ఇష్క్, మనం, 24 వంటి సినిమాలతో మెప్పించిన దర్శకుడు విక్రమ్ కే కుమార్. తమిళ ఇండస్ట్రీ నుండి వచ్చి తెలుగులో వరుస సినిమాలు తీసిన ఆయన చివరిగా నానితో తీసిన “గ్యాంగ్ లీడర్” చిత్రం బాక్స్ ఆఫీస్ వద్ద ఆశించిన స్థాయిలో ఆడకపోయినా విమర్శకుల ప్రశంసలు అందుకుంది.

ప్రస్తుతం అక్కినేని నాగచైతన్య తో థాంక్యూ సినిమాతో ప్రేక్షకుల ముందుకు రాబోతున్నారు. ఈ సినిమా జులై 22న విడుదల కానుంది. ఈ సినిమా ప్రచారంలో భాగంగా ఇచ్చిన ఇంటర్వ్యూలలో తాను హీరో సూర్యతో తీసిన 24 సినిమాకి సీక్వెల్ ఉంటుందని ప్రకటించారు. సూర్య హీరోగా మూడు విభిన్న పాత్రలలో కనిపిస్తూ టైం ట్రావెల్ కాన్సెప్ట్ తో వచ్చిన 24 సినిమా ప్రేక్షకుల నుంచి చక్కని స్పందనను రాబట్టుకుంది.

ఈ సందర్భంగా ఆయన మరికొన్ని ఆసక్తికరమైన విషయాలు చెప్పడం జరిగింది. ఆయన తదుపరి తీయబోయే తెలుగు సినిమా మైత్రీ మూవీ మేకర్స్ బ్యానర్ లో ఉంటుంది అని తెలియజేశారు. న్యాచురల్ స్టార్ నానితో విక్రమ్ కుమార్ తెరకెక్కించిన ” గ్యాంగ్ లీడర్” కూడా మైత్రీ మూవీ మేకర్స్ బ్యానర్ లోనే తీశారు. ఇక మైత్రి బ్యానర్ లో తెరకెక్కుతున్న సినిమానే కాక బాలీవుడ్ లో ఒక యాక్షన్ సినిమా చేయనున్నారని కూడా విక్రమ్ తెలిపారు. థాంక్యూ చిత్రం తరువాత ఆ కథపై కసరత్తు మొదలు పెడతానని.. ఇంత వరకూ ఆయన చేయని కథతో ఆ సినిమా ఉంటుందని ఆయన అన్నారు.

ఇక ఇదే క్రమంలో 2016 లో వచ్చిన 24 సినిమా గురించి విక్రమ్ మాట్లాడారు. ఆ సినిమా సీక్వెల్ కు సంభందించి తనకు కొన్ని ఆలోచనలు ఉన్నాయని.. ఎప్పుడు తీస్తానో తెలియదు కానీ ఖచ్చితంగా 24 సినిమాకు సీక్వెల్ తీస్తానని ఆయన చెప్పారు. విక్రమ్ కుమార్ చెప్పిన ఈ విషయం విని సూర్య అభిమానులు ఆనందం వ్యక్తం చేశారు. ఆత్రేయ పాత్రలో మళ్ళీ తమ హీరోను చుడాలని వారు తహతహ లాడుతున్నారు. ఇటీవలే కమల్ హాసన్ – లోకేష్ కనగరాజ్ కాంబినేషన్ లో వచ్చిన ” విక్రమ్” లో కూడా సూర్య సినిమా చివరలో రోలెక్స్ అనే విలన్ పాత్రలో కనిపించిన విషయం తెలిసిందే.

రామ్ పోతినేని హీరోగా, కృతి శెట్టి హీరోయిన్ గా యువ నటుడు ఆది పినిశెట్టి విలన్ గా నటించిన సినిమా “ది వారియర్”. తమిళ దర్శకుడు లింగుస్వామి ఈ చిత్రాన్ని తెలుగు, తమిళ భాషల్లో తెరకెక్కించారు. దేవిశ్రీప్రసాద్ సంగీతం అందించిన ఈ సినిమాలో బుల్లెట్టు పాట బ్లాక్ బస్టర్ అవగా.. టీజర్, ట్రైలర్ లు కూడా ఆకట్టుకుని భారీ అంచనాల నడుమ ఈ శుక్రవారం విడుదల అయింది.

అయితే పక్కా మాస్ ఎంటర్టైనర్ గా తెరకెక్కిన ఈ చిత్రానికి మొదటి రోజు మిశ్రమ స్పందన లభించింది. రివ్యూలు అంతగా బాగా లేకపోయినా.. కలెక్షన్స్ తొలి రోజు పరవాలేదు అనిపించాయి. బాక్స్ ఆఫీసు వద్ద ఈ సినిమా సేఫ్ అవ్వాలి అంటే వారాంతంలో కలెక్షన్లు పెరగాలి లేదంటే నష్టాలు తప్పవు అని ట్రేడ్ వర్గాలు అంటున్నాయి.

ఇదిలా ఉండగా ఈ సినిమాలో దేవిశ్రీప్రసాద్ సంగీతానికి నెగటివ్ మార్కులు వేశారు ప్రేక్షకులు మరియు విమర్శకులు. ముఖ్యంగా నేపథ్య సంగీతం ఏమాత్రం బాగాలేదని, సినిమాకి ఉపయోగ పడాల్సిన చోట కూడా ఊపు తగ్గించేసి నిరాశ పర్చిందని సమాచారం.

ఒక వైపు భారీ వర్షాలు ఈ సినిమా ఓపెనింగ్స్ ను దెబ్బ తీయగా.. సినిమాలో బాగున్న సన్నివేశాలకు కూడా తన సంగీతంతో దేవిశ్రీప్రసాద్ సహాయం చేయలేకపోయాడు అని సోషల్ మీడియాలో ప్రేక్షకులు విమర్శిస్తున్నారు. పాటల్లో క్యాచీ బీట్ ఉంచి రంజింప జేయటంలో దేవికి ఎవరూ సాటి లేరు. కానీ గత కొంతకాలంగా ఆయన పనితనంలోపదును తగ్గిందన్న మాట వాస్తవం.

ముఖ్యంగా నేపథ్య సంగీతం ఆయన తన మునుపటి స్థాయికి తగ్గట్టుగా ఇవ్వలేకపొతున్నారు అని గత కొన్నేళ్లుగా విమర్శలు వస్తున్నాయి.మేజర్ తరువాత తెలుగులో హిట్ సినిమా లేదు..ఈ క్రమంలో పక్కా మాస్ ఎంటర్టైనర్ అయిన ది వారియర్ హిట్ అయి చిత్ర పరిశ్రమకు ఊపిరి పోస్తుంది అని ట్రేడ్ వర్గాలు అంచనా వేశారు కానీ తొలిరోజు వరకూ వారి ఆశలు నిజం అవ్వలేదు. మరి వారాంతంలో అయినా కలెక్షన్లు పిక్ అప్ అవుతాయి అని ఆశిద్దాం.

న‌టీన‌టులు: సుశాంత్, ప్రియా ఆనంద్, సుద‌ర్శ‌న్, ప్రేమ్ సాగ‌ర్, నిరోషా రామ‌రాజు, అప్పాజీ అంబ‌రీశ, బిందు చంద్ర‌మౌళి, బిగ్‌బాస్ దివి, అన్న‌పూర్ణ‌మ్మ, సందీప్ వార‌ణాసి, లావ‌ణ్య‌రెడ్డి త‌దిత‌రులు న‌టించారు. సంగీతం: న‌రేన్‌ ఆర్ కె సిద్ధార్ధ్‌, ఛాయాగ్ర‌హ‌ణం: అర్వింద్ విశ్వ‌నాథ్‌.. కథ – స్క్రీన్‌ప్లే – రాజ్ శ్రీ‌బిష్ట్‌, సురేష్ మైసూర్ మాట‌లు – పాట‌లు : కిట్టు విస్సాప్ర‌గ‌డ‌.. ఎడిటింగ్ : కోట‌గిరి వెంక‌టేశ్వ‌ర రావునిర్మాత : ప్ర‌వీణ్ కొల్ల‌ ..ద‌ర్శ‌క‌త్వం : ల‌క్ష్మీ సౌజ‌న్య‌

కథ: రాయ‌ల‌సీమ ప్రాంతంలోని బుచ్చివోలు గ్రామంలో స‌ర్పంచ్‌ కోదండం (ప్రేమ్ సాగ‌ర్‌), అత‌ని భార్య చాముండి (నిరోషా)లకు ఒక కొడుకు ఉంటాడు. అతని పేరు గోపాల్ ( సుద‌ర్శ‌న్‌). ఒక రోజు గోపాల్ ఆ ఊళ్లో వున్న నీళ్ల ట్యాంక్ పైకి ఎక్కి త‌ను ప్రేమిస్తున్న సురేఖ (ప్రియా ఆనంద్‌) క‌నిపించ‌డం లేద‌ని, ఆమెని త‌న తండ్రి కోదండ‌మే మాయం చేశాడ‌ని ఆరోపిస్తాడు. గోపాల్ తాత న‌ర‌సింహం (రామ‌రాజు) ఎప్పుడు అవ‌కాశం ల‌భిస్తుందా..ఎప్పుడు కోదండంని ఊరి జ‌నాల ముందు వెదవని చేసి స‌ర్పంచ్ ప‌ద‌విని ద‌క్కించుకోవాలా అని ఎదురుచూస్తుంటాడు. గోపాల్ నీళ్ల ట్యాంక్ ఎక్క‌డంతో త‌ను చెప్పింది చేయ‌క‌పోతే దూకి ఆత్య‌హ‌త్య చేసుకుంటాడ‌ని, అందుకు ఒప్పుకుని సురేఖ ఎక్క‌డుందో వేతుకుదాం అని.. అందుకు ఎస్ ఐ వంశీను (సుశాంత్‌) పురమాయిస్తాడు. ఇంత‌కీ సురేఖ ఎవ‌రు? త‌ను ఎక్క‌డ‌కి వెళ్లింది? త‌నని వంశీ తిరిగి తీసుకొచ్చాడా? త‌ను ఎందుకు ఇంటి నుంచి పారిపోయింది? లాంటి అనేక ప్రశ్నలకు సమాధానమే ఈ వెబ్ సిరీస్ అస‌లు క‌థ.

విశ్లేషణ: మా నీళ్ళ ట్యాంక్ వెబ్ సీరీస్ మూల కథ, పాత్రల చిత్రణ మరియు నేపథ్యం చూస్తే హిందీలో బాగా పాపులర్ అయిన అమెజాన్ ప్రైమ్ వెబ్ సిరీస్ ” పంచాయత్” గుర్తుకు వస్తుంది. అయితే ఆ పోలిక అంత వరకే. తెరకెక్కించిన విధానంలో ఎక్కడా పొంతన లేదు.

రాయ‌లసీమ ప్రాంతంలో జరిగే క‌థ కాబట్టి నటీనటులందరి చేతా రాయ‌ల‌సీమ యాస‌తో మాట్లాడించారు.. అది బాగుంది..అయితే కామెడీకి ఎక్కువ ఆస్కారం ఉన్న ఈ వెబ్ సిరీస్ లో స‌ర్పంచ్ ప‌ద‌వి కోసం సాగే రాజ‌కీయాలు, నీళ్ల ట్యాంక్, ఓ అమ్మాయి మానసిక సంఘర్షణ వంటి ఎన్నో అంశాలు ఉన్నా.. 8 ఎపిసోడ్ లుగా నాలుగు గంట‌ల‌కు పైగా నిడివితో సాగే అవసరం కానీ అంత సేపు బోర్ కొట్టకుండా తరువాత ఏమవుతుంది అని చూసేలా చేయడంలో దర్శకురాలు సఫలం అవ్వలేదు.

పేరుకు హీరో అయినా సుశాంత్ కి ఏమాత్రం ప్రాధాన్యత కానీ, నటనకు అవకాశం కానీ లేవు ఒక్క క్లైమాక్స్ లో తప్ప. ఏం చూసి సుశాంత్ ఈ పాత్రను ఒప్పుకున్నారు అనేది అర్థం కాదు. ఇక హీరోయిన్ గా ప్రియా ఆనంద్ పాత్రలో చిత్రణ, నేపథ్యం ఆకట్టుకునేలా ఉన్నా, మరింత బలంగా, ప్రభావ వంతంగా ఉండేలా చూసుకోవాల్సింది. ఇక ఈతరంలో తెలుగు తెరపై మంచి కమెడియన్ గా నటిస్తున్న సుదర్శన్ కు ఈ వెబ్ సిరీస్ లో చక్కని పాత్ర లభించింది. అతని నటన కూడా అద్భుతంగా ఉంది. ఇక మిగిలిన నటీనటుల్లో ప్రేమ్ సాగర్ ఆకట్టుకుంటారు. వాసు ఇంటూరి, ఒకప్పటి హీరోయిన్ నిరోషా తదితరులు పరవాలేదు.

ఇక సాంకేతిక భాగాలు అయిన కెమెరా వర్క్, మాటలు బాగున్నాయి. పాటలు కూడా పరవాలేదు కానీ నేపథ్య సంగీతం మరింత బాగుండాల్సింది.

మొత్తంగా చక్కని ఎత్తుగడ, ఆసక్తికరమైన పాత్రలు, నేపథ్యం ఉన్నప్పటికీ.. తెరకెక్కించే విధానంలో నాణ్యత, సృజనాత్మకత లోపించిన కారణంగా ” మా నీళ్ళ ట్యాంక్” ఎండిపోయిన బావి లాగా తయారయింది.

థియేటర్ల వ్యవస్థ రోజు రోజుకూ కుంటు పడుతుంది. ఎలాంటి ఇబ్బందీ లేకుండా థియేటర్లను నిర్వహించడం యాజమాన్యాలకు సాధ్య పడట్లేదు. అప్పులు చేసి, ఇక్కట్లు పడి థియేటర్లను నడిపే కంటే వాటిని మూసి వేయడమే మంచిదనే భావనలో ఎక్జిబిటర్లు ఉన్నట్లు తెలుస్తుంది.

వారి బాధలో న్యాయం లేకపోలేదు. ఎందుకంటే కరోనా పాండేమిక్ తరువాత ప్రేక్షకుల అభిరుచులు.. అలవాట్లు మారాయి. ఒకప్పుడు 10 సినిమాలు రిలీజ్ అయితే అందులో 6,7 సినిమాల వరకు హీరో పెద్దా చిన్నా అని తేడా లేకుండా చూసేవారు. కానీ ఇప్పుడు ఆ పరిస్థితి లేదు. భారీ బడ్జెట్ సినిమా అయితేనో.. లేదా పెద్ద హీరో సినిమా బాగా ప్రచారం జరిగి వస్తేనో ప్రేక్షకులు కదలట్లేదు. . ఈ కష్టాలు పడలేక ఆంధ్ర ప్రదేశ్ లో 400 ధియేటర్లు మూసి వేయడానికి నిర్ణయించుకున్నారు.

ఒకప్పుడు పెద్ద సినిమాలకి థియేటర్లులు కళకళ లాడేవి. అదే మీడియం రేంజ్ సినిమాకు ఐతే కనీసం మోస్తరు స్థాయిలో ప్రేక్షకులు హాజరు అయ్యేవారు. కానీ ఇప్పుడు ఆ పరిస్థితి లేదు. ముఖ్యంగా అటు చిన్న సినిమాగా కాక ఇటు పెద్ద సినిమాగా కాకుండా పోయిన సినిమాలకు అస్సలు ఆదరణ ఉండట్లేదు. ఓటీటీ విప్లవం వల్ల కొన్ని రోజులు ఆగితే ఇంట్లోనే చూసుకోవచ్చు అన్న భావన ప్రేక్షకులలో పెరిగిపోయింది అని పంపిణీదారులు అంటున్నారు.

ఒక థియేటర్ నడిపించాలి అంటే నెలకు 3 లక్షల వరకూ ఖర్చు ఉంటుంది. అదే ఒక ఆటకు అయితే 2 వేల నుంచి 5 వేల వరకూ ఖర్చు అవుతుంది. అయితే ప్రేక్షకుల హజరుకు గ్యారంటీ అనేది లేకపోవడంతో.. ప్రస్తుతం థియేటర్ల యాజమాన్యాలు కొన్ని రోజులు ధియేటర్లను మూసివేయడం అనే నిర్ణయాన్ని తీసుకోవాల్సి వచ్చింది.

ప్రస్తుతం అన్ని పరిశ్రమలు, ప్రజల దైనందిన జీవితాలు ఆర్థిక సమస్యలతో సతమతం అవుతున్న దశలో.. థియేటర్ల వ్యవస్థ కూడా కష్టాలు ఎదురుకోక తప్పదు. తొందరలోనే ఈ పరిస్థితి మారాలని, సమస్యలు అన్నీ తొలగిపోయి మళ్ళీ సినిమాలతో, ప్రేక్షకులతో థియేటర్లులు నిండిపోవాలి అని కోరుకుందాం.