మెగాస్టార్ చిరంజీవి హీరోగా, మెగా పవర్ స్టార్ రామ్ చరణ్ ముఖ్య పాత్రలో నటించి ఈ ఏప్రిల్ లో విడుదలైన ఆచార్య చిత్రం అందరి ఆంచనాలను తలకిందులు చేస్తూ పెద్ద డిజాస్టర్ గా నిలిచిన సంగతి అందరికీ తెలిసిందే.

ఆర్ ఆర్ ఆర్ తరువాత రామ్ చరణ్ కనిపించే సినిమా, పైగా కొరటాల శివ లాంటి మంచి ఇమేజ్ ఉన్న దర్శకుడు అవడంతో సినిమా ఖచ్చితంగా హిట్ అవుతుందని అటు మెగా అభిమానులతో పాటు ట్రేడ్ వర్గాలు ఆశించగా ఆచార్య మాత్రం బాక్స్ ఆఫీస్ వద్ద ఘోర పరాజయం చవిచూసింది.

అంతలో భారీ వైఫల్యం తరువాత తదుపరి చేయబోయే సినిమాల పై చిరంజీవి కాస్త ఆగి ఆలోచించే పనిలో ఉన్నారని తెలుస్తుంది. ప్రస్తుతం షూటింగ్ దశలో ఉన్న చిరంజీవి సినిమాలు మూడు. ఒకటి మెహర్ రమేష్ దర్శకత్వం వహిస్తున్న తమిళ చిత్రం “వేదాళం” రీమేక్”భోళా శంకర్” కాగా రెండోది మలయాళ చిత్రం “లుసిఫర్” రీమేక్ “గాడ్ ఫాదర్” . మూడో సినిమాకిబాబీ దర్శకుడు, ఈ చిత్రానికి ఇంకా అధికారంగా పేరు ప్రకటించలేదు. వాల్తేరు వీరయ్య అనే టైటిల్ మాత్రం చక్కర్లు కొడుతుంది.

ఓటిటి ల కాలంలో ఇంకా ఈ రీమేక్ లు ఏంటని ప్రేక్షకులతో పాటు అభిమానులు కూడా అభిప్రాయ పడుతున్న మాట వాస్తవమే. అందుకే ఇప్పుడు ఈ రెండు రీమేక్ లను విడుదల చేస్తే ఆడతాయా లేదా అన్న సందిగ్ధంలో చిరంజీవి ఉన్నట్టు సమాచారం. గాడ్ ఫాదర్ అయితే షూటింగ్ దాదాపు అయిపొయింది, ఈ చిత్రం ఆగస్ట్ లేదా దసరా కానుకగా విడుదల కావచ్చని వార్తలు వినిపించాయి.

అయితే తాజాగా వినిపిస్తున్న సమాచారం ప్రకారం ముందుగా బాబీ సినిమానే రిలీజ్ చేసినా తరువాత రీమేక్ సినిమాలను రిలీజ్ చేసే ఆలోచనలో చిరంజీవి ఉన్నట్టు తెలుస్తుంది.ఏదైనా పెద్ద హీరోలకు ఊహించని పరాజయాలు ఎదురైనప్పుడు ఇలాంటి ఊహాగానాలు కాస్త ఎక్కువగానే వినిపిస్తుంటాయి. కాబట్టి ఏ విషయం అయినా అధికారికంగా ప్రకటన వచ్చే వరకు నమ్మడానికి లేదు.

ఈ మధ్య కాలంలో హీరో గోపీచంద్ కు సరైన హిట్ లేదు. చివరిగా వచ్చిన సీటిమార్ కూడా ఆశించినంతగా ఆడలేదు.ప్రస్తుతం గోపీచంద్ మారుతి దర్శకత్వంలో పక్కా కమర్షియల్ సినిమా చేస్తున్న విషయం తెలిసిందే. రాశి ఖన్నా హీరోయిన్ గా నటిస్తున్న ఈ చిత్రంలో ముఖ్య పాత్రలో సత్యరాజ్ నటిస్తున్నారు. నిర్మాతలుగీతా ఆర్ట్స్ ఈ సినిమాని ప్రతిష్టాత్మకంగా తీసుకున్నారు.

ఎందుకంటే వారి బ్యానర్ లో కూడా స్థాయికి తగ్గ హిట్ వచ్చి చాలా రోజులు అయింది. అందువల్ల ఈ సినిమా విషయంలో చాలా జాగ్రత్తగా ఉంటున్నట్టు తెలుస్తుంది. ఇప్పటికే విడుదల అయిన ట్రైలర్ కి మంచి స్పందన లభించింది. టైటిల్ కి తగ్గట్టుగానే అన్ని రకాల కమర్షియల్ ఎలిమెంట్స్ తో ఒక ఎంటర్టైనర్ చూడబోతున్నాం అనిపించేలా ఆ ట్రైలర్ ను కట్ చేసారు.

ఇదిలా ఉండగా ఈ సినిమా పబ్లిసిటీ కోసం అయి పెట్టిన తొలి ప్రెస్ మీట్ లో నిర్మాత అల్లు అరవింద్ చేసిన వ్యాఖ్యలు చర్చనీయాంశంగా మారాయి. టికెట్ రేట్ల గురించి, హీరో హీరోయిన్ లు సినిమా పబ్లిసిటి చేయాల్సిన అవసరం గురించి ఆయన మాట్లాడిన మాటల్లో చాలా వరకు నిజాలే ఉన్నాయి. అలాగే పక్కా కమర్షియల్ చిత్రానికి టికెట్ రెట్లు తగ్గించిన విషయం కూడా చిత్ర బృందం ప్రచారంలో భాగంగా చెప్పుకున్నారు.

ఇక రిలీజ్ కు రెడీ అయిన పక్కా కమర్షియల్ సినిమా ఫైనల్ కాపీ ని అల్లు అరవింద్ గారు చూసి దర్శకుడు మారుతిని, చిత్ర బృందాన్ని ప్రశంసించారు అని తెలుస్తుంది. ఇండస్ట్రీలో ఎంతో అనుభవం కల అల్లు అరవింద్ గారికి సినిమా నచ్చిందంటే ఖచ్చితంగా ఆ సినిమాలో కంటెంట్ ప్రేక్షకులకు కూడా నచ్చుతుంది అనడంలో ఎలాంటి సందేహం లేదు. మరి అల్లు అరవింద్ జడ్జిమెంట్ తో ఆడియెన్స్ జడ్జిమెంట్ సరిపోతుందా లేదా అనేది తెలియాలి అంతే మరో రెండు వారాలు ఆగక తప్పదు.

ఫిదా చిత్రంతో తెలుగు ప్రేక్షకులకు పరిచయమైన హీరోయిన్ సాయి పల్లవి తొలి చిత్రంతోనే అందరి దృష్టిని ఆకట్టుకుంది. ఆ తరువాత వరుస సినిమాలతో అతి తక్కువ సమయంలో చక్కని క్రేజ్ ను,ఇమేజ్ ను సొంతం చేసుకుంది. తను కేరళ నేపథ్యంలో నుండి వచ్చింది అని మొదటి నుండి ప్రచారం జరిగినా, ఆ విషయంలో నిజం లేదని, తను తమిళ నాట పుట్టాను అని ఇటీవల ఒక ఇంటర్వ్యూలో స్వయంగా సాయి పల్లవి చెప్పడం జరిగింది.

అయితే ముందుగా చెప్పుకున్నట్టు సాయి పల్లవికి ఒక సాధారణ హీరోయిన్ కంటే ఖచ్చితంగా క్రేజ్ ఎక్కువ ఉంది. ఇందుకు పడి పడి లేచే మనసు, శ్యామ్ సింఘా రాయ్, విరాట పర్వం చిత్రాల వేడుకలలో ఆమె పేరు చెప్పినా లేదా ఆమె మాట్లాడటానికి వచ్చినపుడు ప్రేక్షకుల నుంచి లభించిన స్పందన,హర్ష ధ్వానాలు ఉదాహరణగా చెప్పుకోవచ్చు.

అయితే ఈ స్పందన కేవలం ఫంక్షన్ ల వరకే పరిమితం అని, సినిమా కలెక్షన్లకి సాయి పల్లవి పెద్దగా ఉపయోగ పడట్లేదు అని ట్రేడ్ వర్గాల వాదన విన్పిస్తోంది. దగ్గుబాటి రానా తో కలిసి సాయి పల్లవి నటించిన విరాట పర్వం చిత్రం ఈ వారం విడుదల అయిన విషయం తెలిసిందే. అయితే బాక్స్ ఆఫీస్ వద్ద ఈ చిత్రంఘోరమైన ఓపెనింగ్ ను రాబట్టడం ట్రేడ్ వర్గాలను షాక్ కి గురి చేసింది.తొలి రోజు షేర్ కనీసం కోటి రూపాయలను దాటకపోవడం విడ్డూరం అనే చెప్పాలి.

అయితే తర్కించి చూస్తే విరాట పర్వం అయినా, మరే ఇతర లేడీ ఓరియంటెడ్ సినిమాల పరాజయాలను హీరోయిన్స్ కు ఆపాదించడం ఏమాత్రం సరికాదు. సినిమాలో సరైన కథ,పాత్ర ఉంటేనే యే హీరోయిన్ అయినా ఆ సినిమాకు ఉపయోగపడుతుంది కానీ కేవలం తన పేరు మీదే సినిమా థియేటర్ల వద్దకు ప్రేక్షకులను రప్పించడం సాయి పల్లవి యే కాదు యే హీరోయిన్ వల్లా అవదు. ప్రస్తుతం మార్కెట్ లో హీరోలకే బాక్స్ ఆఫీస్ వద్ద సరైన విధంగా ఫలితాలు రావట్లేదు. అలాంటపుడు హీరోయిన్ మీద నింద మోపడం తప్పు అనే చెప్పాలి.

ఆర్ ఆర్ ఆర్ సినిమా ప్రపంచ వ్యాప్తంగా ఎన్ని రికార్డులు కొల్లగొట్టింది అనే విషయం ప్రత్యేకంగా చెప్పనవసరం లేదు. తెలుగు రెండు రాష్ట్రాల తో పాటి, ఓవర్సీస్,మరియు హిందీ మార్కెట్ లో కూడా బ్లాక్ బస్టర్ గా నిలిచిన సంగతి తెలిసిందే.

ఇక థియేటర్ల లో సందడి చేసిన తరువాత మే చివరి వారం లో ఆర్ ఆర్ ఆర్ చిత్రం ఓటిటి లో విడుదల అయింది. తెలుగు తో పాటు మిగతా దక్షిణ భాషల స్ట్రీమింగ్ హక్కులు జీ5 దక్కించుకుంది. ఇక హిందీ మరియు అంతర్జాతీయ వెర్షన్ ను నెట్ ఫ్లిక్స్ సొంతం చేసుకుంది. ఓటిటి లో విడుదల అయిన తరువాత ఆర్ ఆర్ ఆర్ సృష్టిస్తున్న సంచలనం అంతా ఇంతా కాదు.

ముఖ్యంగా అంతర్జాతీయ ప్రేక్షకులు ఆర్ ఆర్ ఆర్ చూసి మతి పోయే తరహాలో సోషల్ మీడియాలో తమ స్పందనను ఒక్కో విధంగా తెలియ చేస్తున్నారు.

తెలుగు ప్రేక్షకులు ఎలా అయితే ఆర్ ఆర్ ఆర్ చూసి ఆనందించారో అంతకు రెట్టింపు స్థాయిలో అంతర్జాతీయ ప్రేక్షకులు సినిమా పట్ల ఆకర్షితులు అయ్యారు.1920 బ్యాక్ డ్రాప్ లో భారత స్వతంత్ర పోరాట యోధులు అయినా అల్లూరి సీతారామరాజు, కొమరం భీమ్ లను ప్రధాన పాత్రలుగా, వాళ్లిద్దరూ కలిస్తే, కలిసి ఒకరికి ఒకరు స్వతంత్ర పోరాటంలో స్ఫూర్తిగా నిలిస్తే ఎలా ఉంటుంది అన్న  కథాంశంతో ఎస్ ఎస్ రాజమౌళి తెరకెక్కించిన ఈ పీరియడ్ యాక్షన్ డ్రామా లో ఉన్న వీరోచిత పోరాట ఘట్టాలు, కళ్ళు చెదిరే విజువల్ ఎఫెక్ట్స్ తో పాటు గుండె బరువేక్కే భావోద్వేగాలను అచ్చం మనం అనుభూతి పొందినట్టు వాళ్ళు కూడా పొందుతుండడం విశేషం.

కొంత మంది ప్రేక్షకులు అయితే ఆర్ ఆర్ ఆర్ ను ఏకంగా ఎవెంజర్స్ లాంటి హాలీవుడ్ సూపర్ హీరోలతో పోల్చడం సినిమా టీమ్ ను కూడా ఆశ్చర్యపరిచింది. ఇక సినిమాలో రామ్ చరణ్, జూనియర్ ఎన్టీఆర్ ల ఆన్ స్క్రీన్ కెమిస్ట్రీ, బ్రోమాన్స్ ను కూడా విపరీతంగా అభినందిస్తున్నారు. మరీ ముఖ్యంగా  నాటు నాటు పాటకు వెర్రెత్తిపోయి తమ స్పందనను ట్వీట్ లు, వీడియోల ద్వారా తెలిపారు.

ఆర్ ఆర్ ఆర్ థియేటర్ లలో విడుదల అయినపుడు ఇంతగా అంతర్జాతీయ ఆదరణను రాబడుతుంది అని బహుశా చిత్ర బృందం కూడా ఊహించి ఉండరు. ఏదేమైనా మన తెలుగు సినిమా ఈ రేంజ్ లో ప్రఖ్యాతి పొందటం మనందరికీ గర్వ కారణమే.

తమిళ స్టార్ హీరో కమల్ హాసన్ కు చాలా కాలంగా సరైన హిట్ పడలేదు. తమిళంలో మంచి ఫామ్లో ఉన్న లోకేష్ కనగరాజ్ దర్శకత్వంలో ‘విక్రమ్’ అనే మాస్ యాక్షన్ ఎంటర్‌టైనర్‌తో ప్రేక్షకుల ముందుకు వచ్చారు కమల్. భారీ అంచనాలతో వచ్చిన ఈ మూవీ మొదటి ఆట నుంచి మంచి క్రేజ్ సంపాదించడంతో కలెక్షన్స్ వర్షం కురుస్తోంది.కమల్ హాసన్ తో పాటు ముఖ్య పాత్రలో ఫాహాద్ ఫాజిల్, విలన్ గా నటించిన విజయ్ సేతుపతి వల్ల ఈ చిత్రానికి తెలుగులో కూడా క్రేజ్ వచ్చింది.

ఈ సినిమాను స్వయంగా కమల్ హాసన్ నిర్మించారు. రాజ్ కమల్ ఇంటర్నేషనల్ బ్యానర్‌పై కమల్ హాసన్, మహేంద్రన్ సంయుక్తంగా ఈ సినిమాను నిర్మించారు. ఈ సినిమాకు అనిరుధ్ రవిచందర్ సంగీతాన్ని సమకూర్చాడు. ఇక ఈ సినిమాకు ప్రపంచ వ్యాప్తంగా ఈ సినిమాకు రూ. 110 కోట్ల మేర వ్యాపారం జరిగినట్లు ట్రేడ్ వర్గాలు అంచనా వేశాయి.తెలుగులో ఇప్పటికే ఈ చిత్రం 14 కోట్ల వరకు వసూలు చేసి బ్లాక్ బస్టర్ గా నిలిచింది. తమిళనాడు లో బాహుబలి2 ను దాటి ఇండస్ట్రీ హిట్ గా నిలవడానికి ఎంతో దూరం లేదు.ఈ వారాంతం లోపే విక్రమ్ ఆ ఘనతను సాధించచ్చు.

మామూలుగానే తమిళ సినిమాలకు ఓవర్సీస్ మార్కెట్ ఎక్కువ, కేవలం యూఎస్ కాకుండా ఆస్ట్రేలియా, యూకే, ముఖ్యంగా మలేసియా, సింగపూర్ లలో తమిళ సినిమాలకు కలెక్షన్లు బాగా వస్తాయి. తాజాగా విక్రమ్ ఓవర్సీస్ మార్కెట్ లో మరో రికార్డును సొంతం చేసుకుంది. ఆస్ట్రేలియా లో 1 మిలియన్ మార్కును దాటింది, శంకర్ – రజినీకాంత్ కాంబినేషన్ లో వచ్చిన 2.0 చిత్రం తరువాత ఆ ఘనతని సాధించిన సినిమాగా విక్రమ్ నిలిచింది 

తమిళ సూపర్ స్టార్ రజినీకాంత్ మరో కొత్త సినిమాను లైన్‌లో పెట్టారు. నెల్సన్ దర్శకుడుగా భాధ్యత వహిస్తున్న ఈ సినిమా రజినీకాంత్ కెరీర్‌లో 169వ సినిమాగా వస్తోంది. తాజాగా ఈ సినిమా టైటిల్‌ను చిత్ర బృందం ఖరారు చేసింది. నెల్సన్-రజినీకాంత్ కాంబోలో తెరకెక్కుతున్న మూవీకి ‘జైలర్’ అనే టైటిల్‌ను ఫిక్స్ చేసింది.జైలులోని ఖైదీలు నేపథ్యంలో తెరకెక్కుతున్నట్లు సమాచారం. ఈ సినిమాని ప్రతిష్టాత్మక బ్యానర్ సన్ పిక్చర్స్ బ్యానర్‌పై కళానిధి మారన్ నిర్మిస్తున్నారు. అనిరుధ్ రవిచంద్రన్ సంగీతం అందిస్తున్నాడు.

కాగా ఈ చిత్రంలో రజినీకాంత్ సరసన అందాల భామ ఐశ్వర్యరాయ్‌ నటించనున్నట్లు ప్రచారం జరుగుతోంది. అదే నిజం అయితే రోబో సినిమా తర్వాత మరోసారి వీరి జంటను వెండితెరపై ప్రేక్షకులకు కనువిందు చేయనుందన్నమాట. నటి ప్రియాంక మోహన్‌ మరో పాత్రలో నటించనున్నట్లు సమాచారం. రమ్యకృష్ణ, దర్శకుడు కేఎస్‌ రవికుమార్, కన్నడ స్టార్‌ నటుడు శివరాజ్‌ కుమార్, హీరో శివకార్తికేయన్‌ కీలక పాత్రల్లో నటించబోతున్నట్లు గట్టి ప్రచారం జరుగుతుంది. జూలై నుంచి ఈ సినిమా రెగ్యులర్ షూటింగ్ ప్రారంభం కానుంది. మరో విశేషం ఏమిటంటే జూలై నాటికి రజనీకాంత్‌ నటుడిగా 47ఏళ్ల మైలురాయిని చేరుకోనున్నా రు. దీంతో జైలర్ చిత్రానికి సంబంధించి ప్రత్యేక టీజర్‌ ఆ రోజున విడుదలయ్యే అవకాశముంది.

గత కొన్నేళ్లుగా తన స్థాయికి తగ్గ హిట్ లేని సూపర్ స్టార్ రజినీకాంత్ కు ఈ సినిమాతో తిరిగి బాక్స్ ఆఫీస్ వద్ద దుమ్ము దులుపుతారు అని అభిమానులు ఆశగా ఎదురు చూస్తున్నారు.ఇటీవల సీనియర్ హీరో అయిన కమల్ హాసన్ విక్రమ్ తో బ్లాక్ బస్టర్ కొట్టిన సంగతి తెలిసిందే. అదే విధంగా రజినీకాంత్ కూడా పెద్ద హిట్ సినిమా అందిస్తాడేమో చూద్దాం.