గత కొన్ని నెలలుగాగా కాస్త అయోమయంలో ఉన్న తెలుగు సినిమా పరిశ్రమకు ఆగస్ట్ నెల తిరిగి మంచి రోజులు తీసుకు వచ్చింది. కాగా ఆగస్టు రెండో వారం..వారాంతంలో స్వాతంత్ర్య దినోత్సవ సెలవుల నుండి వీలయినంత లాభాలను పొందాలనే ఉద్దేశ్యంతో రెండు సినిమాలైన మాచర్ల నియోజకవర్గం, కార్తీకేయ-2, మరియు బాలీవుడ్ డబ్బింగ్ చిత్రాలు విడుదలయ్యాయి. అందులోమొదటగా, అమీర్ ఖాన్ నటించిన లాల్ సింగ్ చడ్డా విడుదలై ఎవరూ ఊహించని భారీ డిజాస్టర్ గా నిలిచింది. కాగా ఈ చిత్రంలో అక్కినేని నాగ చైతన్య ఉన్నప్పటికీ.. సినిమా తెలుగు రాష్ట్రాల్లోని ప్రేక్షకుల పై ఎలాంటి ఎటువంటి ప్రభావాన్ని సృష్టించలేకపోయింది.

శుక్రవారం విడుదల అయిన మాచర్ల నియోజకవర్గం తొలిరోజు వరకూ బాక్స్ ఆఫీసు వద్ద పర్వాలేదు అనిపించినప్పటికీ.. రెండో రోజు నుండి అనూహ్యంగా క్రాష్ అయ్యి డిజాస్టర్ వైపు పయనిస్తోంది. నితిన్ హీరోగా నటించిన ఈ సినిమాకి ఎం ఎస్ రాజశేఖర రెడ్డి దర్శకత్వం వహించారు. కృతి శెట్టి, కాథరిన్ త్రెసా హీరోయిన్లుగా నటించారు. ప్రముఖ నటి అంజలి తో ఐటెం సాంగ్ చేయించి విస్తృతంగా ప్రచారం చేసినా లాభం లేకుండా పోయింది.

ఇక శనివారం విడుదలైన నిఖిల్ కార్తికేయ 2 అద్భుతమైన టాక్ ను తెచ్చుకుని బాక్స్ ఆఫీస్ వద్ద సూపర్ స్ట్రాంగ్ గా ఉండటమే కాక 3 రోజుల్లో బ్రేక్ ఈవెన్ మార్కును సాధించే దిశగా దూసుకు పోతుంది. అంతే కాకుండా ఈ చిత్రం హిందీ వెర్షన్ కూడా విశేషమైన స్పందనను తెచ్చుకుని ఉత్తరాది ప్రేక్షకుల ఆదరణ పొందుతోంది. సినిమాకు వస్తున్న ఆదరణ చూసి రోజు రోజుకూ అదనపు స్క్రీన్‌లు జోడించబడుతున్నాయి.

గత వారం విడుదలైన బింబిసార మరియు సీతా రామం సినిమాలు ఈ వారాంతంలో కూడా తమ లాంగ్ రన్ ను కొనసాగిస్తూ మంచు ప్రదర్శన కనబర్చాయి. ఈ రెండు తెలుగు సినిమాలు ఈ వారాంతంలో తెలుగు రాష్ట్రాల్లో దాదాపు రూ. 3 కోట్ల షేర్ వసూలు చేయడం విశేషం. కార్తికేయ 2, బింబిసార, మరియు సీతా రామం మూడు చిత్రాలు ఘన విజయం సాధించి ఎగ్జిబిటర్లకు, మరియు ట్రేడ్ వర్గాలకు సంతోషాన్ని ఇచ్చాయి.

ఇప్పుడు విజయ్ దేవరకొండ – పూరి జగన్నాథ్ కాంబినేషన్లో భారీ హైప్ తో వస్తున్న లైగర్ ఆగస్ట్ 25న విడుదల కానుండడంతో, టాలీవుడ్ తన విజయపంథాను కొనసాగించి మరిన్ని లాభాలను అర్హిస్తుందని ట్రేడ్ వర్గాలు ఆశిస్తున్నాయి.

ప్రస్తుతం తెలుగు సినీ పరిశ్రమకు మహర్దశ అయినట్లుగా అన్ని సినిమాలు వరుస పెట్టి విజయాలు సాధిస్తున్నాయి. ఆగస్ట్ 5న విడుదలైన కళ్యాణ్ రామ్ సినిమా బింబిసార.. పది రోజుల తరువాత కూడా బాక్స్ ఆఫీసు వద్ద అద్భుతమైన రన్‌ను కొనసాగిస్తుంది. అంతే కాకుండా పదవ రోజున కోటి రూపాయల పైనే వసూలు చేసింది. ఇంతటి అద్భుతమైన ప్రదర్శనతో పాటు ఎన్నో ప్రశంసలను సంపాదించుకున్న బింబిసార చిత్రం అందుకు నిజంగానే అర్హత ఉన్న సినిమాగా చెప్పవచ్చు. ఎందుకంటే ఈ వారం మాచర్ల నియోజకవర్గం మరియు కార్తికేయ 2 రూపంలో రెండు కొత్త సినిమాలు విడుదల అయ్యాయి. వాటిని తట్టుకుని నిలబడటం అంటే అది ఖచ్చితంగా సామాన్యమైన విషయం కాదు.

ఇక 10 రోజుల తర్వాత, కళ్యాణ్ రామ్ బింబిసార సినిమా కలెక్షన్లు ఎలా ఉన్నాయి అంటే.. ప్రపంచ వ్యాప్తంగా 28.5 కోట్ల రూపాయల భారీ షేర్ ను వసూలు చేసింది. అంతే కాకుండా ఈ సినిమా వ్యాపారంలో భాగమైన అందరికీ లాభదాయకంగా మారింది. ఈ సినిమా థియేట్రికల్ రైట్స్ 15 కోట్ల రూపాయలకు జరుపుకుంది. ఆ రకంగా చూసుకుంటే మొదటి వారంలోనే బ్రేక్ ఈవెన్ సాధించింది.

ఇక బింబిసార సినిమా భారీ విజయం సాధించడంతో.. హీరో నందమూరి కళ్యాణ్ రామ్ పార్ట్ 2ను కూడా ప్రేక్షకుల ముందుకు తీసుకు రావాలని నిర్ణయించుకున్నారు. 500 BC నేపథ్యంలో తెరకెక్కిన ఈ ఫాంటసీ యాక్షన్ చిత్రం బింబిసారుడి కథను ప్రేక్షకులకి చూపించింది, ఒక క్రూరమైన అధికార దాహంతో ఉన్న రాజు ఎలా ఒక మంచు మనిషిగా మారాడు అనేది ఈ చిత్ర కథ. ఫాంటసీ డ్రామాతో పాటు టైం ట్రావెల్ వంటి ఆసక్తికర అంశాలతో తెరకెక్కిన ఈ సినిమావిమర్శకుల ప్రశంసలతో పాటు అద్భుతమైన ఆదరణను పొందింది.

నూతన దర్శకుడు మల్లిడి వశిష్ట్ దర్శకత్వం వహించిన ఈ చిత్రంలో కేథరిన్ థ్రెసా, సంయుక్తా మీనన్ హీరోయిన్లుగా నటించగా.. వివాన్ భటేనా కీలక విలన్ పాత్రలో నటించారు. కళ్యాణ్ రామ్ సొంత బ్యానర్ ఎన్టీఆర్ ఆర్ట్స్ బ్యానర్ పై ఈ సినిమాని నిర్మించగా.. ఎంఎం కీరవాణి సంగీతం అందించారు.

నిఖిల్ సిద్దార్థ్ కథానాయకుడిగా నటించిన తాజా సినిమా ‘కార్తికేయ 2’. ఈ సినిమా విడుదల విషయంలో తెర మీద సినిమాలో జరిగే తరహాలో ట్విస్ట్ లు జరిగి పలుమార్లు వాయిదా పడిన తర్వాత ఈ శనివారం థియేటర్లలోకి వచ్చింది. అయితే సినిమా విడుదలైంది. కానీ, ఆశించిన స్థాయిలో థియేటర్లు లభించలేదు. తక్కువ సంఖ్య ధియేటర్లలో విడుదల అయినప్పటికీ… ఎవరూ ఊహించని స్థాయిలో వసూళ్లు సాధించింది.

కార్తికేయ 2′ సినిమాకు తొలి రోజు ప్రపంచవ్యాప్తంగా దాదాపు రూ. 8 కోట్ల గ్రాస్ లభించగా.. దాదాపు 5 కోట్ల షేర్ వచ్చినట్లు ట్రేడ్ వర్గాల సమాచారం. ఒక టైర్ 2 హీరో నిఖిల్‌కు ఇది చాలా భారీ స్థాయి ఓపెనింగ్ అనే చెప్పాలి. తెలుగు రాష్ట్రాల్లో అటు ఓవర్సీస్ లో కూడా ఈ సినిమా మంచి వసూళ్లు సాధించింది.

ఆ రకంగా చూసుకుంటే “కార్తికేయ 2″సినిమా తొలి రోజే బడ్జెట్ లో 35 శాతం రికవరీ చేసినట్లు ట్రేడ్ వర్గాల నుంచి అందించిన సమాచారం. ఇక ఈ వారం విడుదలైన మాచర్ల నియోజకవర్గం, మరియు హిందీ చిత్రాలైన లాల్ సింగ్ చద్దా, రక్షా బంధన్ సినిమాలకు నెగిటివ్ టాక్ రావడంతో కార్తీకేయ 2 సినిమాకు ఎదురే లేకుండా పోయింది. శనివారం రాత్రి కొన్ని ఏరియాల్లో ఎక్స్ట్రా స్క్రీన్లు, థియేటర్లు పెంచారు.

ఇక ఆదివారం అంటే ఈరోజు కూడా మార్నింగ్ షోలకు ప్రేక్షకులు భారీ ఎత్తున తరలి వచ్చారు. అదే కాక అంతకు మించిన విశేషం ఏమిటంటే.. తెలుగు రాష్ట్రాల్లో చాలా చోట్ల కార్తీకేయ 2 చిత్రానికి పొద్దున 8-9 గంటల సమయంలో అదనపు షోలు వేయగా అవి కూడా హౌజ్ ఫుల్ అయ్యాయి. దాన్ని బట్టి ఈ చిత్రానికి ప్రేక్షకుల్లో ఎంత ఆదరణ ఉందో అర్థం అవుతుంది.

ఇక ఈ కలెక్షన్ల వరస చూస్తుంటే కార్తీకేయ 2 సినిమా బాక్స్ ఆఫీసు వద్ద ఫుల్ రన్ పూర్తయ్యే సినిమాకి ప్రపంచ వ్యాప్తంగా 30 కోట్ల షేర్ ను సాధిస్తుందని ట్రేడ్ వర్గాలు అంచనా వేస్తున్నాయి. పైగా రేపు సోమవారం (ఇండిపెండెన్స్ డే హాలిడే) సెలవు రోజు కావడంతో మొదటి మూడు రోజుల్లో అత్యధిక వసూళ్లు రాబట్టే అవకాశం ఉంది. 

చందూ మొండేటి దర్శకత్వం వహించిన ‘కార్తికేయ 2’లో నిఖిల్ సరసన అనుపమా పరమేశ్వరన్ కథానాయికగా నటించారు. శ్రీనివాస రెడ్డి ‘వైవా’ హర్ష సహాయక పాత్రలలో కనిపించారు. ఆదిత్యా మీనన్, తులసి, ప్రవీణ్, సత్య తదితరులు ఇతర పాత్రల్లో నటించారు. ఒక కీలక అతిధి పాత్రలో బాలీవుడ్ నటుడు అనుపమ్ ఖేర్ నటించారు. ఈ చిత్రాన్ని పీపుల్స్ మీడియా ఫ్యాక్ట‌రీ, అభిషేక్ అగ‌ర్వాల్ ఆర్ట్స్ పతాకాలపై టీజీ విశ్వ‌ప్ర‌సాద్, అభిషేక్ అగ‌ర్వాల్ సంయుక్తంగా నిర్మించారు. తెలుగుతో పాటు హిందీలో ఉత్తరాది ప్రేక్షకుల నుంచి కూడా సినిమాకు మంచి స్పందన లభిస్తోంది.