యంగ్ రెబల్ స్టార్ ప్రభాస్ నటించిన ఆదిపురుష్ సినిమా షూటింగ్ ముగిసి చాలా నెలలు అవుతుంది. ప్రస్తుతం పోస్ట్ ప్రొడక్షన్ వర్క్ జరుపుతున్నారు. కాగా మోషన్ గ్రాఫిక్స్ వర్క్ కు కాస్త ఎక్కువ సమయం తీసుకుంటున్నట్లుగా చాలా రోజులుగా సమాచారం అందుతోంది. ఈ సినిమా విడుదల వచ్చే ఏడాది సంక్రాంతికి విడుదలయ్యేలా చిత్ర బృందం అన్ని ప్రయత్నాలు చేస్తున్నట్లుగా కూడా తెలుస్తోంది.

అయితే ఈ సినిమా యూనిట్ పై ప్రభాస్ అభిమానులు చాలా రోజులుగా కోపంతో ఉన్నారు. అందుకు కారణం లేకపోలేదు. గత రెండేళ్లుగా ఈ సినిమా నుంచి ఏదో ఒక అప్డేట్ కోసం ప్రభాస్ అభిమానులు ఎదురు చూస్తునే ఉన్నారు. కానీ సినిమా విడుదలకు చాలా సమయం ఉందంటూ ఫస్ట్ లుక్ మరియు టీజర్ విడుదలను ఇన్ని రోజుల వరకూ దర్శకుడు ఓమ్ రౌత్ వాయిదా వేస్తూ వచ్చారు. సినిమా నుంచి కనీసం ఒక పోస్టర్ అయినా విడుదల చేయలేదు అని ప్రభాస్ అభిమానులు చాలా అసహనంతో ఉన్నారు.

ఐతే ఎట్టకేలకు యంగ్ రెబల్ స్టార్ అభిమానులకు ఒక పెద్ద శుభవార్త రాబోతోంది. ఆదిపురుష్ టీజర్‌ను అక్టోబర్ 3వ తేదీన విడుదల చేయనున్నట్లు చిత్ర బృందం ప్రకటించింది. అలాగే టీజర్ రిలీజ్ నుంచి జనవరి 12న సినిమా రిలీజ్ అయ్యే వరకు ప్రచార కార్యక్రమాలు విస్తృత స్థాయిలో జరుగుతాయని కూడా ప్రకటించారు.

ఇదిలా ఉండగా.. ఈ సారి ఢిల్లీలో రావణ దహన కార్యక్రమాన్ని ప్రభాస్ చేతుల మీదుగా జరిపించాలని ఇప్పటికే ఆయనకు ఆహ్వానం కూడా అందింది. రామాయణాన్ని ఆధారంగా చేసుకొని దర్శకుడు ఓం రౌత్ ఆదిపురుష్‌ సినిమాను తెరకెక్కించారు. శ్రీరాముడిగా ప్రభాస్, సీతగా కృతి సనన్, రావణుడి పాత్రలో సైఫ్ అలీ ఖాన్ కనిపించనున్నారు. భూషణ్ కుమార్ ఈ చిత్రాన్ని నిర్మించారు.

ఈ చిత్రాన్ని భారీ ప్యాన్ ఇండియా సినిమా లాగా మాత్రమే కాకుండా.. ఇప్పటి వరకు ఇండియన్ సినిమాలో చూడని విజువల్ ఎఫెక్ట్స్ ఇందులో చూపించనున్నట్లు దర్శకుడు ఓం రౌత్ ప్రకటించారు. ఆదిపురుష్ టీజర్ సెప్టెంబర్ చివరి వారంలో రిలీజ్ అవనుందని ఇటీవలే కొందరు పుకార్లు పుట్టించారు. అయితే అక్టోబర్ 3నే టీజర్ రిలీజ్ కానున్నట్లు అధికారిక ప్రకటన వచ్చింది. శ్రీరాముడిగా ప్రభాస్‌ను తప్ప మరే హీరోను ఊహించుకోలేనని దర్శకుడు ఓం రౌత్ తన అభిప్రాయాన్ని వ్యక్తం చేశారు.

హీరో ప్రభాస్ కి పెదనాన్న కృష్ణంరాజుతో ఉన్న సాన్నిహిత్యం మరియు అనుబంధం గురించి అందరికీ తెలిసిందే. ఇండస్ట్రీలో ప్రభాస్ ని హీరోగా నిలబెట్టి తన కెరీర్ తీర్చిదిద్దిడంలో ఆయన పెదనాన్న కృష్ణంరాజు ముఖ్య పాత్ర పోషించారు. అంచెలంచెలుగా ఎదిగిన ప్రభాస్.. ప్రస్తుతం భారతదేశంలో గొప్ప హీరోలలో ఒకరుగా నిలిచారు. తెలుగు నుంచి తొలి పాన్ ఇండియా స్టార్ గా అగ్ర స్థానంలో ఉన్నారు. ఆయన మీద ఉన్న అభిమానంతో కృష్ణంరాజు గారికి ఉన్న రెబల్ స్టార్ బిరుదునే అభిమానులు ప్రేమతో ప్రభాస్ కి ఇచ్చారు.

కృష్ణంరాజు లేకపోయి ఉంటే ఈ ప్రభాస్ లేడని ఎన్నోసార్లు స్వయంగా చెప్పుకొచ్చారు ప్రభాస్. తన తండ్రి చనిపోయినప్పుడు ప్రభాస్ కృష్ణంరాజును పట్టుకొని ప్రభాస్ చిన్నపిల్లాడిలా ఏడ్చేశారు. కాగా ఆ సమయంలో నేను ఉన్నాను అని ధైర్యం చెప్పి అన్నీ తానై చూసుకున్నారు కృష్ణంరాజు. అలాంటి పెద్ద దిక్కు హఠాత్తుగా మూగబోవడంతో ప్రభాస్ ఒక్కసారిగా కుప్పకూలిపోయారు.

ఇన్ని రోజులూ తనకు అండగా ఉన్న పెద్ద దిక్కు ఇక నుంచి ఉండరని తెలియడంతో ఒక్కసారిగా ప్రభాస్ కన్నీటి పర్యంతమయ్యారు. ఆ పరిస్థితిలో కృష్ణంరాజు పార్థీవ దేహాన్ని సందర్శించేందుకు వచ్చిన వారికి ఎవరికి కూడా ప్రభాస్ ఏడుపును ఆపడం వల్ల కాలేదు. ఎంతమంది వచ్చి ఆయనను ఓదార్చాలని చూసినా ప్రభాస్ కంటి నుంచి కన్నీటి ధార ఆగలేదు.

అయితే ఇంతటి భాధాకరమైన పరిస్థితిలో కూడా ప్రభాస్ తన మంచి మనసుని చాటుకున్నారు. కృష్ణంరాజు గారి పార్థీవ దేహాన్ని సందర్శించేందుకు ప్రెస్, ప్రజలు మరియు ప్రభాస్ అభిమానులు కూడా భారీ ఎత్తున తరలి వచ్చారు. మరియు అలాంటి పరిస్థితిలో ప్రభాస్ వారికి ఆహారం ఏర్పాటు చేసారు, ఏర్పాట్లు మాత్రమే కాక ప్రతి ఒక్కరినీ పేరు పేరున భోజనం చేసి వెళ్లమని మరీ మరీ చేప్పారట. ఇది నిజంగా ప్రభాస్ యొక్క మంచి హృదయాన్ని చాటుతుందని, కేవలం పేరులో రాజు ఉండటం కాకుండా ఆయన ప్రవర్తన నిజంగా రాజు తరహాలో ఉందని అందరూ అంటున్నారు. కాగా ఆ సమయంలో అక్కడికి వెళ్ళని వారు.. ఇతరుల ద్వారా ఈ విషయం తెలుసుకుని ప్రభాస్ మనసున్న డార్లింగ్ అని ఆయన గురించి గొప్పగా చెప్పుకుంటున్నారు.

ఇక కృష్ణంరాజు మృతి వార్త తెలియగానే సినీ, రాజకీయ రంగాలకు చెందిన ప్రముఖులు సంతాపం తెలియజేసారు. ఆయన పార్థీవ దేహాన్ని హైదరాబాద్ జూబ్లీహిల్స్ లోని తమ ఇంటికి తరలించాక సినిమాటోగ్రఫీ మంత్రి తలసాని శ్రీనివాస యాదవ్ సహా పలువురు టాలీవుడ్ అగ్ర హీరోలు సందర్శించారు.

ఆ క్రమంలో మెగాస్టార్ చిరంజీవి- పవన్ కల్యాణ్- మహేష్- ఎన్టీఆర్- నాని తదితరులు ఉన్నారు. మురళీమోహన్- మోహన్ బాబు- దర్శకులు త్రివిక్రమ్- రాఘవేంద్రరావు తదితరులు కృష్ణంరాజుకు నివాళులర్పించారు. అనంతరం వీరంతా ప్రభాస్ తో పాటు ఆయన కుటుంబ సభ్యులను ఓదార్చారు.

టాలీవుడ్ లో అగ్ర నిర్మాతగా దిల్ రాజు కు మంచి పేరుంది. నిర్మాతగా, డిస్ట్రిబ్యూటర్ మరియు ఎగ్జిబిటర్ గా ఆయన ఎదుగుదల ఎందరికో ఆదర్శంగా నిలిచింది అని చెప్పడంలో ఎలాంటి సందేహం లేదు. పలు రంగాల్లో ఉండి విజయవంతంగా తన ప్రయాణాన్ని సాగిస్తూ వచ్చిన దిల్ రాజు ఇటీవలే పలు వివాదాలకు కేంద్రబిందువుగా మారారు. తెలుగు సినిమా నిర్మాతల గిల్డ్ తీసుకున్న నిర్ణయాలు వాటిని అమలు చేసిన తీరు కావచ్చు.. లేదా యువ హీరో నిఖిల్ నటించిన తాజా బ్లాక్ బస్టర్ హిట్ ‘కార్తికేయ 2’ రిలీజ్ విషయంలో ఆయన పై వచ్చిన కొన్ని పుకార్లు కావచ్చు.

ఇలా చాలా అనవసరమైన విషయాలలో సంబంధం ఉన్నా లేకున్నా ఆయనను చాలా మంది ప్రత్యక్షంగా మరియు పరోక్షంగా నిందించారు. అయితే కార్తీకేయ-2 సినిమా సక్సెస్ మీట్ లో ఆయన ఈ పుకార్లన్నటికీ సమాధానం చెప్పారు అనుకోండి. ఇక ఇలాంటి చవకబారు విషయాలను పట్టించుకోకుండా ఆయన తన పని తాను చేసుకుంటూ పోతున్నారు. ఆయన ప్రస్తుతం రెండు భారీ సినిమాలను నిర్మిస్తున్నారు.

RC-15 మరియు విజయ్ వరిసు రెండు సినిమాలు కూడా ప్రేక్షకులు అత్యంత ఆసక్తితో ఎదురుచూస్తున్న సినిమాలు. ఆర్‌సి 15 చిత్రానికి శంకర్ దర్శకత్వం వహిస్తుండగా, వంశీ పైడిపల్లి దర్శకత్వం వహిస్తున్న ద్విభాషా చిత్రం వరిసు (తెలుగులో వారసుడు). ఈ రెండు సినిమాల మధ్య ఉండే కామన్ పాయింట్ ఏంటంటే ఈ రెండింటినీ నిర్మిస్తున్నది నిర్మాత దిల్ రాజు.

దిల్ రాజు బిజినెస్ పరంగా ఈ రెండు సినిమాలకు కలిపి ధరలను కోట్ చేస్తున్నారట. అందుకు డిస్ట్రిబ్యూటర్లు కూడా ఈ ఒప్పందాల పై చాలా ఆసక్తి చూపుతున్నారనీ, అలాగే దిల్ రాజు చెప్పిన ధరను అందించడానికి సిద్ధంగా ఉన్నారనీ సమాచారం. ఇక ఓవర్సీస్ మార్కెట్‌లో, ఆర్‌సి 15 మరియు వరిసు కలిపి 65 కోట్ల రూపాయల భారీ ధరకు వ్యాపారం జరుపుకుంటున్నాయి. ఒక్కో సినిమాకీ విడివిడిగా చూసుకుంటే రెండు చిత్రాల హక్కులు 32 కోట్లు – 33 కోట్ల ధరలతో ఓకే స్థాయిలో ఉన్నాయి.

దిల్ రాజు అన్ని ప్రాంతాలలో కూడా ఇదే తరహాలో రెండు సినిమాలకు సంబంధించిన వ్యాపారం జరిగేలా చూసుకుంటున్నారు. అలాగే డిస్ట్రిబ్యూటర్లు కూడా ఈ రెండు సినిమాలను అన్ని ప్రాంతాలలో అలానే కొనుగోలు చేసే అవకాశం ఉంది.

RC-15 ఒక సామాజిక సందేశంతో కూడిన రాజకీయ నేపథ్యంలో తెరకెక్కుతున్న సినిమా.. ఈ చిత్రంలో రామ్ చరణ్ సరసన కియారా అద్వానీ నటించనున్నారు. అవినీతి నిరోధక నేపథ్యంలో తెరకెక్కుతున్న ఈ చిత్రాన్ని శంకర్ భారీ ఎత్తున తెరకెక్కిస్తున్నారు. మరోవైపు విజయ్, రష్మిక మందన్న జంటగా నటిస్తున్న చిత్రం వరిసు. ఈ రెండు చిత్రాలకు ఎస్ఎస్ థమన్ సంగీతం అందించనున్నారు.

వరిసు జనవరి 2023లో విడుదల కానుండగా, RC 15 వేసవిలో విడుదల అవుతుందని వార్తలు వినిపిస్తున్నా.. ఇంకా అధికారికంగా విడుదల తేదీని ఖరారు చేయలేదు. ఈ చిత్రం షూటింగ్ ప్రస్తుతం హైదరాబాద్లో శరవేగంగా జరుగుతోంది.