కేజీయఫ్ చాప్టర్ 2′ సినిమా బాక్సాఫీస్ వద్ద ఎంతటి సంచలనం సృష్టించిందో ప్రత్యేకంగా చెప్పనవసరం లేదు. బ్లాక్ బస్టర్ సినిమాగా నిలిచిన ‘కేజీఎఫ్’ పార్ట్ 1 కుకొనసాగింపుగా వచ్చిన ఈ భారీ యాక్షన్ సినిమా.. పాత రికార్డులన్నీటినీ బద్దలు కొట్టి సరికొత్త రికార్డులను నమోదు చేసింది. ఇటివలే ఈ చిత్రం విడుదలై 100 రోజులు పూర్తి చేసుకుంది.

కేజీయఫ్ 2′ సినిమా థియేట్రికల్ రన్ లో ప్రపంచ వ్యాప్తంగా ఈ చిత్రం రూ. 1200 కోట్లకు పైగా గ్రాస్ వసూలు చేసినట్లు తెలుస్తోంది. మొత్తంగా 2022లో అత్యధిక గ్రాస్ కలెక్షన్లను సాధించిన సినిమాగా ‘కేజీఎఫ్ 2’ నిలిచింది. అంతేకాదు ప్రపంచ వ్యాప్తంగా అత్యధిక వసూళ్లు రాబట్టిన మూడో భారతీయ సినిమాగా రికార్డు సృష్టించడం మరో విశేషం. ఈ జాబితాలో ‘దంగల్’ సినిమా మొదటి స్థానంలో ఉంటే.. రెండో స్థానంలో మన ‘బాహుబలి 2’ చిత్రం ఉంది.

ఇక భారత దేశంలో అన్ని వెర్షన్లు కలిపి ‘KGF 2’ సినిమా దాదాపు రూ. 1000 కోట్ల గ్రాస్ వసూలు చేసింది. ఓవర్ సీస్ లెక్కలను మినహాయిస్తే ఇక హిందీ మార్కెట్ లో ‘దంగల్’ వంటి చిత్రాన్ని అదిగమించి నార్త్ ఇండియాలో బాహుబలి 2 తరువాత రెండో స్థానంలో నిలిచింది .. ఓవరాల్ గా ఆర్ ఆర్ ఆర్ సినిమా కలెక్షన్స్ ను అధిగమించిందీ కన్నడ సినిమా, రాబోయే రోజుల్లో ‘KGF 2’ రికార్డులను వేరే సినిమాలు కొల్లగొట్టడం అంత తేలికైన విషయం ఏమీ కాదు.

తాజాగా కేజియఫ్ -2 ఖాతాలో మరో రికార్డు చేరింది. అదేంటంటే భారత దేశంలో మల్టీప్లెక్సులలో అతి పెద్ద సంస్థ అయిన పీవీఆర్ సంభందించిన థియేటర్లలో 124 కోట్ల నెట్ కలెక్ట్ చేసి ప్రథమ స్థానంలో నిలిచింది. ఈ వరుసలో రెండో చిత్రంగా “ఆర్ ఆర్ ఆర్” 93.7 కోట్ల నెట్ కలెక్ట్ చేసింది. ఈ విషయాన్ని పీవీఆర్ పెట్టుబడిదారుల త్రైమాసిక సమావేశంలో తెలియజేశారు.

కేజీయఫ్’ చిత్రానికి కొనసాగింపుగా తెరకెక్కిన ”కేజీయఫ్ 2” చిత్రంలో శ్రీనిధి శెట్టి హీరోయిన్ గా నటించింది. బాలీవుడ్ స్టార్స్ సంజయ్ దత్ – రవీనా టాండన్ కీలక పాత్రలు పోషించారు. అర్చన జాయిస్ – ప్రకాష్ రాజ్ – రావు రమేష్ – ఈశ్వరీ రావు తదితరులు ఇతర పాత్రల్లో కనిపించారు.

హోంబలే ఫిలింస్ బ్యానర్ పై విజయ్ కిరగందూర్ ఈ పాన్ ఇండియా చిత్రాన్ని భారీ బడ్జెట్ తో నిర్మించారు. రవి బస్రుర్ దీనికి సంగీతం సమకూర్చారు. భువన్ గౌడ సినిమాటోగ్రఫీ నిర్వహించగా.. ఉజ్వల్ కులకర్ణి ఎడిటింగ్ వర్క్ చేశారు. ‘కేజీఎఫ్ 2’ చిత్రాన్ని తెలుగులో వారాహి చలన చిత్ర సంస్థ విడుదల చేసింది.

మెగాస్టార్ చిరంజీవి ‘ఆచార్య’ తరువాత మూడు చిత్రాల్లో నటిస్తున్న సంగతి తెలిసిందే. అయితే అందులో రెండు సినిమాలు రీమేక్ గా రూపొందుతున్నాయి. ఒకటి మలయాళ సూపర్ హిట్ సినిమా ‘లూసీఫర్’ ఆధారంగా తెరకెక్కిస్తున్నారు ‘గాడ్ ఫాదర్’ టైటిల్ తో రాబోతున్న ఈ సినిమాకి మోహన్ రాజా దర్శకత్వం వహిస్తున్నారు. ఇక తమిళ సూపర్ స్టార్ అజిత్ హీరోగా నటించిన ‘వేదాళం’ ఆధారంగా ‘భోళా శంకర్’ తెరకెక్కుతోంది. ఈ చిత్రానికి మెహర్ రమేష్ దర్శకత్వం వహిస్తున్నారు. ఇక బాబి డైరెక్ట్ చేస్తున్న మూడవ సినిమా మాత్రం స్ట్రెయిట్ సినిమాగా రూపొందుతోంది.’వాల్తేరు వీరయ్య’ అనే టైటిల్ తో రూపొందుతున్న ఈ సినిమాని మైత్రీ మూవీ మేకర్స్ అత్యంత భారీ స్థాయిలో ప్రతిష్టాత్మకంగా నిర్మిమిస్తున్నారు. అందుకే గాడ్ ఫాదర్ మారుతూ భోళా శంకర్ సినిమాల కంటే ఈ చిత్రానికే అటు అభిమానుల్లో ఇటు ప్రేక్షకుల్లో భారీ క్రేజ్ ఏర్పడింది. అందుకో మరో కారణం కూడా ఉంది. అదేంటంటే ఈ సినిమాలో మెగాస్టార్ తో కలిసి మాస్ మహారాజా రవితేజ నటిస్తుండటమే. ఈ చిత్రంలో ఒక కీలక పాత్రలో రవితేజ కనిపించబోతున్నారు. అయితే ఇందులో రవితేజ ఏ పాత్రలో నటించబోతున్నారు? .. ఆయన పాత్రకు చిరంజీవి పాత్రకున్న సంబంధం ఏంటీ? అన్న సందేహాలు గత కొన్ని రోజులుగా రవితేజ అభిమానులు మరియు మెగా అభిమానులలో తలకెత్తాయి.

ఇటీవలే సినిమా సెట్స్ లోకి రవితేజ అడుగు పెట్టిన విషయం తెలిసిందే. ఈ విషయాన్ని చిత్ర బృందం ఓ వీడియో ద్వారా వెల్లడించారు. ఆ వీడియోలో చిరంజీవి కారవాన్ డోర్ ఓపెన్ చేసి చేయి అందించడం, బదులుగా రవితేజ కన్ను గీటడం ప్రతీ ఒక్కరినీ ఆకట్టుకుంది. ఆ వీడియోకు బ్యాక్ గ్రౌండ్ లో శంకర్ దాదా ఎంబీబీఎస్ టైటిల్ సాంగ్ తో పాటు మాస్ తో పెట్టుకుంటే మడతడి పొద్ది పాట రీమిక్స్ గా రావడం ప్రేక్షకులను విపరీతంగా ఆకట్టుకుంది.

ఈ నేపథ్యంలో ఈ సినిమాకు సంబంధించిన మరో ఆసక్తికరమైన వార్త ఒకటి బయటికి వచ్చింది. రవితేజ మెగాస్టార్ ల పాత్రలు ఎలా వుంటాయి. వాళ్లిద్దరి మధ్య వున్న సంబంధం ఏంటీ అన్న విషయంలో తాజాగా ఒక అందమైన పుకారు బయటికి వచ్చింది.

ఈ సినిమాలో చిరంజీవి – రవితేజ సవతి సోదరులుగా కనిపించబోతున్నారట. ఇద్దరి తండ్రి ఒక్కడైనా తల్లులు మాత్రం వేరే అని, అలాగే ఈ సినిమాలో మాస్ మహారాజా రవితేజ సవతి తమ్ముడిగా కనిపించనున్నారని తెలిసింది. ఇక ఇద్దరి మధ్య మాస్ ప్రేక్షకులని ఉర్రూతలూగించేలా హై వోల్టేజ్ ఫైట్ లు మరియు సన్నివేశాలు దర్శకుడు బాబి ప్లాన్ చేశారని తెలుస్తోంది. ఈ వార్త ఇద్దరి అభిమానులకు ఆనందం తెప్పించడమే కాకుండా సినిమా పై అంచనాలు భారీగా పెరగడం ఖాయం అని చెప్పడంలో ఎలాంటి సందేహం లేదు.

గతంలో రవితేజ ‘అన్నయ్య’ సినిమాలో చిరంజీవి సోదరుడిగా నటించిన విషయం తెలిసిందే. శృతిహాసన్ హీరోయిన్ గా నటిస్తున్న ఈ సినిమాలో రవితేజకు జోడీగా కేథరిన్ నటిస్తున్నారని సమాచారం. ఇక ఈ చిత్రంలో రవితేజ పాత్ర నిడివి దాదాపు 30 నిమిషాల పాటు వుంటుందని చెబుతున్నారు. ఇక ఈ సినిమాలోని ఇతర ముఖ్య పాత్రల్లో బాబీ సింహా, రాజేంద్ర ప్రసాద్ మరియు వెన్నెల కిషోర్ నటిస్తున్నారు. ఈ చిత్రానికి కెమెరా ఆర్థర్ ఏ. విల్సన్, ఎడిటింగ్ నిరంజన్ దేవరమానె, సంగీతం దేవిశ్రీప్రసాద్.

తెలుగులో ఒక హీరో స్థాయిలో అభిమానులను సంపాదించుకున్న సాయి పల్లవి ఇటీవలే విరాటపర్వం సినిమాతో ప్రేక్షకులను పలకరించారు. ఆ సినిమా ఆశించిన స్థాయిలో విజయం సాధించలేదు. అయితే సాయి పల్లవి నటనకు మంచి ప్రశంసలు దక్కాయి. ఇక రెండు వారాల ముందు మరోసారి గార్గి అనే సినిమాతో మరోసారి ప్రేక్షకుల ముందుకు వచ్చారు. తమిళ, తెలుగు భాషల్లో తెరకెక్కిన ఈ సినిమా జూలై 15వ తేదీన ప్రపంచవ్యాప్తంగా భారీ ఎత్తున విడుదలైంది. ముందు నుంచి సినిమాకు పెద్దగా ప్రచారం జరగకపోయినా, సినిమా ట్రైలర్ విడుదల చేశాక ప్రేక్షకులకి సినిమా మీద ఆసక్తి పెరిగింది.

అలాగే రిలీజ్ కు ముందు రోజు సినిమాకు ప్రివ్యూలు వేసారు. ఆ ప్రీమియర్ షో చూసిన విమర్శకులు మరియ మీడియా సినిమాకి చాలా మంచి టాక్ చెప్పారు. ఇతర మెయిన్ స్ట్రీమ్ మీడియాలో కూడా రివ్యూలు బాగానే వచ్చాయి. అయితే బాక్స్ ఆఫీసు వద్ద సందడి మాత్రం అనుకున్నంత లేదు. కోర్ట్ రూమ్ డ్రామా, మరియు ఒక సున్నితమైన అంశంతో తెరకెక్కిన గార్గి సినిమా ఒక మంచి ప్రయత్నంగా పేరు తెచ్చుకుంది. ఇక కలేక్షన్ల పరంగానూ పరవాలేదు అనిపించుకుందీ చిత్రం.

సాయి పల్లవి నటనకు అద్భుత స్పందన లభించగా, సహాయక పాత్రలో నటించిన కాళి వెంకట్ నటనను కూడా పొగడ్తలతో ముంచెత్తారు విమర్శకులు మరియు ప్రేక్షకులు. అయితే ముందుగానే చెప్పుకున్నట్టు మనసు తట్టుకోలేని విధంగా ఉన్న కథా వస్తువు వల్ల ఈ చిత్రం జనరంజకమైన సినిమాగా ఆదరణ పొందలేకపోయింది. ఒక్కోసారి ఇలాంటి సినిమాలు రావాలి, సమాజంలో జరుగుతున్న ఘోర నేరాలను ప్రశ్నించాలి. కాబట్టి ఇతర సినిమాల లాగా కమర్షియల్ సూత్రాలలో ఈ చిత్రాన్ని కొలవడం సబబు కాదు.

ఈ నేపధ్యంలో ఈ చిత్రం ఓటిటి రిలీజ్ ఎప్పుడనే చర్చ కాస్త ప్రాధాన్యతను సంతరించుకుంది. ఎందుకంటే ఈరోజుల్లో ఒక సినిమా థియేటర్లలో విడుదల అవుతున్నపుడే ఏ ఓటీటి యాప్ లో వస్తుంది అని ఆలోచించే ప్రేక్షకులు కూడా ఉన్నారు. కాబట్టి ఆ వార్తలను తూచా తప్పకుండా ఫాలో అయ్యే ప్రేక్షకులు ఓటిటి రిలీజ్ కూడా ఒక విశేషమైన వార్త లాగా చూస్తారు.

తాజాగా వినిపిస్తున్న వార్తల ప్రకారం గార్గి సినిమా వచ్చే వారం అంటే ఆగస్ట్ రెండో తారీఖు నుంచి సోనీ లైవ్ (sony liv) లో స్ట్రీమ్ అవబోతుందని తెలిసింది. మరి ఓటిటి విడుదల తరువాత సాయి పల్లవికి, ఆవిడ సినిమాకి ఇంకెంత ఆదరణ లభిస్తుందో చూద్దాం.

తమిళ యువ స్టార్ హీరో.. జాతీయ ఉత్తమ నటుడు ధ‌నుష్ .. విభిన్నమైన, విలక్షణమైన పాత్రలతో తనకంటూ ప్రత్యేక గుర్తింపు తెచ్చుకున్నారు. ముఖ్యంగా ఆయన సామాన్య ప్రజలకి దగ్గరగా ఉండే పాత్రలు, వాళ్ళ జీవితాలను తెరపై చర్చించే సినిమాలు చూస్తూ తనకంటూ ఓ ప్రత్యేకతను సంపాదించుకున్నారు. అంతే కాకుండా కేవలం తమిళంకే పరిమితం కాకుండా.. హిందీలో పలు చిత్రాల్లోనూ నటించారు.

అంతే కాకుండా ధనుష్ ఇటీవల ఏకంగా అవెంజర్స్ దర్శకులతో కలిసి ది గ్రె మ్యాన్ అనే సినిమాలో నటించిన విషయం తెలిసిందే. అయితే ఆ సినిమాలో అతనికి అనుకున్నంత స్థాయిలో గుర్తింపు దక్కలేదు అనే మాట వాస్తవం. ఏదో అనుకుంటే ఇంకేదో తరహాలో కేవలం రెండు ఫైట్లు రెండు డైలాగులు పరిమితం అయింది ఆయన పాత్ర.

కానీ హాలీవుడ్ వరకు వెళ్ళడం అంటే మామూలు విషయం కాదు కదా. ఇది ఒక విధంగా భవిష్యత్తులో వచ్చే అవకాశాలు దారి ఇచ్చినట్లే అని చెప్పవచ్చు.ఇపుడు ధనుష్ దృష్టి తెలుగు సినీ పరిశ్రమ పై పడింది.

ఇప్పటికే శేఖర్ కమ్ముల దర్శకత్వంలో ఓ స్ట్రెయిట్ తెలుగు చిత్రంలో నటిస్తోన్న ధనుష్. దాంతో పాటు వెంకీ అట్లూరి దర్శకత్వంలో ‘సార్’ అనే సినిమా కూడా చేస్తున్న సంగతి తెలిసిందే. తాజాగా ఈ సినిమాకి సంబందించిన ఫస్ట్ లుక్ మరియు టీజర్ రిలీజ్ గురించిన వివరాలను చిత్ర బృందం ప్రకటించింది.

ఫస్ట్ లుక్ పోస్టర్ లో ధనుష్ టేబుల్ వద్ద కూర్చుని చీకట్లో లాంప్ వెలుతురులో ఏదో రాస్తున్నట్టు కనిపిస్తుంది. మరి అది అల్లరి మూకల పైన ఫిర్యాదు పత్రం అయి ఉంటుందా లేక ఏదైనా బలమైన సంఘటనకు సంబంధించిన కవిత్వం లేదా విప్లవ నినాదం అయి ఉంటుందా అని ఆ పోస్టర్ చూసిన ప్రేక్షకులు ఆలోచిస్తున్నారు. ఇక ఈ చిత్రం తాలూకు టీజర్ ను రేపు ధనుష్ పుట్టిన రోజు సందర్భంగా సాయంత్రం ఆరు గంటలకు విడుదల చేస్తున్నట్లు చిత్ర బృందం ప్రకటించింది.

తెలుగులో ‘సార్’ టైటిల్‌తో వస్తోన్న ఈ చిత్రం తమిళంలో మాత్రం ‘వాతి’ టైటిల్‌తో తెరకెక్కనుంది. ఈ సినిమాను సితార ఎంటర్టైన్మెంట్ పతాకంపై నాగ వంశీతో పాటు త్రివిక్రమ్ శ్రీనివాస్ సతీమని సాయి సౌందర్య నిర్మిస్తున్నారు. పీడీవీ ప్రసాద్ సమర్పకులుగా వ్యవహరిస్తున్నారు. ఈ చిత్రానికి జీవి ప్రకాష్ కుమార్ సంగీతం అందిస్తున్నారు.

దుల్కర్ సల్మాన్ హీరోగా, మృణాల్ ఠాకూర్ హీరోయిన్ గా హను రాఘవపూడి దర్శకత్వంలో తెరకెక్కిన చిత్రం ‘సీతా రామం’. ‘వైజయంతీ మూవీస్’ సమర్పణలో ‘స్వప్న సినిమా’ పతాకం పై స్టార్ ప్రొడ్యూసర్ అశ్వనీదత్ ఈ చిత్రాన్ని నిర్మించారు. ప్రస్తుతం తెలుగు సినిమా పరిశ్రమ లోనే కాదు ప్యాన్ ఇండియా స్టార్ హీరోయిన్ గా ఎదుగుతున్న రష్మిక మందన కూడా ఈ చిత్రంలో కీలక పాత్ర పోషించడం విశేషం.

అంతే కాదు బ్రిగేడియర్ విష్ణు శర్మ పాత్రలో సుమంత్ కూడా ఓ ప్రాముఖ్యమైన పాత్రలో కనిపించ బోతున్నారు. ఈ చిత్రంలో ఆయన లుక్ కు సంబంధించిన పోస్టర్ రిలీజ్ అవ్వడం, దానికి ప్రేక్షకుల నుంచి భలే ఆసక్తికరంగా ఉంది అన్న స్పందన లభించడం జరిగింది.

ఇటివలే విడుదలైన ఈ చిత్రం తాలూకు ట్రైలర్ చూశాక సినిమాలో సుమంత్ పాత్ర ఆకట్టుకునే విధంగా తయారు చేశారు అని ప్రేక్షకులు భావిస్తున్నారు. సీతారాముల ప్రేమ కథకి ఆయన పాత్ర ఏ రకంగా ఉపయోగ పడుతుంది అనే ఆలోచన ప్రేక్షకుల్లో వచ్చింది.

ఇక ‘ సీతా రామం’ ని తను నటించిన ‘గోదావరి’ వంటి క్లాసిక్ సినిమాతో పోల్చి అంచనాలు మరింత పెంచారు హీరో సుమంత్. 2006 లో దర్శకుడు శేఖర్ కమ్ముల కాంబినేషన్లో వచ్చిన “గోదావరి” చిత్రం ఎంత పేరు తెచ్చుకుందో ప్రత్యేకంగా చెప్పనక్కర్లేదు.

ఇప్పుడు ‘ గోదావరి ‘ చిత్రంతో ‘సీతా రామం’ ని పోల్చడంతో సుమంత్ వ్యాఖ్యలు ఇపుడు సోషల్ మీడియా వైరల్ అవుతున్నాయి. సుమంత్ మాట్లాడుతూ.. ” నేను ఈ ఈవెంట్ కి చాలా క్యాజువల్ గా వచ్చేసాను. కానీ మా హీరో దుల్కర్ సూటు బూటు వేసుకొని వచ్చాడు. ఎప్పుడు.. టీ షర్ట్ లు వేసుకునే మా డైరెక్టర్ కూడా షర్ట్ వేసుకుని వచ్చాడు.

వచ్చేసారి నుండి ప్రమోషన్స్ కు నేను కూడా సూటు బూటు వేసుకొనే వస్తాను. ఇక ఈ సినిమా 150 పేజీల కథ మొత్తం చదివిన తర్వాత ‘సీతా రామం’ దృశ్య కావ్యం అవుతుంది అని నాకు అనిపించింది. గతంలో నేను ‘గోదావరి’ అనే సీతారాముల కథ చేశాను ఆ సినిమా అందరికీ గుర్తుంది కదా. ఆ సినిమా అప్పుడు క్లాసిక్ గా నిలిచింది.

ఇప్పుడు ‘సీతా రామం’ కూడా అలాగే క్లాసిక్ అవుతుంది అని చెప్పడంలో ఎలాంటి సందేహం లేదు. ఈ సినిమా పై నాకు చాలా నమ్మకం ఉంది. నేను ఇందులో చాలా మంచి పాత్ర చేశాను. ఆగస్టు 5 తారీఖు కోసం ఎదురుచూస్తున్నాను. ఇది ఖచ్చితంగా అందరూ థియేటర్ లో చూడాల్సిన సినిమా. ఆగస్టు 5న అందరం థియేటర్లో కలుద్దాం” అంటూ చెప్పుకొచ్చారు సుమంత్.

గత కొంత కాలంగా తెలుగు సినీ నిర్మాతలు.. పరిశ్రమ ఎదురుకుంటున్న సమస్యల పై చర్చలు మరియు పలు నిర్ణయాలు తీసుకునే ఆలోచన చేస్తున్న విషయం తెలిసిందే. ఓ వైపు కరోనా వల్ల షూటింగ్ లు ఆగిపోయి నిర్మాణ వ్యయం పెరిగిపోయి నిర్మాతలు చాలా వరకు ఆర్థికంగా తీవ్ర ఇబ్బందుల్ని ఎదుర్కొంటున్నారు. మరో వైపు ఓటీటీల ప్రభావం పెరిగిపోవడంతో ప్రేక్షకులు థియేటర్లకు రావాలంటే ఆలోచించే పరిస్తితి ఏర్పడటం, ముఖ్యంగా పెరిగిన టికెట్ రేట్ల కారణంగా సినిమా థియేటర్లకు ప్రేక్షకులు రావడానికి ఆసక్తిని చూపించడం లేదనే భావన అటు ఇండస్ట్రీ వర్గాల్లోనూ.. ఇటు సినీ విమర్శకులు మరియు ట్రేడ్ వర్గాల్లోనూ ఉంది.

ఇక సినిమా బడ్జెట్ ను కాస్త తగ్గించి సినిమాలు నిర్మించే ప్రయత్నం చేయాలంటే స్టార్ హీరోలు, క్యారెక్టర్ ఆర్టిస్ట్ ల రెమ్యునరేషన్ భారీగా పెంచేశారని నిర్మాతలు వాపోతున్నారు. ఈ నేపథ్యంలో తాజా సమస్యలన్నింటినీ ఓ కొలిక్కి తీసుకురావాలన్న ఆలోచనతో నిర్మాతలు ఆగస్టు ఒకటో తారీఖు నుంచి సినిమాల షూటింగ్ లని నిరవధికంగా ఆపి వేయాలనే ఆలోచనకు వచ్చాయి.

ఈ మేరకు సోమవారం నిర్మాతల మండలి అత్యవసర భేటీని ఏర్పాటు చేసిన విషయం తెలిసిందే. ఈ మీటింగ్ లో ఓటీటీ లో సినిమాల రిలీజ్ లతో పాటు టికెట్ రేట్ల పై అలాగే ఇతర సమస్యల పై చర్చించారట. అయితే ఓటీటీల్లో సినిమాల రిలీజ్ లపై మాత్రం నిర్మాతలు అందరూ ఏకాభిప్రాయానికి రాలేదనే వార్తలు వినిపించాయి. దీంతో 27న మరోసారి నిర్మాతల మండలి సర్వసభ్య సమావేశాన్ని నిర్వహించాలని తలపెట్టింది.

అయితే ఇక్కడ గమనించాల్సిన విషయం ఏమిటంటే, రెమ్యునరేషన్ అనేది అయా నటుడు లేదా హీరో.. తనతో చిత్రం నిర్మించే నిర్మాతతో చర్చించుకుని తీసుకునే నిర్ణయం పరస్పరం లాభాలు మరియు నష్టాలు లెక్కించుకుని జరిగే ఒప్పందం. దాన్ని ఇలా ఏదో ఆఫీసులో జీతాలు నిర్ణయించినట్టుగా చర్యలు తీసుకోవడం లేదా ఫలానా అమౌంట్ వరకే ఇవ్వాలి అనడం ఏమాత్రం సబబు కాదు. అది అసలు కుదరని పనిగా చెప్పవచ్చు.

ఎందుకంటే ప్రస్తుతం యువ హీరోలు కూడా ప్యాన్ ఇండియా స్థాయిలో చిత్రాలు చేస్తున్నారు. అందుకు వారు శారీరకంగా మరియు మానసికంగా ఎంతో కష్టపడుతూ విలువయిన సమయాన్ని కూడా ప్రచార నిమిత్తం వెచ్చిస్తున్నారు. మరి ఆ కష్టానికి ధర వారు నిర్ణయించడమే సరైన పద్ధతి. ఏదైనా బేరం చేసి తగ్గించాలంటే అది సదరు సినిమా నిర్మాత చేయాలి కానీ ఇలా ఎన్ని మీటింగ్ లు పెట్టి ఎన్ని తీర్మానాలు చేసినా లాభం ఉండదు అందువల్ల జరిగే మార్పూ ఏదీ ఉండదు.