ZEE5, భారతదేశంలోని అతిపెద్ద వీడియో ఆన్ డిమాండ్ స్ట్రీమింగ్ ప్లాట్‌ఫారమ్ లలో ఒకటి. దేశ వ్యాప్తంగా అన్ని పరిశ్రమల నుంచి అన్ని రకాల సినిమాలు, వెబ్ సీరీస్ లను వీక్షకులకు అందజేస్తూ చాలా త్వరగా ఓటిటి సంస్థలలో అగ్రస్థానానికి ఎగబాకుతుంది. తాజాగా తన లైబ్రరీలో మరో అద్భుతమైన సినిమాని చేర్చుకుంది.

ప్రేక్షకులు ఎంతగానో విశేష స్థాయిలో ఆదరించి.. అటు విమర్శకుల ప్రశంసలు కూడా పొందిన తమిళ యాక్షన్ థ్రిల్లర్ ‘విక్రమ్’ యొక్క వరల్డ్ డిజిటల్ ప్రీమియర్‌ను ఇటీవలే ప్రకటించింది. లోకేష్ కనగరాజ్ రచన మరియు దర్శకత్వం వహించిన విక్రమ్ చిత్రంలో కమల్ హాసన్, విజయ్ సేతుపతి మరియు ఫహద్ ఫాజిల్ కీలక పాత్రల్లో నటించారు. థియేటర్లలో ఈ చిత్రం విమర్శకులు మరియు ప్రేక్షకులను అద్భుతంగా ఆకట్టుకుని సూపర్ హిట్ చిత్రంగా బాక్స్ ఆఫీస్ వద్ద భారీ విజయాన్ని అందుకుంది.

ఈ చిత్రం తమిళనాడులో అత్యధిక వసూళ్లు సాధించడమే కాకుండా ఇండస్ట్రీ హిట్ చిత్రంగా కూడా నిలిచింది. కాగా నిన్నటి నుంచి అంటే 13 సెప్టెంబర్ 2022 నుండి హిందీ, తమిళం, తెలుగు, మలయాళం మరియు కన్నడ భాషల్లో Zee5 ప్లాట్‌ఫారమ్‌ పై ప్రసారం అవుతుంది.

రాజ్ కమల్ ఫిలింస్ ఇంటర్నేషనల్ నిర్మించిన ఈ చిత్రం అదే పేరుతో 1986లో విడుదలైన చిత్రానికి కొనసాగింపుగా తెరకెక్కింది. కమల్ హసన్ ప్రధాన పాత్ర పోషించిన ఈ సినిమా డ్రగ్ మాఫియా, గ్యాంగ్ వార్స్ మరియు రోమాలు నిక్కబొడుచుకొనే అద్భుత పోరాట ఘట్టాలతో తెరకెక్కిన హై-ఆక్టేన్ యాక్షన్ చిత్రం. ఈ చిత్రంలో వరుస హత్యల కేసును పరిష్కరించే పోలీస్ పాత్రలో ఫహద్ ఫాజిల్ నటించారు. ఇక డ్రగ్ మాఫియా గ్యాంగ్ లోని ఒక ముఖ్య సభ్యుడిగా విలక్షణ నటుడు విజయ్ సేతుపతి కనిపించారు. ఈ ముగ్గురు అసాధారణ నటుల మధ్య వచ్చే సన్నివేశాలు మరియు సంభాషణలు ప్రేక్షకులని విపరీతంగా అలరించాయి.

IMDB సైట్ లో 8.4 రేటింగ్‌తో, విక్రమ్ సినిమాలోని నటీనటుల నటనకు, అలాగే చిత్ర కథనానికి కూడా ప్రశంసలు దక్కాయి. ఔట్ అండ్ ఔట్ యాక్షన్ ప్యాక్డ్ సీక్వెన్స్‌ లతో పాటు థ్రిల్లింగ్ సీన్స్ వరకు ఈ చిత్రంలో మాస్ ప్రేక్షకులని అలరించే అంశాలు చాలా ఉన్నాయి.

కాగా ఇదివరకు Disney+Hotstar లో స్ట్రీమింగ్ కాబడిన విక్రమ్, తాజాగా ZEE5లో వరల్డ్ డిజిటల్ ప్రీమియర్‌తో, ఏకంగా 190 దేశాలలోని వీక్షకులకు అందుబాటులోకి వచ్చింది.

మాస్ మహారాజా రవితేజ ప్రధాన పాత్రలో నటించి ఇటీవలే విడుదలైన యాక్షన్ థ్రిల్లర్ రామారావు ఆన్ డ్యూటీ. కాగా విడుదలైన మొదటి రోజునే.. ఈ చిత్రం పేలవమైన కంటెంట్‌ వల్ల అటు విమర్శకులు మరియు ప్రేక్షకులచే తిరస్కరించబడింది. దాంతో ఈ చిత్రం బాక్సాఫీస్ వద్ద అట్టర్ ప్లాప్ గా నిలిచింది. కేవలం తొలి రోజు మాత్రమే కాస్త గౌరవప్రదమైన నంబర్లను రాబట్టగలిగింది.

నిజానికి కథలో మంచి విషయం ఉన్నా.. తెరకెక్కించే విధానం నిస్సారంగా ఉండటంతో ప్రేక్షకులకి ఈ సినిమా ఏ మాత్రం నచ్చలేదు. కలెక్టర్ పాత్రలో కొత్త లుక్ తో పాటు తన కెరీర్ లోనే ఎప్పుడూ లేని విధంగా సీరియస్ రోల్ లో రవితేజ నటించారు. అయితే మాస్ రాజాను చూస్తే ఎనర్జీ నిండిన పాత్రలో లేదా ఇంటెన్సిటీ ఉన్న పాత్రలో చూస్తాం కానీ ఇలా నీరసంగా ఉన్న పాత్రలో చూడలేము అని ప్రేక్షకులు అభిప్రాయ పడ్డారు. ఈ సినిమాతో మంచి బ్లాక్ బస్టర్ హిట్ సాధించాలి అన్న రవితేజ కోరిక అలా నెరవేరకుండా పోయింది.

అయితే ప్రస్తుతం అన్ని సినిమాలకు జరిగినట్లే, ఈ సినిమాకు కూడా OTT రిలీజ్ ఎప్పుడా అని ప్రేక్షకులు ఎదురు చూశారు. వారి ఎదురుచూపులు ఫలించి సెప్టెంబర్ 15న సోనీలివ్ ప్లాట్‌ఫారంలో స్ట్రీమింగ్ కు సిద్ధంగా ఉంది.

ఈ మేరకు సదరు OTT ప్లాట్‌ఫారం కొద్దిసేపటి క్రితం ఇదే విషయానికి సంభందించి అధికారిక ధృవీకరణ ఇచ్చింది. కాగా ఈ చిత్రం తెలుగు, తమిళం, మలయాళం, కన్నడ భాషల్లో ప్రసారం కానుందని సమాచారం.

ఈ చిత్రంలో రవితేజ సరసన దివ్యాంశ కౌశిక్ మరియు రజిషా విజయన్ కథానాయికలుగా నటించారు. ఒకప్పుడు పాపులర్ హీరో అయిన నటుడు వేణు తొట్టెంపూడి ఈ సినిమాతో తిరిగి వెండితెర పై కనిపించారు. SLV సినిమాస్ మరియు RT టీమ్ వర్క్స్ బ్యానర్లపై సుధాకర్ చెరుకూరి ఈ చిత్రాన్ని నిర్మించగా, నూతన దర్శకుడు శరత్ మండవ దర్శకత్వం వహించారు.

సామ్ సిఎస్ సంగీతం అందించిన ఈ చిత్రంలో నాజర్, నరేష్, పవిత్ర లోకేష్, సర్పత్తా జాన్ విజయ్ ఇతర కీలక పాత్రల్లో నటించారు. థియేటర్లలో ఈ చిత్రాన్ని చూడని వారు సెప్టెంబర్ 15 నుండి సోనీలివ్‌లో చూసి ఆనందించవచ్చు.

పుష్ప ది రైజ్ సినిమాతో ప్యాన్ ఇండియా బ్లాక్ బస్టర్ హిట్ ని అందుకున్న అల్లు అర్జున్ తదుపరి సినిమాపై ఇంకా క్లారిటీ రాలేదు. పుష్ప సినిమా తర్వాత దర్శకుడు వేణు శ్రీరామ్ తో ఐకాన్ సినిమా చేస్తారు అని వార్తలు వచ్చినా.. కోన్ని కారణాల వల్ల ఆ సినిమా సెట్స్ పైకి వెళ్లలేదు. ఇక దర్శకుడు కొరటాల శివతో ఒక సినిమా ప్రకటించినా, అది కూడా కార్యరూపం దాల్చలేదు.

అయితే ఇప్పుడు త్రివిక్రమ్ దర్శకత్వంలో అల్లు అర్జున్ మరో సినిమా చేయబోతున్నట్లు వార్తలు వస్తున్నాయి. త్రివిక్రమ్ – అల్లు అర్జున్ ల బ్లాక్ బస్టర్ కాంబినేషన్లో మరొక సినిమాని ప్లాన్ చేస్తున్నారన్న వార్త విన్న తరువాత అల్లు అర్జున్ అభిమానులు ఇది నిజంగా జరిగితే ఎంతో బాగుండు అని ఆశతో ఉన్నారు.

ప్రస్తుతం అల్లు అర్జున్ పుష్ప 2 సినిమా షూటింగ్లో బిజీగా ఉన్నారు. అల్లు అర్జున్ దృష్టి మొత్తం పుష్ప2 పైనే ఉంది. ఈ ఐకాన్ స్టార్ ఇంతకు ముందు నా పేరు సూర్య నా ఇల్లు ఇండియా సినిమాతో పరాజయంలో ఉన్నప్పుడు.. త్రివిక్రమ్ దర్శకత్వంలో వచ్చిన అలా వైకుంఠపురం సినిమా భారీ విజయాన్ని సాధించింది.. అల్లు అర్జున్ తో పాటు త్రివిక్రమ్ కు కూడా ఎంతో గొప్ప స్థాయిని, పేరుని తీసుకొచ్చింది. వీరిద్దరి కాంబినేషన్లో మరో సినిమా కోసం అటు అల్లు అర్జున్ అభిమానులతో పాటు త్రివిక్రమ్ సినిమాలని, తూటాల్లాంటి మాటలను ఇష్టపడే సినీ ప్రేమికులు కూడా ఎదురు చూస్తున్నారు.

తాజాగా త్రివిక్రమ్ సూపర్ స్టార్ మహేష్ బాబు హీరోగా ఒక సినిమాను తెరకెక్కిస్తున్న విషయం తెలిసిందే. భారీ యాక్షన్ థ్రిల్లర్ గా తెరకెక్కనున్న ఈ సినిమా ఇటీవలే సెట్స్ పైకి వెళ్ళింది. నిజానికి ఈ సినిమాను ఎన్టీఆర్ హీరోగా చేయాల్సింది. అలాగే సినిమాకు “అయినను పోయి రావలే హస్తినకు” అనే టైటిల్ కూడా కొన్ని రోజులు ప్రచారంలో ఉండటం జరిగింది. అయితే కొన్ని కారణాల వల్ల ఆ సినిమా చేతులు మారి మహేష్ బాబు వద్దకు వెళ్ళింది.

ఇక మహేష్ తో సినిమా చేసిన తర్వాత త్రివిక్రమ్ రామ్ చరణ్ కాంబినేషన్లో ఒక సినిమా ఉండొచ్చు అని ఆ మధ్య వార్తలు వచ్చాయి.. కానీ అల్లు అర్జున్ పుష్ప 2 సినిమా తర్వాత త్రివిక్రమ్ కాంబినేషన్లో ఒక సినిమా చేయనున్నారనే వార్త ఇప్పుడు టాక్ ఆఫ్ ది ఇండస్ట్రీగా మారింది. ఏది ఏమైనా పుష్ప సినిమాతో తెలుగు ఇండస్ట్రీకి భారీ కలెక్షన్లతో పాటు ప్యాన్ ఇండియా స్థాయిలో మంచి ఇమేజ్ ను కూడా తీసుకొచ్చారు హీరో అల్లు అర్జున్.. అలాగే అలా వైకుంఠపురములో సినిమాతో అందరినీ ఆకట్టుకున్నారు త్రివిక్రమ్. వీరిద్దరూ ప్రస్తుతం వారు చేస్తున్న సినిమాల చిత్రీకరణ పూర్తయిన తర్వాత తమ కలయికలో ముచ్చటగా మూడో సినిమా చేయనున్నారని సమాచారం.

త్రివిక్రమ్‌ – అల్లు అర్జున్ కాంబినేషన్‌లో ఇప్పటి వరకు జులాయి, సన్నాఫ్‌ సత్యమూర్తి, అల వైకుంఠపురములో వంటి సూపర్ డూపర్ హిట్ చిత్రాలు తెరకెక్కిన సంగతి తెలిసిందే.

పుష్ప: ది రైజ్ వంటి భారీ ప్యాన్ ఇండియా ఘనవిజయం తర్వాత, రష్మిక మందన్న పేరు ఒక్కసారిగా భారతదేశం అంతటా పాపులార్ అయిపోయింది. దీంతో ఆమె ఇమేజ్ కూడా చాలా ఎత్తుకు ఎదిగింది. పుష్ప సినిమాలోని శ్రీవల్లి పాత్రలో ఆమె చేసిన నటన కేవలం తెలుగు రాష్ట్రాల్లోనే కాకుండా యావత్ భారతదేశంలోని ప్రేక్షకులందరినీ ఎంతగానో ఆకట్టుకుంది.

ఇక పుష్ప తర్వాత, రష్మికకు అన్ని పరిశ్రమల నుండి భారీ ఆఫర్లు రావడం ప్రారంభించాయి. ఆమె ఇప్పటికే అమితాబ్ బచ్చన్‌తో గుడ్‌బై అనే నటించారు, అలాగే సిద్ధార్థ్ మల్హోత్రాతో కూడా ఒక సినిమా చేస్తున్నారు. ఈ సినిమాతో పాటు ఇటీవలే రణబీర్ కపూర్‌తో ఒక చిత్రానికి కూడా సంతకం చేశారు. ఆసక్తికరమైన విషయం ఏమిటంటే ఆ చిత్రానికి దర్శకుడు మరెవరో కాదు.. అర్జున్ రెడ్డి వంటి సినిమాతో ఒక్కసారిగా క్రేజీ డైరెక్టర్ గా పేరు తెచ్చుకున్న సందీప్ రెడ్డి వంగా. ఈ సినిమాలో తొలుత హీరోయిన్ గా పరిణీతి చోప్రాను అనుకున్నారు కానీ కొన్ని కారణాల వల్ల ఆమె స్థానంలో రష్మిక వచ్చి చేరారు. ఇక ఈ చిత్రంలో అనిల్ కపూర్ కూడా ఒక ముఖ్య పాత్రను పోషిస్తున్నారు.

ఇక తెలుగు, తమిళ, హిందీ పరిశ్రమలు అన్నిట్లోనే కాకుండా.. ప్రపంచ వ్యాప్తంగా కూడా గుర్తింపు పొందిన తరువాత సహజంగానే, రష్మిక రాబోయే ప్యాన్ – ఇండియన్ చిత్రాలకు తన రెమ్యునరేషన్ పెంచాలని నిర్ణయించుకున్నారని తెలుస్తోంది. ఆమె ఇకపై తన పాత రెమ్యూనరేషన్‌ ను కొనసాగించకుండా, ఏకంగా 5 కోట్ల పారితోషికాన్ని డిమాండ్ చేయాలని నిర్ణయించుకున్నారట.

5 కోట్లు అనేది ఎంతటి భారీ ఇమేజ్ ఉన్న స్టార్ కి అయినా చాలా పెద్ద మొత్తమనే చెప్పాలి. కేవలం అమౌంట్ పెంచడం మాత్రమే కాకుండా రష్మిక తన రెమ్యునరేషన్‌కు అనుగుణంగా తన ప్రతిభను ప్రదర్శించాల్సి వస్తుంది. ఆమె ప్రస్తుతం ప్రపంచ వ్యాప్తంగా భారీ క్రేజ్ ఏర్పరచుకున్న అతిపెద్ద పాన్-ఇండియన్ చిత్రం పుష్ప: ది రూల్‌లో నటిస్తున్నారు. ఈ చిత్రానికి సంబంధించి ప్రేక్షకులలో చాలా ఉత్కంఠ మరియు హైప్ నెలకొంది.

కాగా ఈ చిత్రం షూటింగ్ కూడా ఇటీవలే ప్రారంభమైంది. షూటింగ్ అధికారికంగా ప్రారంభమైందని, పార్ట్ 2 కోసం టీమ్ అంతా ఉత్సాహంగా ఉన్నారని రష్మిక ధృవీకరించారు.

శర్వానంద్, రీతూ వర్మ మరియు అమల అక్కినేని నటించగా . కొత్త దర్శకుడు శ్రీ కార్తిక్ తెరకెక్కించిన టైమ్ ట్రావెల్ ఎమోషనల్ డ్రామా ఒకే ఒక జీవితం సెప్టెంబర్ 9 న విడుదలైంది. మరియు సినీ ప్రేమికుల నుండి మంచి స్పందనను అందుకుంది. తాజా నివేదిక ప్రకారం కలెక్షన్లు ఏ మేరకు వచ్చాయో చూద్దాం.

బాక్స్ ఆఫీస్ దగ్గర శర్వానంద్ సినిమా ఒకే ఒక జీవితం సినిమా గత వారం విడుదలై అటు ప్రేక్షకులు ఇటు విమర్శకుల నుండి అద్బుతమైన స్పందనను సొంతం చేసుకోగా.. ఈ సినిమా బాక్స్ ఆఫీస్ వద్ద వీకెండ్ వరకూ మంచి కలెక్షన్స్ ని సొంతం చేసుకున్న తర్వాత క్లిష్టమైన సాధారణ రోజులలోకి ప్రవేశించింది. సినిమా చూసిన ప్రతి ఒక్కరూ అద్భుతంగా ఉందని ఏకగ్రీవంగా టాక్ చెప్పినప్పటికీ సోమవారం కలెక్షన్లలో కాస్త డ్రాప్ వచ్చిన మాట వాస్తవమే.

సోమవారం మార్నింగ్ అండ్ మ్యాట్నీ షోలలో పెద్దగా కలెక్షన్లు లేని ఈ సినిమా, తిరిగి ఈవినింగ్ అండ్ నైట్ షోలలో స్పాట్ బుకింగ్స్ వల్ల మళ్ళీ నిలదొక్కుకుంది. మొత్తం మీద నాలుగవ రోజు బాక్స్ ఆఫీసు వద్ద ట్రేడ్ వర్గాలు ఆశించిన హోల్డ్ ఉన్నప్పటికీ.. సినిమాకు వచ్చిన టాక్ దృశ్యా సినిమా రన్ ఇంకొంచెం బాగా ఉండాల్సిందని అంటున్నారు.

మొత్తానికి తొలిరోజు చాలా స్లో ఓపెనింగ్ తర్వాత ఓకే ఒక జీవితం రెండవ రోజు మరియు మూడవ రోజు నుంచి బాక్స్ ఆఫీసు వద్ద దూసుకుపోయింది. మొత్తంగా బాక్సాఫీస్ వద్ద మూడు రోజుల తొలి వారాంతంలో మంచి నంబర్‌లను నమోదు చేసింది. ఇక ముందుగానే చెప్పుకున్నట్లు ఈ సినిమా సోమవారం రోజు కూడా బాగానే ఉంది.

ఈ చిత్రం తెలుగు రాష్ట్రాల్లో 5 రోజులకు సుమారుగా 10 కోట్ల గ్రాస్ వసూలు చేసింది. ఇక ఓవర్సీస్‌లో అద్భుతమైన ప్రదర్శన కనబర్చిన ఈ చిత్రం దాదాపు 3.5 కోట్ల గ్రాస్ వసూలు చేసింది , తమిళనాడులో దాదాపు 2.25 కోట్ల గ్రాస్ వసూలు చేసింది , మిగిలిన ఏరియాల గ్రాస్ దాదాపు 1 కోటి వరకూ ఉంటుంది . మొత్తంగా ఒకే ఒక జీవితం సినిమా ఐదు రోజులకు దాదాపు 17 కోట్ల గ్రాస్ వసూలు చేసి ఆకట్టుకుంది.

ఆడవాళ్లు మీకు జోహార్లు, మహాసముద్రం, శ్రీకారం వంటి వరుస పరాజయాలతో ఎలాంటి సినిమా చేయాలో తెలియక సతమతమవుతున్న హీరో శర్వానంద్ కు ‘ఒకే ఒక జీవితం’పెద్ద రిలీఫ్ ఇస్తుంది అనడంలో ఎలాంటి సందేహం లేదు. అలాగే సినిమాకు వచ్చిన రెస్పాన్స్‌తో శర్వా చాలా సంతోషంగా ఉన్నారు.