తాజాగా సినీ ఇండస్ట్రీలో వినిపిస్తున్న సమాచారం ప్రకారం యంగ్ రెబల్ స్టార్ ప్రభాస్ తాను తదుపరి నటిస్తున్న ‘రాజా డీలక్స్’ సినిమాలో రెండు విభిన్న పాత్రల్లో కనిపించనున్నారని, అందులో ఒకటి వృద్ధుడి పాత్ర, మరొకటి యువకుడి పాత్ర అని తెలుస్తోంది. మారుతి దర్శకత్వం వహిస్తున్న ఈ చిత్రం హారర్ కామెడీగా తెరకెక్కుతోంది.
అంతర్గత వర్గాల నుంచి నుంచి అందుతున్న సమాచారం ప్రకారం ఈ సినిమా పీరియాడిక్ హారర్ కామెడీ జానర్ లో తెరకెక్కనుందని తెలుస్తోంది. చాలా కాలం తర్వాత ప్రభాస్ మరోసారి తన కామెడీ టైమింగ్ ను ప్రదర్శిస్తారని, ద్విపాత్రాభినయం చేస్తున్న ఈ చిత్రంలో ఆయన నటన ఆయన అభిమానులను, సినీ ప్రేమికులను ఎంతగానో అలరిస్తుందని అంటున్నారు.
కాగా ఈ చిత్ర ప్రధానాంశం ఒక తాత మరియు అతని మనవడి కథగా ఉండనుందట. లార్జర్ దాన్ లైఫ్ ఎలిమెంట్స్ ఎక్కువగా ఉన్న బాహుబలి సిరీస్, సాహో వంటి సినిమాలకు భిన్నంగా ప్రభాస్ తన కామెడీ టైమింగ్ ను ప్రదర్శించడానికి రాజా డీలక్స్ పుష్కలంగా అవకాశం ఇస్తుందని అంటున్నారు. తెలుగు సినీ పరిశ్రమ ప్రేక్షకులు ప్రభాస్ ను రెగ్యులర్ ఎంటర్ టైనర్స్ లో చూడటానికి చాలా ఆసక్తిగా ఉన్నారు. ఇప్పుడు ఈ వార్త వారిని ఉత్తేజపరుస్తుందనడంలో సందేహం లేదు.
ఈ కాంబినేషన్ తమ అభిమాన హీరో ఇమేజ్ కి సూట్ కాదని భావించిన ప్రభాస్ అభిమానులు మొదట మారుతితో ప్రభాస్ సినిమా ఎందుకు చేస్తున్నారో అని కంగారు పడ్డారు. అయితే ఈ సినిమా లీకైన పిక్స్ నుండి ప్రభాస్ ను న్యూ లుక్ లో చూసి వారు సంతోషించారు. కాగా ప్రభాస్ ను ఇంత బాగా చూపించినందుకు దర్శకుడు మారుతికి కృతజ్ఞతలు కూడా తెలిపారు.
నిధి అగర్వాల్, మాళవిక మోహనన్, రిద్ధి కుమార్ హీరోయిన్లుగా నటిస్తున్న ఈ చిత్రాన్ని పీపుల్ మీడియా ఫ్యాక్టరీ నిర్మిస్తుంది. ఇక ఈ సినిమా విడుదల తేదీని ఇంకా అధికారికంగా ప్రకటించలేదు.
