వేతనాలు పెంచాలి అని డిమాండ్ చేస్తూ తెలుగు చిత్ర పరిశ్రమ లోని కార్మికులు సమ్మె చేపట్టిన సంగతి తెలిసిందే.అయితే సినీ కార్మికులు చేస్తున్న ఈ సమ్మె పై సీనియర్ నటుడు నరేష్ స్పందించారు.కరోనా వల్ల గత కొన్నేళ్లుగా సినిమా పరిశ్రమ ఎన్నో ఇబ్బందులు ఎదుర్కుందని, కాస్త బాగుపడే లోగా ఇలాంటి నిర్ణయాల వల్ల మళ్ళీ కొత్త సమస్యలు వస్తాయి అని ఆయన అభిప్రాయపడ్డారు.

ఈ విషయం పైనే ఆయన తన ట్విట్టర్ హ్యాండిల్ ద్వారా విడియోలు షేర్ చేసారు. నిన్నటి నుంచి టీవీలలో షూటింగ్ లు ఆగిపోతాయి అని ఒకటే వార్తలు మారుమోగిపోతున్నాయి అని ఆయన బాధ పడ్డారు. యూనియన్ కార్మికుల కోరికలు తీరేలా పరిశ్రమ పెద్దలు కలిసి సరైన నిర్ణయాలు తీసుకోవాలి అని,ఖచ్చితంగా తీసుకుంటారు అని ఆయన చెప్పారు.గత మూడు సంవత్సరాలుగా అన్ని పరిశ్రమల లాగే సినిమా ఇండస్ట్రీ కూడా దెబ్బతింది అని,ఆ దశలో కార్మికులు,చిన్న చిన్న ఆర్టిస్టులు తిండికి డబ్బులేక ఇబ్బందులతో పాటు వైద్యం చేయించుకోవడానికి వీలు లేక ప్రాణాలు సైతం కోల్పోయారు. పరిస్థితిలో ఈ మధ్యనే మార్పు వస్తుంది, మన తెలుగు సినిమా పరిశ్రమ గురించి అందరూ గొప్పగా చెప్పుకుంటున్నారు.మనందరి దగ్గర డబ్బులు దండిగా లేకున్నా,కనీసం కడుపు నిండుతుంది కదా అని ఆయన చెప్పుకొచ్చారు.

ఈ సమ్మె గురించి నిర్మాతలు,దర్శకులు ఆయనకు ఫోన్ చేశారని నరేష్ చెప్పారు.ఇప్పటికే కరోనా వల్ల నిర్మాతలు తీవ్ర ఇబ్బందులు ఎదురుకున్నారు అని,వడ్డీలు కట్టలేని పరిస్తితి నుంచి ఇప్పుడిప్పుడే బయట పడుతున్నారని,ఇలాంటి సమయంలో తొందర పడకుండా ఫెడరేషన్,నిర్మాతలు ఒక వారం లేదా పది రోజులలో కలిసి నిర్ణయానికి రావడం పెద్ద కష్టమేమీ కాదని, చివరిగా ఒక ఇండస్ట్రీ బిడ్డగా తను ఈ సమస్య పరిష్కారం కొరకు ఏం చేయడానికి అయినా సిద్ధమని, మనం దరం కలిస్తేనే ఒక కుటుంబం అని, సినీ పరిశ్రమ మళ్ళీ అంధకారం లోకి వెళ్లకుండా పెద్దలందరూ కలిసి మంచి నిర్ణయం తీసుకుంటే బాగుంటుంది అని నరేష్ అభిప్రాయపడ్డారు.

2008 లో వచ్చిన “కొత్త బంగారు లోకం”తో ప్రేక్షకులకి పరిచయమైన దర్శకుడు శ్రీకాంత్ అడ్డాల. తొలి చిత్రంతోనే చక్కని అభిరుచి గల దర్శకుడిగా పేరు తెచ్చుకున్న అడ్డాల ఆ తరువాత నాలుగేళ్లు గ్యాప్ తీసుకుని సూపర్ స్టార్ మహేష్ బాబు, విక్టరీ వెంకటేష్ ల కలయికలో “సీతమ్మ వాకిట్లో సిరిమల్లె చెట్టు” చిత్రం తో ఆశ్చర్య పరిచాడు.ఇద్దరు స్టార్ హీరోలతో చాలా సున్నితమైన కుటుంబ కథా చిత్రం తీసి ప్రేక్షకుల చేత శభాష్ అనిపించుకున్నాడు. మాస్ ఎలిమెంట్స్ ఏవీ లేకపోయినా మహేష్ క్యారెక్టర్ ను ఎంటర్టైనింగ్ గా తీర్చిదిద్దిన విధానం విమర్శకుల ప్రశంసలు అందుకుంది.

ఇప్పుడు మరోసారి శ్రీకాంత్ అడ్డాల ఇద్దరు హీరోలతో సినిమా చేయబోతున్నట్లు సమాచారం.విక్టరీ వెంకటేష్ – మాస్ రాజా రవితేజల కలయికలో ఆ సినిమా వస్తున్నట్టు వార్తలు వస్తున్నాయి. హీరోయిన్,ఇతర సాంకేతిక వర్గం వివరాలు ఇంకా తెలియాల్సి ఉంది.

సీతమ్మ వాకిట్లో సిరిమల్లె చెట్టు ఇప్పుడు తరువాత నాగ బాబు తనయుడు వరుణ్ తేజ్ ను పరిచయం చేస్తూ తీసిన “ముకుంద” సినిమా అనుకున్నంత స్థాయిలో ఆదరణ పొందకపోయినా, పాటలు మరియు కొన్ని సంభాషణలకు పేరు వచ్చింది.ఆ తరువాత మహేష్ బాబు తోనే మళ్ళీ జోడీ కట్టి తీసిన “బ్రహ్మోత్సవం” తెలుగు సినిమా ఇండస్ట్రీలోనే పెద్ద డిజాస్టర్ లలో ఒకటిగా నిలిచింది. కేవలం బాక్స్ ఆఫీస్ కాకుండా సినిమాలో ఉన్న పాత్రలు,సంభాషణలు, కథ,కథనం ఏవీ ప్రేక్షకులకు నచ్చకపోగా చాలా వరకు అసలు అర్థం కాకుండా సినిమా ఉందనే టాక్ ను తెచ్చుకుంది.

స్వతహాగా సాప్ట్ నేచర్ ఉండే పాత్రలు, నేపథ్యాలు ఎంచుకునే అడ్డాల కి గ్రామీణ వాతావరణం ముఖ్యంగా ఉభయ గోదావరి జిల్లాల యాస,అక్కడి మనుషుల మీద మంచి అవగాహన ఉంది. అయితే ఒక దర్శకుడుగా అవి మాత్రమే సరిపోవు కదా. సినిమాలో బలమైన కథ లేదా పాత్రలు ఉంటేనే అది ప్రేక్షకులను ఆకట్టుకునే వీలుంటుంది. తన అభిరుచుల తో పాటు దర్శకుడిగా సినిమా,రచన పై ఉండాల్సిన పట్టు కోల్పోవడం వల్ల అడ్డాల ఆ తరువాత చాలా రోజులు సినిమాకే దూరమయ్యారు.ఆరేళ్ల తరువాత అడ్డాల దర్శకత్వం వహించిన సినిమా “నారప్ప”, ఇది తమిళంలో వచ్చిన “అసురన్” కు రీమేక్. కరోనా వల్ల ఓటిటిలో విడుదల అయిన ఈ సినిమాకు మిశ్రమ స్పందన లభించింది. దీంతో ఇంక అడ్డాల మళ్ళీ ఫామ్ అందుకోవటం కష్టమే అనే అభిప్రాయం ఏర్పడింది.ఇప్పుడు తాజాగా ఇద్దరు హీరోలను డైరెక్ట్ చేసే అవకాశాన్ని అడ్డాల ఎలా ఉపయోగించుకుంటాడో చూడాలి.

మెగాస్టార్ చిరంజీవి హీరోగా నటించిన ఆచార్య సినిమా భారీ అంచనాల మధ్య ఏప్రిల్ లో విడుదలై బాక్సాఫీస్ వద్ద డిజాస్టర్గా నిలిచింది. ఇక ప్రస్తుతం మెగా అభిమానులందరూ మెగాస్టార్ తదుపరి సినిమాల పైనే ఆశలు పెట్టుకున్నారు. ప్రస్తుతం చిరంజీవి నటిస్తున్న మూడు సినిమాలు సెట్స్ మీద ఉన్నాయి.

మోహన్ రాజా డైరెక్షన్లో చిరంజీవి గాడ్ ఫాదర్ అనే సినిమాతో త్వరలో ప్రేక్షకుల ముందుకు రాబోతున్నారు. మలయాళంలో సూపర్ హిట్టయిన లూసిఫర్ అనే సినిమాకి తెలుగు రీమేక్ గా తెరకెక్కుతున్న ఈ చిత్రం పొలిటికల్ యాక్షన్ థ్రిల్లర్ గా ప్రేక్షకుల ముందుకు వస్తుంది. ఈ సినిమాలో మెగాస్టార్ చిరంజీవి ఒక సరికొత్త అవతారంలో ప్రేక్షకులను అలరించనున్నారు అని వినికిడి,అలాగే ఒరిజినల్ లో పృథ్వీరాజ్ పోషించిన పాత్రను తెలుగులో బాలీవుడ్ సూపర్ స్టార్ సల్మాన్ ఖాన్ నటిస్తున్నారు. చిరంజీవి,సల్మాన్ ఖాన్ పై ఒక అద్భుతమైన డాన్స్ నంబర్ సినిమాలో ఉంటుంది అని గట్టి ప్రచారం జరిగింది, అయితే ఆ పాటకు సంభందించిన షూటింగ్ ఇంకా జరగలేదు.

ఇక మరో సినిమా మెహర్ రమేష్ దర్శకత్వంలో రానున్న భోళా శంకర్. ఇది తమిళ చిత్రం వేదాలమ్ (2015) కి రీమేక్. ఇందులో హీరోయిన్ గా తమన్నా, చిరంజీవి చెల్లెలి పాత్రలో కీర్తీ సురేష్ నటిస్తున్నారు.మరో చిత్రం బాబీ దర్శకత్వంలో వస్తున్న సినిమా. అధికారికంగా ఈ చిత్రానికి టైటిల్ ఏదీ ఖరారు కానప్పటికీ “వాల్తేరు వీరయ్య” అనే టైటిల్ ప్రచారంలో ఉంది.ఈ మూడు సినిమాల్లో దాదాపు షూటింగ్ అంతా పూర్తి అయిన సినిమా గాడ్ ఫాదర్, ముందుగా చెప్పుకున్నట్టు కేవలం ఒక పాట చిత్రీకరణ మిగిలి ఉంది. ఇక భోళా శంకర్, వాల్తేరు వీరయ్య రెండు సినిమాలు కూడా యాభై శాతం షూటింగ్ పూర్తి చేసుకున్నాయి.

ముందుగా అనుకున్న ప్లాన్ ప్రకారం అయితే వీటిలో గాడ్ ఫాదర్ మొదటి సినిమాగా రిలీజ్ అయి, సంక్రాంతికి భోళా శంకర్, ఆ తరువాత వేసవి కాలంలో వాల్తేరు వీరయ్య రిలీజ్ చేయడానికి సన్నాహాలు చేస్తున్నారు అని వినిపించింది.అయితే తాజాగా వినిపిస్తున్న వార్తల ప్రకారం తన ఆలోచనలు చిరంజీవి మార్చుకున్నట్లు తెలుస్తుంది. స్ట్రెయిట్ సినిమా అయిన వాల్తేరు వీరయ్య ను దసరా కానుకగా విడుదల చేసి, గాడ్ ఫాదర్ ను సంక్రాంతికి, ఆ పై ఉగాదికి భోళా శంకర్ రిలీజ్ చేసే ఆలోచనలో ఉన్నట్టు తెలుస్తుంది. అయితే ఇవేవీ కూడా అధికారికంగా ప్రకటించలేదు, వీటిలో మళ్ళీ ఒక సినిమా అటు ఒక సినిమా ఇటు అయ్యే అవకాశాలూ లేకపోలేదు అంటున్నారు. మరి మెగాస్టార్ తన అభిమానులకి ఏ పండగకి ఏ సినిమా అందిస్తారో తొందరలోనే తేలిపోతుంది.