కిరణ్ అబ్బవరం నటించిన తాజా చిత్రం ‘వినరో భాగ్యము విష్ణు కథ’ ఫిబ్రవరి 18న విడుదల కానుండగా, ప్రస్తుతం తెలుగు సినీ అంతర్గత వర్గాల ద్వారా ఈ సినిమాకి వినిపిస్తున్న టాక్ చూసి నిర్మాతలు చాలా సంతోషంగా ఉన్నారట. నిజానికి ఈ సినిమా కూడా ఫిబ్రవరి 17నే విడుదల కావాల్సి ఉండగా చివరి నిమిషంలో వాయిదా పడింది.

కిరణ్ అబ్బవరం, కష్మిరా పరదేశి జంటగా నటించిన ఈ సినిమాని ఒక రోజు ఆలస్యంగా అంటే ఫిబ్రవరి 18న ప్రేక్షకుల ముందుకు తీసుకు వస్తున్నారు. అందుకు కారణం గీతా ఆర్ట్స్ బ్యానర్ కి ఉన్న శనివారం సెంటిమెంట్ అని తెలుస్తోంది. సినీ పరిశ్రమలో ఇలాంటి సెంటిమెంట్లు సహజమే.

ఇక ఇండస్ట్రీకి సంభందించిన కొందరు ఈ సినిమాను చూసి పాజిటివ్ రిపోర్ట్ ఇచ్చారని సమాచారం అందుతోంది. నిర్మాత అల్లు అరవింద్ కూడా సినిమా అవుట్ పుట్ పై చాలా కాన్ఫిడెంట్ గా ఉన్నారట. గత కొంతకాలంగా గీతా ఆర్ట్స్ బ్యానర్ లో వచ్చిన సినిమాలు పెద్ద విజయాలు సాధించలేదు కాబట్టి ఈ సినిమాతో ఒక భారీ విజయాన్ని అందుకోవాలని వారు ఆశిస్తున్నారు.

వినరో భాగ్యము విష్ణు కథ సినిమా నుండి ఇటీవల విడుదలైన టీజర్, ట్రైలర్ మరియు ఫస్ట్, సెకండ్ సింగిల్స్ అయిన ‘వాసవ సుహాస’, ‘ఓ బంగారం’ పాటలకు ప్రేక్షకుల నుంచి మంచి స్పందన లభించింది.జీఏ2 పిక్చర్స్ నిర్మిస్తున్న ఈ చిత్రంలో మురళీ శర్మ ఓ కీలక పాత్రలో కనిపించనున్నారు. డానియల్ విశ్వాస్ సినిమాటోగ్రఫీ అందించిన ఈ చిత్రానికి మార్తాండ్ కె వెంకటేష్ ఎడిటింగ్ బాధ్యతలు నిర్వర్తించారు. ఈ చిత్రానికి చైతన్ భరద్వాజ్ సంగీతం అందించారు.

వినరో భాగ్యము విష్ణు కథ చిత్రానికి మురళీ కిషోర్ అబ్బూరు దర్శకత్వం వహించారు. అల్లు అరవింద్ సమర్పణలో బన్నీ వాస్ ఈ చిత్రాన్ని నిర్మించారు. మరి ఇండస్ట్రీ నుంచి వినిపిస్తున్న పాజిటివ్ టాక్/రిపోర్ట్ నిజం అయి వినరో భాగ్యము విష్ణు కథ సినిమా భారీ విజయం సాధించాలని కోరుకుందాం.

తమిళ సూపర్ స్టార్ విజయ్ కి ఇటీవలే తెలుగులో మంచి మార్కెట్ ఏర్పడింది. అందుకు ఏఆర్ మురుగదాస్ తెరకెక్కించిన కత్తి, తుపాకి సినిమాలే ప్రధాన కారణంగా చెప్పుకోవచ్చు. మెల్లమెల్లగా తెలుగు రాష్ట్రాల్లో విజయ్ మంచి మార్కెట్ ఏర్పరచుకున్నారు. అయితే విజయ్ కు తెలుగులో ఇక్కడ మంచి ఫాలోయింగ్ ఉన్నప్పటికీ ఆయన తెలుగు రాష్ట్రాల్లో జరిగే కార్యక్రమాలకు హాజరు కావడం లేదు.

ఈ సంక్రాంతికి వాల్తేరు వీరయ్య, వీర సింహా రెడ్డి సినిమాలతో పోటీగా వారసుడు సినిమా విడుదలైన సంగతి తెలిసిందే. కానీ ఈ సినిమా ప్రచార కార్యక్రమాల కోసం విజయ్ తెలుగులో పాల్గొనలేదు. ఆ సినిమాకి తెలుగు దర్శకుడు, నిర్మాత పని చేసినా కూడా ఆయన సినిమాకి సంభందించిన ఏ కార్యక్రమానికీ హాజరు కాలేదు.

అగ్ర కథానాయకుడు అయి ఉండీ విజయ్ సినిమాను ప్రమోట్ చేయడంలో విఫలం కావడంతో వారసుడు ఫలితం కూడా యావరేజ్ వసూళ్లతో చాలా నిరాశపరిచింది. మరో వైపు తెలుగు రాష్ట్రాల్లో మంచి ఫాలోయింగ్ ఉన్న తమిళ హీరో ధనుష్ తన తాజా చిత్ర ప్రచార కార్యక్రమాల కోసం హైదరాబాద్ వచ్చి సినిమా పై బజ్ క్రియేట్ చేసి తన వంతు ప్రయత్నం చేశారు.

ధనుష్ ను చూసి తెలుగు ఈవెంట్లకు రావడం విజయ్ కూడా మొదలు పెట్టాలని నెటిజన్లు అంటున్నారు. అలా చేస్తే ఖచ్చితంగా తన సినిమాలకు మరింత ఆదరణ పెరుగుతుందని వారి అభిప్రాయం.

ధనుష్ హీరోగా నటించగా వెంకీ అట్లూరి దర్శకత్వం వహించిన ద్విభాషా చిత్రం ‘వాతి/సార్’. ఈ చిత్రంలో సంయుక్తా మీనన్, సముద్రఖని, తనికెళ్ల భరణి, సాయికుమార్ కీలక పాత్రలు పోషించారు. జి.వి.ప్రకాష్ సంగీతం అందించిన ఈ చిత్రాన్ని సితార ఎంటర్టైన్మెంట్, ఫార్చ్యూన్ ఫోర్ సినిమాస్ సంయుక్తంగా నిర్మించాయి. ఈ సినిమాలో ధనుష్ టీచర్ గా కనిపించనుండగా సముద్రఖని నెగెటివ్ రోల్ లో కనిపించనున్నారు.

శివరాత్రి సందర్భంగా ఈ వారం తెలుగు రాష్ట్రాల్లో చాలా సినిమాలు రిలీజ్ అవుతుండటంతో సినీ ప్రేమికులకు అసలైన విందు దొరకబోతుంది. ఆసక్తికరమైన విషయం ఏంటంటే అన్ని సినిమాపూ ఒక్కో దానికి సంబంధం లేకుండా ఉండడంతో ప్రేక్షకులు ఏ ఒక్క సినిమా కూడా మిస్ కాకుండా అన్ని సినిమాలను చూసేలా ఆసక్తిని కలిగిస్తున్నాయి.

వెర్సటైల్ యాక్టర్ ధనుష్ కొత్త చిత్రం సార్ ఈ శుక్రవారం ప్రేక్షకుల ముందుకు రానుంది. తమిళంలో దీనికి ‘వాతి’ అనే టైటిల్ పెట్టారు. ఈ తమిళ-తెలుగు ద్విభాషా చిత్రానికి వెంకీ అట్లూరి దర్శకత్వం వహిస్తున్నారు. తెలుగులో విడుదలైన అన్ని సినిమాలలో ఈ సినిమాకు ప్రేక్షకుల్లో సాలిడ్ బజ్ ఉంది.

ఇక మరో యువ హీరో కిరణ్ అబ్బవరం నటించిన వినరో భాగ్యము విష్ణు కథ సినిమాతో ప్రేక్షకులను పలకరించడానికి సిద్ధంగా ఉన్నారు. మహా శివరాత్రి సందర్భంగా ఫిబ్రవరి 18న ఈ సినిమా విడుదల కానుంది.

సంతోష్ శోభన్, గౌరీ కిషన్ ప్రధాన పాత్రల్లో నటించిన రొమాంటిక్ డ్రామా “శ్రీదేవి శోభన్ బాబు” ఫిబ్రవరి 18న ఈ సినిమా ప్రేక్షకుల ముందుకు రానుంది. ఈ సినిమాకి దర్శకత్వం ప్రశాంత్ కుమార్ దిమ్మల నిర్వహించారు మరియు సంగీత దర్శకుడు సయ్యద్ కమ్రాన్ స్వరాలు సమకూర్చారు. ఈ చిత్రం ద్వారా ’96’ స్టార్ గౌరీ కిషన్ తెలుగు తెరకు పరిచయమవుతున్నారు.

హిందీలో కార్తీక్ ఆర్యన్ నటించిన షెహజాదా ఈ శుక్రవారం విడుదల కానుంది. ఈ చిత్రం 2020 లో విడుదలైన తెలుగు చిత్రం అల వైకుంఠపురములో సినిమాకి రీమేక్ గా తెరకెక్కిన సంగతి తెలిసిందే. పఠాన్ సినిమా తర్వాత హిందీలో విడుదలవుతున్న తొలి భారీ చిత్రం ఇదే కావడం విశేషం. హిందీ ఫిల్మ్ ఇండస్ట్రీలో రీమేక్ లు అంతగా ఆడకపోవడంతో ఈ చిత్రం బాక్సాఫీస్ వద్ద ఎలా రాణిస్తుందో చూడాలి.

మార్వెల్ స్టూడియోస్ యొక్క యాంట్-మ్యాన్ అండ్ ది వాస్ప్: క్వాంటానియా కూడా ఈ శుక్రవారం విడుదల కానుంది. 2023లో మార్వెల్ సినిమా విడుదల కావడం ఇదే తొలిసారి. ఈ సినిమా పై మంచి అంచనాలు నెలకొనడంతో అడ్వాన్స్ బుకింగ్స్ కూడా చాలా సంతృప్తికరంగా ఉన్నాయి.

మాళవిక మోహనన్ కొత్త మలయాళ చిత్రం క్రిస్టీ కూడా ఫిబ్రవరి 17 శుక్రవారం విడుదల కానుంది. మొత్తమ్మీద ఈ వారం రకరకాల సినిమాల రిలీజ్ లతో థియేటర్లు నిండిపోనున్నాయి. మరి వీటిలో ఏ సినిమా ప్రేక్షకులను మెప్పించి బాక్సాఫీస్ వద్ద విజేతగా నిలుస్తుందో వేచి చూడాలి.

మెగా పవర్ స్టార్ రామ్ చరణ్ మరియు దక్షిణ భారత సినీ పరిశ్రమలో బిగ్గెస్ట్ డైరెక్టర్లలో ఒకరైన శంకర్ మొదటి సారి కలిసి తీస్తున్న ప్రెస్టీజియస్ ప్రాజెక్ట్ ఆర్ సి 15 గురించి ఈమధ్య కాలంలో సినీ వర్గాల్లో చర్చలు జరుపుకుంటున్న సంగతి తెలిసిందే. కాగా ఈ సినిమాలోని పాటలకు ప్రముఖ కొరియోగ్రాఫర్లందరినీ జాబితా చేశారట. దాంతో ఈ సినిమా ఖర్చు పెరిగిపోయింది.

జానీ మాస్టర్, ప్రేమ్ రక్షిత్, బోస్కో సీజర్, గణేష్ ఆచార్యతో పాటు మోస్ట్ ఫేమస్ అయిన ప్రభుదేవా కూడా ఈ సినిమా పాటలకు కొరియోగ్రఫీ చేయనున్నారని తాజా సమాచారం. మొత్తంగా ఈ సినిమా కోసం టాప్ కొరియోగ్రాఫర్స్ అందరూ పనిచేస్తున్నారు. పాటలను గ్రాండ్ గా పిక్చరైజ్ చేయడంలో శంకర్ దిట్ట అని తెలిసిందే. ఆర్ సి 15 కోసం కూడా పాటలను ఆయన లావిష్ గా తీస్తున్నారు. ఒక్కో పాటకు 5 కోట్లకు పైగా బడ్జెట్ కేటాయిస్తున్నారని, కేవలం పాటల కోసమే చిత్రం మొత్తంగా యూనిట్ 30 కోట్లకు పైగా ఖర్చు చేస్తోందని సమాచారం.

ఆర్ సి 15 యూనిట్ ఇటీవల కర్నూలు, హైదరాబాద్ లలో షూటింగ్ చేసింది. ఈ సినిమా కాన్సెప్ట్ కు సన్నివేశాలకు చాలా మంది ప్రజలు అవసరం అవుతారని, అందుకే షూటింగ్ సెట్స్ చూసేందుకు వచ్చిన నిజమైన ప్రేక్షకులతోనే చిత్ర బృందం షూటింగ్ చేయించారని తెలుస్తోంది.

కమల్ హాసన్ నటిస్తున్న ‘భారతీయుడు 2’ చిత్రీకరణలో బిజీగా ఉన్న దర్శకుడు శంకర్ తన సమయాన్ని కాస్త తీసుకుని రామ్ చరణ్, కియారా అద్వానీలతో తెరకెక్కిస్తున్న ‘ఆర్ సి 15’ షూటింగ్ ను రీషెడ్యూల్ చేశారు. ఎందుకంటే రామ్ చరణ్ త్వరలో ఆస్కార్ నామినేషన్లు, అందుకు సంబంధించిన ప్రమోషన్స్ లో పాల్గొంటారు. శంకర్ త్వరలో ఇండియన్ 2 కొత్త షెడ్యూల్ ను ప్రారంభించనున్నారు.

శ్రీ వెంకటేశ్వర క్రియేషన్స్ పతాకం పై దిల్ రాజు, శిరీష్ నిర్మించిన ఈ చిత్రం తెలుగు, తమిళ, హిందీ భాషల్లో విడుదల కానుంది. యాక్షన్ ఎంటర్టైనర్ గా తెరకెక్కుతున్న ఈ సినిమాలో రామ్ చరణ్ సీబీఐ ఆఫీసర్ గా మరియు రాజకీయ నాయకుడిగా కనిపించనున్నారు. అంజలి, ఎస్.జె.సూర్య కీలక పాత్రల్లో నటిస్తున్న ఈ చిత్రంలో సునీల్, శ్రీకాంత్, జయరామ్, నవీన్ చంద్ర తదితరులు కూడా నటిస్తున్నారు. ప్రముఖ సంగీత దర్శకుడు థమన్ ఈ చిత్రానికి స్వరాలు సమకూరుస్తున్నారు.

ధనుష్ ‘సార్’ ప్రీ రిలీజ్ ఈవెంట్ లో కమెడియన్ హైపర్ ఆది ఆ సినిమా నిర్మాతల్లో ఒకరైన త్రివిక్రమ్ గురించి గొప్పగా మాట్లాడారు. అయితే త్రివిక్రమ్ శ్రీనివాస్, పవన్ కళ్యాణ్ ల గురించి ఆయన చెప్పిన మాటలు, అసంబద్ధమైన ఎలివేషన్స్ ప్రేక్షకులకు ఓవర్ యాక్షన్ గా అనిపించాయి.

హైపర్ ఆదికి పవన్ కళ్యాణ్ నచ్చితే పర్వాలేదు కానీ వేరే సినిమా ఈవెంట్ లో ఆయన గురించి మాట్లాడటం సమస్యేనని అంటున్నారు నెటిజన్లు. పైన చెప్పినట్టుగానే నిన్న ధనుష్ సర్ ప్రీ రిలీజ్ ఈవెంట్ లో హైపర్ ఆది పవన్ కళ్యాణ్ గురించి మాట్లాడి తన వ్యక్తిత్వాన్ని ఎలివేట్ చేసారు. ఇక త్రివిక్రమ్ – పవన్ కళ్యాణ్ కాంబినేషన్ గురించి కూడా మాట్లాడారు, పవన్ కళ్యాణ్ కు ఈ సినిమాకు ఎటువంటి సంబంధం లేదు కాబట్టి అది అనవసరం అనే చెప్పాలి.

ఈ సందర్భంగా హైపర్ ఆది మాట్లాడుతూ.. ‘మాటలకు మనిషి రూపం వస్తే… అది మట్లాడే మొదటి మాట, థాంక్యూ త్రివిక్రమ్’ అని అంటూ త్రివిక్రమ్ తో పాటు తన అభిమాన హీరో అయిన పవర్ స్టార్ పవన్ కళ్యాణ్ ల గురించి తన స్పీచ్ ని ఎన్నో పొగడ్తలతో నింపారు.

సాధారణంగా నిర్మాత, నటుడు అయిన బండ్ల గణేష్ సినిమా ఈవెంట్లలో విపరీతమైన వ్యాఖ్యలకు, భజనకు పెట్టింది పేరు. ఇప్పుడు హైపర్ ఆది మరో బండ్ల గణేష్ గా ఎదుగుతున్నాడని అంటున్నారు నెటిజన్లు.

వెంకీ అట్లూరి దర్శకత్వంలో ధనుష్ కథానాయకుడిగా నటిస్తున్న చిత్రం ‘సార్/వాతి’. ఈ చిత్రం ఫిబ్రవరి 17న విడుదల కానుంది. బుధవారం ప్రీరిలీజ్ ఈవెంట్ జరిగింది. ఈ కార్యక్రమంలో ధనుష్ తెలుగులో మాట్లాడి అందరినీ బాగా ఆకట్టుకున్నారు. అంతే కాకుండా తెలుగులో మాస్టారు మాస్టారు అంటూ పాట పాడి అందరినీ అలరించారు.

అక్కినేని అఖిల్ నటించిన కొత్త సినిమా విడుదలకు సిద్ధమైంది. తాజా చిత్రం ‘ఏజెంట్’ 2023 ఏప్రిల్ 28న ప్రేక్షకుల ముందుకు రానుంది. కాగా ఈ స్పై థ్రిల్లర్ విడుదల తేదీని ఇప్పటికే పలుమార్లు వాయిదా వేశారు. అయితే ఇప్పుడు ఈ సినిమా ఏప్రిల్ 28న థియేటర్లలోకి రావడం ఖరారయింది. ఈ సినిమా కోసం ఏజెంట్ టీం ఓ ఇంట్రెస్టింగ్ ప్రమోషనల్ ఈవెంట్ ప్లాన్ చేసింది.

ఫిబ్రవరి 22న అఖిల్ అక్కినేని ట్విట్టర్ స్పేస్ లో అభిమానులతో మాట్లాడతారని తెలిపారు. ఒక హీరో తన అభిమానులతో ఇలా ముచ్చటించడం మొదటిసారి అని చెప్పాలి. ఈ విషయాన్ని ఏజెంట్ నిర్మాణ సంస్థ తమ సోషల్ మీడియా అకౌంట్ ద్వారా అధికారికంగా ప్రకటించింది.

సురేందర్ రెడ్డి దర్శకత్వం వహించిన ఈ చిత్రంలో అక్కినేని అఖిల్ సరసన సాక్షి వైద్య, మమ్ముట్టి ఇతర ప్రధాన పాత్రలు పోషించారు. మమ్ముట్టి పాత్ర సినిమాకు చాలా కీలకం కానుందని సమాచారం. ఏజెంట్ తో ఇంతకు ముందెన్నడూ చేయని పాత్రలో అఖిల్ నటిస్తున్నారు. ఈ సినిమా కోసం కోరుకున్న లుక్ ను పొందడానికి తను విపరీతమైన శారీరక పరివర్తనను ఎదుర్కొన్నారని తెలుస్తోంది.

ఏకే ఎంటర్టైన్మెంట్, సురేందర్ 2 సినిమా పతాకాల పై రూపొందనున్న ఈ చిత్రానికి వక్కంతం వంశీ కథ అందిస్తున్నారు. ఈ చిత్రానికి హిప్ హాప్ తమిళ సంగీతం అందించగా, రసూల్ ఎల్లోర్ సినిమాటోగ్రాఫర్ గా పని చేస్తున్నారు. తెలుగుతో పాటు తమిళం, కన్నడ, మలయాళం, హిందీ సహా నాలుగు భాషల్లో ఈ చిత్రాన్ని విడుదల చేయనున్నారు.