అమీర్ ఖాన్ నటిస్తున్న లాల్ సింగ్ చద్దా చిత్రంతో తెలుగు యువ హీరో అక్కినేని వారసుడు నాగ చైతన్య బాలీవుడ్ లో ఆరంగ్రేటం చేస్తున్న సంగతి తెలిసిందే. నాగ చైతన్య ఈ చిత్రంలో అతిథి పాత్రలోనే నటిస్తున్నప్పటికీ కథకి చాలా కీలకమైన పాత్ర అట. అమీర్ ఖాన్ తో కలసి చైతన్య ఈ చిత్రంలో సైనికుడిగా నటిస్తున్నాడు. ఈ సినిమాలో వీరిద్దరూ స్నేహితులుగా కనిపిస్తుండటం విశేషం.

ఆగష్టు 11న ఈ సినిమా పాన్ ఇండియా స్థాయిలో రిలీజ్ కి రెడీ అవుతోంది. ఇప్పటికే రిలీజ్ అయినట్రైలర్ ప్రేక్షకులను ఆకట్టుకుంది. బాలీవుడ్ లో అగ్ర హీరోల సినిమా విడుదలై ఏళ్లు గడుస్తున్నాయి. చాలా కాలం తరువాత ఒక పెద్ద హీరో సినిమా విడుదల అవుతున్న దశలో ఈ సినిమా పై బాలీవుడ్ ట్రేడ్ వర్గాలతో పాటు అమీర్ ఖాన్ అభిమానులు భారీ అంచనాలు పెట్టుకున్నారు.

ఇదిలా ఉండగా తెలుగులో ఈ చిత్రానికి క్రేజీ డీల్ కుదిరింది. లాల్ సింగ్ చద్దా తెలుగు రిలీజ్ హక్కులని అగ్ర నిర్మాత అల్లు అరవింద్ సొంతం చేసుకున్నారు. భారీ ధరకు ఆయన ఈ సినిమా తెలుగు వెర్షన్ హక్కులు సొంతం చేసుకున్నట్లు తెలుస్తోంది. గీతా ఆర్ట్స్ బ్యానర్ లో ఈ చిత్రాన్ని తెలుగు రాష్ట్రాలలో విడుదల చేయనున్నారు.

ఏకంగా అల్లు అరవింద్ లాంటి అగ్ర నిర్మాత రంగంలోకి దిగి ఈ చిత్రాన్ని సొంతం చేసుకోవడంతో ఈ సినిమా కంటెంట్ పైఅంచనాలు పెరిగాయి. లాల్ సింగ్ చద్దాలో ప్రేక్షకులను భావోద్వేగాలతో కట్టి పడేసే అంశాలు ఉంటాయి అని సమాచారం.

గతంలో అల్లు అరవింద్.. అమీర్ ఖాన్ తో గజినీ చిత్రాన్ని నిర్మించారు. ఆ సినిమా అమీర్ ఖాన్ కెరీర్ లోనే కాదు బాలీవుడ్ బిగ్గెస్ట్ హిట్స్ లో ఒకటి గా నిలిచింది. ఆ సినిమా బాక్స్ ఆఫీస్ వద్ద తిరుగులేని లాభాలు తెచ్చిపెట్టింది. మరిప్పుడు లాల్ సింగ్ చద్దా మరెన్ని రికార్డులు కొల్లగొడుతుందో చూద్దాం. అద్వైత్ చందన్ దర్శకత్వంలో తెరకెక్కిన ఈ చిత్రంలో కరీనా కపూర్ ఫీమేల్ లీడ్ గా నటించింది.

సాయి పల్లవి నటించిన కొత్త సినిమా’గార్గి’. గౌతమ్ రామచంద్రన్ దర్శకత్వంలో తెరకెక్కిన ఈ చిత్రం జూలై 15 న ప్రేక్షకుల ముందుకు రానుంది. తెలుగు, తమిళ, కన్నడ భాషల్లో రిలీజ్ అవుతున్న ఈ సినిమాను  తెలుగులో రానా ప్రెజెంటర్ గా వ్యవహరిస్తుండగా తమిళంలో సూర్య, జ్యోతిక రిలీజ్ చేస్తున్నారు.

ఇప్పటికే ఈ చిత్రం నుంచి రిలీజైన పోస్టర్స్ మరియు టీజర్ ప్రేక్షకులను విశేషంగా ఆకట్టుకున్నాయి. ఇక తాజాగా ఈ సినిమా ట్రైలర్ ను హీరోలు రానా, నాని తమ ట్విట్టర్ ద్వారా రిలీజ్ చేసి సాయి పల్లవికి తమ అభినందనలు తెలిపారు. ట్రైలర్ విషయానికొస్తే ఆద్యంతం ఉత్కంఠను రేకెత్తిస్తోంది. “మేడమ్.. మీరు బ్రహ్మానందం పెద్ద కూతురు కదా”అంటూ మీడియా అడిగే ప్రశ్నలతో ట్రైలర్ మొదలైంది.

సెక్యూరిటీ గార్డు గా పనిచేసే బ్రహ్మానందం కు ఇద్దరు కూతుళ్లు.. అందులో పెద్ద కూతురు గార్గి(సాయిపల్లవి) టీచర్ గా పనిచేస్తూ ఉంటుంది. త్వరలోనే ఆమెకు పెళ్లి కూడా జరగబోతుండగా సడెన్ గా పోలీసులు బ్రహ్మానందం ను అరెస్ట్ చేస్తారు. కేసు ఏంటి..? అసలు అతను నేరం చేశాడా..? చేస్తే ఆ నేరం ఎంటి? అనేది ఆకుటుంబంలో ఎవరికి తెలియదు. దీంతో తండ్రి కోసం గార్గి చేసిన పోరాటమే .సినిమా కథగా ట్రైలర్ చూస్తుంటే తెలుస్తోంది.ఇంతకీ సాయి పల్లవి తండ్రి చేసిన ఆ తప్పు ఏంటీ..? ఒక్కరోజులోనే గార్గి జీవితాన్ని తలకిందులు చేసింది ఎవరు..? వంటి విషయాలు సినిమా చూసి తెలుసుకోవాల్సిందే.

నటిగా సాయి పల్లవి ప్రతిభ గురించి ప్రత్యేకంగా చెప్పాల్సిన అవసరం లేదు. సరైన పాత్ర దక్కటమే ఆలస్యం సాయి పల్లవి అద్భుతంగా నటిస్తారు అనేది రుజువైన విషయమే. ఆవిడ ఇదివరకు నటించిన సినిమాలు.. చేసిన పాత్రలే అందుకు ఉదాహరణ. ఇక ఈ ట్రైలర్ కు గోవింద్ వసంత్ అందించిన నేపధ్య సంగీతం హైలైట్ గా నిలిచిందనే చెప్పాలి. ఇక చివర్లో “నన్ను నమ్మవు అమ్మ నువ్వు.. ఎందుకంటే నేను మగపిల్లాడిని కాదు కదా.. ఆడపిల్లను” అంటూ సాయి పల్లవి చెప్పిన డైలాగ్ ఈ సినిమా ఎంతటి భావోద్వేగమైన కథతో రూపొందించబడిందో చెప్పకనే చెప్తుంది. ట్రైలర్ వరకు ఆకట్టుకున్న గార్గి .. వచ్చే వారం అంటే జూలై 15న థియేటర్లలో కూడా అంతే బలంగా ప్రేక్షకులను ఆకట్టుకుంటుంది అని ఆశిద్దాం.

కరోనా పాండమిక్ సమయంలో ఓటీటీ ఫ్లాట్ ఫార్మ్స్ అనేవి అందరికీ అందుబాటులోకి వచ్చాయి. కొన్ని నెలల పాటు థియేటర్లు మూతబడి ఉండటంతో.. నిర్మాతలు నష్టాల నుంచి బయట పడటానికి ఓటీటీలను ఆశ్రయించారు. ఓటీటీలు సైతం భారీ ఆఫర్లు ఇచ్చి చిన్నా, పెద్దా తేడా లేకుండా అన్ని సినిమాలు ఓటీటీ లోనే వీక్షించే అవకాశం ప్రేక్షకులకు ఇచ్చాయి.

ఈ క్రమంలో పెద్ద చిత్రాలను కూడా నాలుగు వారాలకే ఓటీటీ రిలీజ్ అవడం మొదలు పెట్టారు.డిజిటల్ రైట్స్ కోసం ఓటీటీలు భారీ ధరలు చెల్లిస్తుండటంతో.. నిర్మాతలు కూడా సంతోషంగా ఆ డీల్స్ చేసుకుంటూ లాభసాటి వ్యాపారం చేసుకోవడం అలవాటు చేసుకున్నారు. అయితే ఓటీటీల వల్ల ఎంత లాభం ఉందో అంతే నష్టం కూడా ఉందనే విషయాన్ని నిర్మాతలు గుర్తించలేకపోయారని ఒక వాదన ఆలస్యంగా తెర పైకి వచ్చింది.

డిజిటల్ వేదికల హవా పెరగడంతో శాటిలైట్ రైట్స్ రేట్లు పడిపోవడమే కాదు.. మొత్తం థియేటర్ వ్యవస్థపై ప్రభావం చూపే పరిస్థితి ఏర్పడింది అనే మాటలో నిజం లేకపోలేదు. ఒకప్పుడు థియేటర్లలో విడుదలైన సినిమాలు కనీసం ఆరు వారాలు లేదా యాభై రోజులకు గానీ ఓటీటీలోకి వచ్చేవి కావు. కానీ ఇప్పుడు పెద్ద సినిమాలు కూడా మూడు వారాలకే డిజిటల్ వేదికల మీదకు వస్తున్నాయి. దీంతో ఓటీటీలకు అలవాటు పడిపోయిన జనాలు.. ఎలాగూ కొన్ని రోజులు పోతే సినిమాలు ఓటీటీలో వస్తున్నాయి కదా అన్న ఆలోచనతో థియేటర్లకు వెళ్లడం తగ్గించేశారు.

ఇలా సినిమా హాళ్లకు వచ్చే ప్రేక్షకుల సంఖ్య క్రమ క్రమంగా తగ్గిపోతుండటంతో తెలుగు నిర్మాతల మండలి ఇటీవలే కొత్త నిర్ణయాన్ని తీసుకుంది. పెద్ద సినిమాలు ఎనిమిది వారాల తరువాతే ఓటీటీ లో విడుదల కావాలని అలాగే చిన్న సినిమాలు అయితే ఆరు వారాల తరువాత విడుదల చేయాలని నిర్ణయించారు.ఆ నిర్ణయం పట్ల ఒక వర్గం నిర్మాతలు అసంతృప్తి తో ఉన్నారు అని తెలియ వచ్చింది.

సినిమా ఫ్లాప్ అయినప్పుడు తొందరగా ఓటీటీలో విడుదల చేసుకునే వెసులుబాటు దూరం అయినందున ఆదాయం వచ్చే అవకాశం పోయిందన్న ఆలోచనలో సదరు నిర్మాతలు ఉన్నట్టు తెలుస్తుంది. అందుకే కొత్త నిభందనలు వర్టించకుండా నేరుగా ఓటీటీ లోనే తమ సినిమాలు విడుదల చేయాలని నిర్ణయించారట.

వివాదాస్పద వ్యాఖ్యల కేసులో ప్రముఖ సినీ నటి సాయి పల్లవి దాఖలు చేసిన పిటిషన్‌ ను తెలంగాణ హైకోర్టు కొట్టి వేసింది. కాశ్మీర్‌ ఫైల్స్‌ సినిమాతో పాటు గోరక్షకుల పై సాయిపల్లవి వివాదాస్పద వ్యాఖ్యలు చేసినందుకు గానూ హైదరాబాద్‌ సుల్తాన్‌ బజార్‌ పోలీసులకు భజరంగ్‌దళ్‌ నాయకులు ఇటీవల ఫిర్యాదు చేసిన విషయం తెలిసిందే.అయితే భజరంగ్‌దళ్‌ నాయకుల ఫిర్యాదు పై న్యాయ సలహా తీసుకొని కేసు నమోదు చేసిన పోలీసులు సాయిపల్లవికి గత నెల 21న నోటీసులు జారీ చేశారు. ఈ నేపథ్యంలో ఆ నోటీసులు రద్దు చేయాలని కోరుతూ సాయి తెలంగాణ హైకోర్టును ఆశ్రయించారు. సాయి పల్లవి అభ్యర్థనను తోసిపుచ్చిన హైకోర్టు ఆమె పిటిషన్‌ను కొట్టివేసింది.

వేణు ఉడుగుల దర్శకత్వం వహించి.. రానా దగ్గుబాటి హీరోగా, సాయిపల్లవి హీరోయిన్‌గా నటించిన విరాట పర్వం సినిమా జూన్ 17న విడుదలైంది. అంతకుముందు ఈ సినిమా ప్రచారంలో భాగంగా ఇంటర్వ్యూలు ఇచ్చిన సాయిపల్లవి ఆ క్రమంలోనే జరిగిన ఒక ఇంటర్వ్యూలో వివాదాస్పద వ్యాఖ్యలు చేశారు. గోరక్షకులను కాశ్మీర్‌లో ఉగ్రవాదులతో పోల్చుతారా? అంటూ భజరంగ్ దళ్ నేతలు సాయిపల్లవిపై మండిపడుతున్నారు. అసలు ఆమెకు ఏమైనా జ్ఞానం ఉందా? అని ప్రశ్నిస్తున్నారు.

ఎవరిది తప్పు, ఎవరిది ఒప్పు అని చెప్పలేం.. కొన్ని రోజులముందు కూడా ది కాశ్మీర్ ఫైల్స్ అనే సినిమా వచ్చింది కదా.. ఆ టైమ్‌లో ఉన్న కాశ్మీరీ పండిట్లను ఎలా చంపారో చూపించారు కదా.. ? మనం మత ఘర్షణలా చూస్తే.. ఇటీవల ఒక బండిలో ఎవరో ఆవులను తీసుకెళ్తున్నారు. ఆ బండిని నడుపుతున్న వ్యక్తి ముస్లిం కాబట్టి, అతను ఆ ఆవులను చంపడానికి తీసుకు వెళ్తున్నాడు అనే అనుమానంతో అతనిని కొట్టి జై శ్రీరామ్ అన్నారు. అప్పుడు జరిగిన దానికి ఇప్పుడు జరిగినదానికి తేడా ఎక్కడవుంది.? మతాలు కాదు మనం మంచి వ్యక్తిగా ఉండటం ముఖ్యం అని, ఇతరులను బాధించకూడదని.. లెఫ్టిస్ట్ అయినా రైటిస్ట్ అయినా మనం మంచిగా ఉండకపోతే న్యాయం ఎక్కడా ఉండదు. అందుకే నేను సాధ్యమైనంత వరకూ న్యూట్రల్‌గా ఉంటాను.. అంటూ సాయిపల్లవి సదరు ఇంటర్య్వూలో చెప్పుకొచ్చారు.

ఆ తర్వాత ఈ వ్యాఖ్యలు సోషల్ మీడియాలో దుమారం రేపాయి. ఈ క్రమంలోనే భజరంగ్ దళ్ నాయకులు కాశ్మీర్ ఫైల్స్ సినిమాతోపాటు గోరక్షకులపై సాయిపల్లవి వివాదాస్పద వ్యాఖ్యలు చేశారని, గోరక్షకులను కాశ్మీర్ ఉగ్రవాదులతో పోల్చారని ఆరోపిస్తూ పోలీసులకు ఫిర్యాదు చేశారు. ఈ మేరకు కేసు నమోదు చేశారు పోలీసులు.

ఎన్టీఆర్-కొరటాల శివ కాంబినేషన్ లో రెండవ సినిమా ప్రకటించి చాలా రోజులయింది. కానీ ఇప్పటివరకు ఈ సినిమా సెట్స్ పైకి రాలేదు. లెక్క ప్రకారం మే లేదా జూన్ నెలలో అయినా ఈ సినిమా సెట్స్ పైకి రావలసింది. కానీ జూలై నెల వచ్చేసినా ఇంకా సినిమా గురించి ఎలాంటి సమాచారం లేదు. దీనికి కారణం కొరటాల ఇంకా పూర్తిగా సిద్ధం కాకపోవడమే అంటున్నాయి ఇండస్ట్రీ వర్గాలు.

ఆచార్య డిజాస్టర్ దెబ్బతో కొరటాల ఇప్పుడు ఎన్టీఆర్ తో చేస్తున్న సినిమాకి సంభందించిన కథ పై మరింత జాగ్రత్తగా వ్యవహరిస్తున్నారు. ఈసారి కచ్చితంగా హిట్ కొట్టాల్సిన పరిస్థితి కాబట్టి ఎన్టీఆర్ కోసం అనుకున్న స్క్రిప్ట్ కు మార్పుచేర్పులు చేస్తూ తుది మెరుగులు దిద్దుతున్నారట.అయితే కేవలం స్క్రిప్ట్ వర్క్ మాత్రమే ఈ సినిమా ఆలస్యానికి కారణం కాదని, ఆచార్య సినిమా వల్ల నష్టపోయిన డిస్ట్రిబ్యూటర్ లతో కొరటాలకు ఇంకా లావాదేవిలు జరగాల్సి ఉందని వార్తలు వినిపిస్తున్నాయి.

అయితే ఆచార్య సినిమా విడుదలై దాదాపు మూడు నెలలు కావస్తుంది. ఇప్పటికీ ఆ సినిమా తాలూకు ఆర్థిక ఇబ్బందులు కొనసాగుతున్నాయి అంటే నమ్మశక్యంగా లేదని మరొక వాదన వినిపిస్తుంది. ఇక ఇలా రకరకాల పుకార్ల మధ్య వీలయినంత త్వరగా సినిమా మొదలు పెట్టడానికి కొరటాల సన్నద్ధం అవుతున్నారు.

అటు ఎన్టీఆర్ కు కూడా కాస్త టైమ్ కావాలి. ఎందుకంటే, ఆర్ ఆర్ ఆర్ రిలీజ్ తర్వాత ఎన్టీఆర్ కాస్త లావెక్కారు. కొరటాల సినిమా కోసం సరైన లుక్ కోసం కనీసం రెండు నెలల సమయం పడుతుంది. ఈ చిన్న చిన్న ఇబ్బందులు అన్నీ. తొలగి తొందరలోనే ఈ హిట్ కాంబినేషన్ మరో బ్లాక్ బస్టర్ సొంతం చేసుకోవాలని కోరుకుందాం.