మెగా పవర్ స్టార్ రామ్ చరణ్ మరియు యంగ్ టైగర్ ఎన్టీఆర్, రాజమౌళి కాంబినేషన్ లో రిలీజ్ అయిన `ఆర్ ఆర్ ఆర్ ` సినిమా ప్రపంచ వ్యాప్తంగా ఎంత సంచలనం సృష్టించిందో ప్రత్యేకంగా చెప్పాల్సిన పని లేదు. ఇండియన్ బాక్సాఫీస్ ని షేక్ చేసిన చిత్రంగా నిలిచింది. 1100 కోట్లకు పైగా వసూలు చేసి భారతీయ సినిమా చరిత్రలోనే భారీ విజయాలలో ఒకటిగా నిలిచింది.

అమెరికాలో ఆర్ ఆర్ ఆర్ ఎంతగా ప్రభావం చూపిందంటే అక్కడ హిందీ వెర్షన్ ను ఏకంగా రీ రిలీజ్ చేశారు.ఆ స్పెషల్ షో ద్వారా `ఆర్ ఆర్ ఆర్` హాలీవుడ్ మేకర్లకి కూడా దగ్గరైంది. ఇక ఓటీటీ రిలీజ్ తో `ఆర్ ఆర్ ఆర్` స్థాయి ఒక్క సారిగా మారిపోయింది. హాలీవుడ్ సైతం మెచ్చిన చిత్రంగా నిలిచింది.

అల్లూరి సీతారామరాజు పాత్రలో నటించిన రామ్ చరణ్ కి హాలీవుడ్ అవకాశాలు వచ్చాయని వార్తలు వచ్చాయి.ఇక ఇంటర్వెల్ బ్యాంగ్ వద్ద భీమ్ పులులతో వచ్చే సన్నివేశం చూసి హాలీవుడ్ ప్రేక్షకుల రోమాలు నిక్కబొడుచుకున్నాయి. ఆ సీన్ ను పొగుడుతూ ఒక ట్వీట్ ఏకంగా 10 మిలియన్ల వ్యూస్ సంపాదించుకుంది అంటే ఆర్ ఆర్ ఆర్ చిత్రం ఏ స్థాయిలో విదేశీయులను ఆకట్టుకుందో అర్థం అవుతుంది. అసలు ఆర్ ఆర్ ఆర్ కి గ్లోబల్ స్థాయిలో ఇంత ప్రత్యేకమైన గుర్తింపు వస్తుందని, హాలీవుడ్ కి ఈ స్థాయిలో రీచ్ అవుతుందని ఆ చిత్ర యూనిట్ సైతం అనుకుని ఉండరు. ఈ చిత్రానికి దక్కిన అపారమైన క్రేజ్ తో తదుపరి మహేష్ తో తీయబోయే సినిమాని అత్యున్నత స్థాయిలో తెరకెక్కించే అవకాశం రాజమౌళికి దక్కిందని చెప్పవచ్చు.

తాజాగా ఆర్ ఆర్ ఆర్ చిత్రాన్ని జపాన్ లో విడుదల చేస్తున్న విషయం తెలిసిందే. జపాన్ లో అక్టోబర్ లో విడుదల కానున్న ఆర్ ఆర్ ఆర్ ఇంకెన్ని రికార్డులని సాధిస్తుందో, ఇంకెన్ని ప్రశంసలు అందుకుంటుందో చూడాలి. గతంలో బాహుబలి సీరీస్ జపాన్ లో విడుదలై విజయం సాధించింది.

ఇక ఆర్ ఆర్ ఆర్ మరియు రాజమౌళి ఖాతాలో మరో అరుదైన అభిమాన గణం చేరారు. హాలివుడ్ ప్రఖ్యాత దర్శకులు రూసో బ్రదర్స్‌ (జో రూసో-ఆంటోనీ రూసో) .. వీరు దర్శకత్వం వహించిన అవెంజర్స్‌: ఇన్ఫినిటీ వార్‌’, ‘అవెంజర్స్‌: ఎండ్‌గేమ్‌’ వంటి సినిమాలు వరల్డ్ వైడ్ బాక్స్ ఆఫీస్ వద్ద సూపర్ హిట్ గా నిలవడమే కాక ప్రపంచ వ్యాప్తంగా ప్రేక్షకులను అలరించాయి. తాజాగా రస్సో బ్రదర్స్.. మార్క్ గ్రేనీ నవల ఆధారంగా ‘ది గ్రే మ్యాన్‌’ అనే సినిమాను తెరకెక్కించారు. ఈ సినిమాలో మన దక్షిణాది నటుడు ధనుష్ ఒక ప్రధాన పాత్రలో నటించడం విశేషం. ఇందులో ర్యాన్‌ గోస్లింగ్, క్రిస్‌ ఎవాన్స్, అనా డి అర్మాస్‌ ప్రధాన పాత్రల్లో నటించారు. ఈ మూవీ జూలై 15న థియేటర్లలో విడుదల కాగా జూలై 22న ఓటీటీ ప్లాట్ ఫామ్ నెట్‌ఫ్లిక్స్‌లో విడుదల కానుంది.

ఈ చిత్రానికి సంబంధించిన ప్రచార కార్యక్రమాలలో భాగంగా రస్సో బ్రదర్స్ ఒక ప్రశ్నకు బదులిస్తూ, ఆర్ ఆర్ ఆర్ చిత్రం తమకు ఎంతగానో నచ్చిందని, రాజమౌళితో కలిసి పని చేయాలని ఆశిస్తున్నట్లు తెలిపారు. ఇది ఖచ్చితంగా రాజమౌళికి, మన తెలుగు సినీ పరిశ్రమకి గర్వకారణంగా చెప్పుకోవచ్చు.

68వ జాతీయ అవార్డులు (National Awards) కొద్ది సేపటి క్రితమే ప్రకటించారు. ఈ అవార్డులలో దక్షిణాది సినిమాలు సత్తా చాటాయి. ఉత్తమ తెలుగు చిత్రంగా కలర్ ఫోటో ఎంపికవగా, అల వైకుంఠపురములో చిత్రానికి సంగీతం అందించిన తమన్ కు జాతీయ అవార్డు దక్కడం విశేషం.

ఉత్తమ తెలుగు చిత్రంగా ‘కలర్ ఫోటో’ చిత్రం జాతీయ వార్డు కైవసం చేసుకుంది. ఈ చిత్రంలో వర్ధమాన నటుడు సుహాస్, చాందిని చౌదరి ప్రధాన పాత్రల్లో నటించారు. చాయ్ బిస్కెట్ ఫేం సందీప్ రాజ్ దర్శకత్వంలో తెరకెక్కిన ఈ చిత్రాన్ని అమృత ప్రొడక్షన్స్ సంస్థ నిర్మించింది. కాగా స్టీఫెన్ శంకర్ గా పేరు గాంచిన సాయి రాజేష్ కథను అందించారు.

ఇక సంగీత దర్శకుడిగా ప్రస్తుతం అద్భుతమైన ఫామ్ లో ఉన్న థమన్ ఏకంగా ఉత్తమ సంగీత దర్శకుడిగా అవార్డు దక్కించుకున్నారు. అయితే ఈ అవార్డు ఆయన అందించిన పాటలకు దక్కింది అల వైకుంఠపురములో చిత్రంలోని పాటలు దేశవ్యాప్తంగా మారు మ్రోగిన విషయం తెలిసిందే. ఇక సంగీతంలో ఉత్తమ నేపథ్య సంగీతానికి (background score) గానూ సూర్య ఆకాశం నీ హద్దురా (Soorarai Potru) చిత్రానికి సంగీత దర్శకుడు జీ వీ ప్రకాష్ అవార్డు సొంతం చేసుకున్నారు.

అలా వైకుంఠపురములో పాటలు ఇప్పటికి సోషల్ మీడియాలో ట్రెండింగ్ లోనే ఉన్న విషయం తెలిసిందే. ఈ చిత్రంలోని ప్రతి పాటా సూపర్ డూపర్ హిట్ గా నిలిచాయి. సామజవరగమన, బుట్ట బొమ్మ మరియు రాములో రాములా లాంటి పాటలు ఇప్పటికీ శ్రోతలను ఉర్రూతలూగిస్తున్నాయి. ఈ అవార్డు తమన్ కి దక్కడం ఆయనకే కాదు తెలుగు సినిమా పరిశ్రమకు, తెలుగు ప్రేక్షకులందరికీ గర్వ కారణం అనడంలో ఎలాంటి సందేహం లేదు.

అలాగే ఉత్తమ కొరియోగ్రాఫర్ గా సంధ్యా రాజు(నాట్యం సినిమా) కు దక్కింది. ఉత్తమ మేకప్ మెన్ గా రాంబాబు (నాట్యం) ఇక ఉత్తమ నటులుగా హీరో సూర్య, అజయ్ దేవగన్ లకు అవార్డులు లభించాయి. అలాగే ఉత్తమ నటిగా అపర్ణ బాలమురళి, 2020 ఏడాదికి గాను ఈ పురస్కారాలను అందించింది కేంద్ర ప్రభుత్వం.

అక్కినేని నాగ చైతన్య వరుస విజయాలతో ఊపు మీద ఉన్నారు. ఆయన గత చిత్రాలు లవ్ స్టోరీ, బంగార్రాజు ప్రేక్షకులని అలరించి బాక్స్ ఆఫీస్ వద్ద మంచి విజయాలు సాధించాయి. ఈ క్రమంలో చైతన్య నటించిన తాజా చిత్రం థాంక్యూ పై ప్రేక్షకులలో మంచి అంచనాలు ఏర్పడ్డాయి. అందుకు ఒక రకంగా ఈ చిత్ర దర్శకుడు కూడా ఒక కారణం అని చెప్పాలి.

ఎందుకంటే గతంలో నాగ చైతన్య, విక్రమ్ కుమార్ కలిసి చేసిన మనం సినిమా బ్లాక్ బస్టర్ హిట్ గానే కాదు అక్కినేని కుటుంబానికి మరపురాని సినిమాగా మిగిలిపోయింది. ఇక థాంక్యూ చిత్రానికి ప్రీ రిలీజ్ బిజినెస్ భారీ గానే జరిగింది. ప్రపంచ వ్యాప్తంగా ఈ చిత్రం దాదాపు 25 కోట్ల బిజినెస్ జరుపుకుంది.

ప్రముఖ నిర్మాత దిల్ రాజు థాంక్యూ చిత్రాన్ని నిర్మించడంతో పాటు డిస్ట్రిబ్యూషన్ కూడా ఆయనే చూసుకున్నారు. సినిమా రిలీజ్ అయిన ధియేటర్ల సంఖ్య కూడా భారీగానే ఉన్నాయి. అన్నీ చక్కగా కుదిరిన ఈ సినిమా ఈరోజు థియేటర్లలో విడుదలయింది.

ఇక థాంక్యూ చిత్రం టాక్ ఎలా ఉందంటే.. సినిమా తీసిన ఉద్దేశ్యం మంచిదే అయినా.. ఆచరణలో మాత్రం దర్శకుడు అనుకున్న విధంగా తెరకెక్కించ లేక పోయారని విమర్శకుల నుంచి స్పందన లభించింది. ఇక సినిమాలో పాటలు కూడా ఏవీ అంతగా పాపులర్ అవలేదు. పైగా నిడివి కేవలం రెండు గంటల తొమ్మిది నిమిషాలు అయినా.. సినిమాని సాగదీసిన భావన కలుగుతుందని ప్రేక్షకుల టాక్. సరైన పాళ్లలో అన్ని అంశాలు సినిమాలో ఇమిడి పోయి ఉంటే చిత్రం ఖచ్చితంగా విజయం సాధించే అవకాశం ఉండేదని, కానీ ఇప్పుడు అది జరిగేలా లేదని ట్రేడ్ వర్గాల సమాచారం.

ఇక ఓపెనింగ్స్ వరకూ వస్తే తొలి రోజు ఈ చిత్రం ప్రపంచ వ్యాప్తంగా దాదాపు 6 కోట్ల షేర్ రాబట్టచ్చని అంటున్నారు. ఇవి మంచి కలెక్షన్లు అయినప్పటికీ.. సినిమాకి టాక్ బాగా లేకపోవడంతో రేపటి నుంచి కలెక్షన్లు తగ్గడం ప్రారంభిస్తాయి అని ట్రేడ్ వర్గాల అంచనా. మరి థాంక్యూ చిత్రం ఆ అంచనాని నిజం చేస్తుందా లేదా అనేది చూడాలి.

ఇక ఇదిలా ఉండగా, ఈ మధ్య తెలుగు సినిమాల ఫలితాల వరస చూస్తుంటే టైర్ టూ హీరోల చిత్రాలు వరుసగా బాక్సాఫీస్ వద్ద బోల్తా కొట్టాయి. నాని నటించిన అంటే సుందరానికీ, గోపిచంద్ హీరోగా వచ్చిన పక్కా కమర్షియల్, రామ్ పోతినేని వారియర్ ఇవన్నీ బయ్యర్లకు నష్టాలు మిగిల్చాయి. అంటే సుందరానికీ, ది వారియర్ అయితే పది కోట్లకు పైగానే నష్టపోయాయి. మరి ఇప్పుడు తొలిరోజు డివైడ్ టాక్ తెచ్చుకున్న థాంక్యూ చిత్రంతో నాగ చైతన్య ఎంత మేరకు కలెక్షన్లులు సాధిస్తాడు అనేది చూడాలి.

స్టార్ హీరోయిన్ సమంత.. ప్రేమ వివాహం చేసుకున్న అక్కినేని నాగచైతన్యతో ఇటీవలే విడాకులు తీసుకున్న సంగతి తెలిసిందే. ఈ విడాకుల వ్యవహారాన్ని వారిద్దరి అభిమానులు అంత సులువుగా ఒప్పుకొలేక పోయారు. ఇక విడాకుల ప్రకటన తర్వాత సమంత వ్యక్తిత్వం పై అనేక రకాల పుకార్లు సోషల్ మీడియాలో చక్కర్లు కొట్టాయి. ఆమె ప్రవర్తన నచ్చకపోవడం వల్లే, చైతన్య ఆమెతో కలిసి ఉండలేక విడాకులు తీసుకోవాల్సి వచ్చిందని.. సమంత వ్యక్తిగత జీవితంపై తీవ్రంగా నెగిటివ్ కామెంట్స్ వచ్చాయి.

దీంతో సమంతను ట్రోల్ చేస్తూ ఇష్టానుసారంగా మాట్లాడడం ఒక ట్రెండ్ గా మారిపోయింది కొన్ని రోజుల వరకు.. ఇక ఈ నెగటివ్ పబ్లిసిటీ పై గతంలోనే స్పందించారు సమంత. పరిస్థితుల నుంచి కోలుకోవడానికి ఆమెకు కాస్త సమయం ఇవ్వాలంటూ సోషల్ మీడియా ద్వారా కోరారు.ఇక ఆ తర్వాత తన కెరీర్ పై దృష్టి సారించి వరుస సినిమాలతో బిజీ అయిపోయారు సమంత.

ప్రస్తుతం సమంత నటించిన శాకుంతలం సినిమా విడుదలకు సిద్ధంగా ఉంది. ఈ చిత్రానికి గుణశేఖర్ దర్శకత్వం వహిస్తున్నారు.ఇక ఇటీవలే కరణ్ జోహార్ నిర్వహించే కాఫీ విత్ కరణ్ ప్రోగ్రాంకు సమంత హాజరయ్యారు. ఈ షోలో సెలబ్రిటీలు వచ్చి తమ వ్యక్తిగత మరియు వృత్తిపరమైన విషయాలను పంచుకుంటారు. ఈ షోకి బాలీవుడ్‌లో విపరీతమైన క్రేజ్‌ ఉంది.

ఈ షోతో ఫిల్మ్‌ మేకర్‌గానే కాకుండా మంచి హోస్ట్‌గా కరణ్‌ జోహార్‌ నిరూపించుకున్నారు. ఇప్పటివరకు 6 సీజన్లు పూర్తి చేసుకున్న ఈ షో 7వ సీజన్ ను ఈమధ్యనే ప్రారంభించారు కరణ్ జోహార్.ఇందులో భాగంగానే సమంత తన ఎపిసోడ్‌లో పెళ్లి పై కొన్ని వ్యాఖ్యలు చేశారు.

కరణ్‌ జోహార్‌ను ఉద్దేశించి.. ‘ఎంతోమంది వివాహబంధాలు బాధాకరంగా ఉండటానికి మీరే కారణం’ అని సమంత అన్నారు. దానికి ‘నేనేం చేశాను’ అని కరణ్‌ అడగ్గా.. ‘పెళ్లి చేసుకుంటే జీవితం కబీ ఖుషి కబీ ఘమ్‌ (K3G) సినిమాలా ఉంటుందని స్క్రీన్‌పై చూపించారు. కానీ నిజ జీవితంలో మాత్రం అది KGF లా ఉంటుంది అని సమంత సెటైర్ వేశారు.

ఇక ఇదే క్రమంలో కరణ్ నాగ చైతన్య గురించి అడుగుతూ నీ భర్త అన్నప్పుడు సమంత మాజీ భర్త అనడం కాస్త వివాదాస్పదం అయింది. ఇక విడాకుల సమయంలో సమంత పై వచ్చిన ట్రాలింగ్ గురించి కూడా కరణ్ ప్రశ్నలు అడిగారు.అందుకు బదులుగా సమంత స్పందిస్తూ మొదటి నుంచీ తాను ప్రేక్షకుల వద్ద తన జీవితం గురించిన ఏ విషయం కూడా దాచలేదని, అందుకే తన పై వచ్చిన పుకార్లు మరియు వ్యక్తిగత ఖననం పై సరైన విధంగా స్పందించ లేకపోయానని ఆమె అన్నారు. ఇక విడాకుల తరువాత తనను అభిమానించే ప్రేక్షకులకి మాత్రం సమాధానం చెప్పాల్సిన బాధ్యత తనపై ఉందని, అయితే విడాకుల విషయంలో మాత్రం తన దగ్గర సరైన సమాధానం లేకుండా పోయిందని, ఆ పరిస్థితుల నుంచి కొద్ది రోజుల సమయం తీసుకున్నాకనే తాను ఇప్పుడు కాస్త ప్రశాంతంగా ఉన్నానని సమంత తెలిపారు.