మెగా పవర్ స్టార్ రామ్‌ చరణ్‌ హీరోగా శంకర్‌ దర్శకత్వంలో ఓ చిత్రం రూపొందుతున్న విషయం తెలిసిందే. ‘దిల్‌’ రాజు నిర్మిస్తున్న ఈ సినిమా షూటింగ్‌ జరుపుకుంటోంది. ఇందులో కియారా అద్వానీ కథానాయికగా నటిస్తున్నారు. భారీ బడ్జెట్ తో పాన్ ఇండియా స్థాయిలో తెరకెక్కిస్తున్న ఈ సినిమాలో చరణ్‌ రెండు పాత్రల్లో కనిపిస్తారనీ, వాటిల్లో ఒకటి విద్యార్థి కాగా, మరొకటి ప్రభుత్వోద్యోగి అని మొదటి నుంచి గట్టి ప్రచారం జరుగుతుంది.

ఈ సినిమాకి ఇప్పటివరకూ ‘విశ్వంభర’, ‘సర్కారోడు’ అని పలు టైటిల్స్ వినిపించినా, చిత్ర యూనిట్ ఏదీ అధికారికంగా ఖరారు చేయలేదు.ట్రేడ్ వర్గాల నుంచి అందుతున్న సమాచారం మేరకు ఈ సినిమా 30 మార్చి 2023 (శ్రీరామ నవమి) రోజున రిలీజ్ కానుందని తెలుస్తోంది. వేసవి కాలంలో మొదటి సినిమాగా రిలీజ్ చేస్తే ఖచ్చితంగా బాక్స్ ఆఫీస్ వద్ద సినిమాకి లాభం చేకూరుతుంది అనడంలో ఎలాంటి అనుమానం లేదు.

అక్టోబర్ లాగా ఈ సినిమా షూటింగ్ పూర్తి చేసుకుని ప్రొడక్షన్ పనులు ప్రారంభం చేయాలని చిత్ర యూనిట్ సన్నాహాలు చేస్తున్నట్లు తెలుస్తుంది. రామ్ చరణ్ కెరీర్ లో పెద్ద హిట్స్ గా నిలిచిన రంగస్దలం, ఆర్ ఆర్ ఆర్ కూడా మార్చి నెల చివరి వారంలో రిలీజ్ అవటం వల్ల ఇప్పుడు శంకర్ కాంబినేషన్లో వస్తున్న సినిమా కూడా అదే సమయంలో విడుదల చెస్తే సెంటిమెంట్ గా వర్కవుట్ అవుతుందని చిత్ర యూనిట్ భావిస్తున్నారని వినికిడి.

ప్రస్తుతం పంజాబ్‌ లో రామ్‌ చరణ్, కియారాల పై దాదాపు వెయ్యి మంది డ్యాన్సర్స్‌తో సాంగ్‌ షూట్‌ జరుగుతోంది. గణేష్‌ ఆచార్య ఈ పాటకు కొరియోగ్రాఫర్‌ గా వ్యవహరిస్తున్నారు.అయితే ఈ పాట ఇక్కడితోనే పూర్తవదనీ, దీనికి కొనసాగింపు హైదరాబాద్‌లో వేసిన ఓ భారీ సెట్‌లో కూడా జరుగుతుందని తెలిసింది. ఇక వీలయినంత త్వరగా షూటింగ్ పూర్తి చేసి సినిమాని వచ్చే వేసవిలో విడుదల చేయాలనే ఆలోచనలో శంకర్ ఉన్నట్లు తెలుస్తుంది.

శంకర్ ఈ చిత్రంతో పాటు కమల్ హాసన్ తో ఇండియన్ – 2 కు కమిట్ అయిన సంగతి తెలిసిందే. కొన్ని అనుకోని పరిస్థితుల్లో ఆ సినిమా షూటింగ్ ఆపివేయడం జరిగింది. అయితే ఇటీవలే విక్రమ్ తో భారీ బ్లాక్ బస్టర్ హిట్ కొట్టిన కమల్ హాసన్.. ఇండియన్ -2 ను మళ్ళీ సెట్స్ పైకి తేవడానికి ఉత్సుకతతో ఉన్నట్లు, అందుకు దర్షకుడు శంకర్ కూడా సమ్మతించినట్లు తెలుస్తుంది.

తొలి సినిమా నుండి యువతను ఆకట్టుకునే పాత్రలను, క‌థ‌ల‌ను ఎంచుకుంటూ చక్కని నటనను ప్రదర్శిస్తూ.. మంచి న‌టుడిగా గుర్తింపు తెచ్చుకుంటున్నారు కిర‌ణ్ అబ్బ‌వ‌రం. మూడు నెలల వ్యవధి లోనే సెబాస్టియన్ పీసీ 524, సమ్మతమే చిత్రాలను విడుదల చేసి ప్రేక్షకులను ఆశ్చర్య పరిచారు. తాజాగా తన రాబోయే చిత్రం‘నేను మీకు బాగా కావాల్సిన వాడిని’ని రిలీజ్ కు సిద్ధం చేస్తున్నారు.

‘నేను మీకు బాగా కావాల్సిన‌ వాడిని’ సినిమాకి శ్రీధ‌ర్ గాదె ద‌ర్శ‌క‌త్వం వ‌హిస్తున్న ఈ చిత్రం షూటింగ్ దాదాపు పూర్తి చేసుకుంది. ఈ నేప‌థ్యంలో చిత్ర‌ బృందం ప్రచార కార్యక్రమాలను మొదలు పెట్టింది. ఆ క్రమంలోనే ఈ సినిమాకి సంభదించిన టీజర్ ను ఈరోజు విడుదల చేశారు.

టీజర్ చూస్తుంటే మరోసారి ఒక సాధారణ కుర్రాడికి హీరోయిజం టచ్ ఇచ్చిన పాత్రలో కిరణ్ కనిపిస్తున్నట్లు తెలుస్తుంది. మరో ఆసక్తికరమైన విషయం ఏంటంటే కిరణ్ డ్రైవర్ గా కనిపించబోతున్నారు. పంచ్ డైలాగులతో పాటు మంచి యాక్షన్ సన్నివేశాలు కూడా ఉన్నట్టు తెలుస్తుంది. ఇక కొరియోగ్రాఫర్ బాబా భాస్కర్ హీరోకి బాబాయిగా కనిపించటం మరో విశేషం. “నేను బాలయ్య బాబు .. వీడు పవన్ కళ్యాణ్” అంటూ బాబా భాస్కర్ చెప్పే డైలాగ్ ఆయా హీరో అభిమానులను అలరిస్తుంది. ఇక టీజర్ చివరలో “నేను ప్రేమిస్తే మదన్ ని.. మరి ప్రేమించకపోతే ” అనే డైలాగ్ భలే ఫన్నీగా ఉంది.

స్టైలిష్ ఎంట‌ర్టైన‌ర్‌గా తెర‌కెక్కుతున్న ఈ చిత్రంలో కిర‌ణ్‌కు జోడీగా సంజ‌నా ఆనంద్ హీరోయిన్‌ గా న‌టిస్తున్నారు. మ‌ణిశ‌ర్మ సంగీతం అందిస్తున్నారు. ఈ చిత్రాన్ని కోడి రామ‌కృష్ణ స‌మ‌ర్ప‌ణ‌లో కోడి దివ్వ దీప్తి నిర్మిస్తున్నారు.

కరోనా తర్వాత ప్రేక్షకులు చాలా మారిపోయారు. వాళ్లను థియేటర్ల వద్దకు రప్పించాలి అంటే సినిమా వాళ్ళు ఏదైనా అద్భుతం చేయాలి. అది చేయడంలో చాలా మటుకు విఫలం అవుతున్నారు మన దర్శకులు, నిర్మాతలు. తెలుగు ఇండస్ట్రీలో గత కొన్ని రోజులుగా పెరిగిన టికెట్ రేట్ల గురించి జరిగిన చర్చ గురించి ప్రత్యేకంగా చెప్పాల్సిన అవసరం లేదు. ముఖ్యంగా పెద్ద సినిమాలకు అడ్డూ అదుపూ లేకుండా టికెట్ రేట్లు పెంచారంటూ చిత్ర సీమ పై ఎన్నో విమర్శలు కూడా వచ్చాయి. టికెట్ రేట్లు పెంచినప్పటికీ ఆ సినిమాల ఫలితాలు దారుణంగా రావడంతో, నిజంగానే టికెట్ రేట్లు పెరగడం వల్లే ప్రేక్షకులు థియేటర్ల వద్దకు రావడం లేదు అని అందరూ అనుకున్నారు.

కానీ అందులో ఎలాంటి నిజం లేదని.. టికెట్ రేట్ల ప్రభావం కొంత ఉన్నా, సరైన కంటెంట్ లేని సినిమాలను చూడడానికి ప్రేక్షకులు ఆసక్తి చూపించడం లేదనే విషయం గత కొన్ని రోజులుగా వస్తున్న సినిమాలను బట్టి చూస్తుంటే అర్థమవుతుంది.

దానికి ఉదాహరణగా ఇటీవల విడుదలైన సినిమాల ఫలితాలు చూస్తే .. జూన్ లో విడుదలైన మేజర్, విక్రమ్ చిత్రాలు బాక్స్ ఆఫీసు వద్ద సందడి చేశాయి, సినిమాతో ముడిపడ్డ అన్ని వర్గాల వారికీ లాభాలు తెచ్చి పెట్టాయి. అయితే గమనించాల్సిన ఏంటంటే మేజర్ సినిమాకి టికెట్ రేట్లు తగ్గించగా, విక్రమ్ చిత్రానికి మాత్రం జీవో (సింగిల్ స్క్రీన్ – 175 మల్టీప్లెక్స్ – 295) రేట్లు అమలు చేశారు.

ఇక తరువాత విడుదలైన అంటే సుందరానికీ, విరాట పర్వం సినిమాలు మాత్రం ప్రేక్షకులను అలరించడంలో విఫలం అయ్యాయి. ఆ రెండు సినిమాలకూ విక్రమ్ కి ఉన్న టికెట్ రేట్లే ఉన్నాయి. అంటే ఇక్కడ సినిమా కంటెంట్ అనేది ప్రేక్షకులను ఆకట్టుకుంటే టికెట్ రేట్లతో పని లేదు.. ప్రేక్షకులు ఖచ్చితంగా సినిమాని ఆదరిస్తారు.సినిమాలో సరైన విషయం లేకుంటే పక్కా కమర్షియల్ లాంటి సినిమాకి టికెట్ రేట్లు తగ్గించ్చినా ప్రేక్షకులు ఆ సినిమాని తిప్పికొట్టారు.

ఇక ఇటు ఇండస్ట్రీ వర్గాలతో పాటు ట్రేడ్ వర్గాలు కూడా తమ కష్టాలను గట్టేక్కిస్తుంది అని నమ్మకంతో ఉన్న “ది వారియర్” చిత్రం ఈ 14న విడుదల అవుతుంది.ఆ సినిమాకి కూడా సింగిల్ స్క్రీన్ – 175 మల్టీప్లెక్స్ – 295 రేట్లు అమలు చేస్తున్నారని తెలిసింది. ఒక మీడియం బడ్జెట్ సినిమాకి ఇది ఖచ్చితంగా ఎక్కువ రేటు గా చెప్పుకోవచ్చు. ఇది సినిమాకి నెగటివ్ గా పని చేసే అవకాశం ఉందని సినీ ఔత్సాహికులు, ప్రేక్షకులు అభిప్రాయ పడుతున్నారు.

ఏదేమైనా ప్రతి సినిమా రిలీజ్ అప్పుడు ఇలా రేట్లు ఎక్కువ, తక్కువ అంటూ అది ఒక ప్రచార సాధనంగా కాకుండా ఇప్పటికైనా పెద్ద సినిమాలకు ఇంతా, చిన్న సినిమాలకు ఇంతా అని ఒక నిర్ధారిత టికెట్ రేట్లు నిర్ణయించుకుని అవి అన్ని సినిమాలకు అమలు అయ్యేలా చూస్తే అందరికీ మంచిది.

నేషనల్ క్రష్ రష్మిక మందన్న జోరు రోజు రోజుకూ పెరిగిపోతున్న సంగతి తెలిసిందే. వరుస సినిమాలతో, విజయాలతో దూసుకుపోతున్న ఈ కన్నడ భామ మరోసారి ప్రేక్షకులను ఆశ్చర్య పరిచారు. పాత్రల ఎంపికలో ఆమె చూపించే ప్రత్యేకత వల్లే ఆమె క్రేజ్ ఏమాత్రం తగ్గకుండా ముందుకు వెళ్లడం సాధ్య పడుతుంది.

ఇది వరకే అల్లు అర్జున్ సరసన పుష్ప చిత్రంలో శ్రీవల్లిగా నటించి మెప్పించడమే కాకుండా ఆ పైన బాలీవుడ్ లో సిద్ధార్థ మల్హోత్రా సరసన యాక్షన్ క్వీన్ పాత్రతో అలరించబోతున్నారు. అమితాబ్ బచ్చన్ కు కూతురు గానూ నటిస్తున్నారు. ఇంతలోనే రష్మిక మరో వైవిధ్యమైన పాత్రలో, కొత్త గెటప్ లో కనిపించి ప్రేక్షకులకు తీయని షాక్ ఇచ్చారు.

దుల్కర్ సల్మాన్ -మృణాల్ ఠాకూర్ జంటగా నటిస్తున్న “సీతారామం” లో రష్మిక మందన్న ముఖ్య పాత్రలో నటిస్తున్నారు. రాముడి గా దుల్కర్ సల్మాన్, సీతగా మృణాల్ ఠాకూర్ కనిపించనుండగా.. హనుమంతుని పాత్రలో రష్మిక నటించడం విశేషం.ఈ మేరకు నేడు రష్మిక పుట్టినరోజు సందర్భంగా రిలీజ్ చేసిన తాజా ఫోటోలో ఒక ముస్లిమ్ యువతిగా హిజాబ్ ధరించి కనిపించారు. ఈ కొత్త లుక్ అభిమానులను విపరీతంగా ఆకట్టుకుంది.

ఈ ఏడాది ఏప్రిల్ 10న శ్రీరామ నవమి రోజున విడుదల చేసిన సీతారామం లుక్ లోనే ఈ విషయం గురించి చిత్ర యూనిట్ ప్రకటించారు.ఇప్పుడు ఈద్ ఉల్-అధా పేరుతో ఒక ప్రత్యేక పోస్టర్ ని చిత్రబృందం రిలీజ్ చేయగా , ప్రస్తుతం ఈ పిక్ సోషల్ మీడియాలో వైరల్ అవుతుంది.రష్మికది ఇందులో చాలా కీలకమైన పాత్ర అని సమాచారం. ఆమె కాశ్మీరీ ముస్లిం అమ్మాయిగా కనిపించనున్నారు.

ఇక ఈ చిత్రంలో బ్రిగేడియర్ విష్ణు శర్మగా సుమంత్ ఒక కీలక పాత్ర పోషిస్తుండగా, ఆ పాత్రకు సంభందించిన ఫస్ట్ లుక్ పోస్టర్ ఇటీవలే విడుదలైంది.

సీతారామం సినిమాని స్వప్న సినిమాస్ పతాకం పై అశ్విని దత్ నిర్మిస్తున్నారు. విశాల్ చంద్రశేఖర్ సంగీతం అందించారు. తెలుగు సినీ పరిశ్రమలో ప్రతిష్టాత్మక నిర్మాణ సంస్థగా పేరు గాంచిన వైజయంతీ మూవీస్ ఈ భారీ చిత్రాన్ని సమర్పిస్తోంది. దీనికి పిఎస్ వినోద్ సినిమాటోగ్రఫీ అందించారు. తెలుగు- తమిళం- మలయాళం భాషల్లో ఏకకాలంలో రూపొందుతున్న ఈ చిత్రాన్ని ఆగస్టు 5న విడుదల చేసేందుకు సన్నాహాలు చేస్తున్నారు.

గత కొన్ని రోజులుగా తెలుగు సినీ పరిశ్రమలో సీనియర్ నటుడు నరేష్, కన్నడ నుంచి వచ్చిన సీనియర్ నటి పవిత్రా లోకేష్ మధ్య ఉన్న సంబంధం గురించి పలు పుకార్లు షికార్లు చేసి వివాదాస్పదమయిన విషయం విదితమే. ముందుగా ఈ జంట పెళ్లి చేసుకోబోతున్నారు అంటూ వార్తలు రావడంతో నరేష్ మూడో భార్య రమ్య మీడియా ముందుకు వచ్చి.. తన భర్త తనకు విడాకులు ఇవ్వకుండా నాలుగో పెళ్లి ఎలా చేసుకుంటాడంటూ ఆగ్రహం వ్యక్తం చేయడం దుమారం రేపింది.

ఇక మరో పక్క తన భార్య మంచిది కాదని, అందుకే ఆమెను వదిలేసినట్లు నరేష్ మీడియా ముఖంగా తెగేసి చెప్పుకొచ్చారు. పరస్పర వాదనలు, ఆరోపణలతో ఆగకుండా.. బెంగళూరు లో ఒక హోటల్ లో నరేష్, పవిత్ర లని నరేష్. భార్య రమ్య కొట్టాలని చూడటం, పెద్ద గొడవ చేయటంతో ఈ విషయం ఎంతకీ తెగని వ్యవహారంలా తయారు అయింది.

ఇక ఈ నేపథ్యంలో ఈ వ్యవహారం లోకి పవిత్రా లోకేష్ మాజీ భర్త సూచేంద్ర ప్రసాద్ దూసుకువచ్చారు. పవిత్రకు అక్రమ సంబంధాలు కొత్తేమీ కాదు అంటూ తీవ్ర ఆరోపణలు చేశారు. నరేష్, పవిత్రా మాత్రం తాము స్నేహతులమని, ఒకరికొకరు తోడుగా ఉంటున్నామని చెప్పుకొచ్చారు. ఇక పవిత్రా విడాకుల విషయం గురించి మాట్లాడుతూ.. సూచేంద్ర తో తనకు పెళ్లే కాలేదని చెప్పుకురావడం గమనార్హం.

ఈ క్రమంలోనే సూచేంద్ర శనివారం విలేకర్ల సమావేశంలో పవిత్ర పై సంచలన వ్యాఖ్యలు చేశారు. ” పవిత్రకు నాకు పెళ్లి అయ్యింది.. మేము ఇద్దరం ప్రేమించి పెళ్లి చేసుకున్నాం.. కానీ మా మ్యారేజ్ సర్టిఫికెట్ మాత్రం లేదు. కావాలనే మేము ఆ సర్టిఫికెట్ ను తీసుకోలేదు. ఎందుకంటే మేము ఇద్దరం విదేశీ విధానాలకు విరుద్ధం. మ్యారేజ్ సర్టిఫికెట్ విదేశీ సంస్కృతికి నిదర్శనమని భావించి తీసుకోలేదు. అయితే పవిత్ర నా భార్య అని నిరూపించడానికి నా దగ్గర ఆధారాలున్నాయి. నా పాస్ పోర్టు, ఆధార్ కార్డు గమనిస్తే ఆమె నా భార్యే అని ఉంటుంది. మేము ఇద్దరం కలిసి చాలా ఫంక్షన్స్ కూడా వెళ్ళాం” అంటూ చెప్పుకొచ్చారు.

సూచేంద్ర వ్యాఖ్యలతో మళ్ళీ ఈ వివాదం మొదటికి వచ్చింది. నిజానికి ఇలాంటి గొడవలు లేదా సమస్యలు నాలుగు గోడల మధ్య పరిష్కరించుకోవాలి. లేదా కోర్టులో న్యాయపరంగా వాద ప్రతివాదనలు జరిపి తమ నిజాయితీని నిరూపించుకోవాలి. ఇలా రోడ్డుకెక్కి రచ్చ చేసుకుంటే ఆయా వ్యక్తుల గౌరవానికి భంగం కలగడం తప్ప ఏ లాభం లేదు.

ది వారియ‌ర్ చిత్రం జులై 14న రిలీజ్ కానుంది. ఈ చిత్రంలో ఎన‌ర్జిటిక్ స్టార్ రామ్,కృతిశెట్టి జంట‌గా న‌టించ‌నున్నారు. త‌మిళ స్టార్ డైరెక్ట‌ర్ లింగుస్వామి ద‌ర్శ‌క‌త్వం వ‌హిస్తున్నారు. ది వారియ‌ర్ త‌మిళ వెర్ష‌న్ ప్రీ రిలీజ్ ఈవెంట్ చెన్నైలో ఇటీవలే ఐకానిక్ స‌త్యం సినిమాస్‌ లో ప్లాన్ చేశారు.

ఈ ఈవెంట్‌కు త‌మిళ ఇండ‌స్ట్రీ నుంచి 28 మంది సెల‌బ్రిటీలు ముఖ్య అతిథులుగా హాజరు అవటం  విశేషం.  మ‌ణిర‌త్నం, శంక‌ర్‌, విట్రిమార‌న్, భార‌తీరాజా, గౌత‌మ్ మీన‌న్, ఎస్‌జే సూర్య‌, భార‌తీరాజా, లోకేశ్ క‌న‌గ‌రాజ్, హెచ్ వినోథ్‌, శ‌శి, కార్తీక్ సుబ్బ‌రాజు, పీఎస్ మిత్ర‌న్‌, విక్ర‌మ్ ఫ్రభు, శివ‌, పార్థీబ‌న్‌ కార్తీ, విశాల్‌, కీర్తి సురేశ్‌ తో పాటు ప‌లువురు నటీన‌టులు చీఫ్ గెస్టులుగా వచ్చారు. ఇక తెలుగు ప్రి రిలీజ్ ఈవెంట్ రేపు సాయంత్రం 6 గంటలకు ఫిల్మ్ నగర్ లోని JRC కన్వెన్షన్ లో జరగనుంది.

ఈ ఏడాది ఆర్ ఆర్ ఆర్ లాంటి భారీ హిట్ తరువాత స్ట్రెయిట్ తెలుగు సినిమా ఏదీ హిట్ గా నిలిచింది లేదు. సర్కారు వారి పాట, ఫ్3 చిత్రాలు పరవాలేదు అనిపించాయి. అలాగే అశోక వనంలో అర్జున కళ్యాణం వంటి చిన్న సినిమా కూడా ఉన్నంతలో బాగానే ఉంది అన్న పేరు తెచ్చి పెట్టుకుంది. అయితే గట్టిగా బాక్స్ ఆఫీసు వద్ద సందడి చేసిన సినిమా ఏదీ లేదు అనే చెప్పాలి.

వరుస పెట్టి సినిమాలు రావడం వల్ల ప్రేక్షకులకు సినిమా అంటే మొహం మొత్తిన పరిస్థితి ఏర్పడింది. రెండు రాష్ట్రాల లోని చాలా ధియేటర్లు రోజు వారీ నష్టాలతో నడుస్తున్నాయి. ఈ దశలో పక్కా మాస్ యాక్షన్ ఎంటర్టైనర్ గా తెరకెక్కుతున్న ది వారియర్ సినిమా అయినా తమ కష్టాలను కడతేరుస్తుంది అని డిస్ట్రిబ్యూటర్ లు ఆశతో ఉన్నారు.

ఇప్పటికే ఈ సినిమాలో బుల్లెట్టు పాట బ్లాక్ బస్టర్ గా నిలిచింది. సోషల్ మీడియాలో ఆ పాట హవా మామూలుగా లేదు. మిగతా పాటలకు కూడా మంచి స్పందనే వచ్చింది. ఇక ట్రైలర్ కూడా బాగుండటంతో సినిమా ఖచ్చితంగా విజయం సాధిస్తుందనే నమ్మకం అటు ఇండస్ట్రీ వర్గాలతో పాటు ప్రేక్షకులకు కూడా వచ్చింది. మరి అందరి నమ్మకాన్ని ది వారియర్ సినిమా నిలబెడుతుందా? లేదా? తెలియాలి అంటే మరో వారం ఆగాల్సిందే.