మెగా పవర్ స్టార్ రామ్ చరణ్ ప్రస్తుతం కెరీర్లోనే బెస్ట్ ఫేజ్ లో ఉన్నాడు. ఆర్ ఆర్ ఆర్ తరువాత శంకర్ దర్శకత్వంలో సినిమా చేస్తున్న చరణ్, ఆ తరువాత గౌతమ్ తిన్ననూరి తో సినిమా సిద్ధంగా ఉంది.ఇదిలా ఉండగా ఆ తరువాత సుకుమార్ తో సినిమా కూడా ఉండచ్చు అన్న ఊహాగానాలు వినిపిస్తున్నాయి.

కెరీర్ తొలి రోజులు మాస్ సినిమాలతో బాక్స్ ఆఫీస్ వద్ద హిట్స్ కు కొదవ లేకపోయినా, కాస్త డిఫరెంట్ గా ఉండటంతో పాటు భారీ సినిమాలు చేసినప్పుడే రామ్ చరణ్ కు ప్రశంసలతో పాటు ఆయా సినిమాలకు కాసుల వర్షం కూడా కురిసింది.

ఉదాహరణకు మగధీర,రంగస్థలం,ఆర్ ఆర్ ఆర్ ఈ మూడు సినిమాలు కూడా దిగ్గజ దర్శకులు అనదగ్గ వారితో పని చేసి, వారి దర్శకత్వ ప్రతిభ తో పాటు తన నటనా కౌశల్యం చూపించే అవకాశం ఆ సినిమాలలోనే అతడికి దక్కింది.

మగధీర టైం లో ఇంకా పాన్ ఇండియా రిలీజ్ ల సంస్కృతి లేకపోవటంతో ఆ సినిమా ఇతర భాషా ప్రేక్షకులకు అంతగా తెలియకుండా పోయింది. ఇక రంగస్థలం కూడా ఇతర భాషల్లో రిల్లీజ్ కాకపోయినా వైడ్ రిలీజ్ మరియు, సోషల్ మీడియా, ఓటిటీ ల వల్ల ఆ సినిమా కాస్త ప్రాచుర్యం పొందింది.

ఇక ఆర్ ఆర్ ఆర్ సినిమా సమయానికి పాన్ ఇండియా రిలీజ్ ల హవా బాగా ఉండటం, రాజమౌళి పేరు ప్రఖ్యాతలు నలువైపులా వ్యాపించి ఉండటంతో ప్రి రిలీజ్ పబ్లిసిటి యే కాకుండా సినిమా రిలీజ్ అయిన తరువాత ఆ సినిమాకు క్రేజ్ కు ఎలాంటి అవాంతరం లేకుండా పోయింది.

ఇక ఆర్ ఆర్ ఆర్ సినిమా ధియెట్రికల్ రిలీజ్ తరువాత దాదాపు పది వారాలకు ఓటిటీలో విడుదల అయింది. తెలుగు మరియు ఇతర  దక్షిణ భాషల స్ట్రీమింగ్ జీ 5 కు దక్కగా, హిందీ వెర్షన్ మాత్రం నెట్ఫ్లిక్స్ దక్కించుకుంది. నెట్ఫ్లిక్స్ లో ఆర్ ఆర్ ఆర్ చూసిన అంతర్జాతీయ ప్రేక్షకులు కళ్ళు చెదిరే రాజమౌళి మాయాజాలానికి ఆశ్చర్య పోయారు.

ముఖ్యంగా రామరాజు గా రామ్ చరణ్ నటనకు ప్రశంసల జల్లులు కురిపించారు ప్రేక్షకులు. సాధారణ ప్రేక్షకుల నుండి సెలబ్రెటీల వరకూ రామరాజు కు ఫిదా అయిపోయారు. ప్రత్యేకించి రామరాజు ఇంట్రో ఫైట్ సీన్ ఒళ్ళు గగుర్పొడిచే విధంగా రెస్పాన్స్ వచ్చింది. ఈ హంగామా చూసిన నెటిజన్స్,మరియు అభిమానులు రామ్ చరణ్ ను గ్లోబల్ స్టార్ గా పేర్కొనడం విశేషం.

సూపర్ స్టార్ రజినీకాంత్. పరిచయం అక్కర్లేని పేరు. ప్రాంతాలకు అతీతంగా ప్రేక్షకుల ఆదరణ, అభిమానం పొందిన నటుడు. దశాబ్దాలుగా తమిళ ఇండస్ట్రీ నంబర్ వన్ హా చలామణి అయిన రజినీ సినిమాలు తెలుగులోనూ డబ్ అయి బ్లాక్ బస్టర్ అయ్యాయి.

2016 లో వచ్చిన కబాలి చిత్రం అయితే ఒక్క చిన్న టీజర్ తో దేశం మొత్తం అట్టుడుకిపోయేలా చేసింది. అయితే అంచనాలను అందుకోవడం లో కబాలి తీవ్రంగా నిరాశ పరచడం, ఆ వెంటనే అదే కాంబినేషన్ లో వచ్చిన కాలా కూడా పేలవంగా ఉండటం హీరోగా, స్టార్ గా రజినీ ఇమేజ్ ను దెబ్బ తీశాయి. పా రంజిత్ ఇతర హీరోలతో మంచి సినిమాలు తీసి రజినీతో తీసిన రెండు సినిమాలు చేదు జ్ఞాపకాలు గా మిగిలి పోయాయి.

ఇక ఆ తరువాత సీక్వెల్ హైప్ తో వచ్చిన 2.0 , పెట్టా చిత్రాలు కాస్త పర్వాలేదు అనిపించినా రజినీ నుండి ఆయన స్థాయికి తగ్గ హిట్ రాలేదు అన్నది వాస్తవం. పోయిన దీపావళికి వచ్చిన అన్నాత్తే(తెలుగులొ పెద్దన్న) ఏకంగా డిజాస్టర్ అయింది.ఇక రజినీ చేయబోయే తదుపరి సినిమాను ఇదివరకే అనౌన్స్ చేసారు. యువ దర్శకుడు నెల్సన్ దిలీప్ కాంబినేషన్ లో మరో యువ సంచలనం అనిరుధ్ సంగీత సారథ్యంలో సినిమా ఉంటుంది అని అధికారికంగా ప్రకటించారు.

అయితే ఆ ప్రాజెక్టు అనౌన్స్ అయినా తరువాత నెల్సన్ – హీరో విజయ్ కాంబినేషన్ లో వచ్చిన బీస్ట్ సినిమా అంచనాలను అందుకోలేక పోయింది. అందువల్ల ఇప్పుడు రజినీ సినిమా సంగతి ఏం చేస్తాడోనని అభిమానులు కాస్త కంగారు పడుతున్నారు.

అయితే సినిమా స్క్రిప్ట్ దగ్గరనుంచి అన్నీ పక్కాగా కుదిరేలా జాగ్రత్తలు తీసుకుంటున్నారు అని తాజా వార్తలు వినిపిస్తున్నాయి. కథ స్వయంగా రజినీకాంత్ యే రాయనున్నాడు, స్క్రీన్ ప్లే భాధ్యతను సీనియర్ డైరెక్టర్ అయిన కే ఎస్ రవి కుమార్ కి అప్పగించారని సమాచారం. ఇక నటీనటుల విషయంలో కూడా భారీ తారాగణం యే ఉండబోతుంది అని అంటున్నారు.

వీటన్నిటికీ తోడు అనిరుధ్ సంగీతం సినిమాకి అతి పెద్ద ప్లస్ పాయింట్ గా చెప్పుకోవచ్చు. యూత్,మాస్ ఆడియన్స్ ను ఉర్రూతలుగించడం లో అనిరుధ్ కి ఎవరూ సాటి రారు. కొసమెరుపు ఏమిటంటే ఈ సినిమాకి టైటిల్ బాస్ అనుకుంటున్నారు అని తెలిసింది.

ఈ తరం హీరోయిన్స్ లో మోస్ట్ బిజీ అయిన హీరోయిన్ సమంతా. ఏ మాయ చేశావే తో నిజంగానే ప్రేక్షకులను మాయ చేసింది. ఆ తరువాత బృందావనం,దూకుడు వంటి సూపర్ హిట్ సినిమాలతో దూసుకుపోయింది. మంచి నటి అవడంతో పాటు క్యూట్ లుక్స్, సక్సెస్ రేట్ ఎక్కువ ఉండటం వంటి కారణాల వల్ల తన కెరీర్ లో ఎప్పుడు కూడా పెద్దగా అవకాశాలకు బ్రేక్ పడలేదు.

మధ్యలో ఒకసారి ఆరోగ్యం బాగోలేక, నాగ చైతన్య తో పెళ్ళి జరిగిన కొన్ని రోజుల వరకు మాత్రమే కాస్త సినిమాలకు బ్రేక్ ఇచ్చింది. ఆ తరువాత స్టార్ హీరోల పక్కన ఛాన్స్ లు కాస్త తగ్గినా లేడీ ఓరియంటెడ్ సినిమాలతో కెరీర్ ను సాఫీగానే ముందుకు తీసుకెళుతుంది.

అయితే నాగ చైతన్య తో విడాకులు తీసుకున్న తరువాత మరో కొత్త మార్గంలో తన కెరీర్ ను చక్కబెట్టుకుంది సమంతా. ఇన్స్టాగ్రామ్ అనేది ఎంతోమందికి కెరీర్ ను ఇచ్చిన ప్లాట్ ఫామ్, చాలా తేలికగా తీసిపడేసే రీల్స్, టిక్ టాక్ తరహా పేరడీ డాన్స్ లతోనే పాపులర్ అయిన వాళ్ళు ఉన్నారు. ఇప్పుడు సమంతా తనకున్న క్రేజ్ ను, ఇన్స్టా లో ఉన్న ఫాలోయర్స్ ద్వారా ఉపయోగించుకుంటుంది. ఇటీవలి కాలంలో సమంతా ఫోటోషూట్ ల సంఖ్య బాగా పెరిగింది. ట్రెండీ ఔట్ ఫిట్ లకు తోడు హాట్ ఫోజ్ లతో కుర్రాళ్ళ మతి పోగొడుతుంది.

ఇన్స్టా లో బ్రాండింగ్ కూడా ఒక భాగమే, సినిమా హీరోలు, హీరోయిన్ లే కాక, విరాట్ కోహ్లీ వంటి క్రికెటర్ లు కూడా ఈ రకమైన బ్రాండింగ్ ద్వారా లబ్ది పొందిన వారే. ఇప్పుడు సమంతా కూడా అదే దారిలో వెళ్తుంది. ఇన్స్టాగ్రామ్ లో ఫోటో షూట్ లు మాత్రమే కాకుండా ప్రమోషనల్ పోస్ట్ ల ద్వారా దాదాపు నెలకు 3 కోట్ల వరకూ సంపాదిస్తుంది అని సమాచారం. దీపం ఉన్నప్పుడే ఇల్లు చక్కబెట్టుకోవాలి అనే సామెతను సాధారణంగా హీరోయిన్ లు బాగానే వంటబట్టించుకుని ఉంటారు. సమంతా కూడా అదే పని చేస్తూ ఇటు తన సంపాదనతో పాటు వీక్షకులకు ఆనందాన్ని పంచిపెడుతుంది.

స్టైలిష్ స్టార్ అల్లు అర్జున్, క్రియేటివ్ జీనియస్ సుకుమార్ కాంబినేషన్ లో వచ్చిన పుష్ప సినిమా ఎంత పెద్ద హిట్ అయిందో అందరికీ తెలిసిందే. తొలి రోజు మిక్స్డ్ టాక్/రివ్యూస్ వచ్చినా కలెక్షన్ లు సూపర్ హిట్ రేంజ్ లో సాధించి అల్లు అర్జున్ స్టామినా ఎంటో తెలియజేసింది. ముఖ్యంగా హిందీ బెల్ట్ లో బాహుబలి 1 ను క్రాస్ చేసి ట్రేడ్ పండిట్ల చెత్త ఔరా అనిపించుకుంది.

ఇక ప్రేక్షకులతో పాటు సినీ వర్గాలు కూడా పుష్ప 2 ఎప్పుడు వస్తుందా అని ఎదురుచూస్తున్నారు. పుష్ప 2 వచ్చే ఏడాది డిసెంబర్ లో విడుదల అవుతుంది అని అక్కడక్కడా పుకార్లు వినిపించినా అధికారికంగా యే రిలీజ్ డేట్ ఇవ్వబడలేదు.అయితే తాజాగా వినిపిస్తున్న సమాచారం ప్రకారం పుష్ప 2 మొదలవడం మరింత ఆలస్యం కానుందని తెలిసింది.

దీనికి కారణం దర్శకుడు సుకుమార్ అనారోగ్యం. మొదటి భాగం షూటింగ్ సమయంలో కూడా సుకుమార్ కు స్వల్ప అస్వస్థత తో ఉండటంతో కొన్ని రోజులు షూటింగ్ నిలిపివేశారు.ముందుగా అనుకున్న ప్లాన్ ప్రకారం అయితే పుష్ప 2 ఆగస్ట్ లో స్టార్ట్ అవ్వాల్సి ఉంది. అయితే స్క్రిప్టు వర్క్ ఇంకా పూర్తి కాకపోవడంతో పాటు సుకుమార్ ఆరోగ్యం కాస్త కుదుట పడే వరకు సినిమా మొదలయ్యే సూచనలు ఏవీ కనిపించట్లేదు.

ముందుగా సుకుమార్ కోలుకుని , స్క్రిప్టు వర్క్ క్షుణ్ణంగా జరిపిన తరువాతే సినిమా పట్టాలెక్కెందుకు ఒప్పుకుంటారు అని చెప్తున్నారు.సినిమాకి ఉన్న హైప్ అంతా ఇంతా కాదు కాబట్టి కాస్త ఆలస్యంగా అయినా సరే పుష్ప మళ్ళీ తగ్గేదెలే అంటూ అలరించడం ఖాయం.

పుష్ప సినిమాలో పాటలు ఎలా ఫేమస్ అయ్యాయి అనేది తెలిసిన విషయమే, పాటలతో పాటు తగ్గేదేలే డైలాగ్ అల్లు అర్జున్ మానరీజమ్ కూడా బాగా వైరల్ అయి సినిమాకి ఎనలేని క్రేజ్ ను తెచ్చిపెట్టింది.ఇక పార్ట్ 2 లో ఫాహద్ ఫాజీల్ కి అద్భుతమైన పాత్ర ఉంటుంది అని, పుష్ప కి షేఖావత్ కీ మధ్య పోరు రసవత్తరంగా ఉంటుంది అని భోగట్టా. వీటితో పాటు పుష్ప 2లో ఇంకెన్ని విశేషాలు ఉన్నాయో తెలియాలి అంటే కాస్త ఓపిక పట్టక తప్పదు.

కరోనా పాన్డేమిక్ తరువాత ప్రేక్షకులు సినిమా చూసే విధానం మారింది. ప్రేక్షకులు వీకెండ్ సినిమాకు అలవాటు పడ్డారు అని ప్రముఖ నిర్మాత దిల్ రాజు పేర్కొన్నారు. ఆయన చెప్పిన దాంట్లోనూ నిజం లేకపోలేదు.

యే ఇండస్ట్రీ అయినా మార్పు అనేది సహజం. సమయానికి తగ్గట్టు ఆయా కాలానికి అనుగుణంగా అప్డేట్ అవుతూ ముందుకు వెళ్తేనే అభివృద్ధి సాధ్యపడుతుంది.ఇప్పుడు తెలుగు సినిమా పరిశ్రమ కూడా అలాంటి పరిస్థితి లోనే ఉంది.

కరోనా మహమ్మారి దాడికి ఎన్నో జీవితాలు ప్రాణాలు కొల్పోగా పరోక్షంగా ఎన్నో పరిశ్రమలు తీవ్రమైన సంక్షోభం ఎదుర్కొన్నాయి. అందులో తెలుగు సినిమా కూడా ఒకటి. అయితే మన రెండు తెలుగు రాష్ట్రాల ప్రేక్షకులకు సినిమా అంటే ఎంత పిచ్చి అనేది అందరికీ తెలిసిందే.

ఆ పిచ్చి ప్రేమ వల్లే తెలుగు సినీ పరిశ్రమ త్వరగానే కోలుకుని పునరుద్ధరణ వైపు అడుగులు వేస్తుంది. అయితే అన్నీ సవ్యంగా ఉన్నాయి, సమస్యలు ఏవీ లేవు అనుకుంటే పొరపాటే అవుతుంది.ఎందుకంటే కరోనా కి ముందు, కరోనా తరువాత చెప్పుకోదగ్గ మార్పులు వచ్చాయి ప్రేక్షకులు సినిమా చూసే విధానంలో.

ఒకప్పుడు ధియేటర్ లో నుంచి సినిమా వెళ్ళిపోయాక కనీసం ఆరు నెలల గడువు తరువాత కానీ టీవిలో వచ్చేది కాదు. ఓటీటీ రెవల్యూషన్ మూలాన ఆ గ్యాప్ కాస్తా తగ్గిపోయి నెల వరకూ వచ్చింది. అయితే ఒక దశలో తెలుగు సినీ పెద్ద నిర్మాతలు కలిసి కనీసం 6 వారాల తరువాతనే రిలీజ్ గ్యాప్ ఉండాలి అని నిర్ణయించారు. అయితే కరోనా వేవ్ ల వల్ల చాలా చిన్న సినిమాలు, కొన్ని పెద్ద సినిమాలు కూడా డైరెక్ట్ గా ఓటీటీ లో విడుదల కావడం,. ఆ పై తిరిగి ధియేటర్ లు తెరిచిన తరువాత థియేట్రికల్ రిలీజ్ కీ, ఓటిటీ రిలీజ్ కీ మధ్య గ్యాప్ తగ్గిపోయింది.

నాలుగు వారాల లోపే టీవీ లలో, ఫోన్ లలో సినిమాలు అందుబాటులోకి వచ్చేస్తుంటే ఇంక ధియేటర్ కి వెళ్ళడం ఎందుకు అని చాలా ఫ్యామిలీ లు అనుకుని, ఏదైనా పెద్ద సినిమా వచ్చినప్పుడు మాత్రమే ధియేటర్ లకు తరలి వస్తున్నారు.

నిర్మాత దిల్ రాజు చెప్పినట్టే తొలి మూడు రోజుల వరకూ అభిమానులు, సినీ ఔత్సాహికులు మాత్రమే సినిమా చూడటానికి వస్తున్నారు, ఇతర న్యూట్రల్ ఆడియెన్స్, ఫ్యామిలీ ఆడియెన్స్ మాత్రం ఖచ్చితంగా కొన్ని సినిమాలకి మాత్రమే బయటకి వస్తున్నారు. అందుకే దాదాపు ప్రతి సినిమాకీ తొలి సోమవారం కలెక్షన్ లు డ్రాప్ అవుతున్నాయి. దానికి  తగ్గట్టే ఇండస్ట్రీ కూడా వినూత్న పద్ధతిలో ఆలోచించి సినిమాలు నిర్మించి, ప్రేక్షకులను ఆకట్టుకునేలా ప్రచారం చేయాలి. అప్పుడే పరిస్థితిలో మార్పు వస్తుంది.