నటీనటులు: ఆలియా భట్, షెఫాలీ షా, విజయ్ వర్మ, రోషన్ మ్యాథ్యూ తదితరులు

రచన, దర్శకత్వం: జస్మిత్ కే రీన్

డైలాగ్స్: విజయ్ మౌర్య, పర్వీజ్ షేక్, జస్మిత్ రీన్

నిర్మాతలు: గౌరీ ఖాన్, ఆలియా భట్, గౌరవ్ వర్మ

సినిమాటోగ్రఫి: అనిల్ మెహతా

ఎడిటింగ్: నితిన్ బేద్

సంగీతం: ప్రశాంత్ పిళ్లై, విశాల్ భరద్వాజ్

బ్యానర్: రెడ్ చిల్లీస్ ఎంటర్‌టైన్‌మెంట్, ఎటర్నల్ సన్‌షైన్ ప్రొడక్షన్స్

ఓటిటి ప్లాట్ ఫామ్: నెట్‌ఫ్లిక్స్

రేటింగ్: 3/5

బాలీవుడ్ స్టార్ హీరోయిన్ ఆలియా భట్ తాజాగా నటించిన సినిమా “డార్లింగ్స్”. నెట్ ఫ్లిక్స్ లో.డైరెక్ట్ గా విడుదలైన ఈ సినిమా వీక్షకులను ఆకట్టుకుందా లేదా చూద్దాం.

ఈ సినిమా ద్వారా అలియా భట్ మగ వాళ్ళ మీద జరిగే హింసను ప్రోత్సహిస్తుంది అంటూ సోషల్ మీడియాలో కొంతమంది నెగటివ్ పబ్లిసిటీ చేశారు.అయితే సినిమాలో చూపించే హింసకు ఒక బలమైన కారణం మరియు నేపథ్యంతో పాటు చిత్ర బృందం ఉద్దేశ్యం మంచిదైతే.. అందులో ఏమాత్రం తప్పు లేదు.

ఇక ‘డార్లింగ్స్’ కథ విషయానికి వస్తే…. బద్రున్నిసా (అలియాభట్), హమ్జా అబ్దుల్ షేక్ (విజయ్ వర్మ) ప్రేమించి పెళ్ళి చేసుకుంటారు. హమ్జా రైల్వే టీసీగా పనిచేస్తుంటాడు. పెళ్ళైన మూడేళ్ళకే అతను మద్యానికి బానిస అవుతాడు. రాత్రి అయితే చాలు తాగి, భార్య బద్రును కొట్టి హింసిస్తూ.. తెల్లవారగానే మత్తు దిగిపోయి మంచి వాడిలా ఆమెను బ్రతిమలాడుతాడు. బద్రు తల్లి షంషున్నీసా (షఫాలీ షా) కూడా తాను ఉండే పాత అపార్ట్ మెంట్ లో ఉంటుంది. ఇటు తల్లి, అటు కూతురు ఎదురుబొదురు ఫ్లాట్స్ లో నివసిస్తుంటారు. కళ్ళముందే కూతురును అల్లుడు కొడుతుంటే షంషూ భరించలేకపోతుంది. భర్తకు విడాకులిచ్చేసి, తన దగ్గరకు వచ్చేయమని కూతురుకు చెప్తూ ఉంటుంది. కానీ భర్త మీద ప్రేమతో బద్రు ఆ పని చేయలేకపోతుంది. అయితే ఎంతో సహనం మరియు భర్త పై ప్రేమ ఉన్న బద్రు.. ఓ దారుణమైన సంఘటనతో మనసు విరిగి భర్తకు బుద్ధి చెప్పాలనే నిర్ణయం తీసుకుంటుంది. అందుకు తల్లి సాయం కూడా తీసుకుంటుంది. దాంతో పాటు వాళ్ళిద్దరికీ స్నేహితుడైన జుల్ఫీ (రోషన్ మాథ్యూ) వీళ్ళకు ఏ విధంగా సహాయపడ్డాడు? భార్యలో వచ్చిన మార్పుని చూసైనా హమ్జా మారాడా? లేదా? అనేది మిగతా కథ.

భార్యా భర్తలు అంటే ఒకరిని ఒకరు అర్థం చేసుకుని మెలగాలి, అంతే కానీ భర్త అన్న హక్కు అహంకారంతో హద్దు మీరి హింసిస్తే.. అందుకు పర్యావసానం చాలా దారుణంగా ఉంటుందని దర్శకురాలు జస్మిత్ కె రీన్ ‘డార్లింగ్స్ ‘ ద్వారా చెప్పాలనుకున్నారు. గతంలో ఈ తరహా కథతో వచ్చిన సినిమాల్లో సాధారణంగా అయితే మహిళా పాత్రల తాలూకు తిరుగుబాటును ముగింపు సన్నివేశంలో చూపించడం రివాజుగా వచ్చింది. అయితే ఈ బ్లాక్ కామెడీ డ్రామాలో మధ్యలో నుండే భర్త మీద భార్య పగ తీర్చుకోవడమనే అంశాన్ని చూపించారు.

మద్యానికి బానిసైన వ్యక్తి తేలు వంటి వాడని, అలాంటి మనిషిలో మార్పు అంత త్వరగా రాదని బద్రు తల్లి ఆమెతో ఎప్పుడు చెబుతూ.. అందుకు ఉదాహరణగా ఓ కథ కూడా చెబుతుంది. అయితే తల్లి మాటను వింటూనే, బద్రు తన నైజాన్ని వదులుకోకుండా మనిషిగా ప్రవర్తించే క్లయిమాక్స్ లో ఆమె పాత్రలోని గొప్పతనం ప్రేక్షకుల చేత సెల్యూట్ కొట్టిస్తుంది. అలానే… హమ్జా చేసిన దారుణానికి, తప్పు ఒప్పుకుని మనిషిగా మారలేని అతని కుంచిత మనస్తత్వానికి తగిన ముగింపు ఇచ్చి దర్శకురాలు ఆకట్టుకుంటారు.

డార్లింగ్స్’ సినిమాలో మొత్తం నాలుగు పాత్రలు. అందులో ప్రధానమైన బద్రు పాత్రలో నటించిన అలియా భట్ ఒక మధ్య తరగతి ముస్లిం మహిళ పాత్రలో చక్కగా నటించారు. భర్త మీద ఉన్న ప్రేమతో, అతను ఎప్పటికైనా మారతాడు అనే ఆశతో అతని బలహీనతలను సైతం ఓర్పుగా భరించే మహిళ తిరగబడితే ఎలా ఉంటుందో అద్భుతంగా చూపించి మెప్పించారు. ఆమె తల్లిగా ‘సత్య’ ఫేమ్ షఫాలీ షా తనదైన శైలిలో నటించడమే కాక అందరిలోనూ తన ప్రత్యేకంగా నిలిచారు. ఒక రకంగా చెప్పాలంటే అలియా భట్ పాత్ర కన్న ఈమె పాత్రలోనే భిన్న పార్శ్వాలు ఉండటం విశేషం.

ఇక తెలుగు వాడైన విజయ్ వర్మ బాలీవుడ్ లో తనదైన నటన, పాత్రలతో అటు సినిమాల్లోనూ, ఇటు వెబ్ సీరిస్ ల లోనూ రాణిస్తున్నారు. గతంలో ఆయన తెలుగులో నాని ‘ఎంసీఎ’ సినిమాలో విలన్ పాత్రను చేసిన సంగతి తెలిసిందే. ఈ సినిమాలో హమ్జా పాత్రకు ప్రాణం పోశారు. కొన్ని సన్నివేశాల్లో ఆయనని చంపెంత కోపం వచ్చేలా ఆ పాత్రలో క్రూరత్వాన్ని పండించారు. తల్లీకూతుళ్ళకు అండగా నిలిచే జుల్ఫీ పాత్రలో రోషన్ మాథ్యు ఆకట్టుకుంటారు.ఇతర ప్రధాన పాత్రలలో కిరణ్ కర్మార్కర్, విజయ్ మౌర్య, రాజేశ్‌ శర్మ, సంతోష్‌ జువేకర్ తదితరులు పరవాలేదు.

ప్రశాంత్ పిళ్ళై నేపథ్య సంగీతం బాగుంది. సినిమాలో మూడు పాటలు ఉండగా అవి సాధారణ స్థాయిలో ఉన్నాయి. అనీల్ మెహతా కెమెరా పనితనం కూడా బాగుంది. విజయ్ మౌర్య, పర్వేజ్ షేక్, జస్మిత్ కె రీన్ రాసిన సంభాషణలు సినిమా మూడ్ కు తగ్గట్టుగా ఉన్నాయి.

రెండు గంటల పద్నాలుగు నిమిషాల నిడివి ఉన్న ఈ సినిమాలో మధ్య దశలో చాలా సన్నివేశాలు రిపీట్ అవడం వల్ల బోర్ కొట్టిన మాట వాస్తవం. అలానే ఆ సమయంలో కథనం కూడా సాదాసీదాగా సాగడంతో ఒక దశలో సినిమా ఎటు వెళుతుందో అర్థం కాదు. అయితే బద్రు పాత్రలో చలనం వచ్చిన తరువాత ‘డార్లింగ్స్’ సినిమా ఊపు అందుకుంటుంది.

గృహహింస వంటి సమాజంలో ఉన్న ఒక తీవ్రమైన సమస్యను దర్శకురాలు ప్రధాన కథా వస్తువుగా తెరకెక్కించడం నిజంగా అభినందించదగ్గ విషయం.

చందు మొండేటి ద‌ర్శ‌క‌త్వంలో కార్తికేయ సినిమాకి సీక్వెల్ గా వస్తున్న కార్తికేయ‌ 2 పై అంచనాలు భారీగా ఉన్నాయి. ఈ సినిమాలో యువ హీరో నిఖిల్ హీరోగా నటించారు. ఇప్పటికే విడుదలైన టీజర్ మరియు ట్రైలర్1 కు అద్భుతమైన స్పందన వచ్చింది. ఈ చిత్ర నిర్మాణ బాధ్యతను పీపుల్స్ మీడియా ఫ్యాక్ట‌రి, అభిషేక్ అగ‌ర్వాల్ ఆర్ట్స్ బేన‌ర్స్ పై టి.జి. విశ్వ‌ప్ర‌సాద్, అభిషేక్ అగ‌ర్వాల్ ఈ చిత్రాన్ని సంయుక్తంగా నిర్మిస్తున్నారు. ‘శాంతను ఇది నువ్వు ఆపలేని యాగం.. నేను సమిధను మాత్రమే.. ఆజ్యం మళ్లీ అక్కడ మొదలైంది.. ప్రాణ త్యాగం చేసే తెగింపు ఉంటేనే దీనిని పొందగలం’ అంటూ ఆసక్తికరమైన డైలాగ్స్ తో సాగిన ట్రెయిలర్ 1 ప్రేక్షకులని విపరీతంగా ఆకట్టుకుంది.

ఇక ఈ చిత్రానికి సంబంధించిన థియేట్రికల్ ట్రైలర్ ను ఆగస్ట్ 6న విడుదల చేస్తున్నట్లు ఇదివరకే ప్రకటించారు. మరి ఈరోజు విడుదలైన ఈ ట్రైలర్ ఎలా ఉందంటే ..

“అయిదు సహస్రాల ముందు పలికిన ప్రమాదం.. ప్రమాదం లిఖితం.. పరిష్కారం లిఖితం అంటూ ఆసక్తికరంగా మొదలైన ట్రైలర్ అబ్బురపరిచే విజువల్స్ మరియు కట్టిపడేసే బ్యాక్ గ్రౌండ్ మ్యూజిక్ తో ఆకట్టుకుంది. “నా వరకు వచ్చేవరకే అది సమస్య.. నా వరకు వచ్చాక అది సమాధానం” అంటూ హీరో నిఖిల్ ఈసారి కృష్ణ భగవానుడి గురించి ఏదో రహస్యాన్ని చేధించే పనిలో పడ్డట్టు స్పష్టంగా అర్ధం అవుతుంది. ఈ ట్రైలర్ లో హీరోయిన్ అనుపమ పరమేశ్వరన్ తో పాటు బాలీవుడ్ నటుడు అనుపమ్ ఖేర్, మరియు మలయాళ తెలుగు నటుడు ఆదిత్య మీనన్ విలన్ పాత్రలో కనిపిస్తున్నారు.

కార్తికేయ2 చిత్రం విడుదల తేదీ విషయంలో పలు మార్లు మార్పు జరిగిన విషయం తెలిసిందే. మొదట జూలై 22న విడుదల కావాల్సిన సినిమా ఆగస్ట్ 5న విడుదల అవుతుందని పుకార్లు వినిపించాయి. అయితే మళ్ళీ అధికారికంగా ఆగస్ట్ 12న విడుదల అవుతుందని చిత్ర బృందం ప్రకటించింది. అయితే చివరి నిమిషంలో మళ్ళీ కాస్త అపశృతి దొర్లినట్లుగా ఆగస్ట్ 13కు మార్చబడింది.

ఈ చిత్రంలో అనుపమ పరమేశ్వరన్ హీరోయిన్ గా నటిస్తుండగా.. అనుపమ్ ఖేర్, శ్రీనివాస‌ రెడ్డి, ప్ర‌వీణ్‌, ఆదిత్యా మీన‌న్‌, తుల‌సి, స‌త్య, వైవా హ‌ర్ష‌, వెంక‌ట్‌ తదితరులు కీలక పాత్రలు పోషించారు. ఆగస్ట్ 12న ఈ చిత్రాన్ని భారీ స్థాయిలో విడుదల చేయబోతున్నారు. కార్తికేయ సినిమా సూపర్ హిట్ కావడంతో ప్రేక్షకులు ఈ సీక్వెల్ కోసం ఆసక్తిగా ఎదురు చూస్తున్నారు. చూడాలి మరి ఈ సీక్వల్ అంచనాలు అందుకుంటోందో లేదో.

బింబిసార విజయం తెలుగు సినీ పరిశ్రమలో ఎంతో ఆనందాన్ని మరియు ఉత్సాహాన్ని నింపింది. పలువురు సినీ ప్రముఖులు ఈ చిత్రాన్ని సోషల్ మీడియాలో ప్రశంసించారు. ఇటివలే మెగాస్టార్ చిరంజీవి బింబిసార మరియు సీతా రామం చిత్రాలను పొగుడుతూ ట్వీట్ చేశారు.

ఆయన తర్వాత ఐకాన్ స్టార్ అల్లు అర్జున్ కూడా బింబిసార సినిమా విజయం పై కళ్యాణ్ రామ్ మరియు మల్లిడి వశిష్టను అభినందిస్తూ ట్వీట్ చేశారు.

బింబిసార చిత్ర బృందానికి ఆయన అభినందనలు తెలిపారు. ఇది ఎంతో ఆసక్తికరమైన, ఆకర్షణీయమైన ఫాంటసీ చిత్రం అని చెబుతూ.. కళ్యాణ్ రామ్ గారు తన ప్రభావవంతమైన ఉనికిని చాటుకుంటూ ఎప్పుడూ ప్రతిభావంతులైన వారిని పరిశ్రమలోకి తీసుకు వచ్చి కొత్త తరహా సినిమాలను ట్రై చేస్తున్నందుకు ఆయనంటే ఎంతో గౌరవం ఉందని అల్లు అర్జున్ ట్వీట్ చేశారు.

అలాగే ఈ చిత్రాన్ని ఎంతో చక్కగా తెరకెక్కించిన దర్శకుడు వశిష్టను కూడా ఆయన అభినందించారు. దాంతో పాటు సినిమాకు పని చేసిన ఇతర సాంకేతిక నిపుణులకు, ఆర్టిస్టులందరికీ అల్లు అర్జున్ అభినందనలు తెలిపారు. ఇక ఈ చిత్రానికి నేపథ్య సంగీతంతో వెన్నెముకలా నిలిచిన కీరవాణి గారికి.. హీరోయిన్లు క్యాథరీన్ త్రెసా, సంయుక్త మీనన్ లను కూడా అల్లు అర్జున్ అభినందించారు.

అల్లు అర్జున్ తో పాటు దర్శకులు కె. రాఘవేంద్రరావు, బాబీ కూడా ఈ సినిమాకి తమ హృదయపూర్వక అభినందనలు తెలిపారు.

ఇక బింబిసార సినిమా.. గత కొంతకాలంగా కష్టాల్లో ఉన్న తెలుగు సినిమా పరిశ్రమకు చలనం తెస్తూ, అన్ని వయసుల ప్రేక్షకులను విపరీతంగా ఆకట్టుకుంది. తొలి రోజు నుంచీ ఈ చిత్రం అన్ని సెంటర్లలో నందమూరి కళ్యాణ్ రామ్ కెరీర్ లోనే అత్యధిక కలెక్షన్లు వసూళ్లు సాధించింది. ఇప్పటికే చాలా ఏరియాల్లో బ్రేక్‌ ఈవెన్ సాధించి లాభాల్లోకి దూసుకుపోతోంది.

ఈ వసూళ్లతో చిత్ర నిర్మాతలు, డిస్ట్రిబ్యూటర్లు అందరూ కూడా చాలా సంతోషంగా ఉన్నారు. ఈరోజుతో దాదాపు బ్రేక్ ఈవెన్ మార్కును దాటేసిన బింబిసార.. మరి తన దూకుడును ఎంత కాలం కొనసాగించి పంపిణీదారుల పెట్టుబడికి ఏ స్థాయిలో లాభాలను అందిస్తుందో చూడాలి.

దుల్కర్ సల్మాన్ – మృణాల్ ఠాకూర్ జంటగా నటించగా . హను రాఘవపూడి దర్శకత్వంలో స్వప్న సినిమా పతాకం పై నిర్మించిన “సీతా రామం” చిత్రం ఘన విజయం దిశగా పయనిస్తుంది.

ఒక క్లాసికల్ లవ్ స్టోరీ గా తెరకెక్కిన సీతారామం ప్రపంచ వ్యాప్తంగా ప్రేక్షకుల హృదయాలను గెలుచుకుంది. తొలిరోజు ఈ చిత్రానికి ప్రేక్షకుల నుంచి చక్కని స్పందన లభించింది. ఆ మౌత్ టాక్ ప్రభావం రెండో రోజు నుంచి అద్భుతమైన కలెక్షన్లను రాబడుతోంది.

కాగా ఈ చిత్రం శనివారం దాదాపు అన్ని ఏరియాల్లో హౌస్‌ఫుల్‌ బోర్డులు నమోదు చేయగా, చాలా ఏరియాల్లో అదనపు థియేటర్లు జోడించబడ్డాయి. మల్టీప్లెక్స్‌లు, ఎ సెంటర్లతో పాటు శనివారం బి, సి సెంటర్లలో కూడా ఈ సినిమా చాలా మంచి వసూళ్లను రాబట్టింది. ఇక ఈరోజు ఆదివారం, ఈ చిత్రానికి కలెక్షన్ల పరంగా అత్యధిక వసూలు చేస్తుందని ట్రేడ్ వర్గాల అంచనా.

ఇక US బాక్స్ ఆఫీస్ వద్ద ఈ చిత్రం ప్రీమియర్స్ + డే 1 కంటే రెండవ రోజు ఎక్కువ వసూలు చేయడం మరో విశేషం. ఇప్పటికే $400K మార్కును చేరుకున్న సీతారామం ఈ రోజుతో హాఫ్ మిలియన్ డాలర్లు సాధించిన చిత్రాల జాబితాలో చేరనుంది.

యధార్థ సంఘటనల ఆధారంగా ఒక అద్భుతమైన ప్రేమ కావ్యంగా రూపొందించిన ఈ సినిమాని ప్రేక్షకులు మరియు విమర్శకులు ఎంతో ఇష్ట పడుతున్నారు. యుద్ధం రాసిన ప్రేమకథ అంటూ ట్యాగ్ లైన్ తో తెరకెక్కిన ఈ సినిమాలో భావోద్వేగాలకు ప్రేక్షకులు ఎంతగానో ప్రభావితం అయ్యారు.

హీరో హీరోయిన్లు దుల్కర్ సల్మాన్ మరియు మృణాల్ ఠాకూర్ లు వారి పాత్రల్లో ఎంతో చక్కగా నటించడమే కాకుండా వారిద్దరి మధ్య కెమిస్ట్రీ కూడా అద్భుతంగా పండించారు. ఇక దర్శకుడు హను రాఘవపూడి తనదైన పాత్ర చిత్రణలతో, ఫీల్ తో ఈ చిత్రాన్ని ఒక దృశ్య కావ్యంగా మలిచారు. కాగా విశాల్ చంద్రశేఖర్ సంగీతం చిత్రానికి ప్రాణంగా నిలిచింది. పి.ఎస్.వినోద్ అద్భుతమైన విజువల్స్ ఎంతో ఆహ్లాదకరంగా ఉండి ఆకట్టుకున్నాయి.

ఇక నిర్మాణ విలువల పరంగా స్వప్న సినిమా – వైజయంతీ మూవీస్ ఈ చిత్రాన్ని ఎంతో ప్రతిష్టాత్మకంగా రూపొందించారు. ఇలా అన్ని రకాల వనరులు ఈ సినిమాను ఒక అందమైన అనుభూతిని కలిగించే విధంగా నడిపించాయి.

అటు అద్భుతమైన రివ్యూలతో పాటు ఇటు కలెక్షన్ల పరంగా కూడా ఈ చిత్రం బ్లాక్‌ బస్టర్ వైపు పరుగులు తీస్తుంది.ఇటీవల మంచి ప్రచారంతో వచ్చిన పక్కా కమర్షియల్, థాంక్యూ, రామారావు ఆన్ డ్యూటీ వంటి చిత్రాల కంటే సీతా రామం కలెక్షన్లు ఎక్కువగా ఉండటం అందరినీ ఆశ్చర్య పరిచింది. తెలుగు హీరో కాకుండా ఒక మలయాళ హీరో నటించిన ఈ సినిమా బాక్సాఫీస్ వద్ద మంచి వసూళ్లు రాబట్టడం ఎంతో అభినందనీయం.

వరుస ఫ్లాపులతో దిక్కుతోచని పరిస్థితిలో ఉన్న తెలుగు సినిమా పరిశ్రమకు కొంత కాలం తరువాత మంచి రోజులు రానే వచ్చాయి. మునుపటిలా ప్రేక్షకులు మళ్ళీ సినిమాలు చూడరా.. విజయాలు అనేవి ఇంక తెలుగు సినిమాకు అందని ద్రాక్షగా మిగిలిపోతుందా ? వంటి ప్రశ్నలకు ఈ శుక్రవారం రిలీజ్ అయిన సినిమాలు సంతృప్తికరమైన ఫలితాన్ని ఇచ్చాయి.

గత కొంత కాలంగా చాలా ధీనావస్థలో కొట్టు మిట్టాడుతున్న పరిశ్రమకు కొత్త ఉత్సాహాన్నిచ్చాయి. ఈ ఏడాది ఫిబ్రవరిలో డీజే టిల్లు వంటి బ్లాక్ బస్టర్ తరువాత.. మార్చిలో ‘RRR’ వంటి ప్యాన్ ఇండియా సినిమాతో బాక్స్ ఆఫీస్ వద్ద సంచలనాలు సృష్టించడమే కాకుండా ప్రపంచ వ్యాప్తంగా వ్యాప్తంగా వద్ద రికార్డుల మోత మోగించింది. దాంతో పాటు అపారమైన గౌరవాన్ని, పేరు ప్రఖ్యాతలు సంపాదించుకుంది.

అయితే ఆ తరువాత నుంచి భారీ పరాజయాలతో ఒక్కో సినిమా ఫ్లాప్ అవుతూ ఇండస్ట్రీని సంక్షోభంలోకి నెట్టేశాయి.

ఇక ఎట్టకేలకు ఈ శుక్రవారం విడుదలైన సినిమాలు బింబిసార, సీతారామం. అందరి చూపు ఈ రెండు సినిమాల పైనే.. కనీసం ఈ సినిమాలైనా విజయాలు సాధించి పరిశ్రమకు ఊపిరి పోస్తే బాగుంటుందనే అభిప్రాయం అందరిలోనూ ఉండగా రెండు చిత్రాలు ఆ నమ్మకాన్ని నిలబెట్టాయి.

నందమూరి కల్యాణ్ రామ్ నటించిన చారిత్రాత్మక నేపథ్యం గల ‘బింబిసార’, దుల్కర్ సల్మాన్ నటించిన మ్యాజికల్ లవ్ స్టోరీ ప్రేక్షకులను ఆకట్టుకున్నాయి.

కల్యాణ్ రామ్ నపటించిన ‘బింబిసార’ 5వ దశాబ్దానికి చెందిన బింబిసారుడిని ప్రధాన పాత్రలో తెరకెక్కింది. మల్లిడి వశిష్ట దర్శకుడిగా పరిచయమైన ఈ సినిమా టైమ్ ట్రావెల్ కాన్సెప్ట్ తో సరికొత్త నేపథ్యంతో పాటు మాస్ ని అలరించే పోరాట సన్నివేశాలు కూడా వుండటంతో ఈ సినిమాకి ప్రేక్షకులు విజయాన్ని అందించారు. చాలా కాలంగా సరైన హిట్ కోసం ఎదురుచూస్తున్న కల్యాణ్ రామ్ కు భారీ విజయాన్ని దక్కింది. ఎన్నో ఏళ్ల తరువాత థియేటర్ల వద్ద హౌజ్ ఫుల్ బోర్డులు కనిపించడం విశేషం. తొలిరోజు కలెక్షన్ల తోనే ఈ సినిమా దాదాపు యాభై శాతం రికవరీ సాధించి అందరినీ ఆశ్చర్య పరిచింది.

ఇక దుల్కర్ సల్మాన్ మరియు మృణాల్ ఠాకూర్ నటించిన ‘సీతారామం’ రెండు కాలమానాల నేపథ్యంలో సాగే కల్పిత ప్రేమగాథగా తెరకెక్కింది. దర్శకుడు హను రాఘవపూడి ఈ సినిమాని నడిపించిన తీరు చక్కని అనుభూతిని కలిగించడంతో పాటు ఆహ్లాదకరమైన విజువల్స్, వీనులవిందైన సంగీతం.. అలాగే వైజయంతి బ్యానర్ నిర్మాణ విలువలు కలగలిపి ఓ అందమైన సినిమాగా నిలబెట్టాయి. మొదట్లో మరీ స్లోగా నడిచిన భావన కలిగినా.. సీతారాముల ప్రేమకథను ప్రవేశ పెట్టిన విధానం సినిమాని నిలబెట్టింది. ఈ సినిమా కూడా తొలిరోజు కలెక్షన్లతో పాతిక వంతు రికవరీ సాధించింది.

మొత్తానికి అటు బింబిసార’ ఇటు ‘సీతారామం’.. రెండు సినిమాలు కూడా టాలీవుడ్ వాటి పై పేరుకున్న అంచనాలను అందుకుని విజయం సాధించి కొండంత అండగా నిలిచాయి.