కోలీవుడ్ స్టార్ యాక్టర్ అజిత్ కుమార్ హీరోగా త్రిష హీరోయిన్ గా యువ దర్శకుడు అధిక్ రవిచంద్రన్ దర్శకత్వంలో తెరకెక్కిన లేటెస్ట్ మూవీ గుడ్ బ్యాడ్ అగ్లీ. ఈ మూవీకి జివి ప్రకాష్ కుమార్ సంగీతం అందించగా కీలక పాత్రల్లో ఎస్ జె సూర్య, సునీల్, షైన్ టామ్ చాకో, అర్జున్ దాస్ తదితరులు నటించారు.
తెలుగు అగ్ర నిర్మాణ సంస్థ మైత్రి మూవీ మేకర్స్ వారు నిర్మించిన ఈ మూవీకి అభినందన్ రామానుజం ఫోటోగ్రఫి అందించారు. ఇటీవల మంచి అంచనాలతో ఆడియన్స్ ముందుకి వచ్చిన ఈ మూవీ మిక్స్డ్ టాక్ సొంతం చేసుకుని ప్రస్తుతం బాక్సాఫీస్ వద్ద కొనసాగుతోంది. అయితే తమిళనాడులో మాత్రం గుడ్ బ్యాడ్ అగ్లీ మూవీకి మరింతగా కలెక్షన్స్ లభిస్తున్నాయి.
ఆ మూవీ టీమ్ హ్యాపీగా ఉన్న తరుణంలో లెజెండరీ సంగీత దర్శకుడు ఇళయరాజా వారికి పెద్ద షాక్ ఇచ్చారు. ఈ మూవీలో తన మూడు పాటలను ఉపయోగించినందుకు రూ. 5 కోట్ల రూపాయల పరిహారం డిమాండ్ చేస్తూ నిర్మాతలకు లీగల్ నోటీసులని ఆయన పంపించారు.
అనుమతి లేకుండా తన పాటలను ఉపయోగించినందుకు ఆ పాటలను వెంటనే తొలగించి 7 రోజుల్లోపు బేషరతుగా క్షమాపణ చెప్పాలని ఆయన వారిని కోరారు. మరోవైపు, మైత్రి వారు మాట్లాడుతూ, ఆయా మ్యూజిక్ కంపెనీల నుండి అవసరమైన అనుమతులు పొందామని, అయితే దీనికి సంగీత దర్శకుడు అంగీకరించలేదని చెబుతున్నారు. మరి ఈ ఘటన మున్ముందు ఏవిధంగా ముందుకు సాగుతుందో చూడాలి.
