సాధారణంగా సినిమా పరిశ్రమలో హీరో, హీరోయిన్ల కాంబినేషన్, అలాగే కొందరు హీరో – దర్శకుల కాంబినేషన్లో సినిమా వస్తే ఆ సినిమా ఖచ్చితంగా హిట్ అవుతుంది అని నమ్ముతూ ఉంటారు. అలాంటి విషయం ఈరోజు మళ్ళీ రుజువైంది. ఇంతకు ముందు రెండు చక్కని విజయాలు అందుకున్న సినిమాలని అందించిన కథానాయక – దర్శకద్వయం మరో విజయాన్ని తన ఖాతాలో వేసుకున్నారు.

అచ్చం యెన్‌బడు మడమైయాడ (2016), అంతకు ముందు విన్నైతాండి వరువాయా (2010), ఇలా రెండు సూపర్ హిట్ చిత్రాలు తీసిన శింబు – గౌతమ్ మీనన్ ల కలయికలో 12 సంవత్సరాల తర్వాత వెందు తానింధతు కాడు పార్ట్ 1: ది కిండ్లింగ్ సినిమాకు మళ్లీ కలిసి పని చేశారు. ఈరోజు విడుదలైన వారి సినిమాకి తొలి షోల నుండి మంచి టాక్ వినిపిస్తుంది.

కాగా శింబు – గౌతమ్ మీనన్ ఇద్దరూ కలిసి సినిమా చేస్తున్నారు అంటే అది మనసును తాకే ప్రేమకథ అయి ఉంటుంది అని ప్రేక్షకులు ఊహిస్తారు. అయితే వీరిద్దరూ మూడోసారి సినిమా చేస్తున్నప్పుడు మాత్రం మునుపెన్నడూ లేని విధంగా ఇంటెన్స్ యాక్షన్ గ్యాంగ్‌స్టర్ డ్రామాను రూపొందించడం గమనార్హం.

ఇక ట్రైలర్ చూస్తేనే ఇదొక గ్యాంగ్స్టర్ డ్రామా అని స్పష్టంగా అర్ధం అవుతుంది. సినిమా చూసిన ప్రేక్షకులు కూడా ఇదే విషయాన్ని చెబుతున్నారు. ఒక గ్రామీణ యువకుడు బతుకుతెరువు కోసం ముంబై రావడం.. అక్కడ అనుకోని పరిస్థితుల్లో మాఫియా గ్యాంగ్ వార్ మధ్య చిక్కుకోవడం వంటి అంశాలతో సాగిన ఈ ప్రయాణాన్ని ప్రేక్షకులు ఆద్యంతం ఆసక్తితో తిలకించారని తెలుస్తోంది.

ముఖ్యంగా శింబు నటన అద్భుతంగా ఉందని అంటున్నారు. అలాగే యాక్షన్ సన్నివేశాలు ప్రేక్షకుల చేత ఈలలు కొట్టించే విధంగా ఉన్నాయని చెప్తున్నారు. ఇక భారతదేశం గర్వించదగ్గ సంగీత దర్శకుడు అయిన ఏ ఆర్ రహమాన్ అందించిన పాటలు, నేపథ్య సంగీతం కూడా అద్భుతంగా ఉన్నాయి అని అందరూ ముక్తకంఠంతో జై హొ అంటున్నారు. అలాగే లవ్ ట్రాక్ ను హ్యాండిల్ చేయడంలో గౌతమ్ మీనన్ ది అందెవేసిన చేయి. ఈ సినిమాలో కూడా హీరో – హీరోయిన్ల ప్రేమ సన్నివేశాలను చక్కగా తెరకెక్కించి ఆకట్టుకున్నారు అని సోషల్ మీడియాలో ప్రేక్షకులు అభిప్రాయ పడుతున్నారు.

హీరో శింబు, దర్శకుడు గౌతమ్ మీనన్ మరియు మ్యూజిక్ సెన్సేషన్ ఏఆర్ రెహమాన్ కాంబినేషన్‌లో రూపొందిన ‘వెందు తానిందతు కాడు’ చిత్రం తమిళంలో ఈరోజే విడుదల అవగా.. తెలుగులో ‘ది లైఫ్ ఆఫ్ ముత్తు’ పేరుతో ఎల్లుండి అంటే సెప్టెంబర్ 17న విడుదల కానుంది.

ఈ చిత్రంలో కథానాయిక పాత్రలో సిద్ధి ఇద్నాని నటించగా . నీరజ్ మాధవ్ మరియు రాధిక శరత్‌కుమార్ ఇతర ముఖ్య పాత్రల్లో కనిపిస్తారు. ఇషారి.కె. వేల్స్ ఫిల్మ్ ఇంటర్నేషనల్ బ్యానర్‌ పై గణేష్ భారీ స్థాయిలో ఈ రెండు భాగాల ఫ్రాంచైజీని నిర్మిస్తున్నారు. కాగా స్రవంతి మూవీస్ సంస్థ ఈ చిత్రాన్ని తెలుగు రాష్ట్రాలలో విడుదల చేస్తున్నారు.

ZEE5, భారతదేశంలోని అతిపెద్ద వీడియో ఆన్ డిమాండ్ స్ట్రీమింగ్ ప్లాట్‌ఫారమ్ లలో ఒకటి. దేశ వ్యాప్తంగా అన్ని పరిశ్రమల నుంచి అన్ని రకాల సినిమాలు, వెబ్ సీరీస్ లను వీక్షకులకు అందజేస్తూ చాలా త్వరగా ఓటిటి సంస్థలలో అగ్రస్థానానికి ఎగబాకుతుంది. తాజాగా తన లైబ్రరీలో మరో అద్భుతమైన సినిమాని చేర్చుకుంది.

ప్రేక్షకులు ఎంతగానో విశేష స్థాయిలో ఆదరించి.. అటు విమర్శకుల ప్రశంసలు కూడా పొందిన తమిళ యాక్షన్ థ్రిల్లర్ ‘విక్రమ్’ యొక్క వరల్డ్ డిజిటల్ ప్రీమియర్‌ను ఇటీవలే ప్రకటించింది. లోకేష్ కనగరాజ్ రచన మరియు దర్శకత్వం వహించిన విక్రమ్ చిత్రంలో కమల్ హాసన్, విజయ్ సేతుపతి మరియు ఫహద్ ఫాజిల్ కీలక పాత్రల్లో నటించారు. థియేటర్లలో ఈ చిత్రం విమర్శకులు మరియు ప్రేక్షకులను అద్భుతంగా ఆకట్టుకుని సూపర్ హిట్ చిత్రంగా బాక్స్ ఆఫీస్ వద్ద భారీ విజయాన్ని అందుకుంది.

ఈ చిత్రం తమిళనాడులో అత్యధిక వసూళ్లు సాధించడమే కాకుండా ఇండస్ట్రీ హిట్ చిత్రంగా కూడా నిలిచింది. కాగా నిన్నటి నుంచి అంటే 13 సెప్టెంబర్ 2022 నుండి హిందీ, తమిళం, తెలుగు, మలయాళం మరియు కన్నడ భాషల్లో Zee5 ప్లాట్‌ఫారమ్‌ పై ప్రసారం అవుతుంది.

రాజ్ కమల్ ఫిలింస్ ఇంటర్నేషనల్ నిర్మించిన ఈ చిత్రం అదే పేరుతో 1986లో విడుదలైన చిత్రానికి కొనసాగింపుగా తెరకెక్కింది. కమల్ హసన్ ప్రధాన పాత్ర పోషించిన ఈ సినిమా డ్రగ్ మాఫియా, గ్యాంగ్ వార్స్ మరియు రోమాలు నిక్కబొడుచుకొనే అద్భుత పోరాట ఘట్టాలతో తెరకెక్కిన హై-ఆక్టేన్ యాక్షన్ చిత్రం. ఈ చిత్రంలో వరుస హత్యల కేసును పరిష్కరించే పోలీస్ పాత్రలో ఫహద్ ఫాజిల్ నటించారు. ఇక డ్రగ్ మాఫియా గ్యాంగ్ లోని ఒక ముఖ్య సభ్యుడిగా విలక్షణ నటుడు విజయ్ సేతుపతి కనిపించారు. ఈ ముగ్గురు అసాధారణ నటుల మధ్య వచ్చే సన్నివేశాలు మరియు సంభాషణలు ప్రేక్షకులని విపరీతంగా అలరించాయి.

IMDB సైట్ లో 8.4 రేటింగ్‌తో, విక్రమ్ సినిమాలోని నటీనటుల నటనకు, అలాగే చిత్ర కథనానికి కూడా ప్రశంసలు దక్కాయి. ఔట్ అండ్ ఔట్ యాక్షన్ ప్యాక్డ్ సీక్వెన్స్‌ లతో పాటు థ్రిల్లింగ్ సీన్స్ వరకు ఈ చిత్రంలో మాస్ ప్రేక్షకులని అలరించే అంశాలు చాలా ఉన్నాయి.

కాగా ఇదివరకు Disney+Hotstar లో స్ట్రీమింగ్ కాబడిన విక్రమ్, తాజాగా ZEE5లో వరల్డ్ డిజిటల్ ప్రీమియర్‌తో, ఏకంగా 190 దేశాలలోని వీక్షకులకు అందుబాటులోకి వచ్చింది.

మాస్ మహారాజా రవితేజ ప్రధాన పాత్రలో నటించి ఇటీవలే విడుదలైన యాక్షన్ థ్రిల్లర్ రామారావు ఆన్ డ్యూటీ. కాగా విడుదలైన మొదటి రోజునే.. ఈ చిత్రం పేలవమైన కంటెంట్‌ వల్ల అటు విమర్శకులు మరియు ప్రేక్షకులచే తిరస్కరించబడింది. దాంతో ఈ చిత్రం బాక్సాఫీస్ వద్ద అట్టర్ ప్లాప్ గా నిలిచింది. కేవలం తొలి రోజు మాత్రమే కాస్త గౌరవప్రదమైన నంబర్లను రాబట్టగలిగింది.

నిజానికి కథలో మంచి విషయం ఉన్నా.. తెరకెక్కించే విధానం నిస్సారంగా ఉండటంతో ప్రేక్షకులకి ఈ సినిమా ఏ మాత్రం నచ్చలేదు. కలెక్టర్ పాత్రలో కొత్త లుక్ తో పాటు తన కెరీర్ లోనే ఎప్పుడూ లేని విధంగా సీరియస్ రోల్ లో రవితేజ నటించారు. అయితే మాస్ రాజాను చూస్తే ఎనర్జీ నిండిన పాత్రలో లేదా ఇంటెన్సిటీ ఉన్న పాత్రలో చూస్తాం కానీ ఇలా నీరసంగా ఉన్న పాత్రలో చూడలేము అని ప్రేక్షకులు అభిప్రాయ పడ్డారు. ఈ సినిమాతో మంచి బ్లాక్ బస్టర్ హిట్ సాధించాలి అన్న రవితేజ కోరిక అలా నెరవేరకుండా పోయింది.

అయితే ప్రస్తుతం అన్ని సినిమాలకు జరిగినట్లే, ఈ సినిమాకు కూడా OTT రిలీజ్ ఎప్పుడా అని ప్రేక్షకులు ఎదురు చూశారు. వారి ఎదురుచూపులు ఫలించి సెప్టెంబర్ 15న సోనీలివ్ ప్లాట్‌ఫారంలో స్ట్రీమింగ్ కు సిద్ధంగా ఉంది.

ఈ మేరకు సదరు OTT ప్లాట్‌ఫారం కొద్దిసేపటి క్రితం ఇదే విషయానికి సంభందించి అధికారిక ధృవీకరణ ఇచ్చింది. కాగా ఈ చిత్రం తెలుగు, తమిళం, మలయాళం, కన్నడ భాషల్లో ప్రసారం కానుందని సమాచారం.

ఈ చిత్రంలో రవితేజ సరసన దివ్యాంశ కౌశిక్ మరియు రజిషా విజయన్ కథానాయికలుగా నటించారు. ఒకప్పుడు పాపులర్ హీరో అయిన నటుడు వేణు తొట్టెంపూడి ఈ సినిమాతో తిరిగి వెండితెర పై కనిపించారు. SLV సినిమాస్ మరియు RT టీమ్ వర్క్స్ బ్యానర్లపై సుధాకర్ చెరుకూరి ఈ చిత్రాన్ని నిర్మించగా, నూతన దర్శకుడు శరత్ మండవ దర్శకత్వం వహించారు.

సామ్ సిఎస్ సంగీతం అందించిన ఈ చిత్రంలో నాజర్, నరేష్, పవిత్ర లోకేష్, సర్పత్తా జాన్ విజయ్ ఇతర కీలక పాత్రల్లో నటించారు. థియేటర్లలో ఈ చిత్రాన్ని చూడని వారు సెప్టెంబర్ 15 నుండి సోనీలివ్‌లో చూసి ఆనందించవచ్చు.