మెగాస్టార్ చిరంజీవి ఈ వేసవిలో ఆచార్య సినిమాతో ప్రేక్షకుల ముందుకు వచ్చిన సంగతి తెలిసిందే. అందులో మెగా పవర్ స్టార్ రామ్ చరణ్ కూడా ఒక కీలక పాత్ర పోషించగా,కొరటాల శివ దర్శకత్వంలో వచ్చిన ఈ సినిమా బాక్స్ ఆఫీస్ వద్ద బోల్తా పడడమే కాకుండా బిగ్గెస్ట్ డిజాస్టర్ గా నిలిచింది.ఈ పరాభవంతో అటు అభిమానులు తీవ్ర నిరాశ చెందారు.అటు చిరంజీవి కూడా ఈ ఫలితంతో దిగ్భ్రాంతికి గురయ్యారు. అందుకే తరువాత చేయబోయే సినిమాల తీరుతెన్నులు జాగ్రత్తగా చూసుకునే పనిలో ఉన్నారట. ప్రస్తుతం ఆయన చేతిలో మూడు సినిమాలు ఉన్నాయి. ఒకటి మలయాళం లో మోహన్ లాల్ హీరోగా నటించిన లూసిఫర్ చిత్రానికి రీమేక్ గా వస్తున్న గాడ్ ఫాదర్.. ఈ సినిమాని తమిళ హిట్ డైరెక్టర్ మోహన్ రాజా తెరకెక్కిస్తుండగా,మరో సినిమా భోళా శంకర్ (తమిళ సూపర్ హిట్ వేదాలం రీమేక్) కి మెహర్ రమేష్ దర్శకత్వం వహిస్తున్నాడు. మూడో సినిమాకి బాబీ దర్శకుడు కాగా టైటిల్ ఇంకా అధికారికంగా ఖరారు కాలేదు.

ఈ మూడు సినిమాల్లో మొదటగా వచ్చేది గాడ్ ఫాదర్. దసరా కానుకగా విడుదల చేయాలని నిర్మాతలు అన్ని సన్నాహాలు చేస్తున్నారు. మలయాళ వెర్షన్ లో పృథ్వీరాజ్ చేసిన పాత్రను తెలుగులో బాలీవుడ్ సూపర్ స్టార్ సల్మాన్ ఖాన్ చేయనున్నారు.

ఇటీవలే ఫస్ట్ లుక్ కి సంభందించిన వివరాలు కూడా వచ్చాయి. అయితే ఈ చిత్రం తాలూకు రషెస్ చూసిన చిరంజీవి,మోహన్ రాజా పనితనాన్ని మెచ్చుకున్నారు అని సమాచారం. సినిమా చాలా బాగా వచ్చిందని,ఖచ్చితంగా సూపర్ హిట్ అయి తనకి కమ్ బ్యాక్ సినిమాగా నిలుస్తుందని చిరంజీవి ధీమాగా ఉన్నారట. మలయాళం వెర్షన్ తో పోలిస్తే తెలుగు ప్రేక్షకులకు నచ్చేలా కథలో చాలా మార్పులు చేశారట.

స‌మ‌్మర్ సోగ్గాళ్లుగా థియేటర్స్ ముందుకు వచ్చిన F3 సినిమా, అంచనాలకు తగ్గట్టే ప్రేక్షకులను నవ్వించింది.F2 సినిమాకు సీక్వెల్‌గా వచ్చిన ఈ సినిమా..మొదటి రోజు విమర్శకులు పెదవి విరిచినా .. కలెక్షన్లు అనుకున్న దాని కంటే ఎక్కువ స్థాయిలోనే రాబట్టింది. మే 27న విడుదలైన ఎఫ్3 సినిమాకు F2 ఫ్రాంచైజ్ ప్రేక్షకుల నుంచి చక్కని స్పందన వచ్చింది. ముఖ్యంగా ఫ్యామిలీ ఆడియన్స్ థియేటర్లకు క్యూ కట్టడం విశేషం. అనిల్ రావిపూడి డైరెక్షన్‌లో తెరకెక్కిన ఈ సినిమాలో త‌మ‌న్నా, మెహ‌రీన్ హీరోయిన్లుగా నటించారు. సోనాల్ చౌహాన్, మురళీ శర్మ, రాజేంద్రప్రసాద్, అలీ, సునీల్ ఇతర పాత్రల్లో నటించారు.

అలాగే ఎఫ్3 మూవీని థియేటర్లలో చూడలేని వారు ఓటీటీ రిలీజ్ డేట్ కోసం ఎదురు చూస్తున్నారు. అయితే ఈ సినిమా ఓటీటీ విడుదల తేదీపై చిత్ర బృందం ప్రచార సమయంలోనే స్పష్టత ఇచ్చింది.ఈ విషయం మేరకు సినిమా రిలీజ్ అయిన కొద్ది రోజులకు హీరోలు వెంకటేష్,వరుణ్‌ తేజ్‌, డైరెక్టర్ అనిల్ రావిపూడి దీనికి సంబంధించి ఓ వీడియోను విడుదల చేశారు.

ఆ వీడియోలో ఎఫ్3 సినిమాను థియేటర్లలో చూడకపోయినా, నాలుగు వారాల్లో ఓటీటీలో వస్తాదిలే అనుకున్నారు కదా’ అని వరుణ్ తేజ్ అడగ్గా.. ‘ఇట్స్ నాట్ కమింగ్ అమ్మా.. నాలుగు వారాల్లో రాదామ్మా.. ఎనిమిది వారాల తరువాతే వస్తుందమ్మా..’ అని వెంకటేష్ బదులు చెప్పినట్టు ఒక సరదా కార్యక్రమం లాగా ఆ వీడియోను ఉపయోగించుకున్నారు.

అయితే ప్రేక్షకులకు ఇచ్చిన మాట మీద F3 చిత్ర యూనిట్ నిలబెట్టుకున్నారు. సరిగ్గా సినిమా థియేటర్లలో విడుదలైన ఎనిమిది వారాలకు OTTలో F3 సినిమా వస్తుంది. సోనీలైవ్(sonyliv)యాప్ లో జూలై 22న స్ట్రీమింగ్ (streaming)కి సిద్ధంగా ఉంది.

న‌ట‌నకు ప్రాధాన్య‌మున్న పాత్ర‌ల‌ను ఎంచుకుంటూ ద‌క్షిణాదిన ప్ర‌త్యేక గుర్తింపు తెచ్చుకుంటున్న న‌టి సాయి ప‌ల్ల‌వి. ప్ర‌స్తుతం ఈమెకు స్టార్ హీరోకు ఉన్నంత క్రేజ్ ఉంది. గ్లామ‌ర్‌కు అతీతంగా మంచి పాత్ర‌లు పోషిస్తూ ఫ్యామిలీ ఆడియెన్స్‌కు ద‌గ్గ‌రయ్యారు.ఇటీవ‌లే ‘విరాట‌ప‌ర్వం’తో మ‌రోసారి త‌న న‌ట‌న‌తో ప్రేక్ష‌కుల‌ను ఆకట్టుకున్నారు. ఆ సినిమా బాక్స్ ఆఫీస్ వద్ద పరాజయం చవి చూసినా సాయి పల్లవి నటనకు గాను ప్రశంసలు అందుకున్నారు.

ఇదిలా ఉండగా సాయి పల్లవి తాజాగా నటించిన చిత్రం ‘గార్గి’.త్రిభాషా చిత్రంగా(తెలుగు, తమిళం, కన్నడ) చిత్రంగా రూపొందిన ఈ చిత్రం గౌతమ్‌ రామచంద్రన్‌ దర్శకత్వంలో లేడీ ఓరియెంటెడ్‌గా ఈ చిత్రం తెరకెక్కింది.

ఇటీవలే సాయి పల్లవి పుట్టినరోజు సందర్భంగా విడుదల చేసిన ఫస్ట్ లుక్ కి చక్కని స్పందన లభించింది.ఈ సినిమాని త‌మిళంలో 2డీ ఎంట‌ర్టైన‌మెంట్స్ బ్యాన‌ర్‌పై హీరో సూర్య, జ్యోతిక విడుద‌ల చేస్తున్నారు. తమిళంతో పాటు తెలుగు, క‌న్న‌డ భాష‌ల్లో ఈ చిత్రం విడుద‌ల కానుంది. ’96’ ఫేం గోవింద్ వ‌సంత్ సంగీతం అందించిన ఈ చిత్రాన్ని ర‌విచంద్ర‌న్,ఐశ్వర్య లక్ష్మీ,థామస్ జార్జ్ సంయుక్తంగా నిర్మిస్తున్నారు.

తాజాగా గార్గి సినిమాకు సంభందించిన కొత్త అప్డేట్ వచ్చింది. జూలై 15న ఈ చిత్రాన్ని విడుదల చేయబోతున్నట్లు స్వయంగా సాయి పల్లవి ట్విట్టర్ ద్వారా వెల్లడించారు. వరుస సినిమాలతో,చక్కని పాత్రలతో పాటు అద్భుతమైన నటనతో ప్రేక్షకులను ఆకట్టుకుంటున్న సాయి పల్లవి..”గార్గి” ద్వారా మరో విజయం సాధించాలని కోరుకుందాం.

అర్జున్ సురవరం సినిమా తరువాత మూడేళ్లు గ్యాప్‌ తీసుకున్న యంగ్‌ హీరో నిఖిల్ ఈ ఏడాది ఆసక్తికరమైన సినిమాతో వస్తున్నాడు. ఇదే కాక ఆ పై నిఖిల్‌ వరుస సినిమాలను సిద్ధం చేశాడు. ప్రస్తుతం అతడి చేతిలో నాలుగు సినిమాలు ఉన్నాయి అందులో ‘కార్తికేయ-2’ ఒక‌టి. చందు ముండేటి ద‌ర్శ‌క‌త్వం వ‌హించిన ఈ చిత్రం ‘కార్తికేయ’ చిత్రానికి సీక్వెల్‌గా తెర‌కెక్కింది. 2014లో వ‌చ్చిన‌ ‘కార్తికేయ’ ఎంత పెద్ద విజ‌యం సాధించిందో అంద‌రికి తెలిసిందే.

చిన్న బడ్జెట్‌తో తెరకెక్కిచన ఆ చిత్రం ఊహించని క‌లెక్ష‌న్లు సాధించి బ్లాక్ బ‌స్ట‌ర్ హిట్‌గా నిలిచింది. దాదాపు ఎనిమిదేళ్ళ తరువాత ఈ చిత్రానికి సీక్వెల్‌గా కార్తీకేయ 2 రాబోతోంది. ఇటీవల ఈ మూవీ నుంచి విడుదలైన టీజర్‌/ట్రైలర్ లకుప్రేక్షకుల నుంచి మంచి స్పందన వస్తోంది. ఇక జూలై 22న ప్ర‌పంచ‌ వ్యాప్తంగా విడుదల కానున్న ఈ సినిమాకు సంబంధించి ఓ ఆసక్తికర అప్‌డేట్‌ బయటకు వచ్చింది. ఇప్పటికే విడుదలైన ఈ మూవీ పోస్టర్స్‌,ప్రోమోలకు వస్తున్న రెస్పాన్స్‌ చూస్తుంటే సినిమాపై భారీ అంచనాలు నెలకొన్నట్లు కనిపిస్తుంది.

ఈ నేపథ్యంలో ఈ చిత్రం గురించిన ఓ కొత్త వార్త తెర పైకి వచ్చింది.జూలై 22న విడుదలకు సిద్ధమైన కార్తికేయ 2 ఇప్పుడు ఆ తేదీన రాకపోవచ్చని తెలుస్తుంది.కరోనా వల్ల ఇప్పటికే చాలా సినిమాలు ఒకటికి రెండు సార్లు వాయిదా పడిన విషయం తెలిసిందే. ఆ క్రమంలోనే అగ్ర నిర్మాత దిల్ రాజు నిర్మిస్తూ అక్కినేని నాగ చైతన్య హీరోగా నటిస్తున్న థాంక్యూ సినిమా జూలై 8 నుండి 22 కు విడుదలను వాయిదా వేసింది.

అందువల్ల ఓకే రోజు రెండు సమానమైన హీరోల సినిమాలు విడుదలైతే ఇబ్బందులు ఎదురవుతాయని కార్తికేయ 2 సినిమా విడుదలను వాయిదా వేసే ఆలోచనలో ఉన్నట్టు తెలుస్తుంది. ఈ మేరకు జూలై 22 కాకుండా ఆగస్టు రెండో వారంలో కార్తికేయ 2 విడుదల కావచ్చని భావిస్తున్నారు. అయితే ఈ విషయంపై ఇంకా అధికారికంగా ఖరారు అవకపోయినా ఈ వార్తదాదాపుగా నిజమేనని డిస్ట్రిబ్యూషన్ వర్గాలు అంటున్నాయి.

రెండు తెలుగు రాష్ట్రాలతో పాటు ప్రపంచ వ్యాప్తంగా ఈ చిత్రానికి 18 కొట్లకు పైగానే ఢీల్ కుదిరినట్లు సమాచారం. ఓ చిన్న హీరో సినిమాకు ఈ స్థాయిలో ఢీల్‌ కుదరమంటే సాధారణ విషయం కాదు. అనుప‌మ ప‌ర‌మేశ్వ‌ర‌న్ హీరోయిన్‌గా న‌టించిన ఈ చిత్రాన్ని పీపుల్స్ మీడియా ఫ్యాక్ట‌రి, అభిషేక్ అగ‌ర్వాల్ ఆర్ట్స్ బ్యాన‌ర్‌ల‌పై టి.జి. విశ్వ‌ప్ర‌సాద్, అభిషేక్ అగ‌ర్వాల్ సంయుక్తంగా నిర్మించారు. కాల భైర‌వ సంగీతం అందించిన‌ ఈ చిత్రం వచ్చే నెల తెలుగు, హిందీ, త‌మిళం, మ‌ల‌యాళ, క‌న్న‌డ‌ భాష‌ల్లో విడుద‌ల కానుంది.