తెలుగు చిత్ర పరిశ్రమలో ప్రస్తుత పరిస్తితిలో హీరోయిన్ల కొరత స్పష్టంగా కనిపిస్తుంది. ఇలాంటి సమయంలోనే హీరోయిన్ మృణాల్ ఠాకూర్ తొలి చిత్రం సీతారామంతో అద్భుతమైన స్పందనను అందుకుంది. ఈ సినిమా విజయంతో ఇప్పుడు మృణాల్ తెలుగు ఇండస్ట్రీలో మంచి క్రేజ్ ను సంపాదించుకుంది అని చెప్పవచ్చు.

ఒక్కోసారి సినిమా పరిశ్రమలో కేవలం ఒకే ఒక సినిమాతో దశ తిరిగి పోతుంది. స్టార్ స్టేటస్ దక్కాలి అంటే కొన్ని సార్లు ఒక్క సినిమా సరైన విధంగా ప్రభావం చూపితే చాలు. ప్రస్తుతం మృణాల్ ఠాకూర్ విషయంలో అదే జరిగింది.

దుల్కర్ సల్మాన్ తో కలిసి ఆమె చేసిన సీతారామం సినిమా అన్ని భాషల్లో కూడా మంచి స్పందనను సొంతం చేసుకుంటుంది. అంతే కాకుండా ఈ సినిమాలో ఆమె దుల్కర్ సల్మాన్ తో సమానంగా నటించింది అని చెప్పవచ్చు. ఆ పాత్రకు తగ్గట్టుగా మృణాల్ ఠాగూర్ నటించి ప్రేక్షకులు మరియు విమర్శకుల ప్రశంసలు అందుకున్నారు.

హీరో దుల్కర్ కూడా సీత పాత్రకి మృణాల్ తప్ప మరెవ్వరూ న్యాయం చేయలేరు అని కూడా అన్నారు. అయితే ఈ పాత్ర కోసం మొదట కొంతమంది హీరోయిన్లను సంప్రదించారట. కానీ రకరకాల కారణాల వలన ఆ హీరోయిన్లు ఎవరు కూడా ఈ పాత్రలో నటించడం కుదరలేదట. అయితే ఆ లిస్ట్ లో ప్రస్తుత నంబర్ వన్ హీరోయిన్ పూజా హెగ్డే పేరు వినిపిస్తుండటం విశేషం.

సీతా రామం సినిమాలో పూజా హెగ్డేను నటింప జేసెందుకు దర్శక నిర్మాతలు చాలా ప్రయత్నాలు చేశారట. అయితే కరోనా వేవ్ ల నేపథ్యంలో ఇతర సినిమాల షూటింగులు డేట్స్ తో బిజీగా ఉండటంతో పూజ హెగ్డే ఈ పాత్రను చేయలేక పోయారట. డేట్స్ అడ్జస్ట్ చేయకపోవడం వల్ల ఈ అవకాశాన్ని వదులుకోవల్సి వచ్చిందట.

అయితే సీతారామం సినిమాలో నటించిన మృణాల్ ఠాగూర్ మాత్రం సీత పాత్రకు 100% న్యాయం చేసి తన ప్రతిభను నిరూపించుకుంది.. మరి ఈ క్రమంలోనే చక్కని ఆరంభాన్ని సద్వినియోగం చేసుకుని స్టార్ హీరోలతో కూడా నటించే అవకాశాలు దక్కించుకోవాలి అని కోరుకుందాం.

దుల్కర్ సల్మాన్, మృణాల్ ఠాకూర్ జంటగా నటించిన అందమైన ప్రేమకథా చిత్రం ‘సీతారామం’. మంచి అంచనాల మధ్య విడుదలైన ఈ సినిమా తొలి రోజు నుంచే అద్భుతమైన స్పందనను సొంతం చేసుకుని అటు విమర్శకుల ప్రశంసలు, ఇటు బాక్స్ ఆఫీస్ వద్ద చక్కని కలెక్షన్లు రాబడుతోంది.

దుల్కర్ సల్మాన్.. ఈ పేరును తెలుగు ప్రేక్షకులకి ప్రత్యేకంగా పరిచయం చేయాల్సిన అవసరం లేదు. దుల్కర్ ఇది వరకే తెలుగులో నాగ్ అశ్విన్ దర్శకత్వంలో వచ్చిన సావిత్రి బయోపిక్‌ మహానటిలో నటించారు. ఈ సినిమాలో ఆయన జెమిని గణేషన్‌ పాత్రలో అద్భుతంగా నటించి మెప్పించారు. మలయాళ సూపర్ స్టార్ మమ్ముట్టి తనయుడిగా వెండితెరకు పరిచయమైన దుల్కర్ సల్మాన్ అనతికాలంలోనే హీరోగా తనకంటూ ఓ ప్రత్యేకతను సంపాదించుకున్నారు. ఇక సీతా రామంతో మరో చక్కని సినిమాను తన ఖాతాలో జమ చేసుకున్నారు.

హను రాఘవపూడి తెరకెక్కించిన ఈ సినిమా ఒక దృశ్య కావ్యంలా మలచబడింది. నటీనటుల ప్రతిభతో పాటు అహ్లాదకరమైన విజువల్స్, వీనుల విందైన సంగీతం తోడై ఈ సినిమాని క్లాసిక్ స్థాయిలో నిలబెట్టాయి.’ యుద్ధంతో రాసిన ప్రేమకథ` అని ట్యాగ్ లైన్ తో తెరకెక్కిన ఈ సినిమాని వైజయంతీ మూవీస్ సమర్పణలో స్వప్న సినిమా బ్యానర్ పై అగ్ర నిర్మాత నిర్మాత సి. అశ్వనీదత్ అత్యంత ప్రతిష్టాత్మకంగా నిర్మించారు. బాలీవుడ్ నటి/మోడల్ మృణాల్ ఠాకూర్ ఈ చిత్రంతో తెలుగులో హీరోయిన్ గా పరిచయం కాగా.. కీలక పాత్రలో నేషనల్ క్రష్ రష్మిక మందన్న నటించారు. భారీ అంచనాల మధ్య శుక్రవారం విడుదలైన ఈ సినిమా ఫస్ట్ డే ఫస్ట్ షో తోనే మంచి టాక్ ని సొంతం చేసుకుని సూపర్ హిట్ చిత్రంగా నిలిచింది.

ప్రతి షోకి ప్రతి రోజుకూ కలెక్షన్ల పరంగా ఎదుగుదలను కొనసాగిస్తూ విజయపథంలో దూసుకు పోతున్న ఈ సినిమా మరో అరుదైన రికార్డును సొంతం చేసుకుంది. క్లాస్ సినిమాలకు పెద్ద పీట వేసే US బాక్స్ ఆఫీస్ వద్ద హాఫ్ మిలియన్ డాలర్ల ($500k) మార్కును దాటింది. ఈ చిత్రంతో పాటు రిలీజ్ అయిన బింబిసార కంటే యూఎస్ లో అధికంగా వసూళ్లు కొల్లగొట్టింది సీతా రామం. నాని నటించిన అంటే సుందరానికీ.చిత్రం తరువాత ఈ ఘనత సాధించిన తొలి తెలుగు చిత్రంగా నిలిచింది.

నందమూరి కళ్యాణ్ రామ్ కథానాయకుడిగా నటించిన తాజా చిత్రం ‘బింబిసార’. నూతన దర్శకుడు మల్లిడి వశిష్ట దర్శకత్వం వహించిన ఫాంటసీ కమ్ టైం ట్రావెల్ కాన్సెప్ట్ సినిమా ఎన్నో అంచనాల మధ్య ఈ వారం విడుదల అయి అధ్భుతమైన స్పందనను రబట్టుకుంది.

బాక్సాఫీస్ వద్ద తనదైన ఆధిపత్యాన్ని చూపిస్తూ.. తిరుగులేని రారాజు తరహాలో నిలిచింది. గత కొంత కాలంగా సరైన విజయం లేకుండా తెలుగు సినీ పరిశ్రమ చాలా కష్ట కాలంలో ఉన్న పరిస్థితుల్లో.. బింబిసార అసలు సిసలైన బ్లాక్ బస్టర్ ను అందించింది. అటు క్లాస్ ప్రేక్షకులు ఇటు మాస్ ప్రేక్షకులు, మరియు ఫ్యామిలీ ప్రేక్షకులు అందరూ ఈ చిత్రానికి బ్రహ్మరథం పట్టారు. ముఖ్యంగా ఆన్లైన్ టికెటింగ్, భారీ రిలీజ్ ల వల్ల థియేటర్ల వద్ద హౌజ్ ఫుల్ బోర్డులు పెట్టడం పెద్ద సినిమాలకే తొలి రోజు తప్ప పెద్దగా సాధ్య పడట్లేదు. అలాంటిది బింబిసార చిత్రం రెండో రోజు, మూడో రోజు కూడా థియేటర్ల వద్ద హౌస్ ఫుల్ బోర్డులు ఉంచే స్థాయిలో ఆడుతుంది. ఇది కేవలం ఎగ్జిబిటర్లకే కాదు సినీ ప్రేమికులకు కూడా ఎంతో ఆనందాన్ని ఇచ్చే విషయం.

అందరికీ లాభాలు అందించే దిశగా పయనిస్తున్న ఈ చిత్రం కేవలం మూడు రోజుల్లో బ్రేక్ ఈవెన్ మార్కును దాటి ప్రాఫిట్ జోన్‌ లోకి ఎంటర్ అయ్యింది. డిస్ట్రిబ్యూటర్లు అందరూ ఈ సినిమా వల్ల సంతోషంగా ఉన్నారు. అంతే కాదు… నిర్మాత హరికృష్ణ .కె, హీరోను కలిసి ఒక విందు ఏర్పాటు చేసి తమ సంతోషాన్ని పంచుకున్నారట.తెలుగు రాష్ట్రాల్లో ఫస్ట్ వీకెండ్ అంటే సినిమా విడుదలైన మూడు రోజుల్లోనే ‘బింబిసార’ 15 కోట్లకు పైగా షేర్ వసూలు చేయడం విశేషం. ఈ సినిమాకి జరిగిన బిజినెస్ కూడా అంతే. అంటే ఇప్పటికే పెట్టుబడిని తెచ్చేసినట్లు.. ఇకపై వచ్చేవి అన్నీ లాభాలే.

100 శాతం రికవరీ చేసిన బింబిసార కళ్యాణ్ రామ్ కెరీర్ పరంగా చూస్తే… ఇంతకు ముందు ఆయనకు అత్యుత్తమ విజయం అందించిన పటాస్ సినిమాని దాటేసి ఆయన కెరీర్ లోనే భారీ హిట్ గా నిలిచింది. కల్యాణ్ రామ్ బాక్సాఫీస్ వద్ద ఇంత భారీ బ్లాక్ బస్టర్ కొట్టడంతో కేవలం నందమూరి అభిమానులు మాత్రమే కాకుండా పంపిణీదారులు మరియు సినీ ప్రేమికులు, పరిశ్రమ వర్గాలు కూడా చాలా సంతోషంగా ఉన్నారు.

2022లో విడుదలై విజయం సాధించిన సినిమాల్లో ‘డీజే టిల్లు’ సినిమా ఒకటి. చిన్న సినిమాగా వచ్చి సూపర్ ఎంటర్టైనర్ గా నిలిచింది. టైటిల్ రోల్ లో సిద్ధు జొన్నలగడ్డ అద్భుతంగా నటించి తనదైన ఎనర్జీతో ఆకట్టుకున్నారు. డీజే టిల్లు చిన్న సినిమాగా విడుదలై భారీ విజయాన్ని నమోదు చేసుకుంది. అంతే కాకుండా నిర్మాతలకు రెండింతల లాభాలు తీసుకొచ్చింది. ఈ సినిమాతో యువ హీరో సిద్ధూ జొన్నలగడ్డకి మంచి బ్రేక్ వచ్చింది. తెరపై సిద్ధూ తన పెర్ఫార్మన్స్ తో ఆకట్టుకుంటే ఆ పనితనాన్ని రాబట్టుకుని తన దర్శకత్వ ప్రతిభతో ఆకట్టుకున్నారు విమల్ కృష్ణ.

‘డీజే టిల్లు’ సినిమాకు దర్శకత్వ బాధ్యతతో పాటు రచయితగా కూడా పని చేశారు విమల్ కృష్ణ. ఈ సినిమాతో తన ప్రతిభను నిరూపించుకున్న విమల్ కృష్ణకి డీజే టిల్లు విజయం తరువాత హీరోలు, నిర్మాతల నుంచి పిలుపు వచ్చిందని తెలుస్తోంది. ఈ యువ దర్శకుడిని పిలిపించుకొని మరీ కథను వింటున్నారట హీరోలు, నిర్మాతలు.

ఇటీవల విమల్ కృష్ణ నాగచైతన్యను కలిసి కథ వినిపించారని తెలిసింది. విమల్ చెప్పిన కథ చైతన్యకి బాగా నచ్చిందట.ప్రస్తుతం చైతన్య – విమల్ కృష్ణల మధ్య కథా చర్చలు సాగుతున్నట్లు సమాచారం. ఒక్కసారి కథ ఓకే అయిపోతే ప్రీ ప్రొడక్షన్ పనులు మొదలుపెట్టాలని చూస్తున్నారట. కానీ ప్రస్తుతం నాగ చైతన్య షెడ్యూల్ చాలా బిజీగా ఉంది.

‘థాంక్యూ’ సినిమా విడుదలైన తరువాత పరశురామ్ పెట్లతో ఓ సినిమా చేయనున్న విషయం తెలిసిందే. అలానే బొమ్మరిల్లు భాస్కర్ తో కూడా ఒక సినిమా ఉంటుందని సమాచారం. వీటితో పాటు మరో రెండు, మూడు కథలను కూడా చైతన్య ఎంపిక చేశారట. వీటన్నింటి మధ్య విమల్ కృష్ణతో సినిమా ఎలా సర్దుబాటు చేస్తారో చూడాలి.

థాంక్యూ లాంటి డిజాస్టర్ తరువాత మళ్ళీ గట్టి హిట్ కొట్టాలని నాగ చైతన్య బలమైన సంకల్పంతో ఉన్నారు. వరుస విజయాలతో ఉన్న సమయంలో థాంక్యూ చిత్రం నాగ చైతన్యను తీవ్రంగా నిరాశ పరిచింది. మరి చక్కని కథలతో మరియు పాత్రలతో తిరిగి ప్రేక్షకులని ఆకట్టుకుని నాగ చైతన్య తిరిగి విజయాలు సాధిస్తారని ఆశిద్దాం.