బాక్స్ ఆఫీస్ దగ్గర యువ సామ్రాట్ అక్కినేని నాగ చైతన్య నటించిన తాజా చిత్రం థాంక్యూ సినిమా ఈ వారం విడుదలైన సంగతి తెలిసిందే. కాగా ఈ చిత్రం మొదటి రోజునే నెగటివ్ టాక్ ని తెచ్చుకుంది. అంతే కాకుండా మొదటి రోజు నుండి కలెక్షన్స్ పరంగా పూర్తిగా దిగువ స్థాయిలో వెళుతుంది. సరే మొదటి రోజు అంతో ఇంతో పర్వాలేదు అనిపించిన కలెక్షన్లు రెండో రోజు నుంచి మరింత దారుణంగా పడిపోయాయి.

ఇక సాధారణంగా తెలుగు సినిమాలకు మూడో రోజు ఎంతో కొంత అడ్వాంటేజ్ తీసుకుని మంచి కలెక్షన్లు రాబడతాయి. అయితే థాంక్యూ సినిమా ఆ మూడో రోజు అడ్వాంటేజ్ కూడా ఏమాత్రం ఉపయోగించుకోలేదు. చాలా సెంటర్ల లో డెఫిసిట్ లు మూటగట్టుకుని నెగటివ్ షేర్ ను తెచ్చుకోవడం గమనార్హం.

ఇలా అతి తక్కువ కలెక్షన్లతో సినిమా షేర్ ఏ రావడం గగనం అయినందున, చాలా సెంటర్లలో పర్సంటేజ్ విధానంలో థాంక్యూ చిత్రాన్ని అడిస్తున్నారు. అందువల్ల సినిమాకి వచ్చిన కలెక్షన్స్ ఆసలు షేర్ గా పరిగణించబడదు. ఇలా జీరో షేర్ సినిమాను ఇవ్వడం అక్కినేని వారికి కొత్తేమీ కాదు.

హీరో నాగార్జున – రామ్ గోపాల్ వర్మ కాంబినేషన్ లో 2018 లో వచ్చిన “ఆఫీసర్” చిత్రం కూడా అప్పట్లో జీరో షేర్ సినిమాగా నిలిచింది. ఇండస్ట్రీలో హిట్లు సూపర్ హిట్లు ఎలా ఉంటాయో.. ఫ్లాప్ లు మరియు భారీ డిజాస్టర్ లు కూడా ఉంటాయి. అయితే ఇలా ఒకే కుటుంబానికి చెందిన హీరోలు ఇలా జీరో షేర్ రికార్డులు తమ పేరిట మూటగట్టుకోవడం కాస్త విడ్డూరంగానూ, వారి అభిమానులకు అత్యంత బాధాకరంగా ఉంటుంది.

ఈ భారీ పరాజయం నుంచి కోలుకోవాలి అంటే నాగ చైతన్య తన తదుపరి చిత్రంతో గట్టి హిట్ నే కొట్టాలి.ప్రస్తుతం నాగ చైతన్య రెండు సినిమాలకు కమిట్ అయి ఉన్నారు. తమిళ దర్శకుడు వెంకట్ ప్రభు కాంబినేషన్లో తెలుగు / తమిళ ద్విభాషా చిత్రం చేస్తున్నారు. కృతి శెట్టి హీరోయిన్.. వీరిద్దరూ కలిసి ఇదివరకు బంగార్రాజు చిత్రంలో నటించిన విషయం తెలిసిందే. ఇక దర్శకుడు పరశురామ్ తోనూ నాగ చైతన్య ఒక సినిమా చేయాల్సి ఉంది.ఆ చిత్రానికి సంబంధించిన పూర్తి వివరాలు ఇంకా తెలియాల్సి ఉంది. ఇక బాలీవుడ్ సూపర్ స్టార్ అమీర్ ఖాన్ నటించిన “లాల్ సింగ్ చడ్డా” చిత్రంలో నాగ చైతన్య ఒక ముఖ్య పాత్రలో నటిస్తున్న విషయం తెలిసిందే. ఈ చిత్రం ఆగస్ట్ 11న విడుదలకు సిద్ధంగా ఉంది.

హీరోయిన్ సమంత ప్రస్తుతం తన వ్యక్తిగత జీవితంలోని విషయాలను పక్కన పెట్టి కెరీర్ ను చక్కబెట్టే పనిలో ఉన్నారు. వరుస సినిమాలతో బిజీగా ఉంటూ తన ఇమేజ్ ను స్టార్ డం ను పెంచుకుంటూ పోతున్నారు. అంతే కాకుండా బాలీవుడ్ ఇండస్ట్రీలో బిజీ అయ్యేందుకు గట్టిగానే ప్రయత్నాలు చేస్తున్నారు. ఆమె మొన్నటి వరకు తెలుగులో చాలా బిజీగా కనిపించిన విషయం తెలిసిందే. ఇక ఇప్పుడు తన దృష్టిని అంతా బాలీవుడ్ ఇండస్ట్రీ పైన పెట్టినట్లుగా తెలుస్తోంది. ఇక రాబోయే రోజుల్లో సమంత నుంచి చాలా పెద్ద సినిమాలే రాబోతున్నాయట.

ఇదివరకే బాలీవుడ్ యువ హీరో ఆయుష్మాన్ ఖురానా తో ఒక సినిమా చేసే అవకాశం దక్కించుకున్నారు సమంత. అలాగే ప్రస్తుతం మరికొన్ని ప్రాజెక్టులలో కూడా నటించేందుకు చర్చలు జరుపుతున్నారట. అలాగే బాలీవుడ్ హీరో వరుణ్ ధావన్ తో ఒక పెద్ద సినిమాలో కూడా నటించే అవకాశాలు ఉన్నాయి. ఇక వీటితో పాటు తాజాగా స్టార్ హీరో అక్షయ్ కుమార్ తో కూడా ఒక సినిమా చేయబోతున్నట్లు తెలుస్తోంది. ఇటీవల కరణ్ జోహార్ కాఫీ విత్ కరణ్ షోలో సమంత పాల్గొన్న విషయం తెలిసిందే.

ఆ షోలో ఆమెతో పాటు బాలీవుడ్ స్టార్ హీరో అక్షయ్ కుమార్ కూడా అతిధిగా విచ్చేశారు. ఈ షోలో సమంత తన వ్యక్తిగత జీవితం గూర్చీ, అలాగే హీరోయిన్ గా తనని తాను వృద్ధిలో ఉంచేందుకు ఎలా కృషి చేస్తున్నారో తెలిపారు.

ఈ రోజుల్లో ఇండస్ట్రీలో పేరు సంపాదించుకోవాలి అంటే కేవలం ప్రతిభ ఉంటే సరిపోదు. మనల్ని మనం మార్కెట్ కూడా చేసుకోవాలి. అది సినిమా ఇండస్ట్రీలో సర్వ సాధారణం. హీరోలు హీరోయిన్లు పబ్లిసిటీ నిమిత్తం ఒక మనిషి లేదా టీమ్ ను పెట్టుకుని వారి వారి సినిమాల గురించి మరియు వాళ్ల పనితనం గురించి సోషల్ మీడియాలో ట్రెండ్ అయ్యేలా చేయడం ఒక ఫార్ములాగా దాదాపు అందరూ పాటిస్తున్నారు.

ఇదే విషయం పై సమంత కూడా నోరు విప్పారు. ఫలానా సర్వేలో ఎక్కువ పాపులర్ హీరోయిన్ గా తన పేరు వచ్చేలా చేసేందుకు గానూ తన పీఆర్ (PR) టీమ్ కు డబ్బులు ఇచ్చి పని చేయించినట్లుగా తెలిపారు. సమంత ఇలా డబ్బులు ఖర్చుపెట్టి తనని తాను మార్కెటింగ్ చేసుకుంటున్నారు అని ఇదివరకే కొన్ని పుకార్లు వచ్చాయి. ఇప్పుడు సమంత స్వయంగా ఆ మాట చెప్పడంతో ఈ వ్యవహారం మీద కొంత మంది పాజిటివ్ గా రియాక్ట్ అయితే మరికొందరు విమర్శలు చేస్తున్నారు.

విభిన్నమైన కథలు మరియు పాత్రలతో ఎప్పటికప్పుడు సరికొత్త సినిమాలు తీస్తూ ప్రేక్షకులని ఆకట్టుకుంటున్న నటుడు అడివి శేష్. వైవిధ్యభరిత సినిమాలతో ప్రేక్షకుల ముందుకు వస్తూ ఒక అభిరుచి గల నటుడిగా మంచి పేరును దక్కించుకున్నారు.

ఇటీవలే మేజర్ చిత్రంతో ప్రేక్షకుల ముందుకి వచ్చి మరో విజయాన్ని తన ఖాతాలో వేసుకున్నారు. ప్యాన్ ఇండియా స్థాయిలో తెరక్కిన మేజర్ చిత్రం విశేష స్థాయిలో ఆదరణ పొందింది. ఈ చిత్రానికి ప్రచార కార్యక్రమాలను తన భుజాలపై వేసుకుని అడివి శేష్ ఆ పనులను సమర్థ వంతంగా నడిపించారు. ముఖ్యంగా హిందీ ప్రేక్షకులకి ఈ సినిమాని స్పెషల్ ప్రీమియర్ షోలు వేసి బాగా ప్రచారం చేశారు.

ఇక ఇదిలా ఉంటే అడివి శేష్ త్వరలో హిట్ 2 సినిమా తో ప్రేక్షకుల ముందుకి రావాల్సి ఉంది. అయితే ముందుగా అనుకున్న షెడ్యూల్ ప్రకారం హిట్ 2 సినిమా ఇప్పటికే షూటింగ్ పూర్తి అవ్వాల్సింది. అయితే మేజర్ చిత్ర ప్రచార కార్యక్రమాలను తానే అన్నీ అయి నడిపించిన అడివి శేష్ ఆ బిజీ షెడ్యూల్ నుండి కాస్త విరామం తీసుకున్నారు.

హిట్ 2 సినిమా షూటింగ్ కు తాను ఎందుకు హాజరు అవ్వలేక పోతున్నాను అనే విషయం పై శేష్ స్వయంగా ఒక లేఖ రాశారు. అలసి పోయాను. షూటింగ్ కు కాస్త బ్రేక్ కావాలి. అందుకే హిట్ 2 ను వచ్చే నెలలో కొత్త షెడ్యూల్ కు ప్లాన్ చేస్తున్నట్లుగా ఆయన చెప్పుకొచ్చారు.మానసికంగా మరియు శారీరకంగా చాలా అలసి పోయానని.. అందుకే హిట్ 2 నిర్మాత నాని మరియు దర్శకుడు శైలేష్ లను అడిగాను అని ఆయన ఆ లేఖలో పేర్కొన్నారు.

అందుకు వారు కూడా ఒప్పుకున్నారని చెప్తూ, బ్రేక్ నుండి తిరిగి వచ్చాక చివరి షెడ్యూల్ లో పాల్ గొంటానని, తొందరలోనే హిట్ 2 సినిమాలోని KD పాత్రతో ప్రేక్షకుల ముందుకు వస్తానని ఆయన తెలిపారు.ఇక త్వరలోనే హిట్ 2 సినిమా ను పూర్తి చేసి విడుదల తేదీని ప్రకటిస్తామని చెప్పారు అడివి శేష్ . సినిమా షూటింగ్ ఇప్పటికే మెజార్టీ పార్ట్ పూర్తి అయ్యిందని తెలుస్తోంది.

హిట్ – ఫస్ట్ కేస్ లో విశ్వక్ సేన్ నటించిన విషయం తెలిసిందే. ఆ సినిమాకు ప్రేక్షకుల నుంచి మంచి స్పందన వచ్చింది. కరోనా మొదటి వేవ్ ముందు చివరి హిట్ సినిమా అదే కావడం విశేషం. థియేట్రికల్ రిలీజ్ లోనే కాకుండా ఓటీటీ విడుదల తరువాత కూడా హిట్ సినిమా నిజంగా పెద్ద హిట్ అయ్యింది. అందుకే హిట్ 2 కి విపరీతమైన క్రేజ్ ఏర్పడింది. పైగా ఈ ప్రాజెక్ట్ లో అడివి శేష్ నటిస్తున్న కారణంగా ప్రేక్షకులకు సినిమాపై మరింత ఆసక్తి ఏర్పడింది.హిట్ సెకండ్ కేస్ ఎప్పుడు విడుదల అవుతుందా అని ప్రేక్షకులు ఎదురు చూస్తున్నారు. మరి మొదటి భాగం స్థాయిలో రెండవ కేసు కూడా ఆసక్తిగా సాగుతుందా అనేది చూడాలి.

కొరటాల శివ అంటే నిన్న మొన్నటి వరకూ అపజయం ఎరుగని దర్శకుడిగా తెలుగు సినీ పరిశ్రమలో పేరు ఉండేది. అయితే ఒక్క సినిమాతో ఆయన పరిస్థితి తలక్రిందులు అయింది. రచయితగా ‘భద్ర, మున్నా, నిన్న నేడు రేపు, ఒక్కడున్నాడు, సింహా, బృందావనం, ఊసరవెల్లి’ వంటి విజయవంతమైన సినిమాలకు పని చేసి ‘మిర్చి’తో దర్శకుడుగా మారారు కొరటాల శివ. ఆ సినిమా ఘన విజయం సాధించి కొరటాలను స్టార్ డైరెక్టర్ ల లిస్ట్ లో చేరేలా చేసింది. ఆ తర్వాత ‘శ్రీమంతుడు, జనతా గ్యారేజ్, భరత్ అనే నేను’ వంటి సినిమాలతో వరుసగా స్టార్ హీరోలతో సూపర్ డూపర్ హిట్లతో అగ్ర దర్శకుల జాబితాలో చేరిపోయారు. ఇన్ని హిట్ సినిమాలు ఉన్న కొరటాలను ఒకే ఒక్క సినిమా అటు కెరీర్ పరంగా ఇటు ఆర్ధికంగా తీవ్రంగా దెబ్బతీసింది. అదే ‘ఆచార్య’.

మెగాస్టార్ చిరంజీవి, మెగా పవర్ స్టార్ రామ్ చరణ్ ముఖ్య పాత్రలో కలసి నటించిన ఈ సినిమా నిర్మాణం దాదాపు మూడేళ్ల పాటు కొనసాగింది. ఇక ఈ సినిమాకు దర్శకత్వం తో పాటు బిజినెస్ లోనూ ఇన్వాల్వ్ అయ్యారు కొరటాల శివ. అదే ఆయనను తీవ్ర ఇబ్బందుల్లోకి నెట్టింది. సినిమా రిలీజ్ అయి డిజాస్టర్ కావటంతో అన్ని ఏరియాల నుంచి కొనుగోలు దారులు నష్టపోయిన మొత్తాలను చెల్లించాలని కొరటాలపై వత్తిడి తెచ్చారు. చాలా వరకు ఈ వ్యవహారాలను పెద్ద సమస్యగా మారకుండానే సెటిల్ చేశారు కొరటాల మరియు ఆయన స్నేహితుడు సుధాకర్. అయితే సీడెడ్ ఏరియాకు సంబంధించిన వ్యవహారం మాత్రం కాస్త వివాదం అవడం.. ఎగ్జిబిటర్స్ తమ డబ్బు చెల్లించాలని కొరటాల ఆఫీస్ కు వెళ్ళి వత్తిడి చేయడం వంటి సంఘటనలతో సమస్య తీవ్రత పెరిగింది. కొరటాల నేరుగా వచ్చి హామీ ఇస్తే కానీ ఆ సమస్య పరిష్కారం కాలేదు. అలా ఎన్నో ఒడిదుడుకులు ఎదురుకుని ఆచార్య చిత్రం యొక్క ఆర్ధిక లావాదేవీలకు సంబంధించిన సమస్యలను పరిష్కారం చేశారు కొరటాల. అయితే తాజాగా ఆయన పై మరి అభియోగం మోప బడింది.

బాలీవుడ్ స్టార్ అమీర్ ఖాన్ హీరోగా నటించిన “లాల్ సింగ్ చడ్డా” చిత్రాన్ని తెలుగులో మెగాస్టార్ చిరంజీవి సమర్పకుడిగా వ్యవహరిస్తున్న విషయం తెలిసిందే. ఆ చిత్రం తాలూకు తెలుగు వెర్షన్ ప్రి రిలీజ్ ఈవెంట్ లో చిరంజీవి చేసిన వ్యాఖ్యలు ఇప్పుడు చర్చలకు దారి తీస్తున్నాయి.

ఇంతకీ చిరంజీవి ఏమన్నారంటే.. ” నేను ఎప్పుడూ సినిమాలు తీసెప్పుడు అవి జనాదరణ పొందాలి, జనామోదంగా ఉండాలి అని మినిమం గ్యారెంటీ సినిమాలు తీస్తుంటాను, అమీర్ అలా కాదు.. ఆయన.ప్రయోగాత్మకంగా సినిమాలు తీయడం కాకుండా ప్రేక్షకులని మెప్పిస్తూ ఉంటారు. అదే నేను అయితే ఏం చేస్తే ప్రేక్షకులు చప్పట్లు కొడతారో, శభాష్ అంటారో అలాంటి సినిమాలు చేస్తాను, కాకపోతే మధ్యలో నా ప్రమేయం లేకుండా కొన్ని జరిగిపోతుంటాయి వాటి గురించి నేను మాట్లాడదల్చుకొలేదు” అని.చిరంజీవి అన్నారు.

ఆయన అన్న మాటలు పరోక్షంగా ఆచార్య చిత్రం గురించి మరియు దర్శకుడు కొరటాల శివ గురించి అని అందరికీ అర్థం అయింది. అయితే ఇండస్ట్రీలో ఇంత సీనియర్ నటుడు మరియు హీరో అయి ఉండి చిరంజీవి ఇలా మాట్లాడటం ఏంటని ఆ విడియో చూసిన ప్రేక్షకులు అంటున్నారు.

బాలీవుడ్ సూపర్ స్టార్ హీరో అమీర్ ఖాన్ నటిస్తోన్న తాజా సినిమా లాల్ సింగ్ చడ్డా. విలక్షణమైన పాత్రలతో, కథలతో వచ్చే అమీర్ ఖాన్ నుండి సినిమా వస్తుందంటే ప్రేక్షకుల్లో ఆసక్తి ఉంటుంది. కెరీర్ మొదటి నుంచీ అమీర్ విభిన్నమైన కథలను ఎంచుకుంటూ సినిమాలు చేస్తూ విజయాలను అందుకుంటున్నారు. ఆయన హీరోగా నటించిన దంగల్ (2016) విడుదలయి ఆరేళ్లు అవుతుంది. అంత గ్యాప్ తరువాత ఆయన చేస్తున్న సినిమా లాల్ సింగ్ చడ్డా.

ఈ సినిమాలో అమీర్ సరసన కరీనా కపూర్ హీరోయిన్ గా నటిస్తున్నారు. భారీ విజయం సాధించిన 3 ఇడియట్స్ సినిమా తర్వాత ఈ జంట మరోసారి కలిసి నటిస్తున్నారు. దాంతో ఈ సినిమా పై అంచనాలు భారీగా ఏర్పడ్డాయి. ఇక ఈ సినిమాను తెలుగులో మెగాస్టార్ చిరంజీవి సమర్పిస్తున్నారు. అదే విధంగా ఈ సినిమాలో అక్కినేని యువసామ్రాట్ నాగచైతన్య కీలక పాత్రలో నటిస్తున్న సంగతి తెలిసిందే. లాల్ సింగ్ చడ్డా స్నేహితుడు బాలరాజు పాత్రలో నాగ చైతన్య కనిపించనున్నారు.

ఈ క్రమంలో సినిమా తెలుగు ట్రైలర్ ను మెగాస్టార్ చిరంజీవి విడుదల చేశారు. ట్రైలర్ లాంచ్ చేసిన అనంతరం చిరంజీవి, అమీర్ ఖాన్ మీడియాతో ముచ్చటించారు. ఈ సందర్భంగా అమీర్ మాట్లాడుతూ.. తను చిరంజీవి దగ్గర నుండి ఆశీర్వాదం తీసుకోవడానికి వచ్చాను అన్నారు. అలాగే అవకాశం వస్తే తప్పకుండా చిరంజీవి గారితో నటిస్తానని చెప్పారు. ఆ సమయంలోనే గాడ్ ఫాదర్ సినిమాలో నన్ను అడగకుండా సల్మాన్ తో నటింపజేశారు అని అమీర్ చిరంజీవిని చమత్కారంగా అడిగారు.

ఇక చిరంజీవి మాట్లాడుతూ, అమీర్ ఎపుడూ విభిన్నమైన పాత్రలను మరియు సినిమాలను అందించి ప్రేక్షకులని మెప్పిస్తారని, అదే తాను అయితే ప్రేక్షకులు ఏ పాత్రల్లో తనను చూడటానికి ఇష్టపడతారో అవే చేస్తుంటానని, అయితే కొన్నిసార్లు తనకి తెలియకుండానే కొన్ని జరిగి పోతాయని, వాటి గురించి మాట్లాడదల్చుకొలేదని చిరంజీవి అన్నారు. అయితే ఆయన పరోక్షంగా ఆచార్య సినిమా గురించే అలా అన్నారని ఆ విడియో చూసిన సోషల్ మీడియాలో వీక్షకులు అంటున్నారు.

మెగాస్టార్ చిరంజీవి – మెగా పవర్ స్టార్ రామ్ చరణ్ కలిసి నటించిన “ఆచార్య” భారీ పరాజయం చవి చూసిన సంగతి తెలిసిందే. ఇక ఇదే క్రమంలో చిరంజీవి సినిమా పరిశ్రమలో దర్శకులని ఉద్దేశిస్తూ కొన్ని సూచనలు ఇచ్చారు. దర్శకులు ముందుగానే డైలాగులు మరియు స్క్రిప్ట్ రాసుకుని వస్తే మంచిదని, అలా కాకుండా సెట్స్ మీదకి వచ్చిన తరువాత రాస్తే అంతగా మంచిది కాదని ఆయన అభిప్రాయ పడ్డారు.

లాల్ సింగ్ చడ్డా చిత్రాన్ని అమీర్ ఖాన్ ప్రొడక్షన్స్- కిరణ్ రావు – జ్యోతి దేశ్ పాండే, అజిత్ అంధారే (వయాకామ్ 18 స్టూడియోస్) నిర్మించారు. ఈ ఏడాది ఆగస్ట్ 11న ప్రపంచవ్యాప్తంగా తెలుగు-తమిళం-హిందీలో ఈ చిత్రం ప్యాన్ ఇండియా స్థాయిలో విడుదల కానుంది. హాలీవుడ్ హిట్ చిత్రం ‘ఫారెస్ట్ గంప్’ ఆధారంగా ఈ సినిమాను తెరకెక్కించారు. వయాకామ్ 18 స్టూడియోస్ తో కలిసి మెగాస్టార్ చిరంజీవి తెలుగులో ఈ చిత్రానికి సమర్పకుడిగా వ్యవహరిస్తున్నారు.