సినిమా ఇండస్ట్రీలో హిట్లు ప్లాపులు అనేవి సర్వ సాధారణం. ఎందుకంటే ఇది గ్యారంటీ లేని ఇండస్ట్రీ. పక్కా హిట్ అనుకున్న సినిమాలు అట్టర్ ఫ్లాప్ లు అవడం.. అసలు ఆడుతుందో లేదో అనుమానం ఉన్న సినిమాలు సూపర్ హిట్ లు అవడం చాలా సార్లు జరిగింది.. ఇక ముందు కూడా అలానే ఉంటుంది. ఐతే ఒక సినిమా విజయం సాధిస్తే ఆ చిత్రానికి సంభందించిన అందరూ లాభాల బాట పడతారు. అదే పరాజయం పాలైతే నష్టాలను మూటగట్టుకుంటారు. ఒక్కో సారి భారీ డిజాస్టర్స్ సినిమాలు వస్తుంటాయి. ఆ సమయాల్లో భారీ రేట్లకు కొనుగోలు చేసిన బయ్యర్లు మాత్రం తీవ్రంగా నష్టపోవాల్సి వస్తుంది. అలాంటప్పుడే నిర్మాతలకు, డిస్ట్రిబ్యూటర్లకు మధ్య సమస్యలు మొదలవుతాయి.

ఎందుకంటే కొందరు నిర్మాతలు లేదా హీరోలు తమకి సినిమా పట్ల, పరిశ్రమ పట్ల ఉన్న బాధ్యతతో ఆయా నష్టాలలో కొంత వరకు భర్తీ చేస్తుంటారు.. అది డబ్బు తిరిగి ఇచ్చే రూపంలో అయినా కావచ్చు లేదా తదుపరి సినిమాకు రేట్లు సర్దుబాటు చేయడం కావచ్చు ఒక్కొక్కరూ ఒక్కో పద్ధతిని అనుసరిస్తుంటారు. కొందరు నిర్మాతలు మాత్రం ఇలాంటి విషయాల్లో సరిగ్గా స్పందించకుండా వ్యవహరిస్తుంటారు. ప్రస్తుతం తెలుగు సినిమా పరిశ్రమలో తాజాగా ఒక సినిమా భారీ పరాజయం పాలయింది.

ఇటీవల కాలంలో భారీ అంచనాలతో విడుదలైన “లైగర్” బాక్సాఫీస్ వద్ద బిగ్గెస్ట్ డిజాస్టర్ గా సినిమాగా నిలిచిన సంగతి తెలిసిందే. పూరీ జగన్నాథ్ దర్శకత్వంలో తెరకెక్కిన ఈ చిత్రంలో విజయ్ దేవరకొండ మరియు అనన్య పాండే జంటగా నటించారు. ధర్మ ప్రొడక్షన్స్ తో కలిసి పూరీ కనెక్ట్స్ బ్యానర్ పై పూరీ మరియు ఛార్మీ కౌర్ ఈ సినిమాని నిర్మించారు.

ప్యాన్ ఇండియా స్థాయిలో ఆగస్ట్ 25న రిలీజ్ అయిన ఈ స్పోర్ట్స్ యాక్షన్ డ్రామా సినిమా భారీ పరాజయాన్ని చవిచూసింది. అయితే ఆ సినిమా బాక్స్ ఆఫీసు వద్ద ‘లైగర్’ ఫలితం దారుణంగా వచ్చిన తరువాత డిస్ట్రిబ్యూటర్లకు మరియు పూరీ- ఛార్మీల మధ్య నష్టాలకు సంభందించి రకరకాల వార్తలు వచ్చాయి.

రిలీజ్ కు ముందు ‘లైగర్’ చుట్టూ నెలకొన్న అద్భుతమైన హైప్ వల్ల బయ్యర్లు ఆ చిత్రాన్ని అధిక రేట్లకు ఈ చిత్రాన్ని కొనుగోలు చేశారు. అయితే సినిమా డిజాస్టర్ అవడంతో డిస్ట్రిబ్యూటర్స్ అందరూ భారీ నష్టాలను చవిచూశారు. దీంతో పూరీ మరియు ఛార్మి వారికి పరిహారం చెల్లించడానికి ముందుకు వచ్చారని ఆ మధ్య వార్తలు వచ్చాయి.

ప్రస్తుతం ఇండస్ట్రీలో వినిపిస్తున్న టాక్ ప్రకారం పూరి జగన్నాథ్, లైగర్ సినిమా నష్టాలను తీర్చే పని ప్రారంభించారట, అయితే ఆయన నష్టపరిహారం ఇవ్వడానికి సిద్ధంగా ఉన్నా కానీ డిస్ట్రిబ్యూటర్లు ఆయన తిరిగిచ్చే అమౌంట్ తో సంతోషంగా లేరని సమాచారం. డిస్ట్రిబ్యూటర్లు తెలుగు రాష్ట్రాలకు పరిహారంగా 25కోట్ల భారీ మొత్తాన్ని అడుగుతుండగా పూరీ మాత్రం అందులో సగం మాత్రమే ఇచ్చేందుకు పూరీ సిద్ధంగా ఉన్నట్లు తెలుస్తోంది. మరి ఈ వ్యవహారం ఎక్కడ ఆగుతుందో చూడాలి.

ఇకపోతే ‘లైగర్’ ప్లాప్ తర్వాత పూరీ జగన్నాథ్ దర్శకత్వంలో విజయ్ దేవరకొండ – పూజా హెగ్డే హీరోహీరోయిన్లుగా తెరకెక్కాల్సిన ‘జనగణమన’ సినిమా దాదాపు ఆగిపోయినట్లే అంటున్నారు. నిర్మాతలు ఈ ప్రాజెక్ట్ నుంచి తప్పుకోవడమే ఇందుకు కారణంగా చెబుతున్నారు. అధికారిక ప్రకటన ఏదీ రాకపోయినా.. ఈ సినిమా ఆగిపోయిన వార్త దాదాపు ఖరారు చేసుకోవచ్చని అంటున్నారు

తెలుగు సినీ కార్మిక వేతనాల పై ఫెడరేషన్ ఏళ్ల తరబడి చేస్తున్న పోరాటం ఎట్టకేలకు ఫలించింది. గత కొంతకాలంగా సరైన నిర్ణయం తెలపని నిర్మాతలు దిగి వచ్చి జీతభత్యాల పెంపుకు వారి ఆమోదం తెలిపారు.

తెలుగు చలన చిత్ర వాణిజ్య మండలి కో-ఆర్డినేషన్ కమిటీ ఛైర్మన్ దిల్ రాజు ఆధ్వర్యంలో వాణిజ్య మండలి అధ్యక్షులు K. బసిరెడ్డి, గౌరవ కార్యదర్శి K.L. దామోదర్ ప్రసాద్, ప్రొడ్యూసర్స్ సెక్టార్ కౌన్సిల్ చైర్మన్ యేలూరు సురేందర్ రెడ్డి, తెలుగు చలన చిత్ర నిర్మాతల మండలి అధ్యక్షులు C.కళ్యాణ్, గౌరవ కార్యదర్శి T. ప్రసన్న కుమార్, మరియు తెలంగాణ రాష్ట్ర చలన చిత్ర వాణిజ్య మండలి గౌరవ కార్యదర్శిి అయిన కె. అనుపమ్ రెడ్డి, వీళ్ళందరితో పాటు ఇతర కమిటీ సభ్యులు మరియు తెలుగు ఫిలిం ఇండస్ట్రీ ఎంప్లాయిస్ ఫెడరేషన్ అధ్యక్షులు వల్లభనేని అనిల్ కుమార్, జనరల్ సెక్రటరీ P.S.N. దొర, కోశాధికారి సురేష్ లు పాల్గొన్న ఈ సమావేశంలో కార్మికుల వేతనాల పెంపు, మరియు వాటి విధి విధానాలన్నిటినీ ఖరారు చేశారు.

ఈ మేరకు తెలుగు చలన చిత్ర వాణిజ్య మండలి (TFCC) 2018 సంవత్సరంలో చేసిన ఒప్పందంను అనుసరించి.. కార్మికుల వేతనాలను పెద్ద సినిమాలకు 30 శాతం, చిన్న సినిమాలకు 15 శాతం పెంచేందుకు గానూ అంగీకరించారు. ఈ పెంచిన వేతనములు 01-07-2022 వ తేదీనుండి 30-06-2025 వరకు అమలులో ఉంటాయని, అలాగే ఏ సినిమా పెద్దది ఏ సినిమా చిన్నది అనే నిర్ణయం మాత్రం చలన చిత్ర వాణిజ్య మండలి మరియు ఎంప్లాయిస్ ఫెడరేషన్‌లతో కూడిన కమిటీ నిర్ణయిస్తుందని తెలిపారు.

టాలీవుడ్ సినీ ఇండస్ట్రీకి సంబంధించిన సినీ కార్మికులు వేతనాలు పెంచాలంటూ 22 జూన్ నుంచి సమ్మె చేస్తున్నట్టు నోటీసులు ఇచ్చిన సంగతి తెలిసిందే. అసలు జరిగిందెంటంటే గత రెండేళ్లుగా సినిమా పరిశ్రమ కోవిడ్ కారణంగా పెద్ద సంక్షోభాన్ని ఎదుర్కొంది. అలాంటి నేపథ్యంలో ఇటీవలే పరిశ్రమ కాస్త కోలుకుంటోంది. అయితే సినిమాలో నటించే హీరోలకు మాత్రం కోట్ల రూపాయలు పారితోషికంగా ఇచ్చే నిర్మాతలు .. కష్టపడి పని చేసే 24 క్రాఫ్ట్ మెంబర్స్‌కు మాత్రం తగిన వేతనాన్ని ఇవ్వడం లేదంటూ సినీ కార్మికులు ఆందోళన చేపట్టారు.

ఓ వైపు ధరలు అంతకంతకూ పెరిగిపోతున్న నేపథ్యంలో కుటుంబాన్ని పోషించడం చాలా సమస్యగా మారిందని.. తమ జీతం పెంచాలని కార్మికులు చాలా ఏళ్లుగా పోరాడుతున్నారు. పలు మార్లు నిర్మాతలతో చర్చలు జరిగినా వాటి వల్ల ఏ ఉపయోగం లేకుండా పోయింది. ఇదే విషయం మీద కార్మికులు చాలాసార్లు బంద్ కూడా పాటించారు. కానీ వారి సమస్య పరిష్కారం కాలేదు. కానీ క్రిందటి సారి ఇచ్చిన సమ్మె నోటీసు పని చేసింది. సరైన నిర్ణయం తీసుకుంటాం అని నోటీసు సమయంలో హామీ ఇచ్చిన నిర్మాతలు.. ఇటీవల పరిశ్రమ సమస్యల పరిష్కారానికి చొరవ చూపి నెల రోజుల పాటు షూటింగులు నిలిపివేసి అన్ని విషయాల పైనా కూలంకుశంగా చర్చించారు.

ఆ చర్చల పర్యవసానంలో ఎట్టకేలకు కార్మికుల వేతనాల పై నిర్మాతలు సానుకూల నిర్ణయం తీసుకోవడం పై సర్వత్రా హర్షం వ్యక్తమవుతోంది.

తమిళ యువ స్టార్ హీరో శివకార్తికేయన్, తెలుగు యువ దర్శకుడు అనుదీప్ కెవిల కలయికలో వస్తున్న ద్విభాషా చిత్రం “ప్రిన్స్”. ఈ చిత్రాన్ని ప్రకటించినప్పటి నుండి ప్రేక్షకులలో, ట్రేడ్ వర్గాల్లో కూడా చాలా ఆసక్తితో పాటు ఉత్కంఠ నెలకొంది.

శివకార్తికేయన్ వరుస విజయాలతో కెరీర్ లో మంచి ఊపు మీద ఉండటమే ఇందుకు కారణం. ఆయన నటించినగత రెండు చిత్రాలైన ” డాక్టర్”, ” డాన్” సినిమాలు బాక్స్ ఆఫీస్ వద్ద భారీ బ్లాక్ బస్టర్ లుగా నిలిచాయి. మరో విశేషం ఏమిటంటే ఆ రెండు చిత్రాలు తెలుగులో కూడా డబ్ అయి ఇక్కడ కూడా పంపిణీదారులకి మంచి లాభాలను తెచ్చిపెట్టాయి.

ప్రస్తుతం అద్భుతమైన ఫామ్ లో ఉన్న శివ కార్తికేయన్ విజయ పరంపర కొనసాగాలని ఆశిస్తూ ఉండగా.. అనుదీప్ కూడా ఇటీవల తన రచనలో వచ్చిన ఫస్ట్ డే ఫస్ట్ షో వంటి అట్టర్ ఫ్లాప్ తర్వాత తనదైన శైలిలో తిరిగి గట్టి విజయం సాధించాలని చూస్తున్నారు.

ఇక మంచి అంచనాలు ఏర్పరచుకున్న ప్రిన్స్ సినిమా తాలూకు శాటిలైట్ మరియు డిజిటల్ హక్కులు భారీ ధరకు విక్రయించడంతో సినిమా వ్యాపారం చాలా గొప్పగా ప్రారంభమైంది. శాటిలైట్ మరియు డిజిటల్ హక్కులు కలిపి స్టార్‌ సంస్థకు 42 కోట్లకు అమ్ముడయ్యాయి. ఈ సినిమా తెలుగు, తమిళ భాషల్లో కూడా మంచి థియేట్రికల్ బిజినెస్ చేస్తుందని ట్రేడ్ వర్గాలు అంచనా వేస్తున్నాయి.

శివకార్తికేయన్‌కు ప్రస్తుతం హీరోగా ఉన్న బ్రాండ్‌ కారణంగా ఈ సినిమా తమిళనాడులో ఖచ్చితంగా భారీ ఓపెనింగ్‌ను సొంతం చేసుకుంటుంది అని అందరూ బలంగా నమ్ముతున్నారు. ప్రేక్షకులను అలరించే విధంగా ఆయన ఎప్పుడూ నిలకడగా కామెడీ ఎంటర్‌టైనర్‌లను అందిస్తూ వస్తున్నారు. ఆయన గత సినిమాల తరహాలోనే ప్రిన్స్ కూడా ప్రేక్షకులని ఆకట్టుకుని విజయం సాధించే అవకాశాలు ఎక్కువగా ఉన్నాయి. ఎందుకంటే ఇలాంటి సినిమాలు శివకార్తికేయన్‌కి బలమైన జానర్ కాబట్టి, ఇక పబ్లిక్ టాక్ గనక పాజిటివ్‌గా ఉంటే, సినిమాని బ్లాక్‌బస్టర్ అవకుండా అపడం ఎవరి వల్లా కాదు.

పైగా దర్శకుడు అనుదీప్‌కి ఉన్న క్రేజ్‌తో తెలుగు రాష్ట్రాల్లో కూడా ప్రిన్స్‌కి మంచి ఓపెనింగ్స్ వస్తాయి. జాతిరత్నాలు సినిమాతో అనుదీప్ కామెడీని పండించిన తీరు ప్రేక్షకులకు బాగా నచ్చింది. విపరీతంగా నవ్వించే ఆయన డైలాగులు, సినిమాను తెరకెక్కించే తీరు తెలుగు ప్రేక్షకులను ఎంతగానో ఆకట్టుకున్నాయి. మొత్తంగా ప్రిన్స్ సినిమా తెలుగు, తమిళ్ రెండు భాషల్లోనూ భారీ బిజినెస్ చేయడమే కాకుండా అందుకు తగ్గ లాభాలను కూడా అందించి బ్లాక్ బస్టర్ అవుతుందని అంచనా వేస్తున్నారు.