ఏడాది క్రితమే దర్శకుడు సురేందర్ రెడ్డి – పవర్ స్టార్ పవన్ కళ్యాణ్ కాంబినేషన్లో ఒక సినిమా చేయనున్నట్టు ప్రకటించారు. సురేందర్ రెడ్డి మరియు పవన్ కళ్యాణ్ తొలిసారి చేయబోతున్న సినిమా కావడంతో ఈ వార్త చాలా మంది అభిమానులను ఎంతగానో ఉత్సాహపరిచింది. కానీ నెమ్మదిగా, ఈ ప్రాజెక్ట్ గురించి e రకమైన వార్తలు రాకపోవడంతో సినిమా నిలిపివేయబడిందని అందరూ అనుకున్నారు. సురేందర్ రెడ్డి మరియు పవన్ కళ్యాణ్ మధ్య సృజనాత్మక విభేదాల కారణంగా.. చాలా మంది పరిశ్రమ సభ్యులు ఈ ప్రాజెక్ట్ ఆగిపోయినట్లు కూడా పేర్కొన్నారు.

అయితే తాజాగా ఈ సినిమా పై చిత్ర నిర్మాత రామ్ తాళ్లూరి ఒక స్పష్టత ఇచ్చినట్లు తెలుస్తోంది. ఈ సినిమా ఖచ్చితంగా ఉంటుందని, సినిమా ఏమీ ఆగిపోలేదు అని ఆయన తెలిపారు. పవన్ కళ్యాణ్ షెడ్యూల్ చాలా బిజీగా కారణంగా దీనిని తాత్కాలికంగా నిలిపివేసినట్లు ఆయన తెలిపారు.

ప్రస్తుతం సురేందర్ రెడ్డి తన తదుపరి అఖిల్ తో తీస్తున్న చిత్రం ఏజెంట్ సినిమా పనుల్లో బిజీగా ఉన్నారని నిర్మాత రామ్ పేర్కొన్నారు. ఏజెంట్ సినిమా పూర్తి చేసిన తర్వాత సురేందర్ రెడ్డి తన దృష్టిని పవన్ కళ్యాణ్ తో చేసే సినిమా వైపు మళ్లించనున్నారు అని సమాచారం.

ఇదిలా ఉంటే, పవన్ కళ్యాణ్ కూడా సురేందర్ రెడ్డితో తన సినిమాకి ముందు పలు చిత్రాలు పూర్తి చేయాల్సి ఉంది. ప్రస్తుతం ఆయన దర్శకుడు క్రిష్ తో కలిసి హరి హర వీర మల్లు సినిమాను ప్యాన్ ఇండియన్ స్థాయిలో తెరకెక్కించి భారీ విజయం సాధించాలనే పట్టుదలతో ఆ చిత్రం విడుదల కోసం ఎదురుచూస్తున్నారు. అలాగే గబ్బర్ సింగ్ వంటి బ్లాక్ బస్టర్ ఇచ్చిన దర్శకుడు హరీష్ శంకర్‌తో కూడా భవదీయుడు భగత్ సింగ్ అనే ఒక సినిమాని చేయాల్సి ఉంది. ఇక తమిళ నటుడు మరియు దర్శకుడు తెలుగులోనూ సుపరిచితుడు అయిన సముద్రఖని తో వినోదాయ సితం రీమేక్ ను కూడా ఓకే చేశారు. కాగా ఈ చిత్రంలో పవన్ కళ్యాణ్ తో పాటు ఆయన మేనల్లుడు సాయి తేజ్ కూడా కనిపిస్తారు. త్వరలోనే ఈ చిత్రం కూడా షూటింగ్ ప్రారంభించనుంది.

ఇవే కాకుండా పవన్ కళ్యాణ్ వచ్చే ఏడాది జరిగే ఎన్నికల కోసం కూడా సన్నద్ధం అవ్వాలి. అటు రాజకీయం ఇటు సినిమాలతో పవర్ స్టార్ షెడ్యూల్ చాలా టైట్ గా ఉంది. మరి ఆయన అన్ని పనులను సరిగ్గా బ్యాలెన్స్ చేస్తూ ముందుకు సాగి అన్నిట్లోనూ విజయం సాధించాలని కోరుకుందాం.

పూరి జగన్నాథ్ – విజయ్ దేవరకొండ కాంబినేషన్లో వచ్చిన లైగర్ భారీ డిజాస్టర్ గా నిలిచిన సంగతి తెలిసిందే. విడుదలకు ముందు విస్తృతంగా ప్రచారం జరిపిన చిత్ర యూనిట్ పై సోషల్ మీడియాలో తెగ ట్రోల్స్ పడుతున్నాయి. 

విజయ్ దేవరకొండ నటించిన `లైగర్` ఇటీవల విడుదలై బాక్సాఫీస్ వద్ద  ఆశించిన విజయాన్ని అందుకోలేకపోవడం పూరి, విజయ్ మరియు ఛార్మి బృందాన్ని తీవ్రంగా నిరాశపరిచింది. ఆశించిన స్థాయిలో విజయం దక్కకపోవడం అనేది సాధారణంగా పరిశ్రమలో జరిగేదే.. కానీ లైగర్ చిత్రం తొలిరోజు మినహా.. కనీస స్థాయిలో కూడా ధియేటర్లలో ప్రేక్షకుల సంఖ్యను నమోదు చేయడంలో విఫలం అయింది.

అది నిజంగా లైగర్ చిత్ర బృందాన్ని నీరుగార్చెలా చేసింది. అటు సమీక్షకులు ఇటు ప్రేక్షకులు ఈ సినిమాని తీవ్రంగా విమర్శించటంతో పాటునిర్మొహమాటంగా తిప్పికొట్టారు. ఇక బాక్స్ ఆఫీసు వద్ద తొలి నాలుగు రోజులకే సినిమా వసూళ్లు రావడం ఆగిపోయిన తరహాలో ఉండి ఇండస్ట్రీలోనే బిగ్గెస్ట్ డిజాస్టర్ గా నిలిచింది. సినిమాలో ప్రేక్షకులను కట్టిపడేసే అంశాలు ఏమీ లేవని అందరి నుంచీ స్పందన వచ్చింది.

కాగా లైగర్ సినిమా అన్ని పార్టీలకు బాక్సాఫీస్ వద్ద భారీ నష్టాలను తెచ్చిందని అందరికీ తెలిసిన విషయమే. సినిమా మీద ఉన్న హైప్ వల్ల అడ్వాన్స్ బుకింగ్స్ బాగా ఉండటం వల్ల తొలిరోజు  మంచి వసూళ్లని సాధించినా..  తర్వాత ఢీలా పడిపోయింది.

ఇక లైగర్ సినిమా నిర్మాణ దశలో, ఛార్మీ కౌర్ కీలక పాత్ర పోషించింది. ఆమెను ప్రజలు ఇష్టపడినా, ఇష్టపడకపోయినా, ఆమె లైగర్‌కి ఒక వెన్నెముకలా నిలిచింది. పూరితో కలిసి ఛార్మీ పెట్టిన పూరి కనెక్ట్స్ అనే సంయుక్త బ్యానర్‌లో ఆమె ఒక ప్రధాన పాత్ర పోషించారు. సినిమా ఖర్చు విషయంలో, ప్రచార కార్యక్రమాలలో ఆమె ముందుండి నడిపించారు. 
అలాగే మైక్ టైసన్ లాంటి లెజెండరీ పర్సన్ ను సినిమాలో నటించేందుకు ఒప్పించారు.

మరి ఇంతగా కష్టపడిన తరువాత సినిమా భారీ పరాజయం పొందడమే కాకుండా అంతకు మించి సోషల్ మీడియాలో వస్తున్న ట్రోల్స్ వస్తుండటంతో కొద్ది రోజులు సోషల్ మీడియాకు దూరంగా ఉండాలని ఛార్మీ నిర్ణయం తీసుకున్నారు.

ఈ నేపథ్యంలో చిత్ర  ఛార్మి సోషల్ మీడియాలో ట్విట్టర్ ద్వారా స్పందించారు. ఆవిడ ఇచ్చిన సందేశం ఏంటంటే.. “చిల్ గయ్స్! జస్ట్ టేకింగ్ ఏ బ్రేక్ (ఫ్రం సోషల్ మీడియా).. పూరి కనెక్ట్స్ మళ్లీ బౌన్స్ బ్యాక్ అవుతుంది.. ఇంతకంటే బిగ్గర్ గా బెటర్ గా.. అప్పటివరకూ మీరు బతకండి మమ్మల్ని బతకనివ్వండి!“ అన్నారు ఛార్మీ.

గత కొన్ని నెలలుగా గడ్డు కాలాన్ని ఎదురుకున్న తెలుగు సినిమా పరిశ్రమకు ఆగస్ట్ నెల మళ్ళీ పూర్వ వైభవాన్ని తీసుకు వచ్చింది. ఆగస్ట్‌లో టాలీవుడ్‌లో బాక్సాఫీస్ వద్ద బింబిసార, సీతారామం, కార్తికేయ 2 సినిమాలు అద్భుతమైన కలెక్షన్లు సాధించిన తర్వాత, సెప్టెంబర్ నెల కూడా అదే విధంగా మంచి రోజులు కొనసాగిస్తుందని ట్రేడ్ వర్గాలు చాలా ఆశలు పెట్టుకున్నారు. లైగర్ మినహా, ఆగస్ట్‌లో విడుదలైన తెలుగు చిత్రాలు దాదాపు అన్ని బాక్సాఫీస్ వద్ద బ్లాక్‌ బస్టర్‌లుగా నిలిచాయి, పంపిణీదారులు మరియు ఎగ్జిబిటర్‌లకు ఎంతో ఆనందాన్ని ఇచ్చాయి.

కాగా ఈ వారం మూడు కొత్త సినిమాలు విడుదలయ్యాయి. తమిళ హీరో చియాన్ విక్రమ్ నటించిన కోబ్రా చిత్రం గణేశుని పండుగ సందర్భంగా విడుదలైంది. సెలవు రోజున విడుదల అవడం వల్ల బాక్సాఫీస్ వద్ద తొలి రోజు అద్భుతమైన కలెక్షన్లను సాధించింది. కానీ సినిమాకి టాక్ నెగటివ్ గా రావడంతో తరువాతి రోజుల్లో అదే ఊపును కొనసాగించలేకపోయింది. అయినప్పటికీ, తక్కువ బిజినెస్ జరిగిన కారణంగా బయ్యర్స్ పెద్దగా నష్టపోలేదు.

ఇక శుక్రవారం తక్కువ హైప్‌తో విడుదలైన రెండు తెలుగు సినిమాలు కూడా ఉన్నాయి. వైష్ణవ్ తేజ్ హీరోగా తెరకెక్కిన రంగ రంగ వైభవంగా, మరియు అనుదీప్ కెవి రచించిన ఫస్ట్ డే ఫస్ట్ షో సెప్టెంబర్ 2న విడుదలయ్యాయి.

రంగ రంగ వైభవంగా చాలా సాధారణ స్థాయిలో తొలి రోజు ఓపెనింగ్స్ ను తెచ్చుకుంది. సినిమాకు బ్యాడ్ టాక్ త్వరగా వ్యాపించడంతో..ఈ చిత్రం రెండవ రోజునే బాక్స్ ఆఫీస్ వద్ద దారుణంగా కుప్పకూలింది. డబ్బింగ్ సినిమా అయిన కోబ్రా చిత్రం రంగ రంగ వైభవంగా కంటే ఎక్కువ వసూలు చేయడం గమనార్హం. మొత్తంగా రంగ రంగ వైభవంగా చిత్రం కొనుగోలుదారులకు భారీ నష్టం తెచ్చే వైపు పరుగులు తీస్తుంది. వారు పెట్టిన ఖర్చులో దాదాపు 70 శాతం కంటే ఎక్కువ నష్టపోతారని ట్రేడ్ వర్గాలు భావిస్తున్నాయి.

ఇక జాతిరత్నాలు దర్శకుడు అనుదీప్ కథ అందించి మెంటర్ గా వ్యవహరించిన ఫస్ట్ డే ఫస్ట్ షో సినిమా తొలిరోజునే అట్టర్ ఫ్లాప్ గా నిలిచింది. అసలు తొలిరోజే జీరో షేర్ సాధించి బాక్స్ ఆఫీసు వద్ద వాషౌట్ అయింది.

సూపర్ స్టార్ మహేష్ బాబు – దర్శకుడు త్రివిక్రమ్ కాంబినేషన్లో ప్రేక్షకులు ఎంతో ఆసక్తిగా ఎదురుచూస్తున్న SSMB28 సినిమా ఇటీవలే విడుదల తేదీని ప్రకటించుకున్న సంగతి తెలిసిందే. ఈ చిత్రం 28 ఏప్రిల్ 2023న విడుదల కానుంది. చిత్ర బృందం ఈ భారీ అప్‌డేట్‌ను కొద్ది రోజుల క్రితం సోషల్ మీడియాలో ప్రకటించారు. మహేష్ బాబు ఇండస్ట్రీ హిట్ పోకిరి డేట్ కే ఈ సినిమా కూడా రానుందనే వార్త సోషల్ మీడియాలో సంచలనం సృష్టించిందని ప్రత్యేకంగా చెప్పనవసరం లేదు.

ఇక తాజాగా ఈ సినిమా రెగ్యులర్ షూటింగ్ కు సంబందించిన సమాచారం వచ్చింది. SSMB28 సెప్టెంబర్ 8వ తారీఖు నుండి రెగ్యులర్ షూటింగ్ ను ప్రారంభిస్తుంది. కాగా సూపర్ స్టార్ మహేష్ బాబు మాత్రం 13వ తేదీ నుండి షూటింగ్ లో పాలు పంచుకుంటారట. అలాగే ఈ షెడ్యూల్‌లో కొన్ని భారీ యాక్షన్ సన్నివేశాలను చిత్రీకరించనున్నారు.

ఈ చిత్రంలో మహేష్ బాబు సరసన హీరోయిన్ గా పూజా హెగ్డే నటిస్తుండగా.. మిగిలిన నటీనటుల వివరాలు త్వరలో వెల్లడి కానున్నాయి. తాజాగా, ‘అల వైకుంఠపురములో’ చిత్రంతో త్రివిక్రమ్ భారీ విజయాన్ని అందుకున్నారు. అంతే కాకుండా త్రివిక్రమ్ శ్రీనివాస్ అంటే ప్రేక్షకులు ప్రధానంగా ఫ్యామిలీ ఎంటర్‌టైనర్‌లనే ఆశిస్తారు. అయితే ఈసారి ఫ్యామిలీ సబ్జెక్ట్ కాదని, ఎంచుకున్న జానర్‌తో పాటు సబ్జెక్ట్‌కి సంబంధించిన ట్రీట్‌మెంట్ కూడా ఎంతో భిన్నంగా ఉంటుందని మహేష్ స్పష్టం చేశారు. విశ్వసనీయ వర్గాల సమాచారం ప్రకారం సూపర్ స్టార్ మహేష్ బాబు ఇప్పుడు రొటీన్ ఫ్యామిలీ ఎంటర్టైనర్స్ అంటే ఏమాత్రం ఆసక్తి చూపించట్లేదు.

SSMB28 సినిమాతో 12 సంవత్సరాల తర్వాత ఈ మహేష్ – త్రివిక్రమ్ కాంబోలో సినిమా రాబోతుంది. అతడు, ఖలేజా తర్వాత మహేష్‌బాబు, త్రివిక్రమ్‌ల కలయికలో ఇది మూడో సినిమా. చిత్ర నిర్మాతలు, హారిక అండ్ హాసిని క్రియేషన్స్ గత సంవత్సరం ఈ ప్రాజెక్ట్‌ను ప్రకటించి అభిమానులను ఆనందపరిచారు ఈ చిత్రానికి ప్రస్తుతం తెలుగు సినిమా పరిశ్రమలో నంబర్ వన్ మ్యూజిక్ డైరెక్టర్ అయిన ఎస్ఎస్ థమన్ సంగీతం అందిస్తుండగా, నవీన్ నూలి ఎడిటింగ్ బాధ్యతలు నిర్వర్తించనున్నారు.

తమిళ హీరో శివ కార్తికేయన్ నటిస్తున్న తాజా ద్విభాషా చిత్రం “ప్రిన్స్”. ఈ సినిమాకు తెలుగు దర్శకుడు, జాతిరత్నాలు ఫేమ్ అనుదీప్ కేవీ దర్శకత్వం వహిస్తున్నారు. ఉక్రెయిన్ నటి ర్యాబోషప్క ఇందులో హీరోయిన్‌గా నటిస్తున్నారు. ఈ సినిమాను దీపావళికి ప్రేక్షకుల ముందుకు తీసుకు వస్తున్నామని ఇదివరకే చిత్రబృందం ప్రకటించింది. తాజాగా ఈ చిత్రానికి సంబంధించిన మొదటి పాటను రిలీజ్ అయింది. బింబిలికి పిలాపి అంటూ సాగే ఈ పాటు ప్రేక్షకులను ఆకట్టుకుంది.

అయితే ఈ చిత్రం పట్ల ట్రేడ్ వర్గాలు కాస్త నమ్మకం తగ్గినట్లు కనబడుతోంది. అందుకు కారణం ఈ చిత్ర దర్శకుడు అనుదీప్ ఏ అంటున్నారు. జాతిరత్నాలు సినిమాతో బ్లాక్ బస్టర్ హిట్ కొట్టిన దర్శకుడు అనుదీప్ కెవి తెలుగు చిత్ర పరిశ్రమలో చాలా తొందరగా స్టార్ దర్శకులుగా చలామణి అయ్యారు. ఈ చిత్రం ప్రేక్షకులకు విపరీతంగా నచ్చింది అలాగే బాక్సాఫీస్ వద్ద భారీ విజయాన్ని సాధించింది.

అనుదీప్ జాతి రత్నాలుతో తనదైన ముద్ర ఏర్పరచుకున్నారు. కొద్ది రోజుల క్రితమే అనుదీప్ రచనా భాద్యతలు వహించిన ఫస్ట్ డే ఫస్ట్ షో థియేటర్లలో విడుదలైంది. తన ఇమేజ్ కారణంగా, ఆ సినిమాను అనుదీప్ బాగా ప్రచారం చేసి విడుదలకు ముందు సినిమాకు సంభందించిన అన్నీ కార్యక్రమాలకు హాజరయ్యారు. అందువల్ల ప్రేక్షకులు కూడా సినిమాలో మంచి విషయం ఉండే ఉంటుందని అనుకున్నారు.

అయితే ఫస్ట్ డే ఫస్ట్ షో సినిమా చాలా దారుణమైన టాక్, కలెక్షన్లను రాబట్టి భారీ డిజాస్టర్ గా నిలిచింది. చిన్న బడ్జెట్ సినిమా అయినప్పటికీ.. కనీసం సాధారణ స్థాయిలో కూడా ధియేటర్లలో ప్రదర్శన జరుపుకొలేకపోయింది.

దీంతో.. జాతిరత్నాలు సినిమా విజయంలో అనుదీప్ పాత్ర ఏమీ లేదని, వైజయంతీ బ్యానర్ మరియు మహానటి ఫేం నాగ్ అశ్విన్ వల్లే ఆ సినిమా విజయం సాధించిందని ఇండస్ట్రీ, ట్రేడ్ వర్గాలు అంటున్నాయి.

అందువల్ల ముందుగా ఉన్నట్లు ఇప్పుడు ప్రిన్స్ సినిమాకి ట్రేడ్ లో క్రేజ్ లేదు..అందుకే వారు భారీ అఫర్ లు ఏమీ ఇవ్వదలచుకొలేదు అని తెలుస్తోంది. ఫ్లాప్ సినిమాలు వచ్చినపుడు ఇలా హీరోలు లేదా దర్శకులు మీద కాస్త ప్రభావం ఖచ్చితంగా ఉంటుంది. అయితే సినిమాలో సరైన కంటెంట్ ఉంటే ప్రిన్స్ సినిమాని బ్లాక్ బస్టర్ అవకుండా ఏ నెగటివ్ పబ్లిసిటీ ఆపలేదు అనేది నిజం.

ప్రిన్స్ సినిమాను సురేష్ బాబు, సునీల్ నారాంగ్, పుస్కూర్ రామ్ మోహన్ రావు సంయుక్తంగా నిర్మిస్తున్నారు. జాతిరత్నాలు ఫేమ్ అనుదీప్ కేవీ దర్శకత్వం వహిస్తున్నారు. తమన్ సంగీతాన్ని సమకూరుస్తున్నారు. ప్రస్తుతం ఈ చిత్రం షూటింగ్ చివరి దశలో ఉండగా.. శరవేగంగా చిత్రీకరణ జరుపుకుని ఈ చిత్రాన్ని దీపావళి సందర్భంగా ప్రేక్షకుల ముందుకు తీసుకురావాలని చిత్రబృందం సన్నాహాలు చేస్తుంది. గతేడాది డాక్టర్ చిత్రంతో.. ఇటీవల డాన్ సినిమాతో సూపర్ సక్సెస్ అందుకున్న ఈ యువ హీరో.. స్టార్ హీరో అయ్యే దిశగా వరుస విజయాలతో చే దూసుకెళ్తున్నాడు.