తెలుగు సినిమా పరిశ్రమలో ఉన్న సమస్యల దృష్ట్యా నిర్మాతల మండలి ఆగస్ట్ మొదటి తారీఖు నుంచి షూటింగులను ఆపేసిన సంగతి తెలిసిందే. అయితే తాజాగా అందుతున్న సమాచారం ప్రకారం నిర్మాతల మండలి ప్రకటించిన షూటింగ్ సమ్మెను విరమించారని తెలుస్తోంది. కొన్ని వారాల క్రితం ఆగిపోయిన సినిమా షూటింగ్‌లు ఇప్పుడు తక్షణం అమలులోకి రానున్నాయి.

టాలీవుడ్ ప్రముఖ నిర్మాత దిల్ రాజు, నిర్మాతల మండలి ఇటీవల తీసుకున్న కొన్ని నిర్ణయాలు వివాదానికి దారి తీశాయి. స్టార్ హీరోలు మరియు దర్శకుల పారితోషికాలను లక్ష్యంగా చేసుకుని వాటి పై నియంత్రణ తేవాలని నిర్మాతల మండలి ప్రయత్నించింది. గత నెలలో వరుస ఫ్లాప్‌లతో తెలుగు సినీ పరిశ్రమ సంక్షోభంలోకి వెళ్ళిపోతున్న దశలో ఈ ప్రకటన చేయబడింది.

అయితే నిర్మాతల మండలి చేసిన ప్రయత్నాల్ని స్టార్ హీరోలు మరియు స్టార్ డైరెక్టర్లు ఏమాత్రం ఇష్ట పడలేదు. సినిమాల పరాజయాల కారణంగా తమ రెమ్యూనరేషన్లను తగ్గించుకోబోము అనే ఆలోచన లోనే వారు ఉన్నారు. తమ స్టార్ డం తో సినిమాలు విజయవంతం అవుతున్నాయని, అంతే కాక తమ బ్రాండ్ వాల్యూతో ప్రేక్షకులను థియేటర్ వద్దకు లాగగలుగుతున్నారని భావిస్తున్నారు.

అశ్విని దత్, బండ్ల గణేష్ వంటి నిర్మాతలు ఈ సందర్భంగా దిల్ రాజుకు వ్యతిరేకంగా బహిరంగంగా ప్రకటనలు చేశారు. ఎందుకంటే తెలుగు సినీ నిర్మాతల గిల్డ్ నిర్ణయాలలో ముఖ్య పాత్ర పోషిస్తున్నది దిల్ రాజు కాబట్టి. ఈ మేరకు తన సినిమాల షూటింగ్‌లను ఆపేది లేదని అశ్వినీదత్ ఇదివరకు స్పష్టం చేశారు. “మా ప్రొడక్షన్స్ దిల్ రాజు నిబంధనలలో భాగం కావు. మేము మా షూటింగ్ కొనసాగిస్తాము” అన్నారాయన.

అయితే విచిత్రంగా ఏ ఆగస్టు నుంచి షూటింగులు బంద్ చేశారో.. అదే నెలలో టాలీవుడ్‌ తిరిగి పూర్వ వైభవాన్ని అందుకోవడం విశేషం. రెండు వారాల్లో బింబిసార, సీతా రామం, కార్తికేయ 2 రూపంలో మూడు సూపర్‌ హిట్‌లు రావడంతో సినిమాలో సరైన విషయం ఉంటే చాలు ప్రేక్షకులు ఆదరిస్తారని తేలిపోయిందని, రెమ్యునరేషన్‌లు లేదా ఓటిటిలను బూచిగా చూపే అవసరం లేదని తేలిపోయింది.

థాంక్యూ, పక్కా కమర్షియల్, ది వారియర్ మరియు రామారావు ఆన్‌ డ్యూటీ వంటి సినిమాలు ఫ్లాప్ అవడానికి కారణం ఆ సినిమాల్లో సరైన కంటెంట్ లేనందు వల్లే కానీ మరే కారణం చేత కాదు. అదే విధంగా ఈ మధ్య వచ్చిన హిట్ సినిమాలు కొత్తదనంతో పాటు ఏదో ఒక ఆసక్తికరమైన అంశాలను అందించి భారీ కలెక్షన్లను రాబడుతున్నాయి. ఇదే ఇప్పుడు సక్సెస్ ఫార్ములా.

ప్రముఖ నిర్మాత అశ్విని దత్ ప్రస్తుతం సీతా రామం చిత్రం విజయం తర్వాత చాలా సంతోషంగా ఉన్నారు. ఇండస్ట్రీ అంతా సినిమాలు మునుపటిలా ఆడతాయా లేదా అన్న అనుమానాలు వ్యక్తం చేస్తున్న తరుణంలో సీతా రామం సినిమా ఘన విజయంతో ఆ చిత్ర నిర్మాత అయిన అశ్విని దత్‌తో పాటు సినీ పరిశ్రమకు కూడా ఊపిరి పోసింది అని చెప్పాలి.

ఇదిలా ఉండగా ఈటివిలో ప్రసారం అయ్యే హిట్ టాక్ షో అలీ తో సరదాగాలో అశ్విని దత్ పాల్గొన్నారు.ఈ మేరకు అలీతో జరిపిన మాటల సందర్భంగా, నిర్మాతల మండలి మరియు ఇతర సమస్యల గురించి అశ్విని దత్ మాట్లాడారు. ఒకానొక స్టార్ హీరోకి ఓ నిర్మాత 100 కోట్ల రెమ్యునరేషన్ ఆఫర్ చేశాడని అశ్విని దత్ చెప్పారు. కాగా అందులో యాభై శాతం అడ్వాన్స్‌గా ఇచ్చేసి, మిగిలిన మొత్తాన్ని షూటింగ్ తర్వాత చెల్లించాలని ఆ నిర్మాత ప్లాన్ చేసినట్లు చెప్పారు.

విచిత్రం ఏంటంటే అదే నిర్మాత నటీనటుల భారీ పారితోషికాల విషయంలో నిర్మాతల మండలి సమ్మెలో పాల్గొన్నారని అశ్విని దత్ పేర్కొన్నారు. ఆ నిర్మాత ఒక వైపు ఇలా హీరోలకు భారీ రెమ్యూనరేషన్లు ఇస్తూ, మరో పక్క నిర్మాతల మండలి సమ్మెలలో పాల్గొనడం ద్వారా ఏమి చెప్పాలనుకుంటున్నాడని, తద్వారా ఆ నిర్మాత ద్వంద్వ వైఖరిని అశ్విని దత్ బయట పెట్టారు.

అయితే ఈ విషయం చెప్తున్నప్పుడు అశ్విని దత్ ఎవరి పేర్లను తీసుకోనప్పటికీ, ఆయన మాట్లాడింది డివివి దానయ్య గురించే మాట్లాడుతున్నట్లు కనిపిస్తోంది. ప్రస్తుతం డివివి దానయ్య నిర్మాతగా వ్యవహరిస్తున్న మారుతీ, ప్రభాస్‌ల సినిమాకి సంబంధించి పారితోషికం విషయంలో పుకారు ఉంది. అయితే ఇప్పుడు ప్రభాస్-మారుతి సినిమా నుండి దానయ్య తప్పుకున్నారని ఇండస్ట్రీ వర్గాలు అంటున్నాయి. అదీ కాక పక్కా కమర్షియల్ భారీ పరాజయం పాలయిన దశలో అసలు ప్రభాస్ మారుతిల కాంబినేషన్లో అనుకున్న ప్రకారం సినిమానే ఉండకపోవచ్చని కూడా ఒక పుకారు కూడా ఉంది. మరి ఆ సినిమా ఉంటుందో లేదో ఈ వార్త నిజమో తెలియాలంటే కొన్ని రోజులు ఆగక తప్పదు.

ప్రస్తుతం తెలుగు సినిమా పరిశ్రమలో స్టార్ హీరోల బ్లాక్ బస్టర్ సినిమాలను వారి పుట్టినరోజుకి మళ్లీ విడుదల చేసే ట్రెండ్ నడుస్తున్న విషయం తెలిసిందే . ఇటీవలే ఆగస్ట్ 9న సూపర్ స్టార్ మహేష్ బాబు పోకిరి సినిమాని విడుదల చేసుకుని మహేష్ అభిమానులు భారీ స్థాయిలో సంబరాలు చేసుకున్నారు. ఇక వారికి మేమేమీ తక్కువ కాదు అంటూ పవన్ కళ్యాణ్ పుట్టిన రోజు సందర్భంగా ఆయన అభిమానులు జల్సా విడుదల చేస్తుండగా, మెగాస్టార్ చిరంజీవి ఇంద్ర మరియు ఘరానా మొగుడు చిత్రాలను కూడా మళ్లీ విడుదల చేయడానికి ప్లాన్ చేస్తున్నారు. మరి ప్యాన్ ఇండియా స్టార్ మరియు యంగ్ రెబెల్ ప్రభాస్ అభిమానులు ఊరికే ఉంటారా.. వాళ్ళు కూడా ఈ ట్రెండ్ లో పాల్గొంటూ తమ అభిమాన హీరో పుట్టిన రోజున ప్రత్యేక షోలను ఏర్పాటు చేస్తున్నారు.

తాజాగా అందుతున్న సమాచారం ప్రకారం, అక్టోబర్ 23న ప్రభాస్ పుట్టినరోజు కోసం ఒకటి కాదు ఏకంగా మూడు సినిమాలను తిరిగి విడుదల చేయడానికి అతని అభిమానులు ప్లాన్ చేస్తున్నారు. ఈ మేరకు ప్రభాస్ పుట్టిన రోజు నాడు వర్షం, మిర్చి, ఛత్రపతి సినిమాల ప్రత్యేక షోలు ప్రదర్శించే ఏర్పాట్లు చేస్తున్నారట.

వర్షం సినిమా ప్రభాస్ కెరీర్ లోనే ఒక మైలురాయిగా నిలిచిన సినిమా. ప్రభాస్ అభిమానులకు మాత్రమే కాకుండా సాధారణంగా సినీ ప్రేమికులకు చాలా ప్రత్యేకమైన చిత్రం. ప్రభాస్ ను టాలీవుడ్‌లో స్టార్ హీరోగా నిలబెట్టిన ఈ సినిమాలో ప్రభాస్ – త్రిషల జంట ప్రేక్షకులను ఎంతగానో ఆకట్టుకుంది. సినిమా విడుదలై దాదాపు రెండు దశాబ్దాలు గడిచినా దేవిశ్రీప్రసాద్ అందించిన ఎవర్గ్రీన్ సంగీతం మరియు సినిమాని ఇప్పటికీ ప్రేక్షకులు మరచిపోలేదు.

ఇక రాజమౌళి దర్శకత్వంలో వచ్చిన చత్రపతి సినిమా ప్రభాస్ ను ఒక మాస్ యాక్షన్ హీరోగా నిలబెట్టింది. అంతే కాకుండా భావోద్వేగాలతో కూడుకున్న ప్రభాస్ నటన, వీరోచితంగా చేసిన పోరాట సన్నివేశాలు ఇప్పటికీ అందరూ అంతే ఆసక్తిగా చూస్తారు. ప్రభాస్ అభిమానులకు మరియు మాస్ ప్రేక్షకులకు ఇదే ఫేవరెట్ సినిమా అనడంలో ఎలాంటి సందేహం లేదు.

చివరిగా మిర్చి సినిమా.. దర్శకుడు కొరటాల శివ తొలి చిత్రంగా తెరకెక్కిన ఈ సినిమా ప్రభాస్ ను అటు సూపర్ స్టైలిష్ గా ఇటు ఊర మాస్ టచ్ లో చూపించారు. పక్కా కమర్షియల్ సినిమాకు కావాల్సిన అన్ని అంశాలు ఉన్న మిర్చి సినిమా ఆ సమయానికి ప్రభాస్ కెరీర్ లోనే బిగ్గెస్ట్ హిట్ గా నిలిచింది. ప్రభాస్ యొక్క స్టైలిష్ లుక్స్ మరియు ఉర్రూతలూగించే ఫైట్స్ ఈ చిత్రానికి ప్రధాన ఆకర్షణగా చెప్పుకోవచ్చు.