తమిళ స్టార్ హీరో శింబు కథానాయకుడిగా, అభిరుచి గల దర్శకుడు గౌతమ్ వాసుదేవ్ మీనన్ దర్శకత్వంలో రూపొందిన తాజా సినిమా ‘వెందు తనిందదు కాడు’. ఈ చిత్రంలో సిద్దీ ఇధ్నానీ కథానాయికగా నటించారు. వేల్స్ ఫిల్మ్ ఇంటర్నేషనల్ పతాకంపై ఇషారి. కె. గణేష్ ఈ చిత్రాన్ని భారీ స్థాయిలో నిర్మించారు. తమిళంలో గురువారం విడుదలై అద్భుతమైన టాక్ ను, మరియు విమర్శకుల నుండి గొప్ప ప్రశంసలను అందుకుంది ఈ చిత్రం.

కాగా ఈ చిత్రాన్ని ‘ది లైఫ్ ఆఫ్ ముత్తు’ టైటిల్ తో తెలుగు ప్రేక్షకుల ముందుకు ప్రసిద్ధ నిర్మాణ సంస్థ శ్రీ స్రవంతి మూవీస్ బ్యానర్ పై నిర్మాత ‘స్రవంతి’ రవికిశోర్ విడుదల చేశారు. కొన్ని సాంకేతిక కారణాల వల్ల ఈ చిత్రం మార్నింగ్ షోలు సరైన సమయానికి మొదలవలేదు. ఐతే మ్యాట్నీ షో నుండి సినిమా చూసిన అన్ని వర్గాల ప్రేక్షకుల నుంచి చక్కని స్పందన లభిస్తోంది. ఈ సందర్భంగా శనివారం హైదరాబాద్‌లో తెలుగు మీడియాతో చిత్ర బృందం ముచ్చటించింది.

దర్శకుడు గౌతమ్ వాసుదేవ్ మీనన్ మాట్లాడుతూ ”నిజానికి మొదట్లో ఈ సినిమాను తెలుగులో విడుదల చేయాలనే ఆలోచన నాకు లేదు. కానీ ‘స్రవంతి’ రవికిశోర్ గారు స్వయంగా నాకు ఫోన్ చేశారు. ‘ పాటలు విన్నాను, చాలా బావున్నాయి. అలాగే ట్రైలర్ చూశాను. నాకు బాగా నచ్చింది. తెలుగులో కూడా ఈ చిత్రాన్ని విడుదల చేద్దాం’ అన్నారు.

తమిళనాడులో ఒక పల్లెటూరి నేపథ్యంలో ఈ సినిమా కథ మొదలవుతుంది. మరి తెలుగులో విడుదల చేయాలనుకున్నప్పుడు ఏ ఊరు అయితే బావుంటుంది? హీరో మాట్లాడే యాస ఎలా ఉండాలి? అన్న విషయాల పై కొంత పరిశోధన చేశాము. అంతే కాకుండా డబ్బింగ్ విషయంలో కూడా జాగ్రత్తలు తీసుకున్నాం . ఇంతకు ముందు నా సినిమాలకు కొన్ని రివ్యూలలో ‘గౌతమ్ మీనన్ సినిమాల్లో హీరో బైక్ మీద తిరుగుతూ అమ్మాయితో పాటలు పాడుకుంటాడు’ అని రాశారు. కానీ, ఈ సినిమాలో మాత్రం అవేవీ లేవు. నేను ఇంతకు ముందు తీసిన సినిమాలకు చాలా భిన్నమైన సినిమా ఇది అని అన్నారు.

ఈ చిత్రానికి హీరో శింబు కాబట్టి… సినిమాను ఇంత సహజంగా తెరకెక్కించగలిగాను. అదే మరో హీరో అయితే స్టార్ డమ్, ఫ్యాన్స్ వంటి విషయాల వల్ల అనవసరమైన విషయాలు జోడించాల్సి వచ్చేది. కానీ శింబు అటువంటివి పట్టించుకోడు. అందువల్ల ఈ సినిమా తీయడం చాలా సులభంగా జరిగింది. ఇక తమిళంలో పేరున్న రచయిత జయమోహన్ ఈ చిత్రానికి కథ అందించారు.

తెలుగు, తమిళ ప్రేక్షకుల నుంచి సినిమాకు మంచి స్పందన లభిస్తోంది. దీనికి సీక్వెల్ చేసే ఆలోచన కూడా ఉంది. రెండు మూడు రోజుల్లో ఆ వివరాలు వెల్లడిస్తానని గౌతమ్ మీనన్ అన్నారు.

ఈ సందర్భంగా నిర్మాత ‘స్రవంతి’ రవికిశోర్ మాట్లాడుతూ..గౌతమ్ మీనన్ తో తనకు ఎప్పటి నుంచో పరిచయం ఉందని, ఇద్దరం కలిసి ఒక సినిమా చేయాలని అనుకున్నామని.. ఆ చర్చలో భాగంగానే ‘ది లైఫ్ ఆఫ్ ముత్తు’ గురించి తెలిసిందని చెప్పారు. ఇంతకు ముందు వారి సంస్థ ద్వారా విడుదలైన ‘నాయకుడు’, ‘పుష్పక విమానం’ , ‘రెండు తోకల పిట్ట’, ‘రఘువరన్ బీటెక్’ వంటి సినిమాల తరహాలో ఈ సినిమా కూడా ప్రేక్షకులను ఆకట్టుకుంటోందని అన్నారు.

హీరోయిన్ సిద్ధీ ఇధ్నానీ మాట్లాడుతూ.. గౌతమ్ మీనన్ సినిమాలో కథానాయికగా నటించడం, ఈ రోజు ఆయన పక్కన కూర్చుకోవడం చాలా సంతోషంగా ఉందని తెలిపారు. తెలుగులో సినిమాను విడుదల చేసిన నిర్మాత ‘స్రవంతి’ రవికిశోర్ గారికి థాంక్స్ కూడా చెప్పారు. ఇంతకు ముందు తెలుగులో కొన్ని సినిమాలు చేశానని.. కొంత విరామం తర్వాత ఈ సినిమాతో విజయం అందుకోవడం సంతోషంగా ఉందని అన్నారు.

రాజమౌళి తెరకెక్కించిన ఆర్ఆర్ఆర్ సినిమా గురించి ఇప్పటికీ ప్రపంచ వ్యాప్తంగా విస్తృత స్థాయిలో చర్చ జరుగుతూనే ఉంది. ఆ సినిమాకి అంత పెద్ద హిట్ అవుతుందని, అంతర్జాతీయంగా ఈ స్థాయిలో గుర్తింపు వస్తుందని అనుకోలేదని దర్శకుడు రాజమౌళి అన్నారు. ఆయన తెరకెక్కించిన భారీ చిత్రాలైన ఆర్ ఆర్ ఆర్, బాహుబలి వంటి సినిమాలకు సంభందించిన విషయాలను ఆయన ఇటీవలె జరిగిన టొరంటో ఇంటర్నేషనల్ ఫిలిం ఫెస్టివల్‌లో వెల్లడించారు.

ఆర్ఆర్ఆర్ సినిమా కథ చేస్తున్నప్పుడు ఈ సినిమా ఇతర రాష్ట్రాల వారికి బాగా నచ్చుతుందనే నమ్మకం అంతగా ఉండేది కాదన్నారు. ఇక రాష్ట్రాలకే అలా ఉంటే దేశాలకు అతీతంగా ప్రేక్షకులకి నచ్చుతుందని, ఇంతటి భారీ ఎత్తున ప్రశంసలు వస్తాయని అసలు కలలో కూడా అనుకోలేదని రాజమౌళి తెలిపారు. నెట్ ఫ్లిక్స్ లో విడుదలైన తర్వాత ఆర్ ఆర్ ఆర్ సినిమా హాలీవుడ్ ప్రేక్షకుల ఆదరణను విశేష స్థాయిలో పొందింది అన్న విషయం తెలిసిందే. జపాన్‌లో ప్రేక్షకులకు కూడా ఆర్ఆర్ఆర్ చాలా బాగా నచ్చింది. అయితే అక్కడ వారి రివ్యూలని చూసి స్వయంగా రాజమౌళి షాక్‌కు గురయ్యారట.

హాలీవుడ్ ప్రేక్షకులతో పాటు అక్కడి స్టార్లు, హాలీవుడ్ దర్శకులు మరియు ప్రొడ్యూసర్లకు కూడా మన తెలుగు సినిమా నచ్చింది. ఇది ఖచ్చితంగా మనందరికీ గర్వంగా అనిపించే విషయం. ఐతే హాలీవుడ్‌కు నచ్చుతందని తన శైలిని మార్చుకోలేనని రాజమౌళి అన్నారు. హాలీవుడ్ తరహాలో సినిమాని తెరకెక్కించడం తనకు రాదని, సొంత శైలిలోనే ఉన్నంతలో ప్రత్యేకంగా తీయడమే వచ్చు అని చెబుతూ.. ఒకవేళ తను తన శైలిని మార్చుకుని సినిమాలు తీస్తే అవి హాలీవుడ్ ప్రేక్షకులకి నచ్చకపోవవచ్చు అన్నారు రాజమౌళి.

రామ్‌చరణ్, జూనియర్ ఎన్టీఆర్ కాంబినేషన్‌లో రాజమౌళి తెరకెక్కించిన ఈ సినిమా ప్రపంచవ్యాప్తంగా రూ.1200 కోట్లకు పైగా వసూలు చేసింది. ఇక మహేష్ బాబు హీరోగా ఓ అడ్వెంచర్ మూవీని తెరకెక్కించడానికి జక్కన్న రెడీ అవుతున్నారు. ఇక ఇదే క్రమంలో తన విజయపథానికి తొలి మెట్టైన బాహుబలి చిత్రం గూర్చి రాజమౌళి మాట్లాడారు.

భారతదేశంలో ఉన్న అన్ని చలన చిత్ర పరిశ్రమల కంటే తెలుగు సినిమా పరిశ్రమ ఎక్కువగా రామాయణం మరియు మహాభారతం నుంచి స్ఫూర్తి పొంది చిత్రాలను నిర్మించిందని రాజమౌళి అన్నారు. ఈ రెండు ఇతిహాసాలలో చాలా భావోద్వేగాలతో పాటు ఎంతో నాటకీయత మరియు పోరాట అంశాలు ఉన్నాయి. అందుకే రామాయణం, మహాభారతాల సారాంశాన్ని తీసుకుని కథలను రూపొందించి సినిమాలు తీయగలిగితే ఆ సినిమాలను కేవలం తెలుగు వారికే పరిమితం చేయనవసరం లేదని ఆయన అన్నారు.

బాహుబలి కూడా అలాంటి స్ఫూర్తితో తెరకెక్కించిన సినిమా అని, అందువల్లే భాష, జాతి భేదాలకు అతీతంగా అంతటి భారీ విజయం సాధించి.. భారతదేశంలో సినిమా పరిశ్రమ అంటే కేవలం బాలీవుడ్ మాత్రమే కాదు, మరెన్నో పరిశ్రమలు ఉన్నాయి అన్న విషయాన్ని అందరికీ తెలిసేలా చేసిందని, ప్రత్యేకించి తెలుగు సినిమా పరిశ్రమ గురించి తెలుసుకోవడం ప్రారంభించారని రాజమౌళి చెప్పారు.

ఆయన చెప్పిన దాంట్లో వాస్తవం ఉంది. ప్రస్తుతం ప్రతి ఇండస్ట్రీ కూడా ప్యాన్ ఇండియా సినిమాలను తెరకెక్కించే ఆలోచనలో ఉన్నారు అంటే అందుకు ముఖ్య కారణం బాహుబలి సినిమా సాధించిన విజయం, ఇచ్చిన స్ఫూర్తి వల్లే అనేది నూటికి నూరు పాళ్ళూ నిజం.

గత కొద్ది రోజులుగా పెద్ద సినిమాలన్నీ విడుదల అయిపోవడంతో చిన్న సినిమాలన్నీ ఇప్పుడు రిలీజ్ కోసం క్యూ కట్టాయి. ఈ వారం మూడు చిన్న సినిమాలు తెలుగు వెండి తార మీద సందడి చేయడానికి వచ్చాయి. ఈ వారం విడుదలైన మూడు సినిమాల మీద విడుదలకు ముందు మంచి బజ్ ఏర్పడింది. సుధీర్ బాబు హీరోగా కృతి శెట్టి హీరోయిన్గా నటించిన ఆ అమ్మాయి గురించి మీకు చెప్పాలి అనే సినిమా సెప్టెంబర్ 16వ తేదీన విడుదల అయిన సినిమాల్లో మొదటిది.

మోహన్ కృష్ణ ఇంద్రగంటి దర్శకత్వంలో రూపొందిన ఈ సినిమా మీద మంచి అంచనాలు ఉన్నప్పటికీ.. ఆ అంచనాలను అందుకోవడంలో సినిమా విఫలమయింది. అక్కడక్కడా కొన్ని మంచి సన్నివేశాలు తప్ప ఏమాత్రం బాగోలేదని సినిమా చూసిన ప్రేక్షకులు పెదవి విరిచారు.

ఇక రెండో చిత్రం యువ హీరో కిరణ్ అబ్బవరం హీరోగా నటించిన నేను మీకు బాగా కావాల్సిన వాడిని. శ్రీధర్ గదే దర్శకత్వంలో ఈ సినిమాను కోడి రామకృష్ణ కుమార్తె కోడి దివ్య దీప్తి తన సొంత నిర్మాణ సంస్థ నిర్మాణంలో నిర్మించారు. కిరణ్ అబ్బవరం వరుస విజయాల బాటలో వచ్చిన ఈ చిత్రం మంచి కమర్షియల్ ఎంటర్టైనర్ అవుతుందని ప్రేక్షకులు ఆశించారు. 

అయితే సినిమా మరీ మూస ధోరణిలో ఉండటం వలన ప్రేక్షకులను అసలు ఆకట్టుకోలేకపోయింది. కేవలం కొన్ని కామెడీ సన్నివేశాలు, మణిశర్మ అందించిన పాటలు మినహా సినిమాలో చెప్పుకోవడానికి ఏమీ లేదని సినిమా చూసిన అందరూ అభిప్రాయపడ్డారు. నిజానికి సెప్టెంబర్ తొమ్మిదవ తేదీన విడుదల కావాల్సిన ఈ సినిమా ఒక వారం వాయిదా పడింది. 

ఇక ఈ రెండు సినిమాలు కాకుండా శాకిని డాకిని అనే సినిమా కూడా 16వ తేదీన విడుదలయింది. నివేదా థామస్, రెజీనా కసాండ్రా ప్రధాన పాత్రలలో రూపొందిన ఈ సినిమాను దర్శకుడు సుధీర్ వర్మ తెరకెక్కించారు. సురేష్ ప్రొడక్షన్స్ తో కలిసి సునీత తాటి అనే నిర్మాత ఈ సినిమాను నిర్మించారు. ఈ చిత్రం కొరియన్ సినిమా ” మిడ్నైట్ రన్నర్స్” అధికారిక రీమేక్ గా రుపొందించబడింది. చక్కని క్రైమ్ కామెడీ అయ్యే అన్ని లక్షణాలు ఉన్నా కూడా మరీ నత్తనడకన సాగిన కథనం వల్ల సినిమాలో ఉండాల్సిన బిగి లేకుండా పోయిందని, ఇదే సినిమా OTTlo విడుదలై ఉంటే బాగుండేదని కొందరు ప్రేక్షకులు అనడం కొసమెరుపు.

ఆ రకంగా నెగటివ్ టాక్ మరియు పేలవమైన రివ్యూలను తెచ్చుకున్న ఈ మూడు సినిమాలూ బాక్స్ ఆఫీస్ వద్ద తొలి రోజే డిజాస్టర్లుగా నిలిచాయి. కనీస స్థాయిలో కూడా ఓపెనింగ్స్ దక్కించుకోలేకపోవడమే కాకుండా చాలా ఏరియాలలో థియేటర్ రెంట్ కూడా వసూలు చేయలేనంత దారుణంగా ఈ సినిమాల కలెక్షన్లు ఉండటం గమనార్హం.