భారత దేశ హోమ్ మినిస్టర్ అమిత్ షాతో తెలుగు సినీ నటుడు/హీరో జూనియర్ ఎన్టీఆర్ నిన్న సమావేశం అయిన సంగతి తెలిసిందే. అయితే ఈ భేటీ పలు పుకార్లకు దారి తీసింది. ఎన్టీఆర్ ను అమిత్ షా కలవడం కేవలం మర్యాదపూర్వక చర్య మాత్రమేనని అని పరిశ్రమలోని ఒక వర్గం అంటుండగా, మరి కొందరు మాత్రం ఈ విషయం పైకి కనిపించేంత సాధారణ విషయం కాదని, ఏదో గుడార్థం దాగి ఉందని వ్యాఖ్యానిస్తున్నారు.

విశ్వసనీయ వర్గాల సమాచారం ప్రకారం, రజాకార్ల ఉద్యమాన్ని వీరోచితంగా చూపిస్తూ రజాకార్ ఫైళ్లపై సినిమా చేయడానికి బిజెపి గత కొన్ని రోజులుగా ప్రయత్నిస్తోందట. ప్రముఖ రచయిత విజయేంద్ర ప్రసాద్ ఈ స్క్రిప్ట్‌ ను సిద్ధం చేసే అవకాశం ఉందని కూడా తెలుస్తోంది. బిజెపి పార్టీ సంభందిత వర్గాల ప్రకారం.. ఈ సినిమాలో నటించమని ఎన్టీఆర్‌ని బీజేపీ అభ్యర్థించినట్లుగా సమాచారం. ఈ చిత్రం ఇతివృత్తం హిందూ మతానికి సంబంధించినది, ఇది బిజెపి పార్టీ ప్రధాన సందేశాన్ని మరింత బలంగా ప్రజల్లోకి, ముఖ్యంగా తెలుగు రాష్ట్రాల ప్రజలు తమ ఉనికిని గుర్తించడంలో.. సినిమా ద్వారా తమ ఉద్దేశ్యాలు చేరుకునేందుకు సహాయపడుతుంది.

ఆర్ ఆర్ ఆర్ సినిమాలో జూనియర్ ఎన్టీఆర్ అద్భుతమైన నటనను ప్రపంచ వ్యాప్తంగా సినీ ప్రేమికులు ఎంతగానో మెచ్చుకున్నారు. అంతే కాకుండా కేంద్రంలో అధికార పార్టీ అయిన బీజేపీ ఈ పాపులారిటీని ఉపయోగించుకోవాలని భావిస్తున్నట్లు తెలుస్తోంది. మరి నిజంగా ఈ సినిమా కార్యరూపం దాల్చితే గనక ఖచ్చితంగా భారీ స్థాయిలో రూపొందే సినిమా అవుతుందనడంలో ఎలాంటి సందేహం లేదు.

ఇదిలా ఉండగా, ఎన్టీఆర్ తన తదుపరి చిత్రంగా దర్శకుడు కొరటాల శివతో కలిసి పని చేయనున్నారు. వీరివురూ ఇది వరకు కలిసి పని చేసిన జనతా గారేజ్ సూపర్ హిట్ సినిమాగా నిలిచింది. కాగా ఎన్టీఆర్ 30వ సినిమాని ప్యాన్ ఇండియా స్థాయిలో భారీగా తెరకెక్కించనున్నారు. ఎన్టీఆర్ ఆర్ట్స్‌తో పాటు హారిక & హాసిని క్రియేషన్స్‌ బ్యానర్ల పై ఈ చిత్రం నిర్మించబడుతుంది. ఇటీవల ఎన్టీఆర్ పుట్టినరోజు సందర్భంగా చిత్ర బృందం విడుదల చేసిన మోషన్ పోస్టర్‌ అభిమానులతో పాటు ఇతర ప్రేక్షకుల ప్రశంసలు అందుకుని సోషల్ మీడియాలో వైరల్ అయింది.

యువ హీరో నిఖిల్ నటించిన కార్తికేయ 2 సినిమా అందరి అంచనాలకు మించి అద్భుతంగా ప్రదర్శనను కొనసాగిస్తుంది. బాక్స్ ఆఫీస్ వద్ద ఒకదాని తర్వాత మరో మైలురాయిని దాటుతూ దూసుకు పోతుంది. ఈ సినిమా తెలుగు రాష్ట్రాల్లోనే కాకుండా హిందీ మార్కెట్‌లోనూ భారీ విజయాన్ని అందుకుంది. కార్తికేయ 2 హిందీ మార్కెట్‌లో మొదటి రోజు చాలా తక్కువ స్క్రీన్‌లలో ప్రదర్శించబడింది . కానీ ప్రేక్షకుల నుండి అద్భుతమైన మౌత్ టాక్‌తో, సినిమాను ఎక్కువ మంది చూడాలి అనే డిమాండ్ పెరగడంతో రోజు రోజుకూ స్క్రీన్‌ల సంఖ్య పెరుగుతూ వచ్చింది.

యాక్షన్‌-అడ్వెంచర్‌ నేపథ్యంలో శ్రీకృష్ణుడి కాలం నాటి ఇతివృత్తం ఆధారంగా తెరకెక్కిన ఈ చిత్రం తొలి వారం హిందీ మార్కెట్లో 5.75 కోట్ల నెట్ వసూలు చేసింది. కాగా మొదటి వారాంతంలో 9.57 కోట్ల రూపాయల భారీ వసూళ్లు రాబట్టింది. ఇక తొమ్మిదవ రోజు సినిమా ఏకంగా 4.07 కోట్ల రూపాయలను తెచ్చిపెట్టింది. మొత్తంగా చూసుకుంటే ఇప్పటివరకు హిందీలో కార్తీకేయ 2 15 కోట్ల నెట్ ను రాబట్టింది.

కలెక్షన్లు ఇలా ఎక్కడా తగ్గకుండా బాక్స్ ఆఫీస్ వద్ద స్టడీగా ఉన్నాయి. అంతే కాకుండా రెండవ వారాంతంలో మొదటి వారం కంటే రెట్టింపు కలెక్షన్లు రావడం విశేషం. ఇది అత్యంత అరుదైన రికార్డు గా చెప్పుకోవచ్చు. 2014 లో వచ్చిన కార్తీకేయ చిత్రానికి సీక్వెల్ అయిన కార్తికేయ 2 లో నిఖిల్ ప్రధాన పాత్రలో నటించగా.. అనుపమ పరమేశ్వరన్, శ్రీనివాస్ రెడ్డి మరియు అనుపమ్ ఖేర్ కూడా కీలక పాత్రల్లో నటించారు.

నిఖిల్ నటనతో పాటు, చందూ మొండేటి దర్శకత్వ ప్రతిభ , ఆసక్తికరమైన కథనంతో పాటు కాల భైరవ అద్భుతమైన నేపథ్య సంగీతం మరియు ఆహ్లాదకరమైన విజువల్స్ ఈ సినిమాకు ప్రధాన ఆకర్షణగా నిలిచాయి. విడుదల ముందు చిత్ర బృందం అనేక ఇబ్బందులను ఎదురుకున్నా.. చివరికి ఫలితం మాత్రం వారికి ఎంతో ఆనందాన్ని ఇస్తుంది అనడంలో ఎలాంటి సందేహం లేదు.

అల్లు అర్జున్ పుష్ప ది రూల్ త్వరలోనే సెట్స్‌పైకి వెళ్లడానికి సిద్ధంగా ఉంది. నిన్ననే ఈ సినిమా పూజా కార్యక్రమాలు జరుపుకున్న విషయం తెలిసిందే. ఈ ప్రాజెక్ట్ పై అందరిలోనూ భారీ అంచనాలు నెలకొన్నాయి. అల్లు అర్జున్ పుష్పరాజ్ పాత్రలో మరోసారి అలరించనున్న ఈ చిత్రం ప్రధానంగా పుష్ప vs షేకావత్ మధ్య యుద్ధం లా ఉండబోతుంది. షేకావత్ పాత్రలో ఫహద్ ఫాసిల్‌ మొదటి భాగంలో కొంత సేపే ఉన్నప్పటికీ రెండో భాగంలో మాత్రం ఆయన పాత్ర పుష్ప తో పోటీ పడుతుందట. అల్లు అర్జున్ – ఫహద్ ఫాసిల్‌ ల మధ్య అటు సినిమాలో పాత్రధారులుగా ఇటు నటులుగా అద్భుతమైన పోటీని మనం చూడబోతున్నాం అన్నమాట.

ఆసక్తికరమైన విషయం ఏమిటంటే, పుష్ప: ది రూల్ సినిమాకు ఇప్పుడు సుకుమార్ కేవలం దర్శకుడి గానే కాకుండా నిర్మాతగానూ వ్యవహరిస్తున్నారట. ఆయన సొంత బ్యానర్ సుకుమార్ రైటింగ్స్‌తో కలిసి ఈ చిత్రం నిర్మించబడుతుంది. పుష్ప ది రైజ్ చిత్రానికి మైత్రి మూవీ మేకర్స్ తో పాటు ముత్తంశెట్టి మీడియా సహ నిర్మాతలుగా చేరారు. భారీ బడ్జెట్‌తో రూపొందనున్న పుష్ప ది రూల్ కు ఇప్పుడు ముతంశెట్టి మీడియా స్థానంలో సుకుమార్ రైటింగ్స్‌ ప్రవేశించింది.

అత్యంత భారీ క్రేజ్ ను ఏర్పరచుకున్న ఈ చిత్రాన్ని ఏదో ఆషామాషిగా తీయడానికి సుకుమార్ ఏ మాత్రం తొందరపడటం లేదు. సినిమాకు సంబందించిన ప్రతి అంశాన్నీ క్షుణ్ణంగా పరిశీలించి అన్నిటితో సంతృప్తి చెందిన తర్వాత మాత్రం షూటింగ్ ప్రారంభించాలనుకుంటున్నారట. అందుకే చాలా విరామం తీసుకుని ఆగస్ట్‌లో ఈ సినిమా షూటింగ్ ప్రారంభించాలని నిర్ణయించుకున్నారని సమాచారం.

ఇక సినిమా కథాంశం విషయానికి వస్తే, టైటిల్ సూచించినట్లుగా, ఈ చిత్రం పుష్ప ఎదుగుదలను అద్భుతంగా ప్రదర్శించనుందని తెలుస్తోంది. పైగా ఈ చిత్రంలో కేవలం చిత్తూరు, తమిళనాడు కాకుండా ఏకంగా అంతర్జాతీయ నేపథ్యంలో తెరెక్కనుందట. అంటే హీరోగా అల్లు అర్జున్ ఉన్న క్రేజ్ కు తగ్గట్టే పుష్ప ది రూల్ లో పుష్పరాజ్ కు ఎందరో విరోధులు ఉంటారట. అలా పుష్పరాజ్ పాత్ర ఎన్నో సవాళ్ళను ఎదుర్కొనే విధంగా సినిమా ఉంటుందట. ముందుగా చెప్పుకున్నట్లు పుష్ప 2 లో ఫహద్ ఫాసిల్ ఈసారి బలమైన పాత్రను కలిగి ఉంటారని సమాచారం. అంతే కాకుండా ఆయన పాత్ర చిత్రణ అందరినీ ఆశ్చర్యపరుస్తుందని, ఖచ్చితంగా అద్భుతంగా ఉంటుందని అంటున్నారు.

పుష్ప ది రైజ్ బాక్స్ ఆఫీస్ వద్ద సూపర్ హిట్‌గా నిలిచిన సంగతి తెలిసిందే. ఈ చిత్రం తాలూకు థియేట్రికల్ రైట్స్ ₹145.5 కోట్లకి జరుపుకుంది. ఇక తన మొత్తం రన్ అయ్యాక వ్యాపారంలో 120% రికవరీ చేసింది. తెలుగు రాష్ట్రాల్లో ఈ సినిమా ఆశించిన స్థాయిలో ఆడకపోయినా, ఇతర భాషల్లో చక్కని రన్ తెచ్చుకుంది. ముఖ్యంగా హిందీలో ఎవరూ ఊహించని విధంగా విజయం సాధించి ఓవరాల్ గా సినిమా సూపర్ హిట్ అయింది. మరి పుష్ప 2 ఏ స్థాయిలో ఆడుతుందో ఎన్ని రికార్డులను సొంతం చేసుకుంటుందో చూడాలి.

మెగాస్టార్ చిరంజీవి పుట్టినరోజు సందర్భంగా, ఆయన నటించిన బ్లాక్ బస్టర్ చిత్రం ‘ఘరానా మొగుడు’ సినిమాను మెగా అభిమానులు అనేక ప్రదేశాలలో ప్రత్యేక ప్రదర్శనలను ఏర్పాటు చేశారు. అయితే ఆశ్చర్యకరమైన విషయం ఏంటంటే ఈ షోలకు స్పందన అనుకున్నంత భారీగా లేకపోవడమే.

టాలీవుడ్‌లో ఇటీవల రీ రిలీజ్ ల వర్షం కురుస్తోంది. తాజాగా సూపర్‌స్టార్ మహేష్ బాబు నటించిన పోకిరి చిత్రాన్ని మహేష్ అభిమానులు భారీ స్థాయిలో ప్రత్యేక ప్రదర్శనలను ఒక పండగలా జరుపుకున్నారు. అంతే కాక వారి విశేష స్థాయి సంబరాలు అందరి దృష్టినీ ఆకర్షించాయి. ఇక మహేష్ అభిమానుల సంబరాలు చూసి పవర్ స్టార్ అభిమానులు సెప్టెంబర్ 2న పవన్ కళ్యాణ్ పుట్టినరోజు సందర్భంగా జల్సా సినిమాను ప్రత్యేకంగా ప్రదర్శించే ఏర్పాట్లు చేస్తున్నారు. మరి మెగాస్టార్ చిరంజీవి అభిమానులు కూడా ఘరానా మొగుడు సినిమాని ప్రదర్శించడానికి పూనుకున్నారు.

అప్పట్లో ఇండస్ట్రీ హిట్ అయిన ఈ సినిమాకు మెగా ఫ్యాన్స్ స్పెషల్ షోస్ ప్లాన్ చేశారు. అయితే ఇవి పోకిరి లాగా విస్తృత స్థాయిలో అత్యధిక షోలు కాకుండా పరిమితంగానే ఏర్పాటు చేశారు. అయినప్పటికీ, చాలా షోలు అమ్ముడవ్వకపోవడం లేదా హౌస్‌ఫుల్ కావడం కొంత మంది మెగా అభిమానులను నిరుత్సాహపరిచింది.

అయితే ఇక్కడ మెగా అభిమానులు బాధ పడాల్సిన అవసరం లేదు. 1992లో విడుదలైన ఘరానా మొగుడు అప్పట్లో 10 కోట్ల రూపాయల భారీ వసూళ్లను సాధించిన తొలి టాలీవుడ్ చిత్రంగా నిలిచింది. అంతే కాకుండా చాలా కేంద్రాలలో 100 రోజులు విజయవంతంగా ప్రదర్శించబడింది. కాబట్టి ఘరానా మొగుడు సినిమా సాధించాల్సిన ఘనత 30 ఏళ్ళ క్రితమే సాధించింది. ఇప్పుడు ఏదో అభిమానులు తమ ఆనందం కోసం వేసుకున్న షోలు హౌజ్ ఫుల్ కాలేదని చింతించాల్సిన అవసరం లేదు.

కె రాఘవేంద్రరావు దర్శకత్వం వహించిన ఘరానా మొగుడు సినిమా అన్ని వర్గాల వారిని అలరించేలా కమర్షియల్ అంశాలతో తెరకెక్కిన సినిమా. ఈ చిత్రం మెగా అభిమానులకు ఎంతో ప్రత్యేకం అని చెప్పచ్చు. మెగాస్టార్ చిరంజీవి తనదైన శైలిలో కామెడీ, మాస్ డైలాగ్స్, ఫైట్స్, హీరోయిన్లతో రొమాన్స్ మరియు డాన్స్ ను కనబరిచి ఆకట్టుకున్నారు. అలాగే ఆయనకు ధీటుగా హీరోయిన్ గా నగ్మా కూడా తన పాత్రలో అద్భుతంగా నటించారు. ఇప్పటికీ ఎందరో మెగా అభిమానులతో పాటు ఇతర సాధారణ ప్రేక్షకులకు కూడా ఘరానా మొగుడు సినిమా అలరిస్తుంది.