల్‌ చేస్తూ థియేటర్ల యజమానులు, మల్టీప్లెక్స్ అసోసియేషన్ ఆఫ్ ఇండియా వారు సుప్రీంకోర్టును ఆశ్రయించారు. సినిమా హాళ్లలో బయటి నుంచి తీసుకొచ్చే ఆహారాన్ని నిషేధించాలంటూ పిటిషన్‌ దాఖలు చేశారు. ఈ క్రమంలో తాజాగా హైకోర్టు ఆదేశాలను అత్యున్నత న్యాయస్థానం పక్కన పెట్టింది.

ఆరోగ్యకరమైన ఆహారం అందించడానికి సినిమా హాళ్లు ఏమీ వ్యాయామ శాలలు కాదని ఈ సందర్భంగా ధర్మాసనం వ్యాఖ్యానించింది. ప్రేక్షకులు వినోదం కోసం థియేటర్లకు వస్తారని తెలిపింది. ఇది ప్రైవేట్ యాజమాన్యంలో ఉంటుంది. కాబట్టి బయటి ఆహారాన్ని అనుమతించాలా.. వద్దా అనే దాని పై నిర్ణయం తీసుకునే హక్కు వారికి ఉంటుందని స్పష్టం చేసింది.

అయితే పిల్లలకు మాత్రం ఆహారం, మంచి నీరు అందించాలని ఇప్పటికే సినిమా హాళ్లను ఆదేశించామని ధర్మాసనం ఈ సందర్బంగా గుర్తు చేసింది.

సినిమాని చూసేందుకు థియేటర్‌ను ఎంపిక చేసుకునేందుకు ఎలాగైతే ప్రేక్షకుడికి హక్కు ఉంటుందో అలాగే నిబంధనలను విధించే హక్కు సినిమా థియేటర్ యొక్క యాజమాన్యానికి కూడా ఉంటుంది. అక్కడ ఉన్నవాటిని వినియోగించాలా వద్దా అనేది పూర్తిగా సినిమా చూడటానికి వచ్చిన ప్రేక్షకుడి ఎంపిక పై ఆధారపడి ఉంటుంది. అయితే ఆ షరతులు ప్రజా ప్రయోజనాలకు, భద్రతకు విరుద్ధం కానంత వరకు యజమాని నిబంధనలను పెట్టడానికి పూర్తి అర్హత ఉంది’ అని సుప్రీం కోర్టు నొక్కి మరీ చెప్పింది.

ఈ సందర్భంగా పలు ఉదాహరణలు చెబుతూ న్యాయమూర్తులు సరదా వ్యాఖ్యలు కూడా చేశారు. ‘సినిమా హాల్లోకి ఎవరైనా జిలేబీలు తీసుకెళితే అప్పుడు పరిస్థితి ఏంటి?. ఒకవేళ జిలేబీలు తిని ప్రేక్షకుడు తన చేతి వేళ్లను సీట్‌పై తుడిస్తే దాని క్లీనింగ్‌కు ఎవరు డబ్బు ఇస్తారు. ఇక ప్రజలు సినిమా హాల్లోకి తందూరీ చికెన్ కూడా తీసుకెళ్తారు. మరి అప్పుడు హాల్‌లో తినేసిన ఎముకలు పడేశారని కూడా కంప్లైట్‌ రావొచ్చు. ఇలాంటివి కూడా ప్రజలను ఇబ్బంది పెట్టవచ్చు’’ అని సరదాగా వ్యాఖ్యానించారు.

బ్రహ్మాజీ, రవితేజ, సంఘవి ప్రధాన పాత్రల్లో కృష్ణవంశీ దర్శకత్వంలో 1997లో విడుదలైన చిత్రం సింధూరం. ఇక ప్రస్తుతం తెలుగు చిత్ర పరిశ్రమలో పాత సినిమాలను రీ రిలీజ్ చేసే ట్రెండ్ నడుస్తోంది. ఈ నేపథ్యంలో ఓ నెటిజన్ తన పాత సినిమా ‘సింధూరం’ని రీ రిలీజ్ చేయమని దర్శకుడు కృష్ణవంశీని ట్యాగ్ చేస్తూ ట్వీట్ చేశాడు.

ఈ ట్వీట్ కు కృష్ణవంశీ స్పందిస్తూ వామ్మో ఆ సినిమా కోసం ఐదేళ్ల పాటు అప్పులు తీర్చేశానని అన్నారు. సింధూరం రీ రిలీజ్ పై కృష్ణవంశీ ఇచ్చిన ఈ రెస్పాన్స్ నెటిజన్లను షాక్ కి గురి చేసింది. ఇంత మంచి సినిమా హిట్ కాకపోవడం ఏమిటని వారు ఆశ్చర్యపోయారు. కృష్ణవంశీ మళ్లీ సింధూరం విడుదల చేస్తే టిక్కెట్లు కొనుక్కుని తిరిగి చెల్లిస్తామని కొందరు నెటిజన్లు ఆయనకి ప్రోత్సాహకంగా నిలిచారు.

దర్శకుడు కృష్ణవంశీ తన పాత ఇంటర్వ్యూలలో సింధూరం సినిమా గురించి చాలా సార్లు గొప్పగా చెప్పారు. తుపాకీ తీసుకుని ప్రజలను చంపితే ఏం జరుగుతుందో చూపించడానికే ఈ సినిమా తీశానని కృష్ణవంశీ పేర్కొన్నారు. ఆ సినిమాలోని 20 నిమిషాల సీక్వెన్స్ (సెకండాఫ్ లో) ను కాస్త మార్చితే సినిమా సూపర్ హిట్ అవుతుందని ఇండస్ట్రీలోని పెద్దలందరూ ఆయనకు సలహా ఇచ్చారు. అయితే కృష్ణవంశీ ఆ సినిమా ఒక ఉద్దేశ్యం, నిబద్ధతతో చేసినందున, ఆయన వారి సలహాను పట్టించుకోలేదు.

సింధూరం కథ విషయానికి వస్తే.. పోలీస్ ఆఫీసర్ అవ్వడానికి శిక్షణ తీసుకుంటూ ఉంటాడు బుల్లిరాజు( బ్రహ్మాజీ). అతను ఉడుకు స్వభావం మరియు న్యాయం యొక్క బలమైన భావాన్ని కలిగి ఉన్న వాడు. బుల్లిరాజు గోదావరి నదికి దగ్గరగా ఉన్న ఒక చిన్న గ్రామానికి చెందినవాడు. బుల్లిరాజు మేనకోడలు బేబీ (సంఘవి) అతన్ని ప్రేమించి పెళ్లి చేసుకోవాలనుకుంటుంది. అతనికి కూడా ఆమె పై అదే ఇష్టం ఉన్నా.. పైకి మాత్రం ఆ ఇష్టాన్ని చూపించడు.

చంటి (రవితేజ), బైరాగి, సత్తిపండు తదితరులు అదే గ్రామంలో నివసించే దారితప్పిన యువకులుగా ఉంటారు. వారు పేకాట ఆడటం, తాగడం మరియు బాలికలను ఎగతాళి చేయడం వంటివి చేస్తూ సమయాన్ని గడుపుతారు. వీరందరూ బుల్లిరాజుకు స్నేహితులు. కొన్ని సంఘటనల వల్ల బుల్లిరాజును జీవిత మార్గాన్ని మార్చుకోవాల్సి వస్తుంది మరియు చంటి కూడా అతనితో చేరతాడు. చివరికి వారికి ఏమైంది అనేది మిగిలిన కథ.

సింధూరం సినిమా కమర్షియల్ గా సక్సెస్ కాకపోయినా నటీనటులకు, దర్శకుడు కృష్ణవంశీకి ఎంతో పేరు తెచ్చి పెట్టింది. ముఖ్యంగా రవితేజ కెరీర్లో ఈ సినిమా ఒక టర్నింగ్ పాయింట్ గా చెప్పుకోవచ్చు.

అప్పట్లో రవితేజ అసిస్టెంట్ డైరెక్టర్ ఉద్యోగంతో పాటే సినిమాల్లో చిన్న చిన్న పాత్రలతో కుటుంబాన్ని పోషించడానికి చాలా కష్టపడ్డారు. అయితే ‘సింధూరం’లోని చంటి పాత్రతో రవితేజకి తన నటనా సామర్థ్యాన్ని పరీక్షించుకునే అవకాశం లభించింది. రవితేజకు 29 ఏళ్లు ఉన్నప్పుడు చంటి పాత్ర లభించింది. ఆ పాత్రలో ఆయన కనబర్చిన అద్భుత నటన ఆయనకు స్టార్ డమ్ తీసుకువచ్చింది.