మన భారతీయ పురాణాలతో పాటు గొప్ప చరిత్ర పట్ల రచయిత, దర్శకుడు త్రివిక్రమ్ శ్రీనివాస్ చాలా ఆసక్తి చూపుతారు అని అందరికీ తెలిసిందే. హిందూ పురాణాలు మరియు పాత్రల గురించి ఆయన తన సినిమాలలో అనేక సార్లు ప్రత్యక్షంగా చెప్పడం లేదా పరోక్షంగా అవి గుర్తొచ్చెలా సన్నివేశాలు మరియు డైలాగులు ఉన్నాయి. చాలా సందర్భాల్లో ఇటువంటి సబ్జెక్ట్‌ తో సినిమా చేసేందుకు ఆయన ఆసక్తి చూపారు. అయితే, వివిధ కారణాల వల్ల, ఆయన కేవలం మాటల్లోనే తప్ప తెరమీద అలాంటి సినిమా ఇంతవరకు తీయలేదు.

అయితే తాజాగా వినిపిస్తున్న వార్తల ప్రకారం ఆ సమయం ఆసన్నమైనట్టే కనిపిస్తుంది. త్రివిక్రమ్ దర్శకత్వంలో ఎట్టకేలకు తనకు ఇష్టమైన జానర్ లో ఒక భారీ బడ్జెట్ చిత్రం మొదలుపెడుతున్నట్లు కనిపిస్తోంది. ఈ విషయం పై అధికారిక సమాచారం ఇంకా అందుబాటులో రానప్పటికీ, కన్నడ నటుడు ఉపేంద్ర తన తదుపరి చిత్రం అయిన ప్యాన్- ఇండియా భారీ సినిమా కబ్జా టీజర్ విడుదల కార్యక్రమంలో ఈ భారీ చిత్రం తాలూకు సమాచారాన్ని అందించారు.

కన్నడ స్టార్లు ఉపేంద్ర – సుదీప్ ల కలయికలో వస్తున్న భారీ బడ్జెట్ సినిమా “కబ్జా. ఈ చిత్రానికి సంబంధించిన టీజర్ ను నిన్న విడుదల చేశారు. రానా కూడా హాజరైన టీజర్ ఈవెంట్‌లో ఉపేంద్ర మాట్లాడుతూ, త్రివిక్రమ్ దర్శకత్వం వహించిన ‘హిరణ్యకశ్యప’ సినిమా వల్ల వచ్చే రెండేళ్లు కూడా రానా చాలా బిజీగా ఉంటారని అన్నారు. ఆ సమయంలో రానా ఈ సినిమా ఉందని చెప్పలేదు అలాగని లేదనీ చెప్పలేదు. గత కొన్ని రోజులుగా ఇదే విషయం మీద మీడియాలో వార్తలు బాగానే వచ్చాయి. అందువల్ల ఈ తాజా వార్త టాలీవుడ్ ఇండస్ట్రీ వర్గాలకు, సినీ ప్రేమికులకు భారీ ఉత్సాహాన్ని ఇచ్చింది.

సూపర్ స్టార్ మహేష్ బాబుతో త్రివిక్రమ్ తన తదుపరి సినిమా తాలూకు షూటింగ్ ఇటీవలే ప్రారంభించారు. ఈ చిత్రం ఏప్రిల్ 2023లో విడుదల కానుంది. దీని తర్వాత ఈ మాటల మాంత్రికుడు ‘హిరణ్యకశ్యప’ సినిమాని ప్రారంభించనున్నట్లు తెలుస్తోంది.

త్రివిక్రమ్ – అల్లు అర్జున్ ల కాంబినేషన్లో వచ్చిన “జులాయి” సినిమాలో ఒక డైలాగ్ ఉంటుంది. ” లాజిక్లులు ఎవరూ నమ్మరు. అందుకే మన దేశంలో సైంటిస్ట్ ల కంటే బాబాలు ఫేమస్” అనే డైలాగ్ ఉంటుంది. అదే డైలాగ్ కొంత మారిస్తే.. మన సోషల్ మీడియాలో తెలుగు సినీ ప్రేక్షకులు, ముఖ్యంగా మన స్టార్ హీరోల అభిమానుల ప్రవర్తనకు సరిగ్గా సరిపోతుంది. అదేంటంటే.. ఫ్యాన్స్ కి ఎమోషన్స్ మాత్రమే.. లాజిక్స్ పట్టవు.

ఎస్ ఎస్ రాజమౌళి దర్శకత్వంలో, మెగా పవర్ స్టార్ రామ్ చరణ్, యంగ్ టైగర్ ఎన్టీఆర్ హీరోలుగా నటించగా . భారీ హైప్ తో ఈ ఏడాది మార్చి 25న విడుదలైన ఆర్ ఆర్ ఆర్ అటు బాక్స్ ఆఫీస్ పరంగా ఇటు ప్రశంసల పరంగా ఎంత ఖ్యాతి గడించిందో ప్రత్యేకంగా చెప్పనక్కర్లేదు. అయితే ఆ సినిమా విడుదలైన దగ్గర నుంచి మెగా – నందమూరి అభిమానుల మధ్య ఏదో రకంగా గొడవలు జరుగుతూనే ఉన్నాయి.

గత నెలలో, ప్రముఖ లైఫ్‌స్టైల్ మరియు పాప్ కల్చర్ మ్యాగజైన్ వెరైటీ వారి వార్షిక అంచనాల జాబితాలో ఆస్కార్‌కు వారి అంచనా వేసిన నామినీల జాబితాలో జూనియర్ ఎన్టీఆర్‌ పేరును చేర్చింది. ఈ జాబితా వచ్చినప్పుడు చాలా మంది మెగా అభిమానులు ఈ విషయాన్ని తీసి పారేసి ఎన్టీఆర్ మరియు ఆయన అభిమానులను ఎగతాళి చేశారు. అంతే కాకుండా ఇది కేవలం డబ్బులు ఇచ్చి జరిపించుకున్న పనిగా కూడా పేర్కొన్నారు.

ఆ సమయంలో నిజానికి ఇందులో ఎన్టీఆర్ ప్రమేయం ఉందని చాలా మంది సోషల్ మీడియాలో ప్రచారం చేయగా, రాజమౌళి తండ్రి అయిన విజయేంద్ర ప్రసాద్ గారు తన ప్రభావంతో ఇలా చేశారని కూడా కొందరు పేర్కొన్నారు.

అయితే, ఇప్పుడు పరిస్థితి మారింది. అచ్చం సినిమాలో వచ్చే ట్విస్ట్ లాగా, వెరైటీ వెబ్‌సైట్ రామ్ చరణ్‌ని కూడా తమ తాజా ఆస్కార్ నామినేషన్ అంచనాల జాబితాలో చేర్చడంతో.. ఇప్పుడు మెగా అభిమానులు తమ హీరోని పొగడడం మొదలుపెట్టారు. అయితే అప్పుడు మెగా అభిమానులు చేసిందే ఇప్పుడు ఎన్టీఆర్‌ అభిమానులు చేస్తూ మెగా అభిమానుల పై దాడి చేయడం ప్రారంభించారు.

వెరైటీ మ్యాగజైన్‌లో కనిపించడానికి రామ్ చరణ్ మరియు అతని బృందం కూడా డబ్బు చెల్లించిందని ఈ క్రమంలో ఎన్టీఆర్ అభిమానులు ఆరోపిస్తున్నారు. మెగా అభిమానులకు బూమరాంగ్ లాగా చేసిన ఆరోపణలు మళ్ళీ తిరిగి వచ్చినట్లు పరిస్తితి ఏర్పడింది.

నిజానికి ఈ మొత్తం వ్యవహారంలో ఇరు వర్గాల అభిమానుల తప్పూ ఉంది. ఆర్ ఆర్ ఆర్ సినిమా విడుదలైన రోజు నుండి నిన్న మొన్నటి వరకూ ఎన్టీఆర్ అభిమానులు రాజమౌళి పై సోషల్ మీడియాలో హేయమైన వ్యాఖ్యలు చేసి అకారణంగా నిందలు కూడా మోపారు. అందువల్ల మెగా అభిమానులు మొదటి నుంచి ఈ సినిమాలో తమదే పై చేయి అన్నట్లు వ్యవహరించారు.

అయితే ఆర్ ఆర్ ఆర్ సినిమాకు అంతర్జాతీయ స్థాయిలో గుర్తింపు రావడం మొదలైన దగ్గర నుంచి ఎన్టీఆర్ అభిమానులు మళ్ళీ సినిమాని తిరిగి పొగడటం మొదలు పెట్టారు. ఆర్ ఆర్ ఆర్ ఆస్కార్ అవార్డుకు ఎంపికయ్యే అవకాశం ఉన్న తరుణంలో ఇరు వర్గాల అభిమానులు ఈ చిల్లర గొడవలు పక్కనపెట్టి సమిష్టిగా ఉంటే మంచిది.

దర్శకుడు గౌతమ్ వాసుదేవ్ మీనన్ అంటే తమిళ ప్రేక్షకులతో పాటు తెలుగు ప్రేక్షకులు కూడా ఇష్ట పడతారు. తెలుగులో ఘర్షణ, ఏమాయ చేసావే లాంటి సినిమాలతో ఆయన ఇక్కడి ప్రేక్షకులని మెప్పించారు. ఓ పక్క దర్శకుడుగా వరుసగా సినిమాలని తెరకెక్కిస్తూనే, ఈ మధ్య ఆయన నటుడిగా కూడా బిజీగా మారారు. అయన సినిమాలను తెరకెక్కించే శైలికి చాలా మంది అభిమానులు ఉన్నారు. ఆయన సినిమాల్లో ప్రేమ కథలకి థ్రిల్లర్ టచ్ కలిపి సరికొత్తగా తెరకెక్కిస్తారు. లవ్, యాక్షన్ జోనర్స్ ను ప్రత్యేకమైన విధంగా తీయడంలో ఆయన దిట్ట.

గౌతమ్ వాసుదేవ్ మీనన్ ప్రస్తుతం శింబు హీరోగా, సిద్ది ఇద్నాని హీరోయిన్ గా ‘వెందు తనిందదు కాడు’ అనే సినిమాని తెరకెక్కించారు. గురువారం విడుదలైన ఈ చిత్రం అద్భుతమైన టాక్ ను మరియు విమర్శకుల ప్రశంసలు అందుకుంది. చాలా కాలానికి శింబు, గౌతమ్ మీనన్ కి బాక్స్ ఆఫీస్ వద్ద సూపర్ హిట్ దక్కిందని ట్రేడ్ వర్గాలు అంటున్నాయి. ఈ చిత్రం చక్కని ఓపెనింగ్స్ ను సాధించి మంచి లాంగ్ రన్ వైపు పరుగులు తీస్తుంది.

ఇక తెలుగులో ఈ సినిమా ‘ది లైఫ్‌ ఆఫ్‌ ముత్తు’ పేరుతో సెప్టెంబర్ 17న రిలీజ్ అయింది. నిజానికి రెండు వెర్షన్లు ఒకేసారి విడుదల కావాల్సి ఉన్నా, కొన్ని సాంకేతిక కారణాల వలన రెండు రోజులు ఆలస్యంగా విడుదలైంది. ఈ సందర్భంగా సినిమా ప్రచార కార్యక్రమాలు నిర్వహించారు. ప్రచార కార్యక్రమాలలో భాగంగా ఓ ఇంటర్వ్యూలో గౌతమ్ వాసుదేవ్ మీనన్ మాట్లాడుతూ తన పాత హిట్ సినిమాలు వాటి సీక్వెల్స్ గురించి మాట్లాడారు.

గౌతమ్ వాసుదేవ్ మీనన్ మాట్లాడుతూ.. ఇటీవలే వెంకటేష్ గారిని కలిసి ఘర్షణ పార్ట్ 2 గురించి చర్చించామని చెప్పారు. సీక్వెల్ పట్ల వెంకటేష్ గారు కూడా ఎంతో ఆసక్తి ఉన్నారని, ఇంకా స్క్రిప్ట్ పనులు ప్రారంభించలేదని, అయితే తొందరలోనే సినిమా ఉంటుందని ఆయన తెలిపారు. ఇక కమల్‌హాసన్‌ గారితో ‘రాఘవన్‌ 2’ ప్లాన్‌ చేయాలనుకుంటున్న విషయం.. అలాగే నాగచైతన్యతో ‘ఏ మాయ చేసావె 2’ కూడా భవిష్యత్తులో తెరకెక్కిస్తానని ఆయన తెలిపారు.

గతంలో ఈ సినిమాలు భారీ విజయం సాధించాయి. ఇప్పుడు వాటికి సీక్వెల్స్ తెరకెక్కితే ఖచ్చితంగా ప్రేక్షకులు ఆయా సినిమాల మీద ఆసక్తి చూపిస్తారు. అదే కాకుండా ప్రస్తుతం అన్ని పరిశ్రమలలో అయితే భారీ బడ్జెట్ సినిమాలు లేదా సీక్వెల్స్ ట్రెండ్ నడుస్తోంది. తాజాగా విజయం సాధించిన ఉత్సాహంతో గౌతమ్ మీనన్ తిరిగి విజయాల బాట పడతారని ఆశిద్దాం.