తెలుగు సినీ పరిశ్రమలో దిగ్గజ దర్శకుడిగా ఎస్ ఎస్ రాజమౌళికి ఎంత పేరుందో.. ఒక సినీ ప్రేమికుడిగా కూడా అంతే మంచి పేరుంది. సాధారణంగా ఆయన ఏదైనా సినిమా చూసి అది నచ్చితే, వెంటనే సోషల్ మీడియాలో దానిపై తన స్పందనను తెలియజేస్తుంటారు ఎస్ ఎస్ రాజమౌళి. అంత పెద్ద దర్శకుడే సినిమా బాగుంది అన్నారంటే సినిమాలో ఖచ్చితంగా ఉండే ఇంటుంది అని ప్రేక్షకులు అనుకోవడం ఖాయం. ఆయన అలా చెప్పడం వల్ల ఆయా సినిమాలకు కూడా కాస్త క్రేజ్ ఏర్పడుతుంది.

ఇప్పుడు ‘విక్రాంత్ రోణ’ విషయంలోనూ అదే జరిగింది. జులై 28న విడుదలైన ఈ ప్యాన్ ఇండియా సినిమాని ఇటీవలే రాజమౌళి వీక్షించారట. ఈ సందర్భంగా రాజమౌళి, విక్రాంత్ రోణ చిత్ర బృందానికి శుభాకాంక్షలు తెలియజేశారు. ఈ సినిమా తనకెంతో నచ్చిందని.. ఇలాంటి చిత్రం పై పెట్టుబడి పెట్టాలంటే అందుకు దమ్ము, ధైర్యం ఉండాలని.. ఆ ధైర్యం చేసినందుకు మీకు తగిన ఫలితం దక్కిందంటూ ట్విటర్ లో సుదీప్ మరియు విక్రాంత్ రోణ చిత్ర యూనిట్ ను రాజమౌళి అభినందించారు.

ఈ మేరకు రాజమౌళి చేసిన ట్వీట్ సారాంశం ఏంటంటే.. విక్రాంత్ రోణ విజయం సాధించినందుకు సుదీప్‌కు, చిత్ర బృందానికి శుభాకాంక్షలు. ఇలాంటి సినిమా చేయాలంటే.. దమ్ము, ధైర్మ, ఆత్మవిశ్వాసం ఉండాలి. మీరు (సుదీప్‌ని ఉద్దేశిస్తూ) ధైర్యంగా ముందడుగు వేసినందుకు, మంచి ఫలితం దక్కింది. ఈ చిత్రానికి ఆయువుపట్టు అయిన ప్రీ-క్లైమాక్స్ ఎపిసోడ్ నిజంగా అద్భుతంగా ఉంది. అసలు అది ఆ స్థాయిలో తెరకెక్కిస్తారని అసలు ఊహించనే లేదు. ఆ సన్నివేశం చాలా బాగుంది. సినిమా అంతా నాకు బాగా నచ్చింది అంటూ ఇక్కడ గుడ్డి స్నేహితుడు భాస్కర్‌ను ప్రత్యేకంగా మెన్షన్ చేయాల్సిందే అంటూ ట్వీట్ చేశారు రాజమౌళి.
అందుకు ఎంతో ఆనందంగా హీరో కిచ్ఛా సుదీప్ బదులిచ్చారు.. ధన్యవాదాలు సార్. మీ నుంచి ఇలాంటి ప్రశంసలు అందడం మాకు మా చిత్ర యూనిట్ కు ఎంతో గర్వంగా ఉంది. భాస్కర్ తరపున, మా చిత్ర బృందం తరఫున మీకు బిగ్ హగ్ అంటూ సుదీప్ తన సంతోషాన్ని చెప్పుకొచ్చారు.

కాగా.. అనూప్ భండారి దర్శకత్వంలో రూపొందిన ‘విక్రాంత్ రోణ’లో సుదీప్ సరసన శ్రీలంకన్ బ్యూటీ జాక్వెలిన్ ఫెర్నాండెజ్ కీలకమైన పాత్రలో నటించింది. ఆమె నాట్యం చేసిన “రా రా రక్కమ్మా” పాట ఈ మధ్య ప్రతి చోటా వినిపిస్తుంది అంటే అది అతిశయోక్తి కాదు. నిరూప్ భండారి, నీత అశోక్, మధుసుధన్ రావు కీలక పాత్రల్లో నటించిన ఈ ప్యాన్ ఇండియా చిత్రానికి దాదాపు అన్ని వర్గాల నుంచి మంచి స్పందన వస్తోంది. ఈ నేపథ్యంలోనే ఈ చిత్రం బాక్సాఫీస్ వద్ద మంచి వసూళ్లు కూడా రాబడుతోంది. ఇక రాజమౌళి వంటి బిగ్ డైరక్టర్ ట్వీట్ ద్వారా ఆ చిత్రం యొక్క మంచి టాక్ మరింత పెరుగుతుంది.

తెలుగు సినీ పరిశ్రమలో ఎలాంటి బ్యాక్ గ్రౌండ్ లేకుండా వచ్చి తనకంటూ ప్రత్యేకమైన ఇమేజ్ ను, స్టార్ డం ను సంపాదించుకున్న హీరో రవితేజ. అసిస్టెంట్ డైరెక్టర్‌గా తన ప్రయాణం మొదలుపెట్టిన రవితేజ, ఒక రకంగా సినిమా కష్టాలను ఎదురుకుంటూ ఒక్కో మెట్టూ ఎక్కుతూ స్టార్ హీరోగా మారారు.

అంతే కాకుండా ఆయన ఎప్పుడూ కొత్త దర్శకులతో కలిసి పని చేయడానికి వెనుకాడరు. కెరీర్‌లో రవితేజ తొలి సినిమా చేసిన దర్శకులు ఆ పైన ఇండస్ట్రీలో అగ్ర దర్శకులుగా ఎదిగారు.శీను వైట్ల, బోయపాటి శ్రీను వంటి దర్శకులకు తొలి సినిమా అవకాశం ఇచ్చింది రవితేజనే. ఆ తరువాత వారు ఎలాంటి స్థాయికి చేరుకున్నారో ప్రత్యేకంగా చెప్పనక్కర్లేదు.

ఇక రవితేజ పరిచయం చేసిన ఇతర దర్శకులు యోగి ( ఒక రాజు ఒక రాణి), ఎస్ గోపాల్ రెడ్డి (నా ఆటోగ్రాఫ్ స్వీట్ మెమోరీస్), హరీష్ శంకర్ (షాక్), గోపిచంద్ మలినేని ( డాన్ శీను), కే.ఎస్ రవీంద్ర/బాబీ (పవర్), విక్రమ్ సిరికొండ (టచ్ చేసి చూడు) ఉన్నారు.

వీరిలో హరీష్ శంకర్ మరియు బాబీ ప్రస్తుతం ఇండస్ట్రీలో డిమాండ్ ఉన్న దర్శకులు గా చలామణి అవుతున్నారు. కేవలం కొత్త దర్శకులే కాదు, ఒక సినిమా తీసి ఫ్లాపులతో ఉన్న దర్శకులను కూడా రవితేజ ప్రోత్సహించడంలో ముందుంటారు.

ఇక తాజాగా రవితేజ అలాంటి దర్శకుడితో చేసిన సినిమా “రామారావు ఆన్ డ్యూటీ”. శ్రీ లక్ష్మీ వెంకటేశ్వర సినిమాస్ & రవితేజ టీం వర్క్స్ బ్యానర్లపై సుధాకర్ చెరుకూరి నిర్మించిన ఈ చిత్రానికి శరత్ మండవ దర్శకత్వం వహించారు. రాజీషా విజయన్, దివ్యాంశ కౌశిక్ హీరోయిన్లుగా చేశారు. సీనియర్ హీరో వేణు తొట్టెంపూడి ఇందులో ఓ కీలక పాత్రను పోషించారు. కొన్ని యధార్థ సంఘటనల ఆధారంగా ఈ సినిమా రూపొందిన ఈ చిత్రం జూలై 29న మంచి అంచనాల నడుమ విడుదలైంది.

అయితే రవితేజ నమ్మకాన్ని వమ్ము చేస్తూ ఆ చిత్రం ఘోరమైన స్పందనను తెచ్చుకుంది. మాస్ మహరాజ్ నుంచి ఆశించే ఎనర్జీ, ఎంటర్టైన్మెంట్ సినిమాలో ఏమాత్రం లేకపోవడంతో ప్రేక్షకులు చాలా నిరాశ చెందారు. అలాగని ఏదైనా కొత్తదనంతో ఆకట్టుకున్నారా అంటే అదీ లేదు. ఎర్ర చందనం స్మగ్లింగ్ నేపథ్యం అనేది ఆసక్తికరమైనదే అయినా.. అటు థ్రిల్లర్ లా తీయకుండా ఇటు కమర్షియల్ సినిమాలా కాకుండా రెండిటికీ చెడిన రేవటిలా తయారయింది సినిమా.

మొత్తానికి తాను కష్టపడి పైకి వచ్చారన్న కారణంతో కొత్త దర్శకులు, లేదా ఫెయిల్యూర్ లో ఉన్న దర్శకులకు అవకాశాలు ఇచ్చే రవితేజకు ఆ నిర్ణయం వల్ల చాలా తక్కువ సార్లు మాత్రమే విజయాలు దక్కాయి. ఆయన దర్శకులపై పెట్టుకున్న నమ్మకాన్ని వారు నిలుపుకోలేక పోయారు.

ప్రస్తుతం రవితేజ చేతిలో మూడు సినిమాలు ఉన్నాయి. అందులో ధమాకా చిత్రానికి త్రినాధరావు నక్కిన దర్శకుడుగా వ్యవహరిస్తున్నారు, ఈయన గత చిత్రాలు హిట్ సినిమాలే. అయితే రవితేజ నటిస్తున్న మిగతా రెండు చిత్రాలైన టైగర్ నాగేశ్వరరావు , రావణాసుర చిత్రాల దర్శకులు మాత్రం ప్రస్తుతం విజయాలు లేని వారే. మరి ఆ సినిమాలైనా హిట్ సాధించి రవితేజ నమ్మకాన్ని నిలబెడతాయి అని ఆశిద్దాం.

ఏ సినీ పరిశ్రమలో అయినా బయోపిక్ అనేది ఒక సక్సెస్ఫుల్ ఫార్ములా. ఇప్పటికే ప్రముఖ వ్యాపారవేత్తలు, సెలబ్రెటీల జీవిత సంఘటనల ఆధారంగా తెరకెక్కిన పలు చిత్రాలు సూపర్ హిట్ అయిన సంగతి తెలిసిందే. ఇక ఇటీవల తమిళ నటుడు మాధవన్ ప్రధాన పాత్రలో ఇస్రో శాస్త్రవేత్త నంబి నారాయణన్ జీవితం ఆధారంగా రాకెట్రీ – ది నంబి ఎఫెక్ట్ సినిమాను తెరకెక్కించారు. జూలై 1న విడుదలైన ఈ సినిమాకు ప్రేక్షకుల నుంచి విశేషమైన స్పందన లభించింది.

తాజాగా ఈ సినిమా ఓటిటిలో విడుదల అయింది, దాంతో ప్రశంసల వెల్లువ కొనసాగుతుంది. ఎందరో ప్రేక్షకులు మరియు సినీ ప్రముఖులు ఈ చిత్రాన్ని పొగడ్తలతో ముంచెత్తారు. తాజాగా ఆ లిస్ట్ లోకిసూపర్ స్టార్ రజినీకాంత్ చేరారు. హీరో మాధవన్ పై ప్రశంసలు కురిపించారు. అంతే కాకుండా రాకెట్రీ సినిమా గురించి తన అభిప్రాయాలను ఓ స్పెషల్ నోట్ విడుదల చేశారు.

రాకెట్రీ.. ప్రతి ఒక్కరు చూడాల్సిన సినిమా. ముఖ్యంగా యువకులు. మాధవన్ దర్శకత్వంలో తన తొలి చిత్రం పద్మభూషణ్ ఇస్రో శాస్త్రవేత్త నంబి నారాయణన్ పై తీయడం ద్వారా తనను తాను సమర్థుడైన చిత్ర నిర్మాతగా నిరూపించుకున్నారు. భారతదేశ అంతరిక్ష పరిశోధన కోసం పని చేస్తున్నప్పుడు వారి జీవితంలో చాలా కష్టాలు ఎదురయ్యాయి. ఇలాంటి చిత్రాన్ని మాకు అందించినందుకు మాధవన్ కు ధన్యవాదాలు అంటూ ట్వీట్ చేశారు సూపర్ స్టార్. అలాగే ఈ సందర్భంగా సినిమా తీసిన మాధవన్ ను, శాస్త్రవేత్త నంబి నారాయణన్ ను ఆయన సత్కరించారు.

ఇస్రో శాస్త్రవేత్త నంబి నారాయణన్ జీవితంలో జరిగిన సంఘటనల ఆధారంగా హీరో మాధవన్ రాకెట్రీ – ది నంబి ఎఫెక్ట్ చిత్రాన్ని తెరకెక్కించారు. అతను సాధించిన విజయాలతో పాటు దేశం అభివృద్ధి చెందాలనే ఆశయం కోసం ఏం త్యాగాలు చేశారు, అలాగే ఆయన పై తప్పుడు ఆరోపణలు చేసి గూఢచారి కేసులో ఇరికించినపుడు ఆయన ఎన్ని అవమానాలు దిగమింగి కష్టాలు ఎదురుకున్నారు.. చివరికి తను నిర్దోషి అని ఎలా నిరూపించుకున్నాడు అనే అంశాలను రాకెట్రీ సినిమాలో చక్కగా చూపించారు. ఇందులో నంబి నారాయణన్ పాత్రలో మాధవన్ నటించడంతో పాటు ఆయనే దర్శకత్వం వహించారు. ఇందులో సిమ్రాన్, రవి రాఘవేంద్ర, మిషా ఘోషాల్ కీలకపాత్రలలో నటించారు.

మొదటి నుండి మాధవన్ కు నటుడుగా చక్కని పేరు ఉంది. ఎలాంటి పాత్ర చేసిన దానికి తన నటనతో ప్రత్యేకతను జోడించడం ఆయనకు ఆయనే సాటి. శాస్త్రవేత్త నంబి నారాయణన్ పాత్రలో ఆయన జీవించారంటే అది ఎంత మాత్రం అతిశయోక్తి కాదు. ఇక ఆయన భార్య పాత్రలో సిమ్రాన్ కూడా అద్భుతంగా నటించారు. కొన్ని సన్నివేశాల్లో వారిరివురి నటనకు ప్రేక్షకుల కళ్ళు చెమర్చేచే స్థాయిలో భావోద్వేగాలని పండించారు. ఇక ఇంత మంచి సినిమాలో అతిథి సహాయక పాత్రల్లో తమిళ నటుడు సూర్య, బాలీవుడ్ బాద్షా షారుక్ ఖాన్ నటించి తమ అభిరుచిని చాటుకున్నారు. తెలుగు, తమిళ వెర్షన్లో సూర్య నటించగా, హిందీ వెర్షన్లో షారుక్ ఖాన్ నటించారు.

కరోనా ప్యాన్డేమిక్ రాక ముందు తెలుగు సినిమా మార్కెట్ ఎంతో అద్భుతంగా ఉండేది. యావరేజ్ టాక్ వచ్చిన సినిమాలు కూడా చక్కని వసూళ్లు సాధించేవి. చిన్న హీరో అయినా పెద్ద హీరో అయినా తొలి మూడు రోజుల కలెక్షన్లు చాలా బాగుండేవి. వాటి వల్ల సినిమాలు ఫ్లాప్ అయినా నష్టాలు కొంత మేరకే వచ్చేవి. అయితే కరోనా వరుస వేవ్ ల దాడి తరువాత పరిస్తితి పూర్తిగా మారిపోయింది.

ఈ ఏడాది ఆర్ ఆర్ ఆర్ వంటి భారీ విజయం తరువాత చాలా కాలం తెలుగు నుంచి హిట్ సినిమానే లేదు. F3, సర్కారు వారి పాట చిత్రాలు బాక్స్ ఆఫీస్ వద్ద యావరేజ్ గా నిలిచాయి. చిన్న సినిమాగా వచ్చిన అశోక వనంలో అర్జున కళ్యాణం పరవాలేదు అనిపించింది.

ఇక జూన్ నెలలో విడుదలైన మేజర్ చిత్రం మాత్రం అందరికీ లాభాలను తెచ్చిపెట్టింది. ఈ ఏడాదిలో ఆర్ ఆర్ ఆర్ తరువాత విజయం సాధించిన ఒకే ఒక్క తెలుగు సినిమా మేజర్ కావడం విశేషం.

ఇక జూలై నెలకు వస్తే తొలి వారం గీతా ఆర్ట్స్ బ్యానర్ పై, మారుతి దర్శకత్వంలో హీరో గోపీచంద్ మరియు రాశి ఖన్నా హీరోయిన్ గా నటించిన పక్క కమర్షియల్ ఎన్నో అంచనాల మధ్య వచ్చి నిరాశ పరిచింది. ఆ తరువాత వచ్చిన చిన్న సినిమా హ్యాపీ బర్త్ డే కూడా పరాజయం పాలయ్యింది. పక్కా మాస్ బొమ్మగా వచ్చిన రామ్ పోతినేని “ది వారియర్” చిత్రం కూడా ఫ్లాప్ గా నిలిచింది. ఇక నాగ చైతన్య హీరోగా, దిల్ రాజు నిర్మాణంలో వచ్చిన “థ్యాంక్యూ” చిత్రం ఐతే అత్యంత భారీ డిజాస్టర్ గా నిలిచింది.

ఇక ఈ వారం విడుదలైన రామారావు ఆన్ డ్యూటీ సినిమా అయినా కాస్త రిలీఫ్ ను ఇస్తుంది అనుకున్నారు ట్రేడ్ వర్గాలు. కాస్త తక్కువ అమౌంట్ కే బిజినెస్ జరగడం, మాస్ లో రవితేజకు మంచి ఫ్యాన్ బేస్ ఉండటం వల్ల సినిమా కనీసం బ్రేక్ ఈవెన్ అయినా అవుతుంది అనుకున్నారు. కానీ మొదటి షోలు కాస్త సందడి చేసిన తరువాత చిత్రం బాక్స్ ఆఫీసు వద్ద చతికిల బడింది.

ఇక డబ్బింగ్ సినిమాలైన రాకెట్రీ – ది నంబి ఎఫెక్ట్, సాయి పల్లవి గార్గి చిత్రాలు విమర్శకుల ప్రశంసలు అందుకున్నాయి. అయితే ఈ వారం విడుదలైన కన్నడ సినిమా “విక్రాంత్ రోణ” అనూహ్యంగా తెలుగు రాష్ట్రాల్లో విజయం సాధించి అందరికీ లాభాలను తెచ్చిపెట్టింది. ప్రేక్షకులను ఆకట్టుకునే కంటెంట్ కు తోడు కాస్త న్యాయమైన టికెట్ రేట్లు ఉంచితే ఖచ్చితంగా సినిమాలు విజయం సాధిస్తాయి అనే పాఠాన్ని మన తెలుగు సినీ నిర్మాతలు మరియు పంపిణీదారులకు చెప్పకనే చెప్పింది “విక్రాంత్ రోణ”.