జనవరి 13న విడుదలైన చిరంజీవి ‘వాల్తేరు వీరయ్య’ చిత్రం ప్రేక్షకుల నుంచి మంచి రెస్పాన్స్ తెచ్చుకుని మొదటి రోజు సాలిడ్ కలెక్షన్లను నమోదు చేయగా, రెండో రోజు కూడా అదే జోరును కొనసాగిస్తూ 2 రోజులకు 44.3 కోట్ల షేర్ ను రాబట్టింది. ఈ సినిమా థియేట్రికల్ రైట్స్ విలువ రూ.88 కోట్లు కాగా, మొదటి వారంలోనే మొత్తం థియేట్రికల్ బిజినెస్ రాబట్టే అవకాశం ఉంది.

ఇదిలా ఉంటే ఈ సినిమాలో ఓ కీలక పాత్రలో కనిపించిన రవితేజను వాల్తేరు వీరయ్య యూనిట్ పట్టించుకోవడం లేదు అన్నట్లుగా కనిపిస్తుంది. ఫ్లాష్ బ్యాక్ లో రవితేజ పాత్ర, ఆయన నటన వాల్తేరు వీరయ్య బ్లాక్ బస్టర్ విజయానికి ప్రధాన కారణాల్లో ఒకటి అని అనడంలో ఎలాంటి సందేహం లేదు.

కాగా వాల్తేరు వీరయ్య సినిమా విడుదలకు ముందు అన్ని పోస్టర్లలో రవితేజను ఉపయోగించిన చిత్ర బృందం విడుదల తర్వాత మాత్రం దీన్ని చిరంజీవి సినిమాగా ప్రొజెక్ట్ చేయడానికి ప్రయత్నిస్తుంది. సినిమా రిలీజ్ రోజు తర్వాత నుండి మైత్రి యూనిట్ నుంచి వచ్చిన పోస్టర్స్ అన్నీ చిరంజీవి సింగిల్ పోస్టర్లే.

గత డిసెంబర్ వరకు రవితేజ కాస్త దారుణమైన స్థితిలో ఉన్నారు. 2022 లో ఆయన నటించిన రెండు సినిమాలు బాక్సాఫీస్ వద్ద ఘోరంగా విఫలమయ్యాయి, మరియు ఆయన నటన కూడా ఆ చిత్రాలలో ప్రేక్షకులను ఆకట్టుకోవడంలో విఫలమైంది.

కానీ ఒక్క నెలలోనే అంతా మారిపోయింది,ఇప్పుడు సూపర్బ్ కలెక్షన్స్ తో పాటు తన నటనకు కూడా అద్భుతమైన ప్రశంసలు అందుకుంటూ సాలిడ్ కమ్ బ్యాక్ ఇచ్చారు రవితేజ.

రవితేజ గత చిత్తం అయిన ధమాకా బాక్సాఫీస్ వద్ద భారీ వసూళ్లు రాబట్టినప్పటికీ ఆయన ఎనర్జీ, డ్యాన్సులు చూపించడం మినహా ఈ సినిమాలో నటనకు పెద్దగా స్కోప్ లేదు. కానీ వాల్తేరు వీరయ్య సినిమాలో మాత్రం రవితేజ తన కెరీర్ లో అత్యుత్తమ ప్రదర్శనల్లో ఒకటిగా నిలిచే నటనను కనబరిచారు.

ఇటీవల చిత్ర బృందం నిర్వహించిన సక్సెస్ మీట్ లో రవితేజ నటన పై చిరంజీవి కూడా ప్రశంసలు కురిపించారు. ఆ పెర్ఫార్మెన్స్ చూసి కన్నీళ్లు పెట్టుకున్నానని, ఆ సన్నివేశానికి గ్లిజరిన్ కూడా అవసరం లేకుడా పోయిందని మెగాస్టార్ అన్నారు. రవితేజ పాత్ర విక్రమ్ సాగర్ ఐపీఎస్ గూండాల చేతిలో కత్తిపోట్లకు గురై చనిపోయే ప్రీ క్లైమాక్స్ సన్నివేశం గురించి చిరంజీవి మాట్లాడారు.

మెగాస్టార్ చిరంజీవి, దర్శకుడు కొరటాల శివ మధ్య వివాదం చెలరేగిన విషయం తెలిసిందే. ఆచార్య సినిమా పరాజయం పాలైన తర్వాత చిరంజీవి చాలా సందర్భాల్లో కొరటాల శివ పై పరోక్షంగా విరుచుకుపడ్డారు. అయితే కొరటాల శివను టార్గెట్ చేసి తాను ఏ వ్యాఖ్యలూ చేయలేదని, అవి సినీ పరిశ్రమకు సంబంధించిన సాధారణ ప్రకటనలని ఆయన ఇటీవల ఓ ఇంటర్వ్యూలో స్పష్టం చేశారు.

అయితే ఖచ్చితంగా చిరంజీవి వ్యాఖ్యలు కొరటాలను టార్గెట్ చేస్తూ చేసినవేనని ఇతర హీరోల అభిమానులు, సోషల్ మీడియాలోని ఇతర తటస్థ ప్రేక్షకులు గట్టిగా చెబుతున్నారు.

కొరటాల శివను వరుసగా టార్గెట్ చేస్తూ చిరంజీవి సంధిస్తున్న తీరు చూస్తుంటే.. బహుశా ఆయన ఆచార్య ఫలితాన్ని తట్టుకోలేకపోతున్నారని అంటున్నారు. సినిమా ఇండస్ట్రీలో సక్సెస్ ఫెయిల్యూర్స్ అనేవి మామూలేనని, కానీ ఇండస్ట్రీలో ఈ స్థాయిలో ఒక వ్యక్తిని టార్గెట్ చేయడం ఎప్పుడూ చూడలేదని ప్రేక్షకులు అభిప్రాయపడుతున్నారు.

కొరటాల మీద కానీ, ఇండస్ట్రీలోని ఇతర దర్శకుల పై కానీ చిరంజీవి చేసిన కామెంట్స్ వెనుక ఖచ్చితమైన కారణం ఏంటో ఎవరికీ తెలియదు. కానీ ఆయన మాటలు నిజంగా కొరటాలకి వ్యతిరేకంగా అని ఉంటే గనక.. ఆయన తన ధోరణి గురించి ఒకసారి ఆలోచించాలి.

ఎందుకంటే కొరటాల శివ ఏమీ మామూలు దర్శకుడు కాదు, నాలుగు విజయవంతమైన చిత్రాలను అందించారు, అలాగే 3 బ్యానర్స్ లో పనిచేశారు, ఏ నిర్మాత కూడా ఆయన గురించి ఇలాంటి వ్యాఖ్యలు చేయడం కానీ, లేదా ఫిర్యాదు కానీ చేయలేదు.

అలాగే, ఆ 4 చిత్రాల నిర్మాతలకు అద్భుతమైన లాభాలు కూడా వచ్చాయి. చిరంజీవి చేసిన ఈ కౌంటర్లకు కొరటాల శివ బదులుగా సరైన పాయింట్లతో స్పందిస్తే అప్పుడు ఆయనకు అవమానం జరిగినట్లు ఉంటుంది అనడంలో సందేహం లేదు. మెగాస్టార్ చిరంజీవి, కొరటాల శివల మధ్య ఉన్న సమస్య ఉన్నా అది త్వరగా సెటిల్ అవుతుందని, మరోసారి వీరిద్దరి మధ్య వివాదానికి సంబంధించిన వార్తలు అసలు తలెత్తవని ఆశిద్దాం.

నందమూరి బాలకృష్ణ ఓ కులాన్ని కించపరిచేలా వ్యాఖ్యలు చేసి వివాదంలో చిక్కుకున్నారు. ఆయన చేసిన వ్యాఖ్యలకు ఆ సామాజికవర్గం వారు ఆగ్రహానికి గురయ్యారు. వెంటనే ఆయన తన వ్యాఖ్యలకు గల కారణాన్ని వివరిస్తూ పత్రికా ప్రకటన విడుదల చేయాల్సి వచ్చింది.

నందమూరి బాలకృష్ణకు మన ఇతిహాసాలు, రామాయణ, మహాభారతాల మీద ఎంతగా పట్టు ఉంటుందో అందరికీ తెలిసిందే. అయితే అలాంటి బాలయ్య ఓ చిన్న తప్పు చేశారు. వీర సింహా రెడ్డి సినిమా ప్రమోషన్స్‌లో భాగంగా మాట్లాడుతూ.. దేవ బ్రాహ్మణుల గురువు దేవళ మహర్షి అని, వారి నాయకుడు రావణ బ్రహ్మ అని అన్నారు. దీంతో ఆ వర్గానికి చెందిన వారు ఆయన వ్యాఖ్యల పై ఆగ్రహం వ్యక్తం చేశారు. చరిత్ర తెలియకుండా మాట్లాడొద్దని, బాలకృష్ణ వెంటనే క్షమాపణలు చెప్పాలని డిమాండ్ చేశారు.

దేవబ్రాహ్మణ సంఘం నాయకులు కుల చరిత్ర గురించి తనను సరిదిద్దినందుకు వారిని బాలకృష్ణ ప్రశంసించారు. తాను ఎవరి మనోభావాలను దెబ్బతీయాలని అనుకోలేదని, తన వ్యాఖ్యలకు ఎవరైనా నొచ్చుకుని ఉంటే అందుకు క్షమాపణలు చెబుతున్నానని ఆయన అన్నారు. అంతే కాక, దేవబ్రాహ్మణ సభ్యులు తన క్షమాపణను స్వీకరించాలని ఆయన ఆకాంక్షించారు.

మరో వైపు బాలయ్య వీరసింహారెడ్డి గత గురువారం విడుదలై బాక్సాఫీస్ వద్ద మంచి వసూళ్లను రాబడుతోంది. గోపీచంద్ మలినేని దర్శకత్వంలో యాక్షన్ ఎంటర్ టైనర్ గా ఈ చిత్రాన్ని రూపొందించారు.

బాలకృష్ణ 107వ సినిమాగా ఈ సినిమా ప్రేక్షకుల ముందుకొచ్చింది. ఎప్పుడైతే ఈ సినిమా షూటింగ్ స్టార్ట్ చేశారో అప్పటినుంచే నందమూరి ఫ్యాన్స్ బోలెడన్ని అంచనాలు పెట్టుకున్నారు. విడుదల తర్వాత నందమూరి ఫ్యాన్స్ కోరుకున్న అన్ని అంశాలూ సినిమాలో ఉండటంతో ఆనందించారు.

మైత్రి మూవీ మేకర్స్ బ్యానర్‌ పై ఎంతో ప్రతిష్టాత్మకంగా రూపొందిన ఈ సినిమాలో శృతి హాసన్ హీరోయిన్ గా నటించగా.. హానీ రోజ్, వరలక్ష్మీ శరత్ కుమార్, కన్నడ స్టార్ దునియా విజయ్, మలయాళ నటుడు లాల్, నవీన్ చంద్ర, మురళీ శర్మ, ఈశ్వరీ రావు తదితరులు ఇతర ముఖ్య పాత్రలు పోషించారు.

బాహుబలి 1, 2 సినిమాల భారీ విజయాల వెనుక బలమైన శక్తుల్లో నిర్మాత శోభు యార్లగడ్డ ఒకరు. ఆయన మార్కెటింగ్ మేధావితనంతో పాటు ఒక ప్రత్యేకమైన అవుట్ రీచ్ వ్యూహం బాహుబలిని హద్దులు దాటి ప్రపంచవ్యాప్తంగా ఒక భారీ దృగ్విషయంగా మార్చడానికి సహాయపడింది. శోభు లేకపోతే ఆ ఎపిక్ యాక్షన్ సినిమా ఇంతటి కల్ట్ స్టేటస్ సాధించడం అసాధ్యమని రాజమౌళి కూడా గతంలో చెప్పుకొచ్చారు.

ఇప్పుడు రాజమౌళి తెరకెక్కిస్తున్న ‘ఆర్ఆర్ఆర్’కు కూడా శోభు తన వంతు సహకారం అందించారని సమాచారం. నిర్మాతగా ఆయనకు ఆర్ఆర్ఆర్ సినిమాతో సంబంధం లేకపోయినా ఆస్కార్ ప్రచారానికి ఆర్థికంగా సహకరిస్తున్నట్లు సమాచారం.

సాధారణంగా ఒక సినిమాకు జరిగే ఆస్కార్ ప్రచారానికి భారీ మార్కెటింగ్, టూరింగ్ మరియు అవుట్ రీచ్ యాక్టివిటీస్ ఇలా ఎన్నో అవసరం అవుతాయి. కాగా రాజమౌళితో కలిసి ఈ వ్యవహారాలు అన్నీ నిర్వహించడానికి శోభు సరైన వ్యక్తి అని అనడంలో ఎలాంటి సందేహం లేదు.

ఆస్కార్ ప్రచారానికి విడుదలైన తర్వాత ఆర్ఆర్ఆర్ చిత్ర బృందం కోట్ల రూపాయలు ఖర్చు చేసింది. ఇందులో నిర్మాత డీవీవీ దానయ్య ప్రమేయం ఏమాత్రం లేదట. ఈ ప్రచారానికి పూర్తిగా బాహుబలి నిర్మాత శోభు ఆర్థిక సహాయం అందించారని, ఆర్ఆర్ఆర్ టీంతో కలిసి ప్రతి ప్రచారానికి కూడా హాజరయ్యాడని ఇండస్ట్రీ టాక్.

ఏదేమైనా అందరి శ్రమ ఫలించి ఆర్ ఆర్ ఆర్ సినిమాకు ప్రతిష్ఠాత్మకమైన ఆస్కార్ అవార్డు దక్కితే అందరికీ ఆనందం. కాగా ఆస్కార్ అవార్డు యొక్క ప్రచారానికి ఎంత శ్రమ అవసరం అవుతుందో నిర్మాత శోభు యార్లగడ్డ తన ట్విట్టర్ అకౌంట్ లో పంచుకున్నారు.